Kolosenses 1:5 - Northern Tepehuan Bible

⁵ Kïïga maatï aapimï tudu sai bia aapimï ïmo kïïgadukami nïnïraragai mïï tïbagiana. Dai gobai ix makïdï bia aapimï tïbagiana gïn abïnakiadan buayi sai apia kïïga buaboitudada aapimï dai sai kïïga oigïdada aapimï bïïxi go gaa buaboitudadami. Máí aapimï sai bia aapimï ïmo kïïgadukami nïnïraragai aidïxi kaï aapimï go buaboikïdï aatagi. Aidïxi kaï aapimï go bhai ïrhiaragai aatagi tudu.

Tepehuan Northern: Diuusi ñiooquidʌ utuducami oodamicʌdʌ

⁵ nʌnʌracatai aapimʌ istuigaco iimi agai tʌvaagiamu dai Diuusi ʌʌmadu oidaca agai tomastuigaco. Aidʌsi tucamidʌrʌ maí aapimʌ isʌrvaavoi isSuusi Cristo ʌrcʌʌgacʌrʌ vuviadami, aapimʌ vaavoitu isʌmo imidagai iimi agai Diuusi ʌʌmadu.

Kolosenses 1:5 Referans Kwoze

Efesios 1:13

Xibi aapimï ix makïdï maiti ïr judidiu kaxi kaïkana ix makïdï ïr buaboi. Kaïkana aapimï go bhai ïrhiaragai aatagi tudu. Dai xibi ka buaboitudai aapimï Suxi Kristo ïpï dai ka kïïgakïrï bubuaka aapimï. Xibi buaboitudakai aapimï gïn tïpaltu Diuxi gïn maakakai Diuxi Ibhïadï gïn abhana. Ka ïkiaxdïrï podukai agaitadai Diuxi ix otosa agaitadai Ibhïadï dai kaxkïdï otoi ïgai.

2 Timoteo 4:8

Dai kïï maatï aanï sai sïïrhi aatabuayi ïgai ix makïdï aagada agai ix bhai kïï idui aanï. Dai kïï maatï aanï ïpï sai bhai dasakami bia ïgai gin maitïki kïï sïïrhi oidakatai aanï. Dai mai xu xi mosïkaxi aanï gin maakimu ïgai maitïki ïpï. Bïïxi ix makïdï bhai ïrhiarakïdï nïnïraka ix dibiagi ïgai buimu maitïki ïpï.

Tito 1:2

Ipïrhidi aanï sai buaboidaitai ïgai ixtumaxi ïr buaboi sai kïïga mai duduadikuda ïgai kïï maatïkatai sai kïïgakïrï óídaka agai bïïxkïrï bïïtarï. Diuxi gïr aagidi ïïki sai óídaka ragai bïïxkïrï bïïtarï tudu dai ïgai mai yaatagïi.

1 Pedro 2:2

Ka máí aapimï xïï kïï tuiga Gïr Nukadakami gïn bïïtarï tudu. Dai kaxkïdï gï agai sai nakïdan dukai kaïkagi aapimï Diuxi ñokidï ïpïan dukai go aarhi xixïñi nanakïi bibhai. Podukai buimu aapimï gubukarhigai gïn ibhïdagïrï dai bïïx tasai bamioma kabakami dukai gukakamu aapimï oiditai gïn buaboidaraga.

Kolosenses 1:23

Dïï gia tomaxi ïr buaboi sai Suxi Kristo ka bhai dui gïn bïïtarï bïïxkïrï gï agai xi apia buaboitudada aapimï ixtumaxi ïr buaboi. Kabami abïr gugukada tudu kïïga buaboidaitai ixtumaxi ïr buaboi. Daiñi, aidï abhiadïrï xi tukamïrï kaï aapimï go bhai ïrhiaragai aatagi kïïga bhai gïn ïrhidiña aapimï. Bhai gïn ïrhidiña nïnïrakatai go naana maaxi kïkïïgadukami ix makïdï bia Diuxi gïn bïïtarï. Apia abïr buaboidaitai nïnïraka gobai tudu. Dai maiti abïr gïn dagito xi gin maitiagi ïma maaxi tïgibudagai. Maiti abïr gïn dagito xi tomarhi ïmo ixtumaxi gïn popoidagi gïn bhai ïrhiaraga tudu ix makïdï bhïiyi aapimï xudu tukamidïrï buaboitu aapimï. Daiñi, ix makïdï buaboitu aapimï ïr go galbaaxi bhai ïrhiaragai aatagi ix makïdï gï aiturhi bïïxi go gaa oidigi daama óídakami. Dai Diuxi gin maa sïïrhikami saidi aipakoga aagaiña aanï go galbaaxi bhai ïrhiaragai aatagi ïpï.

