VUAANA 10:28 - Northern Tepehuan Bible

²⁸ Dai aanï gamaakai gubukarhigai ïgai sai kïïgakïrï óídakana bïïxkïrï bïïtarï dai tomarhi ïmo imidagai mai koimu ïgai. Dai mai tipu xorai gin popoidagi ix makïdï nukada aanï.

Tepehuan Northern: Diuusi ñiooquidʌ utuducami oodamicʌdʌ

²⁸ Aanʌ cʌʌgacʌrʌ vuvaidi ʌgai vai tomastuigaco oidacana tʌvaagiʌrʌ. Maitiipu sioorʌ istutuidi isgiñvoopoidagi giñaaduñi vaavoitudadami.

VUAANA 10:28 Referans Kwoze

VUAANA 6:37

—Dïï gia oidaga jaa mui odami ix makïdï gin maa Diuxi gin Oga sai gin urabana dai ïgai gia kïïga gin buaboitudamu dai gin urabakamu dai aanï mai gajiadïrï biamu tomarhi ïmadutai ïgai.

Hebreos 7:25

Kaxkïdï bia ïgai gubukarhigai ix kïïgakïrï bubiadagi odami ix makïdï urapïkïdagi Diuxi buaboitudaitai ïgai Suxi Kristo. Bïïxkïrï bïïtarï daja Suxi tudu dai bïïxkïrï bïïtarï apia gadaanturhiada agai ïgai xorai urabagi.

Romanos 8:29

Diuxi ka ïkiaxdïrï maatïkatadai xorai aatïmï daidi ïr ïko bubaidadïka agai. Dai ïgai dáí sai aatïmï ïpïamaaxkana gï maara Suxi Kristo. Podukai Suxi Kristo bïïxi adaama ïr namïakami dai muidu aatïmï ix makïdï ïr susukurhidï.

VUAANA 18:9

Potïtïdai Suxi sai dagitona sai iimïna go mamaatïrdamigadï sai podukai ïpï duna ixdukatai Suxi aagiditadai Ogadï ïkioma aidïxi potïtïdai ïgai, —Diuxi gin Oga, mai dagito aanï ix kuga imiagi tomarhi ïmoko ix makïdï gin nukaturhi aapi— itïtïdai Suxi.

Filipenses 1:6

Diuxi ïgai dai gï aaga idui ïmo aaduindagai aapimïrï tudu. Dai kïïga buaboitudai aanï sai apia oijadami ïgai go aaduindagai aapimïrï asta xïxkadï ukami dibia Suxi Kristo ïpamu. Aidï gia kïïga naatorhikami bimu gobai.

1 Juan 2:25

Dai go urabaragai ïgai ïmadï gobai kaxi ïr go kïïgakïrï oidakaragai bïïxkïrï bïïtarï ix makïdï gïr aagidi Suxi Kristo sai gïr maaki agai.

VUAANA 4:14

Dïï mos go sudagi ix makïdï gaoidi aanï gokïdï gia ka mai tonokoñikana odami bïïxkïrï bïïtarï. Go sudagi ix makïdï gaoidi aanï ïr ïpïan dukami ïmo babiki ix makïdï odami ïrana mïraiña dai ïgaikïdï kïïgakïrï óídakana odami bïïxkïrï bïïtarï— itïtïdai Suxi.

Romanos 8:1

Aa gia ïr buaboi gobai ix makïdï gïn aagidi aanï. Kaxkïdï xibi ka mai tipu gïgïbidaragai odami bïïtarï ix makïdï bïïnakami bii Suxi Kristo.

