Romanos 6:12 - Northern Tepehuan Bible

¹² Kaxkïdï abïr mai dagito xi gïn tïanïdagi go soimaaxkami tami oidigi daama óídakatai aapimï bai mai ïïgiadagi aapimï gïn soimaaxi tïgibudagai.

Tepehuan Northern: Diuusi ñiooquidʌ utuducami oodamicʌdʌ

¹² Casiavʌr maitʌndadagitoda isʌDiaavora soimaasi gʌnduiñtuldagi dai poduucai camaisoimaasi ivuaadamu aapimʌ.

Romanos 6:12 Referans Kwoze

Galatas 5:16

Gin aaduñi, bïïxi óídakami bia tïgibudagai ix makïdï ïïgi ibhïadïañdïrï imïi dai ix makïdï mai ïïgiada ïrhidi Diuxi. Kaxkïdï gïr ajïi tïgibudagai xi ibuada aatïmï naana maaxi soimaaxi. Dïï gia abïr oijada Diuxi Ibhïadï dai aidï gia ka maiti ibuadamu aapimï ixtumaxi ibuada ïrhidiña ïïgi gïn tïgibudagakïdï.

Romanos 6:16

Daiñi, kïï maatï aapimï sai xudu ïmoko biaka ïrhiadagi gï amu, ïgai biakamu ix ïïgiadagi amudï tomax dukai. Dai po maaxi xibi gïn bïïtarï ïpï. Kïï bhaiga aapimï xibi xi gïn tïïgidagi xi go soimaaxkami gïn amukagi ïïgiditai aapimï go soimaaxkami. Dïï gia go soimaaxkami go ïï mukigami buapai. Dïï gia xi gïn tïïgidagi aapimï Diuxi xi ïr gïn amukagi ïgai ïïgiditai aapimï aidï gia ïgai kïïgakïrï gïn nïijadamu.

Romanos 8:13

Ix ïïgiditai óídakagi aapimï gïn ïkidadï tïgibudagai aidï gia mos koimu aapimï. Dïï gia ix Diuxi Ibhïadï gubukarhigakïdï maigobai dasagi aapimï ix makïdï ibuadana ïïgiditai gïn tïgibudaga ïkidadï, aidï gia kïïgakïrï óídakamu aapimï.

Galatas 5:24

Daiñi, aatïmï ka bïïna daraka Suxi Kristo xibi dai ka ïkobai bii aatïmï gïr ïïkidadï tïgibudagaiñdïrï. Aatïmï gïr bïïtarï ka kuruxiana xixapikan dukai biyan dui gïr ïïkidadï tïgibudagai tudu dai kaxkïdï ka mai bia aatïmï xi ïïgiadagi gobai xïïxkadï gïr aagidagi sai iduña rïrhidi ixtumaxi.

2 Korintios 4:11

Mai biïga ixdukatai gïr aiyagi mukigami oiditai aatïmï Suxi tudu. Dai ïkobïrakoga kïkïrhiokorïi aatïmï ïpï. Pomaaxi gïr oidakaraga tami oidigi daama. Dïï gia gobai gïr maakai oigaragai saidi Suxi gubukarhigadïkïdï óídakagi aatïmï, mai gupukatai aatïmï tudu. Dai podukai mui óídakami nïijadamu sai Suxi gubukarhigadïkïdï óídaga aatïmï dai maatïkamu ïgai sai kia oidaga Suxi, ïgai gubukarhigadïkïdï óídakatai aatïmï tudu.

2 Timoteo 2:22

Kaxkïdï gï agai xi ïkobai aimïrada aapi bïïxi go soimaaxkamiañdïrï ix makïdï ibuada ïrhidiña utu iimïdami. Gï agai bhaiyoma xi ipïldagi aapi xi kïï sïïrhi oidakagi, dai ix kïïga kabakami dukai buaboitudagi, dai ix kïïga oigïdada jaa mai bui ñokaitai aapi jaa aipakoga. Urabañi aapi go ix makïdï tanïiña soiñi Gïr Nukadakami kïï buañixikatai ibhïadï tudu.

Efesios 4:22

Kaxkïdï abïr maigobai dasa go ïkidadï gïn tïgibudaga ïmadï ïkidadï gïn oidakaraga. Gobai mos ïr ïï soimaaxkamikana dai gïn bupuirumadaiña gobai gïn maakaitai tïgibudagai xi iduña ïrhiadagi aapimï ix makïdï maiti ïr soiñi.

