—Buaboitudai ïgai go bhai ïrhiaragai aatagi tudu dai biakana oigaragai xi Diuxi tïanïdagi. ¿Dai gobai ix tïiya ïrhidi sai ka maiti ïr soiñi go sïïrhikamigadï go Moises ïmadï go ojadï go gaa ñiñokituldiadamigadï Diuxi ix makïdï buaboitudaiña odami ïïki abhiadïrï? ¿Xibi ix bhai ka mai namïga gobai? Xadïrï. Xadïrï ugitïna gobai mos aagaitai aatïmï go bhai ïrhiaragai aatagi di— itïtïdai. —Daiñi— itïtïdai. —Otomioma ugiti antaada go oidigi ïmadï tïbagi xi bhai go arhidukïdioma ñoki sïïrhikamigadïana Diuxi.
Mataibo 5:18 - Northern Tepehuan Bible18 Mai ugiti agai gobai ojadï tudu asta xïï tïbïpi kïakagi go oidigi ïmadï tïbagi kia. Asta go arhidukïdioma ojadï go sïïrhikami mai ugiti agai tudu. Aanï aagai sai mai ugiti agai gobai asta xïxkadï ukami bïïxi ïpïdui ixtumaxi ojixi ami sïïrhikamiana— itïtïdai. Gade chapit laTepehuan Northern: Diuusi ñiooquidʌ utuducami oodamicʌdʌ18 Sʌʌlicʌdʌ angʌnaagidi sai siʌʌsi uucami cʌaacagi oidigi vʌʌsi istumaasi aagai Diuusi moduucai imʌda agai maitʌviaa agai tomalaachi tomali ʌmo oojai maimaigovai gʌdaasa agai asta siʌʌscadʌ ʌpʌdui vʌʌsi ismaacʌdʌ viaa siʌpʌduñiagi. Gade chapit la |
Mataibo 5:18
82 Referans Kwoze
Dai Suxi potïtïdai, —Mai kïïga buaboitudai aapimï kaxkïdï. Daiñi, tomaxi mosïkaxi palïpi buaboitudamudai aapimï bhaigakamudai aapimï xi potïdagi ïmo tubidaki sai maigobai kïkibana dai otoma gïn ïïgiadamudai go tubidaki dai maigobai imimudai. Mai tipukamudai ixtumaxi gïn sobhidagi tomaxi mosïkaxi palïpi buaboitudadamudai aapimï tudu.
—Gïn aagidamu aanï ix dukatai ibuadagi xïïxkadï soi gïn buidadagi óídakami. Daiñi, xïïxkadï aituldagi aapimï ñoki no xibhïkai ïmo kiikiïrï gin aagaitai aanï dai xi ami óídakami soi gïn buidadagi gin buaboitudaitai aapimï aidï gia iimibïrai abhiadïrï dai ïmai kiikiïrï abïr aitulda gin ñoki. Mai kia bïïxi kiikiïrï nato aituldamu aapimï gin ñoki tami Israelïrï xi ka dibimu aanï ïpamu tudu. Ka podukai aagai aanï ix makïdï ïr Diuxi otosadï dai ïmo kïïrhi busai tudu— itïtïdai Suxi.
Maiti abïr ibuada ix dukai ibuayi go odami ix makïdï kïï tutiakami gïn dadasai dai mai kïï tutuiga tudu. Xïïxkadï soikïda agadagi ïgai ïmo soitigami gïgïr ibaiña trompetakïdï sai bïïxi go óídakami maatïkana. Po buayi ïgai ipïrhiditai sai kïïga gïn tïgito nïijadagi jaa dai kïïga ñokada ïgai bïïtarï tudu. Dai kïïga ïr buaboi sai kïïga ñokada antaada jaa aagaitai ïgai dïï mosïkaxi gobai ïr maitïkidïka agai ïgai. Diuxi mai maaki agai ïmai maitïki tudu— itïtïdai Suxi.
Gïn tïïgimu aanï ïpamu tudu dai aidï gia ka maiti gin tïkakamu aapimï tomarhi ïmo ixtumaxi bamioma— itïtïdai. —Gin aaduñi, kïïga abïr gïn tïgito kaïka idi ñoki. Daiñi, gïn maakai aanï sïïrhikami ix aatagada aapimï gin Oga ïmadï gin mamaatïrdamikatai aapimï. Kaxkïdï ix tanïdagi aapimï ix tumaxi gïn maakimu ïgai mïx tumaxi tanïdagi.
