Romanos 12:2 - Northern Tepehuan Bible

² Maiti abïr ïïgiada tïgibudadï oidigi daama óídakami bhaiyoma abïr bhïiyi tïgibudagai utudui Diuxiañdïrï. Aidï gia gïn utudutuldamu Diuxi gïn ïrabiadïrï dai maatïkamu aapimï ixtuma agai Diuxi gïn bïïtarï. Ix makïdï Diuxi aagai gïn bïïtarï mos ïr ïï kïkïïgadukami dai buapai bhai ïrhiaraga Diuxi bïïtarï. Mai tipu ïma maaxi bamioma kïïgadukami xi bhai ix makïdï Diuxi agai gïn bïïtarï.

Tepehuan Northern: Diuusi ñiooquidʌ utuducami oodamicʌdʌ

² Maitavʌr ʌpan duucai oidaca ʌsoimaasi ivuaadami baiyomavʌr ʌma duucai gʌntʌtʌgito dai poduucai ʌma duucai oidacamu aapimʌ. Dai poduucai maatʌcamu aapimʌ istumaasi Diuusi ipʌlidi isivuaada aapimʌ. Diuusi baigʌʌlidi ispoduucai ivuaada aapimʌ daidʌ ʌrcʌʌgai aapimʌ gʌmvʌʌtarʌ poduucai vaamioma cʌʌga vaavoitudamu aapimʌ. Gomaasi ʌrvaamioma cʌʌga ducami siʌ tomastumaasi istumaasi isivuaadagi aapimʌ.

Romanos 12:2 Referans Kwoze

1 Pedro 1:14

Daiñi, ïkioma aidïxi mai kia maatïkatadai aapimï ixtumaxi ïr buaboi dai ïïgidiña aapimï ïïgi gïn tïgibudaga, aidï biaka ïrhiditadai aapimï naana maaxi ix makïdï mai kïkïïgadu. Ka maiti abïr podukai óídaka xibi tudu. Ïïgiadabïrai Diuxi gïr Oga bhaiyoma aarhi maamaradïkatai aapimï.

2 Korintios 5:17

Daiñi, odami ka ïmapïbuayi xïïxkadï urabagi ïgai Suxi Kristo ïpï. Diuxi utuduturhi ïgai kaxkïdï. Dai amaxi ka buaboitudakai ïgai ka ugiatïkïi go ïïkidadï oidakaradï dai aidï abhiadïrï ka biakana ïgai ïmo utudui oidakaragai.

Kolosenses 3:10

Xibi ka bhïiyi aapimï go utudui oidakaragai dai ka utudutudaimi aapimï. Xibi Diuxi ix makïdï gïn idui aatabuayi aapimïrï dai ka ïpïan tuigakami bijimi aapimï Diuxi. Gïn utudutuldaimi Diuxi sai podukai kïïga maatïkana aapimï ïgai dai kïïga ïmadaiña aapimï ïpï.

Efesios 5:17

Maiti abïr bupuiruaka aidï daidi abïr gïn aajagïda dai maatiagi ix tumaxi ipïrhidi Diuxi xi buadagi aapimï.

1 Pedro 4:2

Ix bhai gïn dukagi ix soimaaxi taatamadagi aapimï ïpïan dukai Suxi Kristo aidï gia ka maiti ibuadamu aapimï go soimaaxkami ix makïdï gïn tanïdagi odami tïgibudadï tudu. Aidï gia bhaiyoma ibuadamu aapimï ixtumaxi Diuxi ipïrhidi asta xako ukami óídakagi aapimï tami oidigi daama.

Romanos 12:1

Gin aaduñi, sïïrhikïdï kïï tuiga Diuxi gïr bïitarï gïr oigïrhitai. Kaxkïdï xibi kabami gïn tanïi aanï xi ïïgi gïn tïïgidagi aapimï ïmo daxdaragai duakakami dukai Diuxi bïïtarï. Diuxi bïïtarï abïr óídaka tudu kïïga xadutudaitai ïgai gin iibhïdakïdï. Gobai ïr ïmo bhai ïrhiaraga Diuxi bïïtarï. Kïïga maatiga maaxi aidï saidi ïr sïïrhi xi podukai xadutuadagi aapimï Diuxi.

