Romanos 6:3 - Northern Tepehuan Bible

³ ¿Maiti mïx maatï aapimï sai buaboidakai aatïmï ka bïïnaga bipiïyi aatïmï Suxi Kristo? Daiñi, aatïmï koi ïgai ïmadï aidïxi ïgai muu. Biïna bii aatïmï ïgai kaxkïdï.

Romanos 6:3 Referans Kwoze

Galatas 3:27

Aidïxi buaboitu aatïmï Suxi Kristo uraba bii aatïmï ïgai tudu dai ka ïmo odami dukai bii aatïmï ïgai ïmadï.

Romanos 6:8

Dai aatïmï koi Kristo ïmadï. Kaxkïdï kïïga buaboitudai aatïmï sai óídakamu aatïmï ïgai ïmadï ïpï.

1 Korintios 12:13

Aidïxi uraba gïr darai Diuxi Ibhïadï go buaboitudadami amaxi ïmo aadunumï bii aatïmï tudu tomaxi ïr judidiukagi aatïmï ix maiti ïr judidiukagi ïpï. Ïmo aadunumï bii aatïmï ix ïr soigaxikami dukai pipioñi aatïmï ix maiti ïr pipioñi ïpï. Tomax dukai bïïxkatai aatïmï bia Diuxi Ibhïadï dai kaxkïdï ïr ïmo aadunumï aatïmï.

1 Pedro 3:21

Kaxi gï duakaturhi Suxi Kristo ïpamu tudu dai kaxkïdï bia aatïmï kïïgakïrï bubaidaragai. Daiñi, aidïxi sudagiïrï dupi oidigi dai kïïgakïrï bubuaka go Noé ïmadï aaduñdï go barkoïrï iimïitai ïgai, gobai ïr ïmo maaxidaragai dukai gïr kïïgakïrï bubaidaraga bïïtarï ix makïdï bia aatïmï xibi. Aatïmï kïïgakïrï bubuakïi xibi buabotudakai aatïmï sai gï duakatu Suxi Kristo ïpamu tudu dai gïr bakuanai aatïmï sudagikïdï. Sudaïrï daibusai go Noé ïïki tudu dai xibi aatïmï ïpï sudaïrï dïgabuskïi gïr bakuanaitai aatïmï. Dai maiti gï agai sai po gïn ïrhiada aapimï sai go bakuanaragai ix makïdï ibuayi aatïmï mosïkaxi ïr ïmo buanaragai gïr tukuga bïïtarï. Gobai ïr ïmo xadutudaragai bhaiyoma ix makïdï ibuayi aatïmï Diuxi bïïtarï, ka maatïkatai aatïmï sai Suxi Kristo ka bhai dui gïr bïïtarï dai ka mai tipu soimaaxkami gïr abhana.

Hechos 2:38

Dai go Piduru potïtïdai aidï, —Gï agai sai ïma dukai gïn tïtïgitoda aapimï bïïxkatai dai gï agai xi gïn bapakonada sïïrhikamigadïkïdï Suxi Kristo sai oigïlda gïn nïijadana Diuxi— itïtïdai. —Aidï gia Diuxi otosamu Ibhïadï sai gïn ïmadï daakana— itïtïdai.

Mataibo 28:19

Iimibïrai bïïxi oidigi daama tudu daidi abïr tïïgida gin ñoki bïïxi go naana maaxi ñokadami ix makïdï oidaga oidigi daama. Podukai abïr soikïda saidi ïr gin mamaatïrdamigakagi ïgai. Daidi bapakonadabïrai ïpï sai podukai maaxitudana ïgai saidi ïr oijadami ïgai Diuxi gin Oga dai saidi ïr aanï gin oijadamiga ïpï Maradïkatai aanï Diuxi. Dai go bapakonaragai ïr ïmo maaxidaragaika agai saidi ïr oijadami ïgai Diuxi Ibhïadï ïpï.

Santiago 4:4

Daiñi, Diuxi bïïtarï ïpïan dukami aapimï ïmo oki ix makïdï oidiña ïmai kïïrhi tomaxi maiti ïr kunadï. Oidiña aapimï go tami oidigi daama óídakami tïgibudadï soimaaxkïdï tudu. Pobuayi aapimï gaagaitai gïn bhai ïrhiaraga ixtumaxiïrï oidaga tami oidigi daama. Bamioma ïïmadai aapimï go soimaaxi tïgibudagai ix makïdï oidaga tami idi oidigi daama tudu dai mai ïïmadai aapimï Diuxi. Gï agai sai maatïkagi aapimï tudu sai odami ix makïdï adaimïi pomaaxkami tïgibudagai ïr buidïrï bïïtïkami Diuxi.

1 Korintios 9:13

Daiñi, kïïga maatï aapimï sai go aatabuadami ix makïdï go gïï kiupiana aatabuayi kuadana daxdaragaiñdïrï ix makïdï odami buapaiña ami kiupiana. Dai ïïmoko ix makïdï go daxdakaruïrï aatabuadana asta kuadana lïïlïchi go daxdaragai ix makïdï daxdakaruïrï dadasaiña ïgai.