Udaxi 1:24

Gïn aaduñi, mosïka arhi ïmaduga Diuxi dai ïgai bhai dui go kïïgakïrï bubaidaragai gïr bïïtarï Suxi Kristokïdï ix makïdï ïr Gïr Nukadakami. Kïïga ixtutuidikïi Diuxi ix gïn nukadakagi dai gïn soikïdagi sai mai dagitoagi aapimï gïn buaboidaraga sai podukai mai gïpiïrï surhigiagi aapimï. Dai kïï bhaiga ïgai sai bhai gïn buadagi saidi kïïga bhai ïrhiarakïdï gukakagi aapimï ami xako kabami totoarïi buitapi Diuxi. Kabami totoarïi Diuxi tudu mos ïï kïïga xigiamaaxkatai ïgai dai mos ïï kabami gubuakatai ïgai ïpï. Kïïga ixtutuidikïi ïgai ix bhai gïn duñagi sai mai biakagi aapimï toma lïïchi soimaaxkami gïn abhana dai bhodïrï baan gïn tutusamu ïgai ami buitapi ïgai ka kïïga bhai gïn dunakai ïgai.

VUAANA 17:2

Aapi gin Oga gin maa sïïrhikami an sai tïanïna bïïxi oidigi daama óídakami. Dai gin maa aapi sïïrhikami ïpï sai gin gubukarhigakïdï kïïgakïrï óídakana bïïxkïrï bïïtarï bïïxi go óídakami ix makïdï gin maa aapi.

VUAANA 5:24

—Kïïga abïr gïn tïgito kaïka idi ñoki. Daiñi, odami ix makïdï ïïgida kaïkagi gin ñoki dai buaboitudagi ïgai ix makïdï gin otoi ka bïïxkïrï bïïtarï oidaka agai. Diuxi ka mai maakimu ïgai gïgïbidaragai dai ka bubuaka abhiadïrï xako darakatadai ïgai, xako mos ïr ïï mukigami gï dukami tudu, dai ka baapa ïgai xako gia ïr kïïgakïrï oidakaragai— itïtïdai.

1 Juan 2:19

Go odami ix makïdï ïr buidïrï bïïtïkamigadï Suxi ix makïdï aagai aanï xibi ïgai gïr urapïkïiña ïkioma dïï gia gïr dagito ïgai dai ïkobai iji. Kaxkïdï gï maatï ix maiti ïr gïr aaduñi ïgai. Ix gïr aaduñikamudai ïgai kïïgakïrï aidï gia gïr urabakamudai ïgai kia. Podukai gïn mamaaxidi ïgai ix maiti ïr gïr aaduñi kïïgakïrï tudu gïr dagitokai ïgai.

1 Juan 5:11

Diuxi gïr aagidi sai gïr maakai ibhïdagai utudui sai kïïgakïrï óídakana aatïmï bïïxkïrï bïïtarï mos buaboitudakai aatïmï Maradï tudu.

Udaxi 1:21

Daiñi, Diuxi kïïga gïn oigïdai. Dai gï agai sai buaboitudada aapimï ix kïïga gïn oigïdai ïgai. Bïïx tasai abïr podukai óídaka aapimï, buaboitudatai sai Diuxi gïn oigïdai tudu. Dai kïïga buaboitudaitai abïr nïnïraka saidi Gïr Nukadakami Suxi Kristo gïn tïïgidana xïï kïï tuiga ïgai gïn bïïtarï. Gïn maakai ïgai go bïïxkïrï bïïtarï oidakaragai tudu mos ïï kïï tuigakatai ïgai gïn bïïtarï.

1 Pedro 1:5

Dai Diuxi gïn nukadai bïïxi gubukarhigadïkïdï kïïga buaboitudai aapimï kaxkïdï. Gïn nukadai ïgai asta xïïxkadï ka kïïgakïrï bubuakiagi aapimï tudu. Dai xïïxkadï karhioga ugiti agadagi oidigi aidï maaxitulda agai Diuxi ix maaxika agai go bhai ïrhiaragai ix makïdï gïn aji agai ka kïïgakïrï bubuakïkai aapimï.

VUAANA 11:25

Dai Suxi itïtïdai aidï, —Aanï ïgai ix makïdï duduakatudai koidadï di. Dai aanïkïdï kïïgakïrï óídaga óídakami ïpï. Odami ix makïdï gin buaboitudai, tomaxi koi ïgai bïïxkïrï kïïgakïrï duduaka agai.