Romanos 13:14

Xibi abïr ïpïan dukai óídaka Suxi Kristo Gïr Nukadakami bhaiyoma. Daidi abïr mai tïgito ajiopada xi dukatai buadagi ix tumaxi gïn tanïi gïn ïkidadï tïgibudaga.

Santiago 4:4

Daiñi, Diuxi bïïtarï ïpïan dukami aapimï ïmo oki ix makïdï oidiña ïmai kïïrhi tomaxi maiti ïr kunadï. Oidiña aapimï go tami oidigi daama óídakami tïgibudadï soimaaxkïdï tudu. Pobuayi aapimï gaagaitai gïn bhai ïrhiaraga ixtumaxiïrï oidaga tami oidigi daama. Bamioma ïïmadai aapimï go soimaaxi tïgibudagai ix makïdï oidaga tami idi oidigi daama tudu dai mai ïïmadai aapimï Diuxi. Gï agai sai maatïkagi aapimï tudu sai odami ix makïdï adaimïi pomaaxkami tïgibudagai ïr buidïrï bïïtïkami Diuxi.

2 Korintios 4:4

Go diabora ïgai dai gatïanïi tami idi oidigi daama tudu. Dai maatiga maaxi sai buirumadai ïgai go óídakami ix makïdï mai maatï kaïkagi gïr aatagi mai buaboitudaitai ïgai ixtumaxi ïr buaboi. Maiti ipïrhidi go diabora ix óídakami maatï kaïkagi go bhai ïrhiaragai aatagi aagaitai Suxi Kristo tudu. Maiti ipïrhidi ïgai ix maatïkagi óídakami xïï kïï tuiga dai xïï gubuka Suxi Kristo Gïr Nukadakami. Suxi ïmadï Diuxi kïïga ïmadugan maaxi dai ïmadugan tutuiga tudu.

VUAANA 17:14

Xibi kaxi gatïïgi aanï gï ñoki gin mamaatïrdamiga ix kaxkïdï go gaa kïïdai. Ka maiti ïr aaduñdï gobai go gaa xibi ix makïdï adaimïi ïïgi tïgibudadï kaxkïdï kïïdai go gaa. Xibi gin ïpïamaaxi gobai, aanï ïpï maiti ïr aaduñdï go gaa ix makïdï adaimïi ïïgi tïgibudadï— itïtïdai.

2 Pedro 1:4

Dai gïr aagidi Suxi mui ñoki kïïga gupukami dai kïïga namïakami ïpï dai ïgaikïdï gï báí ïgai saidi gïr maaki agai naana maaxi kïkïïgadukami ixtumaxi. Sïïrhikïdï gubuka ïgai tudu dai kïï tuiga dai kaxkïdï gïr aagidi ïgai go naana maaxi namïakami ñoki gobai. Dai go ñoki ix makïdï gïr aagidi ïgai gïr maakai tïgibudadï Diuxi saidi ka biakatai aatïmï tïgibudadï Diuxi ka ïpïan tutiakana aatïmï ïgai. Kaxkïdï tomaxi soimaaxi iduña ïrhidi go óídakami ix makïdï mai buaboitudai dai naana maaxi oidaga soimaaxkami tami oidigi daama bïïxkïrï kïïgakïrï bubuakïi aatïmï go soimaaxkamiañdïrï.

Santiago 1:27

Dïï gia Diuxi pokaiti sai odami ix makïdï mai sarabidi go soimaaxkami ix makïdï oidaga tami oidigi daama dai bhaiyoma kïïga soikïdagi aarhi mai dïïdïkami ïmadï bipiudu, sai ïgai gia kïïga oidi go buaboidaragai ix makïdï kïïga buañixi. Oidi ïgai go buaboidaragai ix makïdï mai bia soimaaxi tudu.

1 Juan 3:13

Gin aaduñi, kïïga gï maatï saidi go odami ix makïdï mai buaboitudai gïr kïïdada agai podukai ïpï. Dai mai bia aapimï xi gïn tïkakadagi ix tuixidï gïn kïïdai ïgai. Ïpïan buayi ïgai go Kain kaxkïdï.

1Tesalonicenses 4:3

Ipïrhidi Diuxi sai mosïkaxi ïgai bïïtarï óídakana aapimï ïko darakatai soimaaxkamiañdïrï. Maiti ipïrhidi ïgai sai abhana bopodagi aapimï jaa ix makïdï maiti ïr sïïrhi tudu.