1 Korintios 15:19

Ix ïr buaboikamudai sai mosïkaxi tami idi oidigi daama gïr soikïi Suxi dai amaxi ka kokai aatïmï ka maiti gïr soiña agai aidï gia sogigi aatïmï ix makïdï buaboitudai. Xi ïr buaboikamudai gobai aidï gia ka maiti ïr buaboikamudai gïr nïnïraraga. Ix ïr buaboikamudai gobai aidï gia bamioma soi dukai óídakamudai aatïmï ix bhai bïïxi go gaa óídakami tudu.

Hebreos 7:19

Go ïïkidadï sïïrhikami toma lachi mai soi óídakami ix kïïga biïna Diuxi ïmadï tudu. Dïï xibi gia mamaakai Diuxi sïïrhikami go Suxi Kristo saidi ïr dadaxdadamikana. Dai podukai gïr maa ïgai ïmo kïïgadukamioma buaboidaragai ix makïdï gia kïïga gïr soikïi dai kïï kabaka. Kïïga maatï aatïmï tudu sai go utudui buaboidaragaikïdï gia kïïga bia aatïmï oigaragai ix aiyagi Diuxi buitapi dai biagi ïmo urabagi ïgai ïmadï.

1Tesalonicenses 2:13

Gïr susukurhi, dudatai aagidiña aatïmï Diuxi ix bhai gïr ïrhidi maatïkatai sai kïïga buaboitudai aapimï gïr aatagi. Mai xu ix mosïkaxi odami aatagidï dukai kaï aapimï gïr aatagi tudu. Diuxi ñokidï dukai kaï aapimï bhaiyoma dai podukai aba ïgai. Dai Diuxi ñokidï kïïga gïn soikïi gïn ibhïdagïrï buaboitudaitai aapimï gobai.

1 Juan 3:3

Dai kaxkïdï xibi bïïxkatai aatïmï ix makïdï kabakan dukai buaboitudai sai ïpïan mamaaxka ïragai Suxi Kristo xïïxkadï dibiagi ïgai, aatïmï ka maigobai dadasaimi bïïxi go soimaaxkami ix makïdï ibuadana aatïmï. Buañixikan dukai óídaka rïrhidi aatïmï ïpïan dukai Suxi Kristo kaxkïdï.

Galatas 5:5

Dïï gia aatïmï ix makïdï bia Diuxi Ibhïadï dai ïgai gubukarhigadïkïdï óídaga mai podukai ibuayi. Mai gajiadïrï biayi aatïmï Suxi Kristo tudu. Aatïmï gia kïï maatï sai buañixikami gïr aagai Diuxi dai kïïgakïrï gïr nïidi. Dai bhai ïrhiarakïdï nïnïraka aatïmï xi gïr ajiagi ixtumaxi kïïgadukami buañixikatai aatïmï.

2 Korintios 5:19

Suxi Kristokïdï ka bhai dui Diuxi ix dukatai oigïldagi ïgai soimaaxkamigadï bïïxi óídakami tudu sai óídakami biakagi oigaragai ix urabagi Diuxi. Dai gïr maa ïgai sïïrhikami ix tïtïïgiadagi aatïmï óídakami ix dukatai biakagi ïgai urabaragai Diuxi ïmadï ïpï.

Hechos 23:6

Daidi Pabora gï tïgito tïï ix go dudunukami ix makïdï ami daraka ïïmoko ïr saduseo dai jaa ïr fariseo, kaxkïdï gïgïrï ño daidi itïi, —Gin aaduñi, aanï ïr fariseo dai gin oga ïr fariseo ïpï. Dai aanï buaboitudai sai koidadï duduaka agai kaxkïdï gin bua aapimï tanai dai gïn baan kïi— itïtïdai.

1 Pedro 3:15

Dai bhaiyoma abïr kïïga xadutuada Suxi Kristo bïïxi gïn ibhïdagakïdï gïn Tïanïdamigakatai ïgai. Dai bhaiga abïr gïn duka sai bhaigakana aapimï xi kïïga aa noraidagi ñoki xïïxkadï gïn tïkakagi go jaa ix tuixi bhai gïn ïrhidi aapimï buaboitudaitai aapimï Suxi Kristo. Dïï gia xïïxkadï aa noraidagi aapimï ñoki gï agai sai mai gïgïrdukïdï gïn ïrhiadagi aapimï dai gï agai sai kïï bhai maaxkami dukai aa noraidagi aapimï.