Romanos 7:1

Gin susukurhi, aapimï kïï maatï ix dukatai aatabuayi go sïïrhikami. Kïï maatï aapimï sai go sïïrhikami mosïkaxi odami duduakakami bïïtarï tïanïi dai go koidadï bïïtarï gia cho.

Romanos 6:16

Daiñi, kïï maatï aapimï sai xudu ïmoko biaka ïrhiadagi gï amu, ïgai biakamu ix ïïgiadagi amudï tomax dukai. Dai po maaxi xibi gïn bïïtarï ïpï. Kïï bhaiga aapimï xibi xi gïn tïïgidagi xi go soimaaxkami gïn amukagi ïïgiditai aapimï go soimaaxkami. Dïï gia go soimaaxkami go ïï mukigami buapai. Dïï gia xi gïn tïïgidagi aapimï Diuxi xi ïr gïn amukagi ïgai ïïgiditai aapimï aidï gia ïgai kïïgakïrï gïn nïijadamu.

Hechos 19:5

Dai gïn bapakoi ïgai mos kaïkai aatagidï Pabora dai podukai mamaaxidi ix ka buaboitu ïgai Suxi Kristo.

1 Korintios 6:9

Gï aagai ix kïï sïïrhi gïn tïgitokagi aapimï maatïkatai sai soimaaxi buadami mai biaka agai oigaragai ix Diuxi tïanïdagi. Daiñi, odami ix makïdï aipakoga boopoiña jaa ïmadï mai biaka agai oigaragai ix Diuxi tïanïdagi. Dai podukai ïpï ix makïdï buaboitudai uubixi, dai ix makïdï abhana boyiña oñigadï ïmai, dai ix makïdï ïïgi gïn ïmadï boopoiña kïkïïrhi dai oki ïpï,

1 Korintios 5:6

Maiti gï agaitadai ix gïgïrdukïdï gïn ïrhiadagi dai pokaitadagi ix kïïga ibuayi aapimï tudu kia gïn urabakatai go soimaaxi buadami. Tadu daibusai aapimïkïdï ixdukai ibuayi go kopodakarui. Daiñi, ix dukai lïïchi kopodakaruikïdï ka bïï sudakami kopodarïi ïmo tui dai mai xu mosïkaxi laalachi kopodarïi gobai podukai ïpï ibuayi go soimaaxi saagida buaboitudadami. Ïmo soimaaxi buadami bïïxi sarabiadan buayi bïïxi go gaa buaboitudadami ix makïdï urabagi ïgai tudu.

Hechos 8:16

Diuxi Ibhïadï mai kia ïmadï dakatadai tomarhi ïmadutai ïgai. Mos gïn bapakoñikatadai ïgai Suxi Kristo sïïrhikamigadïkïdï.

2 Korintios 13:5

Daiñi, aapimï ikaitiña sai maatïka ïrhidi ix bhai bia aanï ïmo sïïrhikami Diuxi amadïrï. Dïï gia gï agaitadai bhaiyoma saidi ïïgi gïn tïgitokagi aapimï ix bhai kïïgakïrï buaboitudai aapimï. ¿Mai ix gïn ïmadï daja Suxi Kristo? Ïjï tudu. Dai gï agai sai kïïga maatïkagi aapimï gobai. Ix maiti gïn ïmadï dakagi ïgai aidï gia gobai itïiya ïrhidi sai mai urabaka aapimï ïgai tudu.

1 Korintios 15:29

Xibi ïpamu aagamu aanï go duakaragai. Daiñi, ïïmadutai aapimï pokaiti sai mai duduakarïi koidadï dïï bïïxkïrï pokaitiña ïgai saidi ibuayi soiñi ix gïr bapakonakagi aatïmï ix makïdï kia duduaka soiña ïrhiditai ix makïdï ka koi. ¿Dukatai ïr soiñikana gobai tudu ix mai duduakarïi koidadï?

1 Korintios 3:16

Gin aaduñi, kïïga maatï aapimï sai aapimï ïr Diuxi bakidï dukai xako oidakami ïgai. Kaxkïdï tudu Diuxi Ibhïadï aapimïrï daja.

1 Korintios 6:19

Kïï sïïrhi abïr gïn tïgitoka tudu sai gïn tukuga ïr Diuxi Ibhïadï bakidï dukai gïn ïrana dakatai ïgai. Dai Diuxi ïgai dai gïn maa ïïgi Ibhïgadï sai gïn ïmadï dakana. Kaxkïdï ka mai bia aapimï sïïrhikami ix ïïgi gïn tïanïdagi aapimï.

1 Korintios 9:24

Gin aaduñi, kïïga maatï aapimï sai xïïxkadï bopiagi odami ïmo mïrhikaruana muidutai bopoyiña dïï mosïkaxi ïmaduga ix makïdï gamaitïkïi. Gï agai tudu ix kabami gï aajagi ix makïdï gamaitï agadagi. Podukai tudu abïr óídaka aapimï. Kabami abïr gïn aaga ibuadatai ixtumaxi bhai ïrhidi Diuxi sai podukai buyiña aapimï go maitïki.

1 Korintios 10:2

Podukai bïïxkatai gïr ïïki aaduñi uraba go Moises.