1 Juan 5:19

Kïïga maatï aatïmï saidi ïr maamaradï aatïmï Diuxi tudu. Dai maatï aatïmï ïpï sai go diabora tïanïi bïïxi go gaa oidigi daama óídakami ix makïdï mai buaboitudai Suxi Kristo.

Efesios 1:18

Daanïi aanï Diuxi sai kïïga gïn maatïtuldana gïn iibhïdagïrï tudu. Aidï gia maatïkamu aapimï xïïxi ïr gïdukami go bhai ïrhiaragai ix makïdï bia Diuxi gïr bïïtarï, aatïmï gïr bïïtarï tudu ix makïdï ïr bapaidarxigadï. Diuxi gïr báí xi gïïpi bhai ïrhiarakïdï nïnïrakana aatïmï gobai ix makïdï bia ïgai gïr bïïtarï.

2 Pedro 2:20

Daiñi, ïïmo odami mamaatïrïi sai Suxi Kristo ïgai daidi ïr go Tïanïdami dai saidi ïr kïïgakïrï bubiadamigadï óídakami ïpï. Dai podukai mamaatïrïi ïgai ixdukatai bhaiga odami xi buañixikami dukai óídakagi Diuxi buitapi. Dai ka maatïkatai ïgai go Suxi ka daadagitoiña ïgai go soimaaxkami ix makïdï oidaga tami oidigi daama. Dïï gia xi gokiïrï gïn bapasadagi ïgai ïpamu go soimaaxkamiïrï dai gïn dagitoagi ix gïn tïanïdagi gobai asta xako ka mai tïtïïgai ïgai ix dukatai dagitoagi, aidï gia bamioma soimaaxi bipiïyi ïgai xi bhai xi aidïxi mai kia maatïkatadai ïgai Suxi.

Efesios 2:2

Aidïpïrï adaimïiña aapimï go odami tïgibudadï dai ïïgidiña aapimï go diabora pobuadatai. Go diabora ïgai dai tïanïi go soimaaxi iibïdagami ix makïdï mos ïbïltapi ajiopai. Dai xibi aatabuayi ïgai iibhïadïrï odami ix makïdï mai ïïgidi Diuxi ïpï.

Galatas 1:4

Suxi Kristo tudu ïgai dai ïïgi gï tïïgi sai gï muatudana ïmo daxdaragai dukai dai bhai duñagai gïr soimaaxkamiga sai ka kïï biïna aatïmï Diuxi ïmadï. Podukai idui ïgai dai kïïgakïrï gïr bubaitu bïïxi go soimaaxkamiañdïrï ix makïdï oidaga tami idi oidigi daama. Podukai ipïrhi Diuxi gïr Oga sai ïïgi gï tïïgidana Suxi gïr bïïtarï tudu xi kaxkïdï gï tïïgi ïgai dai gï muatu.

Romanos 7:22

Daiñi, Diuxi sïïrhikamigadï ïr bhai ïrhiaradï gin ibhïdaga.

VUAANA 7:7

—Mai tipu tudu ixtukïdï gïn kïïdadagi odami dïï aanï gia gin kïïdai ïgai. Maaxi aagaiña aanï xïïxi ïr soimaaxi ibuadami ïgai dai kaxkïdï gin kïïdai— itïtïdai Suxi.

Apokalipsis 13:8

Dai bhaitoma bïïxi oidigi daama óídakami xadutuada agai go kïixi Diuxi dukai. Dïï gia go odami ix makïdï ojixi go libroïrï ix makïdï bia go Arhi Kañiru ïgai gia mai xadutuada agai go gïï kïixi. Go Arhi Kañiru ïgai makïdï gï muatu dai bia ïmo libro xako ojixi odami ix makïdï bïïxkïrï bïïtarï óídaka agai. Aidï abhiadïrï xi mai kia kïkibatadai oidigi biakana ïgai go libro tudu. Dai odami ix makïdï ojixi ami libroïrï gia mai xadutuada agai go gïï kïixi.

Romanos 7:12

Dïï tomax dukai bïïxkïrï kïïgadu Diuxi sïïrhikamigadï. Kïï buañixi gobai dai kïï sïïrhiñi.