1 Korintios 13:13

Dïï gia xibi mai kia kugaidakai Diuxi aaduindadï oidakamu kia baika ixtumaxi ix makïdï mai ugitimu kia. Oidakamu gïr buaboidaraga buaboidaitai aatïmï Diuxi. Gobai ïr ïmoko ix makïdï mai ugitimu kia. Dai biakamu aatïmï kia gïr nïnïraraga ïpï maatïkatai aatïmï sai Diuxi iduñimu ixtumaxi gïr aagidi. Gobai gïr nïnïraraga mai ugitimu ïpï. Dai oidakamu kia oigïldaragai gïr oigïdatai aatïmï aipakoga. Gobai mai ugitimu ïpï. Baika ixtumaxi oidakamu tudu ix makïdï mai ugitimu dïï gia gaoigïldadagi ïr ïgai ix makïdï bamioma ïr namïakïdï.

Hechos 24:15

Idi kïkïïrhi ix makïdï gïpiïrï gin bupaimi buaboidadankaiti sai Diuxi duduakalda agai bïïxi go koidadï tomaxi ïr kïï buañixikami iibhïadï xi ïr soimaaxi buadamikagi ïpï. Aanï podukai buaboitudai ïpï tudu.

1 Tomoteo 1:15

Daiñi, pokaitiña aatïmï sai dibia Suxi Kristo tami idi oidigi daama kïïgakïrï bubaida agaitai soimaaxi buadami dai kïïga ïr buaboi gobai. Kaxkïdï tudu bamioma ïr soimaaxi buadami aanï xi bhai toma xorai dai bïïxkïrï kïïgakïrï gin busaitu ïgai.

2 Tesalonicenses 2:16

Gïr susukurhi, gïn daanturhiña aatïmï sai gïn abïnakidiña Diuxi dai sai gupurtudana ïgai gïn buaboidaraga. Dai kïï gubuakatai gïn buaboidaraga aidï gia bïïxi ixtumaxi aagidagi aapimï jaa kïïga ibuadamu soiñi dai bïïxi ixtumaxi ibuadagi aapimï jaa bïïtarï kïïga ibuadamu soiñi ïpï. Suxi Kristo Gïr Nukadakami ïmadï Diuxi gïr Oga ïgai dai kïï tutuiga gïr bïïtarï tudu dai gïr oigïdai dai gïr maakai ibhïxtaragai ix makïdï mai ugiatïkïi dai gïr maakai ïmo nïnïraragai kïïgadukami ïpï.

Kolosenses 3:16

Gïn tïgito abïr ajiopada aatagidï Suxi Kristo dai abïr dagito sai ïgai ñokidï gïn tïanïdagi gïn tïgibudagïrï dai saidi gïn tïanïdagi gobai bïïxi ix tumaxiïrï ibuadagi aapimï ïpï. Podukai abïr bhïiyi kïïgadukami tïgibudagai daidi aipako abïr gïn mamaatïturhiada aapimï dai aipakoga abïr gïn mamaakada ñoki. Dai bïïxi gïn ibhïdakïdï abïr ganïyi go naana maaxi nïidadï Diuxi ix makïdï aagai xïïxi ïr gïdukami Diuxi. Daidi abïr gamamaakada ïmo Diuxiatanamїidaragai Diuxi bïïxi gïn ibhïdagakïdï.

Romanos 10:8

Daiñi, Diuxi ñokidï ikaiti sai, Aapimï bia Diuxi ñokidï. Ka kïïga maatïtai aagai aapimï Diuxi ñokidï tudu ka kïïga maatïkatai aapimï gïn iibhïdagïrï ix kaiti gobai, ikaiti Diuxi ñokidï. Go galbaaxi Diuxi ñokidï tudu ïgai dai aagaiña aatïmï aipakoga. Aagidiña aatïmï óídakami sai gï agai xi buaboitudagi ïgai.

Hechos 10:36

—Daiñi— itïtïdai, —Aapimï kïïga maatï sai Diuxi maa ïmo bhai ïrhiaragai aatagi go judidiu. Aagidi ïgai sai mosïka Suxi Kristo gamaakai urabaragai Diuxi ïmadï. Dai Suxi Kristo ïgai dai bïïxi adama ïr gatïanïdami oidigi daama.