Romanos 2:8

Dïï gia Diuxi kabami bhamuka agai buidïrï ix makïdï ïïgi gïn tïgito ajiopadagi dai maiti ibuayi ixtumaxi ïr sïïrhi apia adaimïitai ïgai go soimaaxkami.

1 Pedro 2:11

Gin aaduñi, xibi gïn aagidamu aanï ïmo ñoki gïn oigïdatai aanï. Daiñi, aatïmï xibhïadïrï óídakami dukai óídaga tami oidigi daama. Idi oidigi mai kïïgakïrï ïr gïr kii tudu dai bhaiyoma go tïbagi ïr gïr kii. Kaxkïdï kïïga abïr gïn tïgitoka dai mai ïïgiada go soimaaxi ix makïdï gïn tanïdagi gïn tukuga xibi kia gïn tukugïrï óídakatai aapimï. Go soimaaxkami ix makïdï gïn tanïdagi gïn tukuga ïr buidïrï kaatïkami dukai gïn ibhïdaga tudu dai soi duada ïrhidi gobai gïn ibhïdaga.

Tito 2:12

Dai xibi maatï nïiditai aatïmï xïï kïï tuiga Diuxi gobai gïr soikïi naana maaxi ixtumaxiïrï. Gïr soikïi gobai xi dagitoagi aatïmï ixtumaxi mai bhai ïrhidi Diuxi. Dai gïr soikïi ïpï xi gajiadïrï biagi aatïmï go soimaaxi ix makïdï ibuada ïrhidiña odami ix makïdï mai buaboitudai. Dai maatï nïiditai aatïmï xïï kïï tuiga Diuxi gobai gïr soikïi xi sïïrhi gïr tïtïgitoagi ïpï dai xi buañixikan dukai óídakagi idi oidigi daama kïïga ïïgiditai aatïmï Diuxi. Bïïxi gobai gïr soikïi maatï nïiditai aatïmï xïï kïï tuiga Diuxi otosakai ïgai Suxi Kristo.

Efesios 2:3

Bïïxkatai aatïmï buaboitudadami pomaaxi óídakaiña ïkioma ïpï. Ïïgidiña aatïmï ïïgi gïr tïgibudaga soimaaxkïdï. Mos ibuadana aatïmï bïïxi go soimaaxkami ix makïdï bhai ïrhidiña gïr tukuga ïmadï gïr tïgibudaga ïkidadï. Ïïgi pomaaxkatadai aatïmï tudu. Ajïakamikatadai aatïmï xi gïr bui bhamukagi Diuxi dai xi taatagi aatïmï gïgïbidaragai ïmadï bïïxi go gaa óídakami.

Udaxi 1:18

Ïkiaxdïrï gïn aagidi ïgai sai xïïxkadï karhioga ugiti agadagi oidigi saidi oidaka agai mui parunadami. Ïgai adaimuda agai ïïgi bhai ïrhiaradï ibuadatai ïïgi ixtumaxi bhai ïrhiadagi ïgai. Po kaiti go ojotosadï Suxi Kristo baasïkioma tudu dai ipïrhidi aanï saidi gïn tïgitokagi aapimï gobai.

1 Pedro 1:14

Daiñi, ïkioma aidïxi mai kia maatïkatadai aapimï ixtumaxi ïr buaboi dai ïïgidiña aapimï ïïgi gïn tïgibudaga, aidï biaka ïrhiditadai aapimï naana maaxi ix makïdï mai kïkïïgadu. Ka maiti abïr podukai óídaka xibi tudu. Ïïgiadabïrai Diuxi gïr Oga bhaiyoma aarhi maamaradïkatai aapimï.

Tito 3:3

Daiñi, maiti gï agai xi soi dukai nïijada aatïmï go jaa ix makïdï mai buaboitudai. Aatïmï ïpï maiti ïr buaboitudadamikana ïkioma tudu dai ïpïan tutiakana aatïmï ïgai dai ïpïamaaxi ibuadana. Aidï mai ïïgidiña aatïmï Diuxi dai buaboitudaiña aatïmï ixtumaxi ïr yaatagi. Mai bhaigakana aatïmï xi dagitoagi go soimaaxkami ix makïdï ibuada ïrhidiña aatïmï gaagaitai ïmo bhai ïrhiaragai. Aidï ïjïgakoitïrïkana aatïmï dai gïr kïïdaiña aatïmï aipakoga. Pomaaxi tutiakana aatïmï mai kia buaboitudakai tudu.