Kolosenses 4:12

Diuxikïdï gïn biaturhi go Epafro ïpï. Ïgai ïr ïmo pioñigadï Suxi ïpï dai gïn urapïkïiña ïgai amïka ïpï. Ïgai bïïxi ibhïgadïkïdï gïn daanturhiña sai kïïga kaban gukakana aapimï gïn buaboidaraga. Dai gïn daanturhi ïgai ïpï sai kïïga biakana aapimï ibhïxtaragai kïïga maatïkatai aapimï bïïxi ixtumaxi ipïrhidi Diuxi saidi ibuada aapimï.

1 Pedro 1:18

Daiñi, Diuxi kïïgakïrï gïn bubaitu gïn ïïkidadï oidakaragaiñdïrï ix makïdï gïn biturhi gïn aaduñi ïïkidadï. Maiti ïr soiñikatadai gïn ïïkidadï oidakaraga tudu. Dai kïïga maatï aapimï sai kabami namï gïn kïïgakïrï bubaidaraga dai Diuxi ïgai dai dáí namïgadï. Ixtumaxi dáí ïgai gïïpi bamioma namïga xi oro xi ïpï plata. Dáí ïgai Suxi Kristo tudu sai mukuna ïgai dai aaxtana ïradï ïmo arhi kañiru dukai mai biakatai ïgai toma lïïchi soimaaxkami abhana.

VUAANA 14:30

Ka mai xii tïbïpi aatagadamu aanï gïn ïmadï xibi tudu. Ka karhioga dibia go Diabora ix makïdï gatïanïi tami oidigi daama. Ïgai mai bia gubukarhigai ix gin tïanïdagi

Romanos 7:14

Kïï maatï aatïmï sai Diuxi sïïrhikamigadï ïr Diuxi tïgibudadï. Dïï aanï mos ïr odami dai go soimaaxkami gin tïanïi pioñigadï dukai.

Apokalipsis 12:9

Daidi Diuxi maigo surhi go gïï kïixi tïbagiañdïrï modukai tïtïañikarudï. Podukai bhaigobai oidigi daama surhi go kïixi ix makïdï diabora tïgidu dai satanás tïgidu ïpï. Ïgai tudu ïr go gïï kooyi agaikïdï ix makïdï ïki abhiadïrï ajiopaiña tami oidigi daama dai bupuirumadaiña óídakami. Tami oidigi daama gï surhitu ïgai tudu ïmadï modukai tïtïañikarudï maitïkai Diuxi tïtïañikarudï ïgai bui.

Mataibo 13:22

—Dai go ïxtokai ix makïdï basoi sïïxidakami saagida surhi ïr ïpïan dukami go odami ix makïdï kaïkana Diuxi ñokidï dïï mos apia maaxi óídaga dai buaboidaradï mai kabakaturïiña. Kabami buamï gïn ïrhidi ïgai gaagaitai tuminxi dai gaagaitai bhai ïrhiaradï ixtumaxiïrï oidaga tami idi oidigi daama. Dai kaxkïdï ïgai bïïtarï ka maiti ibuayi soiñi go ñoki ïpï ix makïdï kaïkana ïgai—.

Markos 4:19

dïï mos arhiï tïtïitoi ïgai ixdukatai oidaka agai tami oidigi daama. Ïgai gïn bupuirutudai adaimïitai go tuminxi. Naana maaxi biaka ïrhidi ïgai dai go ñoki ix makïdï kaï ïgai ka mai soikïi.

Kolosenses 1:9

Dai aidï abhiadïrï xi kaï aatïmï ix makïdï gïr aagidi Epafro gïn aagaitai aapimï, aidï abhiadïrï gïn daanturhiña aatïmï. Mai dagitokai gïn daanturhiña aatïmï tudu. Daanïiña aatïmï Diuxi sai gïn soikïiña sai kïïga biakana aapimï bïïxi go tïgibudagai ix makïdï ïr soiñi. Dai daanïiña aatïmï sai kïïga maatï nïijadana aapimï ix dukatai ibuadagi tomax tuma daibuñagi. Podukai gïn daanturhiña aatïmï sai bïïxi aïkatïrï ixtumaxiïrï kïïga maatïkana aapimï ix dukatai ipïrhidi Diuxi sai ibuada aapimï tudu.