—Kïïga abïr gïn tïgito kaïka idi ñoki. Daiñi, aapimï ix makïdï gin buaboitudai ibuadamu ï galbaaxi aaduindagai ix makïdï aanï ibuayi dai asta ibuadamu gïgïrdukamioma aaduindagai ix aanï. Aanï imimu mïïka xako daja gin Oga dai aïkai aanï amïka aidï gia aapimï ix makïdï gin buaboitudai buimu gubukarhigai daidi ibuadamu gïgïrdukamioma aaduindagai ix bhai ix makïdï aanï ibuayi.
Daiñi, kïïga maatï aapimï sai ïmo gapioñi mai bamioma namïga ix bhai tïanïdamigadï dai ïmo otoxikami mai bamioma namïga ix bhai ix makïdï gaotoi ïpï. Aanï ïr gïn tïanïdamiga tudu dai gïn otosdamiga dai bïïxkïrï gïn pioñi dukai gaatadui aanï gïn soikïitai xibiki kaxkïdï gï aagai ix mai gïgïrdukïdï gïn ïrhiadagi ïïgi aapimï dai bhaiyoma ix gapipioñi dukai gïn ïrhiada dai kïïga gïn soikïda aipakoga.
Daidi Suxi aagai ïmo maaxidaragai aatagi aagaitai kañiñiru ïmadï paxturugadï dai aagaitai go judidiu bhaitï gukakamigadï ïpï. Daidi potïtïdai ïgai go odami, —Kïïga abïr gïn tïgito kaïka idi ñoki. Daiñi gobai ix makïdï ïr ïïxibogami dai oomarhigakami kïïga bapakïi kurarïrï xako kukupi kañiñiru dïï mai kuuparagana sïïrhi bapakïi. Ïgai bhaiyoma mos kurarai daama sïïrhi nïnïyiña dai bapakïi.
Dai Suxi itïtïdai, —Kïïga gï tïgito kaïka idi ñoki. Daiñi, gï aagai ix ïpamu utudui bubuakiagi odami saidi gïn tïanïna Diuxi. Ïma dukai xadïrï biakana oigaragai ix Diuxi tïanïdagi. Daiñi, odami ix makïdï mosïkaxi dïïdïañdïrï bubuaka ix dukai bubuakai bïïxi odami mos ïr odami ïpïan dukami tomaxorai dai mai bia oigaragai ix Diuxi tïanïdagi. Mosïkaxi ïgai ix makïdï Diuxi Ibhïgadï gubukarhigadïkïdï ka ïpamu utudui bubuakïi gia. Mosïkaxi ïgai bia oigaragai ix Diuxi tïanïdagi— itïtïdai.
Dai Suxi potïtïdai, —Kïïga ïr buaboikamu ixtumaxi gïn aagidamu aanï. Daiñi— itïtïdai. —Toma xorai ix makïdï dagitoagi buxtuidadï dai oidakaradï ipïrhiditai xi kïïgakïrï gatïanïdagi Diuxi, ïgai gïïpi bamioma biakamu tami idi oidigi daama bïïxi gobai ix makïdï dagito ïgai. Daiñi, xi dagitoagi ïgai kiidï xiïpï oñigadï xiïpï susukurhidï dai xixïgidï xiïpï dïïdïdï xiïpï maamaradï, bïïxi gobai bamioma biakamu ïgai tami idi oidigi daama.
Dai xibi otoma ka dagitomu aanï gïn kii dai ka maiti gin nïijadamu aapimï asta xïïxkadï aagadagi aapimï ïmo bhai ïrhiaragai ñoki in aagaitai aanï. Aidï po kaitidamu aapimï sai, Diuxi maakana bhai ïrhiaragai ïgai ix makïdï ïr Diuxi otosadï, ikaitidamu aapimï gin aagaitai aanï. Dai aidï gia gin nïijadamu aapimï ïpamu— itïtïdai.
Go Abelkaru ïgai dai gï muatu ïpïgioma dai gokiïrï jaa mui gïn koditu ïpï asta aidïxi ukami gï muatu go Zakariaskaru. Ïgai ix makïdï muu go gïï kiupai tuixikigadïana tudu. Ami xako gï muatu ïgai ïmo padïrï kïïka go gïï kiupai dai ïma padïrï kïïka go dadaxdakarui dai ami ïrana gïi ïgai. Dai aanï aagai sai aapimï po ïrhidi sai kïï idui gïn aaduñi ïïki kokai ïgai go ñokituldiadamigadï Diuxi dai kaxkïdï aanï aagai ïpï sai buaturhi aapimï Diuxi bïïxkatai ïgai ix makïdï gïn koditu— itïtïdai Suxi.