Udaxi 1:1

Bhaiga gin aaduñi Diuxi amadïrï. Aanï ïr Udaxi dai gïn ojidi idi ojai. Sukurhidï aanï Santiago dai ïmo pioñigadï aanï Suxi Kristo. Gïn ojidi aanï aapimï ix makïdï ïr ïko bubaidadï Diuxi gïr Oga. Aapimï ïr ix makïdï kïïga gïn oigïdai dai gïn nukadai Diuxi. Gïn nukadai ïgai urabakatai aapimï Suxi Kristo tudu.

2 Tesalonicenses 2:13

Gïr susukurhi, kïïga gïn oigïdai Diuxi. Dai gïn aagida rïrhidi sai dudatai potïtïdaiña aatïmï Diuxi sai bhai gïr ïrhidi aapimïkïdï. Gï agai tudu ix podukai aagidagi aatïmï Diuxi kaxkïdï tudu aidï abhiadïrï xi gï aaga idui Diuxi go oidigi kaxi ïkobai gïn darai ïgai sai buaboitudaiña aapimï. Gïn darai ïgai sai ïïgi ïgai bïïtarïkana aapimï kïïga buaboitudaitai aapimï dai biakatai Diuxi Ibhïadï.

VUAANA 3:36

Dai bïïxkatai ix makïdï buaboitudagi Diuxi Maradï kïïgakïrï óídaka agai bïïxkïrï bïïtarï. Dïï gia xorai mai ïïgiadagi ïgai mai buaboitudaitai mai kïïgakïrï óídaka agai dai taata agai gïgïbidaragai Diuxiañdïrï bïïxkïrï bïïtarï bhaiyoma— itïtïdai Juan go mamaatïrdamigadï.

2 Timoteo 1:12

Dai xibi maixapi aanï ibuadatai go aaduindagai ix makïdï gin maa ïgai dïï mai xaïrai aanï gokïdï. Kaxkïdï tudu kïïga maatï aanï ix tuiga Suxi Kristo ix makïdï buaboitudai aanï dai gobai ïr ïmo abïnakidaragai gin ibhïdaga bïïtarï. Kïïga buaboitudai aanï tudu dai asta nukaturhi aanï gin ibhïdaga. Kaxkïdï tudu kïï maatï aanï sai ïgai bia gubukarhigai ix gin nukadakagi asta xïïxkadï dibiagi ïgai ïpamu.

Romanos 5:21

Ïkioma go soimaaxkami tïanïiña bïïxi óídakami gïr buapidakai gobai mukigami. Dïï gia xibi Diuxi gïr tïtïïgidi xïï kïï tuiga ïgai. Xibi Suxi Kristo Gïr Nukadakami bhai dui gïr bïïtarï sai Diuxi kïïgakïrï gïr nïijadana dai sai aatïmï kïïgakïrï óídakana bïïxkïrï bïïtarï ïpï.

1 Tomoteo 1:16

Maaxituda ïrhidi ix xïï kïï tuiga ïgai xi kaxkïdï maiti gin ojodai ïgai soimaaxi buadamikatai aanï dai bhaiyoma gin soi ansai buaboitudaiña dai kïïgakïrï busaiña. Podui ïgai sai gï maatïkana sai toma xorai bhaiga ix buaboitudagi dai kïïgakïrï busiagi bïïxkïrï bïïtarï tomax xïï soimaaxi buadamikagi ïgai.

Romanos 6:23

Go soimaaxkami maitïkidï ïr go ïï mukigami tudu. Dïï gia Diuxi gïr maakai ïmo oidaragai. Ïgai gïr maakai ïmo kïïgakïrï oidakaragai bïïxkïrï bïïtarï tudu bïïnakatai aatïmï Gïr Nukadakami Suxi Kristo.

Romanos 5:17

Go Adán soimaaxi dui ïïki kaxkïdï aidï abhiadïrï go mukigami apia kïïkigiña. Dïï go aaduindagai ix makïdï idui Suxi Kristo gïïpi bamioma gubuka xi bhai go soimaaxkami ix makïdï iduitadai Adán. Suxikïdï gïr maakai Diuxi ix dukatai kïïgakïrï gïr nïijadagi ïgai. Ïmo oidaragai dukai gïr maakai gobai gïr oigïdaitai. Dai kïïgakïrï nïijadamu Diuxi odami ix makïdï buaboidakai bhïiyagi óídaradï dai ïgai kïïgakïrï óídakamu Suxi Kristo gubukadadïkïdï.