Lukas 12:33

Dai Suxi potïtïdai ïpï, —Daiñi gin aaduñi, xako bhai darasada aapimï ixtumaxi aapimï namïakami ïrhidi, ami gïn tïtïitodamu aapimï. Kaxkïdï abïr gagara mïx tuma biakagi bhaiyoma dai oida go tuminxi go soititigami. Aidï gia biakamu aapimï ïmo tuminxi bhai tuakaru dukai tïbagiana ix makïdï tomarhi ïmo imidagai mai ugiti agai. Dai Diuxi ami darasamu naana maaxi ixtumaxi namïakami gïn bïïtarï ix makïdï tomarhi ïmo imidagai mai ugitimu ïpï. Ami gia mai xia gï buayi ixtumaxi namïakami. Mai bapakïi ïïxibogami ami tudu dai mai tipu batopadagai ixtuma xia duadiagi ix makïdï biakagi aapimï ami— itïtïdai.

Hechos 13:26

Dai Pabora oi go aatagi daidi ikaiti, —Kaïkabïrai gin aaduñi, aapimï tudu ix makïdï ïr pipiixaradï Abraam dai aapimï ïpï ix makïdï ïr xadutuadami Diuxi tomaxi maiti ïr judidiu aapimï. Bïïxkatai aapimï bïïtarï idi ñoki ixtukïdï kïïgakïrï busiagi ïmoko.

2 Korintios 6:7

Dai Diuxi gubukarhigadïkïdï gatïtïïgidi aatïmï ñoki ix makïdï ïr buaboi Diuxi Sandadarugadï dukai gaatabuadatai aatïmï tudu. Dai bui gugukaiña aatïmï go odami ix makïdï buidïrï bïïtï Diuxi dai maiti ixtutuidiña ïgai gïr bui kïïga buañixikatai gïr oidakaraga. Kïïga buañixikami óídaga aatïmï tudu dai gobai gïr soikïi xïïxkadï gïr bui ñokadagi jaa. Gobai gïr soikïi sai mai biakagi ïgai ixtukïdï gïr bui ñokadagi tudu.

Galatas 2:5

Dïï mai ïïgidi aatïmï toma lachi. Ix ïïgiadamudai aatïmï aidï gia ka saagida aagamudai aatïmï ïma maaxi aatagi dai ka maiti ïr go bhai ïrhiaragai aatagikamudai kïïga. Dai aatïmï ipïrhidi xi apia buaboitudada aapimï ix makïdï kïïgakïrï ïr go bhai ïrhiaragai aatagi. Kaxkïdï mai ïïgidi aatïmï ix makïdï pokaiti sai gï agai buaboitudadami ix gïn circuncidandoagi.

Galatas 2:14

Dïï gia aidïxi nïidi aanï sai mai kïïga ibuayi ïgai ixdukatai aagai go bhai ïrhiaragai aatagi antai bui kïkiba go Piduru dai kabami bhagaidi. Ñokidi aanï ïgai bïïxkatai go gaa buitapi tudu. Potïtïdai aanï, —¿Ix tuixi pomaaxi ibuayi aapi Piduru?— antïtïdai aanï. —¿Mai ix ïmo mai judiu duu ibuadana aapi gakuadatai ïmadï ix makïdï maiti ïr judidiu? ¿Dai xibi ix tuixi gubuakïdï aagidimi aapi go ix makïdï maiti ïr judidiu sai ïïgidiña ïgai go Moises sïïrhikamigadï? Gobai ka maiti ïr go bhai ïrhiaragai aatagi di. Aagidimi aapi go odami sai judidiu dukai ibuadagi ïgai tudu. Dai xibi baasïki ïïgi aapi mai ïmo judiu dukai ibuadatadai gakuadatai aapi ïmadï ix makïdï maiti ïr judidiu. ¿Dai xibi ipïrhidi pïxi xi go ix makïdï maiti ïr judidiu xi judidiu dukai ibuadagi gubuakïdï biakatai xi ïïgiadagi go sïïrhikami? Gobai ka maiti ïr go bhai ïrhiaragai aatagi— antïtïdai aanï.

Efesios 4:21

Kïïga kaïkana aapimï Suxi Kristo aatagidï tudu. Kïïga máí aapimï ix tumaxi ïr buaboi aidïxi máí aapimï Suxi.

2 Pedro 1:12

Gin aaduñi, ka kïïga maatï aapimï ixtumaxi ïr buaboi, ixtumaxi gïn aagidimi aanï idi ojiïrï tudu. Dai ka buaboitudai aapimï gobai. Dïï gia bïïxkïrï apia dudatai gïn aagidamu aanï ïpamu dai podukai gïn tïgituldiadamu aanï gobai.