Dai Suxi potïtïdai, —Oidakamu ïïmadutai dai gïn aagakai aituldamu gin aatagi bhai ïrhiarakami jaa odami buitapi. Dai aagadamu xi dagitoagi ïgai gïn kiiki dai gïn susukurhi dai gïn xixïgi dai gïn dïï ïmadï gïn oga dai asta gïn maamara dai gïn dïdïbïraga ïpï pobuadatai. Pobai iduñimu ïgai gin buaboitudaitai.
—Dai mïx ajiagi ïmapïkïrï mïx xako maiti gïn miadïgidagi dai tomarhi maiti gïn kaïkan buadagi, bïrai bubuaki abhiadïrï dai gigigida gïn sususaka bai gïsïna tukuragadï. Dai ami óídakami nïijadamu mïx xuduku gigidagi gïn sususaka dai ka mos ïr ïmo bhagaidaragai dukami ka agai ïgai bïïtarï. Podukai maatïkamu ïgai xi mai kïï dui maiti gïn miadïgidakai— itïtïdai.
Dai potïdamu aanï, —Idi ñoki ix makïdï gïn aagidamu aanï kïïga ïr buaboi. Daiñi, aidïxi maiti ipïrhi aapimï xi soikïdagi ïmadutai gin aaduñi, dai mai xudu tomaxi go bamioma mai tïanïdamikagi ïgai, ix maiti ipïrhi aapimï xi soikïdagi ïgai aanï podukai nïidi xi maiti ipïrhi aapimï xi gin soikïdagi tudu— tïdamu aanï.
Dai potïdamu aanï ïgai, —Daiñi— tïdamu aanï. —Kïïga soikïiña aapimï jaa buaboitudadami. Soikïiña aapimï asta go buaboitudadami ix makïdï bamioma mai tïanïi tudu. Dai bïïxi aïkatai ixtumaxi ix makïdï idui aapimï soikïitai ïgai, bïïxi gobai aanï podukai nïidi sai aanï in bïïtarï iduitadai aapimï. Gobai kïïga ïr buaboi tudu. Po tïdamu aanï go buaboitudadami Reygadïkatai aanï— itïtïdai Suxi go odami.
Dai bhodïrï potïtïdai Suxi go dudunukami, —¿Ix makïdï go bïï goka maamaradï kïïga ïïgidi ogadï?— itïtïdai. Dai go dudunukami potïtïdai, —Go ix makïdï ïpïgioma aagidi ïgai— itïtïdai. Dai Suxi aagidi go dudunukami ix tïiya ïrhidi go maaxidaragai aatagi. Daidi potïtïdai ïgai, —Aanï aagai sai kïïga ïr buaboi sai muidutai go odami ix makïdï bamioma soimaaxi ibuadami aagai aapimï biaka agai oigaragai ix urabagi Diuxi gatïanïitai ïgai dai aapimï gia cho. Asta go kïkïïrhimïrhiakami oki ïmadï go gataanïdami kuota uraba agai dai aapimï gia cho— itïtïdai. —Daiñi— itïtïdai.
Dai Suxi potïtïdai, —Gin tïgito abïr kaï ixtumaxi gïn aagidamu aanï. Kïïga ïr buaboi gobai tudu. Daiñi, xi kïïga buaboitudagi aapimï aidï gia bhaigakamu aapimï xi ibuadagi ixdukai idui aanï go igoxi dïïdïkïdï ïpï. Dïï gia maiti gï agai sai po gïn ïrhiadagi sai mai kïïga maatï aapimï ix bhai ïr buaboi sai ixtutuidikïi Diuxi ix ibuadagi ixtumaxi tanïdagi aapimï. Ix kïïga buaboitudagi aapimï aidï gia asta bhaigakamu aapimï xi potïdagi ïmo tubidaki sai maigobai imïna dai sai go gïï sudagiïrï gïsïna tudu dai gobai gïn ïïgiadamu— itïtïdai.