Romanos 5:2

Buaboidakai aatïmï Suxi Kristo baa aatïmï ïmo gïdukami bhai ïrhiaragïrï ix makïdï gïr maa Diuxi gïr oigïdaitai. Dai xibi bhai ïrhiarakïdï nïnïraka xi urabagi aatïmï Diuxi xudu gï maaxitudagi ïgai xïïxi ïr gïïdukami.

Hechos 7:59

Kia maixaitadai go odami baidi go Tibañi daanïgi go Suxi daidi ikaiti, —Aapi Suxi gin Nukadakami, bhïkañi gin ibhïdaga— ikaiti.

VUAANA 6:47

—Kïïga abïr gïn tïgito kaïka idi ñoki. Daiñi, bïïxkatai ix makïdï gin buaboitudai kïïgakïrï óídaka agai bïïxkïrï bïïtarï

VUAANA 6:27

—Kïïga abïr gïn tïgito dai abïr mai gaagada mosïkaxi go kuadagai ix makïdï xia gï buayi. Bhaiyoma abïr gaagada go kuadagai ix makïdï bïïxkïrï bïïtarï óídakana odami ugakai. Daiñi, aanï ïr ix makïdï kïïgakïrï odami busai dai ka aagai Diuxi sai gin maa sïïrhikami kïïgakïrï gin nïiditai. Gin maa ïgai sïïrhikami ansai gïn maakana go pan ix makïdï bïïxkïrï bïïtarï óídakana odami ugakai— itïtïdai.

Romanos 5:9

Suxi Kristo aaxi ïradï gïr bïïtarï kaxkïdï xibi Diuxi kïïgakïrï gïr nïidi. Dai xi Diuxi kïïgakïrï gïr nïidi aidï gia ka maiti gïr ayimu gïgïbidaragai.

VUAANA 6:68

Daidi Piduru itïtïdai, —Gïr Nukadakami, ¿Borai ïmai urabana aatïmï? Aapi ïgai dai bia go ñoki ixtukïdï kïïgakïrï óídakana aatïmï bïïxkïrï bïïtarï di— itïtïdai.

Lukas 23:46

Dai gïgïr iiña go Suxi dai gokiïrï potïtïdai ïgai Diuxi, Gin Oga, itïtïdai. Gï nukaturhi aanï gin ibhïdaga, itïtïdai. Mos potïi ïgai dai muu.

Markos 13:22

—Dai dadimu jaa ïpï daidi tïimu saidi ïr Diuxi otosadï daidi ïr gïn bhaitï kïakamiga. Dai jaa tïimu saidi ïr aituldadami Diuxi ñokidï odami buitapi ïpï. Naana maaxi iduñimu ïgai ix makïdï odami ïïgi xadïrï ixtuidana dai podukai maaxituda agai xïï gupuka ïgai. Podukai buirumada agai mui odami. Dai asta go ix makïdï Diuxi ïko bubaitu katoma buaboituda agai ïpï dïï ïgai gia xadïrï gïn buirumadana go yaatabogami.

VUAANA 10:29

Gin Oga ïgai dai gin maa ix makïdï ïr gin sosoiga gïn dukami tudu. Ïgai kïïga nunukadai gin sosoiga dai ïgai bamioma ïr gubuakami ix bhai toma xorai. Kaxkïdï mai tipu xorai gin popoidagi gin sosoiga.

1 Juan 1:2

Ïgai tudu gïr maakai go utudui oidakaragai bïïxkïrï bïïtarï. Biatu ïgai tukugai dai gï maaxitu gïr buitapi tami oidigi daama. Kïïga nïidi aatïmï tudu dai kaxkïdï gïn aagidimi aatïmï xibi sai ïgai duduakatudai odami iibhïadï sai mai kona ïgai tomarhi ïmo imidagai. Ïmadï dakatadai ïgai Diuxi gïr oga ïïki abhiadïrï dai xibiapioma dibia ïgai tami idi oidigi daama gïr bïïtarï.