1Tesalonicenses 4:5

Maiti gï agai tudu ix ïïgiada aapimï gïn tukuga xïïxkadï gïn tanïda gobai sai soimaaxi ibuada aapimï. Daiñi, go gaa ix makïdï mai buaboitudai Diuxi adaimïiña ixtumaxi ipïrhidi ïïgi tukugadï dai aapimï maiti gï agai ix pobuadagi.

Romanos 13:14

Xibi abïr ïpïan dukai óídaka Suxi Kristo Gïr Nukadakami bhaiyoma. Daidi abïr mai tïgito ajiopada xi dukatai buadagi ix tumaxi gïn tanïi gïn ïkidadï tïgibudaga.

Romanos 8:11

Daiñi, Diuxi ïgai dai duakaturhi go Suxi Diuxi Ibhïadï gubukadadïkïdï. Dai xibi Diuxi Ibhïadï gïn ïrana daja. Kaxkïdï maatï aatïmï sai Diuxi duakatuda agai gïn tukuga ïpï mukukai aapimï. Gïn duakatudamu Diuxi Ibhïadï gubukarhigadïkïdï ix makïdï gïn ïrana daja.

Romanos 6:14

Podukai go soimaaxkami ka mai biakamu ix dukatai gïn tïanïdagi. Xibi ka mai bia aapimï sïïrhikami xi ïïgiadagi go sïïrhikami. Xibi bhaiyoma ïïgida ïrhidi aapimï Diuxi mos ïï kïï tuigakatai ïgai gïn bïïtarï.

Romanos 5:21

Ïkioma go soimaaxkami tïanïiña bïïxi óídakami gïr buapidakai gobai mukigami. Dïï gia xibi Diuxi gïr tïtïïgidi xïï kïï tuiga ïgai. Xibi Suxi Kristo Gïr Nukadakami bhai dui gïr bïïtarï sai Diuxi kïïgakïrï gïr nïijadana dai sai aatïmï kïïgakïrï óídakana bïïxkïrï bïïtarï ïpï.

Udaxi 1:16

Galtutuiga go tïtïïgiadami yaatagi ïgai tudu. Tomax maaxi imïdagi oidakaradï mai biïga ixtukïdï soi kaitiada ïgai buidïrï Diuxi dai buidïrï jaa dai tomax dukai mai bhai gïn ïrhidiña ïgai. Adaimïi ïgai ïïgi bhai ïrhiaradï ibuadatai ïïgi ixtumaxi ipïrhiadagi ïgai. Gïgïr tïtïanïdami dukai ñokai kabami tïkabi gïn tïgitokatai ïgai. Yaatagïi ïgai dai ïgai aagidiña go óídakami ixtumaxi odami kaïka ïrhidiña saidi podukai bhai gïn ïldagi odami ïgaikïdï kaïkatai aatagidï sai podukai ibuadagi go odami ixtumaxi ïgai ipïrhidi.

2 Korintios 5:4

Maiti ipïrhidi aatïmï ix mai tukugakatai óídakagi aatïmï dïï gia aijiïgïitai óídaga aatïmï xibi mos ïï bïïtïkatai gïr oidakaraga tami oidigi daama. Ka otoma biaka rïrhidi gïr utudui tukugai tudu saidi ka mai tipukagi go mukigami ka kïïgakïrï óídakatai aatïmï bïïxkïrï bïïtarï.

Genesis 4:7

—Bhaiyoma ix dukai aagai aanï podukai gin buapidamudai aapi daxdaragai. Aidï gia oigïda gï nïijadamudai aanï dai kïï bhai ïldamudai aapi— itïtïdai. —Dïï xibi ka mai kïï dui aapi di. Kaxkïdï an aagai sai todian dukai gï ayimu soi maaxi tïgibudagai dai gïïpi soimaaxkami iduña antaada aapi ïïgidakai aapi gobai. Dïï gia gï aagai ix kabakada aapi gï tïgibudaga bhaiyoma dai mai ïïgiada go soimaaxi— itïtïdai Gïr Nukadakami.