Daidi Suxi potïtïdai, —Kïïga ïr buaboi ixtumaxi gïn aagidamu aanï xibi. Kaïkabïrai tudu. Daiñi, aanï ïr Diuxi otosadï ix makïdï ïmo kïïrhi busai. Dai xïïxkadï utudutuldagi aanï go tïbagi ïmadï oidigi aidï daibamu aanï ïmo daikaruana kïï tiodikami dai kïï namïakami dai ami dakatai gatïanïdamu aanï— itïtïdai. —Dai amaxi aapimï daraibamu gïgïr daraikaruana ïpï dai ami darakatai gatïanïdamu aapimï ïpï. Amaxi gatïanïdamu aapimï bïïxi go piipixaradï go bhaibuxtama dan goka maamaradï go Israelkaru tudu— itïtïdai.
—Gïn aagidamu aanï ïmo ñoki dai kïïga ïr buaboi gobai. Daiñi, xi aapimï buaboitudadami daidarxikami aagadagi ïmo ixtumaxi tami oidigi daama aidï gia Diuxi daidarxikami aagadamu ïpï amïï tïbagiana dakatai ïgai. Dai podukai ïpï ix maakadagi aapimï oigaragai saidi gï ibuadagi ixtumaxi aidï gia Diuxi ïpï maakimu oigaragai gobai bïïtarï ïpï— itïtïdai.
—Kaxkïdï aanï aagai sai ïïki abhiadïrï mai tipukana xorai bamioma namïakagi xi bhai go Juan ix makïdï bapakonadami aagaiña odami. Mai tipu óídakami saagida xorai bamioma namïakagi xi ïgai tudu. Dïï gia tomax xïïxi namïakagi go Juan bïïxkïrï oidaga xorai bamioma namïga xi ïgai Diuxi bïïtarï gatïanïitai ïgai. Diuxi bïïtarï asta go otïrhioma namïakïdï oidakami bïïxkïrï bamioma namïga xi bhai go Juan tudu— itïtïdai.
Dai xi maakiagi aapimï ïmo oidaragai ïmadutai gin mamaatïrdamiga aidï gia bhïimu aapimï ïmo maitïki ïpï tomaxi mai xii namïakagi go oidaragai ix makïdï maakiagi aapimï. Tomaxi mosïkaxi ïmo baso sudagi óídagi aapimï tudu. Bïïxkïrï buimu aapimï gïn maitïkiga. Gin maamara dukai nïidi aanï gin mamaatïrdamiga kaxkïdï— itïtïdai Suxi.
Daiñi, aanï aagai sai ayimu ixtuigako Diuxi aagada agai ix tuma gïgïbidaragai biaka agai bïïxi soimaaxi ibuadami. Dai amaxi go óídakami ix makïdï maiti ipïrhi xi gïn miadïgidagi bamioma soimaaxi taata agai gïgïbidaragai xi bhai go óídakami Sodomïrï dai Gomorïrï ix makïdï kabami soimaaxi idui ïïki— itïtïdai Suxi go mamaatïrdamigadï.
Dai kïïga bhai ïrhiarakïdï kaï Suxi go ñokidï go tïanïdami sandadaru. Daidi potïtïdai Suxi go óídakami ix makïdï oidi ami boiyana, —Kïïga ïr buaboi ixtumaxi gïn aagidamu aanï xibi— itïtïdai. —Aanï aagai sai mai tïtïgaiña aanï ïmai xorai ïpïan ïxi buaboitudagi idi tïanïdami sandadaru. Kïïga buaboitudai gobai tudu. Mai tïtïgaiña aanï ïmai xorai poïxi kïïga buaboitudadagi tomarhi gin aaduñi judidiu saagida ix makïdï tami Israelïrï óídaga tudu— itïtïdai.
Dai oi Suxi go aatagi daidi potïtïdai, —Daiñi— itïtïdai. —Ïïmo odami xïïxkadï maiti gakuadagi ïgai ïmo xadutudaragai dukai gadaanïitai Diuxi aidï mai gaxiubaiña kuupadï dai mai bakuanaiña buibasodï. Soi gïn ïrhiadan maaxkana ïgai tudu ipïrhiditai sai nïijadagi jaa dai podukai kïï tutiakami gïn dadasai ïgai. Dai kïïga ïr buaboi sai ïïmo óídakami kïï tutiakami aaga antaada tudu. Dïï gia mosïkaxi gobai ix makïdï aagagi odami ïgai bïïtarï ïr maitïkidïka agai. Mai buimu ïgai ixtumaxi Diuxi amadïrï tudu. Kïï tutiakami gïn dadasai ïgai dïï mos maiti ïr buaboi kaxkïdï— itïtïdai.
Piblisite