Kolosenses 1:12 - Northern Tepehuan Bible

¹² aagidiña aapimï Diuxi sai kïïga bhai gïn ïrhidi ïgaikïdï. Sai bhai gïn ïrhidiña aapimï tudu Diuxikïdï maatïkatai sai ïgai ka bhai gïr dui sai biakana aatïmï bïïxi ixtumaxi bia Diuxi gïr bïïtarï. Aatïmï gïr bïïtarï tudu ix makïdï kaxi ïr maamaradï. Aatïmï ix makïdï kudagiïrï dukai óídaga ïïgiditai ixtumaxi ïr buaboi tudu.

Tepehuan Northern: Diuusi ñiooquidʌ utuducami oodamicʌdʌ

¹² Diuusi gʌroigʌli gʌrsoimaascamiga cascʌdʌ viaa aatʌmʌ sʌʌlicami ʌʌmadu vʌʌsi aa vaavoitudadami isiimiagi tʌvaagiamu dai isDiuusi cʌʌgacʌrʌ gʌrnʌijadagi. Cascʌdʌ baigʌrʌlidi aatʌmʌ Diuusi gʌroogacʌdʌ.

Kolosenses 1:12 Referans Kwoze

Hechos 20:32

Xibi daanïi aanï Diuxi sai ïgai gïn nukadakana dai sai kïïga ïïgiada aapimï Diuxi ñokidï ix makïdï aagai xïï kïï tuiga Diuxi. Diuxi ñokidï kïï gupurtudarhiga dai ïgaikïdï biaka antaada aapimï naana maaxi ixtumaxi kïï bhai maaxkami ix makïdï Diuxi bhai dáí maamaradï bïïtarï.

Efesios 1:11

Ïkobai gïr bubaitu Diuxi bïïnakai aatïmï Suxi Kristo tudu. Tukamidïrï abhiadïrï ïïgi podukai gï tïgitokatadai Diuxi xi aatïmï ix makïdï bïïna daraja Suxi Kristo ïr ïko bubaidadïkana. Podukai dáí ïgai saidi ïpï gï duna ixdukatai ïgai ipïrhidi. Bïïxkïrï ibuayi ïgai ixdukatai gï tïgitokagi kaxkïdï.

Efesios 1:18

Daanïi aanï Diuxi sai kïïga gïn maatïtuldana gïn iibhïdagïrï tudu. Aidï gia maatïkamu aapimï xïïxi ïr gïdukami go bhai ïrhiaragai ix makïdï bia Diuxi gïr bïïtarï, aatïmï gïr bïïtarï tudu ix makïdï ïr bapaidarxigadï. Diuxi gïr báí xi gïïpi bhai ïrhiarakïdï nïnïrakana aatïmï gobai ix makïdï bia ïgai gïr bïïtarï.

Hechos 26:18

Dai tïïgidamu aapi ixtumaxi ïr buaboi bai ïgai dagitona go soimaaxkïdï tïgibudagai tukamukïdï dai oijadana go kïïgadukïdï tïgibudagai ix makïdï ïr kudagi tudu. Sai ka maiti gïn tïanïna go diabora dai Diuxi gïn tïanïna bhaiyoma. Daidi oigïrhixikami bimu soimaaxkamigadï gin buaboitudaitai ïgai dai uraba bimu ïgai Diuxi ïko bubaidadï— gin tïtïdai Suxi— itïtïdai Pabora.

Efesios 3:6

Podukai máí ïgai sai Diuxi ïki abhiadïrï kaxi gï tïgitokatadai sai go odami ix makïdï maiti ïr judidiu ïpïan ïxi biakana sïïrhikami ïmadï go judidiu. Diuxi ipïrhidi sai gïn bïïtarïkagi ïpï bïïxi ixtumaxi kïïgadukami ix makïdï Diuxi bia maamaradï bïïtarï. Xibi ka bïpïnakai Suxi Kristo kaxi ïr ïmo aadunumïkana go judidiu ïmadï ix makïdï maiti ïr judidiu. Gobai tudu ïr Diuxi tïgibudadï ix makïdï ïxtokikana ïkioma. Dai xibi gia go odami ix makïdï maiti ïr judidiu mos buaboitudakai go bhai ïrhiaragai aatagi ka ïpïan ïxi gïn ajïga xi biakagi ix makïdï Diuxi aagai sai maakiagai. Mos buaboidakai ïgai Suxi Kristo tudu.

2 Korintios 5:5

Dai Diuxi ka bhai dui ix dukatai biakagi aatïmï gïr tukugai utudui. Asta gïr maa ïgai ïïgi Ibhïadï sai gïr ïmadï dakana tudu. Kaxkïdï kïïga maatï aatïmï saidi iduñimu Diuxi ixtumaxi gïr aagidi. Kïïga maatï aatïmï sai buaboikïdï gïr maaki agai gïr tukugai utudukami tudu. Ïma dukai xadïrï gïr maakimudai ïgai Ibhïadï sai gïr ïmadï dakana tudu.

Romanos 8:17

Maamaradï aatïmï Diuxi tudu. Kaxkïdï xibi bïïxi go bhai ïrhiaraga ix makïdï Diuxi bhai darasakami bia Suxi Kristo bïïtarï ïr aatïmï gïr bïïtarï ïpï. Dïï gia gï agai xi soimaaxi taatagi aatïmï ïpïan dukai ix dukatai taata Suxi bai podukai gïr aiyagi ïmo xadutudaragai ïgai ïmadï ïpï.

Hebreos 3:14

Gï agai xi gïr mamaakadagi aatïmï ñoki aipakoga dai xi gïr abïnakiadagi ix apia buaboitudada aatïmï tudu. Kaxkïdï tudu kïïga maatï aatïmï sai gï agai xi apia kïïga buaboitudada aatïmï asta xïïxkadï ukami óídakagi aatïmï. Gï agai xi mo ïxi buaboitudada aatïmï ix duu buaboitu aatïmï tukamïrï tudu sai podukai kïïga biakana aatïmï ïmo urabaragai Suxi Kristo ïmadï.

VUAANA 14:6

Daidi Suxi itïtïdai, —Aanï tudu ïr go boi ixtukïdï ajïi odami xako daja Diuxi. Mosïkaxi aanïkïdï mamaatïrïi odami ixtumaxi ïr buaboi. Dai mosïkaxi aanïkïdï kïïgakïrï óídaga odami ïpï. Mai tipu xorai aiyagi mïïka xako daja Diuxi ix maiti gin buaboitudadagi ïgai.

Apokalipsis 21:23

Ami maiti gï agai tasai dai tomarhi masadai. Diuxi ïgai daidi ïr kudagigadï kaxkïdï dai go Arhi Kañiru tïgidukïdï ïr kudakarudïka agai mos ïï kudagigakatai ïgai bïï gokatai.

Hebreos 12:23

Gin aaduñi, ka urabaka aapimï bïïxi go buaboitudadami. Ka bipiatu aapimï ïmo sïïrhikami dai ïmo bhai ïrhiaragai Diuxi amadïrï tudu ïpïan dukai bïïxi buaboitudadami. Daiñi, bïïxi odami ix makïdï ïr gaxixïgi bhïiyi sïïrhikamigadï ogadï. Dai bïïxi buaboitudadami ïr gaxixïgi duu, maamaradïkatai ïgai Diuxi. Bipiatu aapimï ïmo gïdukami bhai ïrhiaragai sïïrhikami tudu aidïxi Diuxi podukai aagai sai aapimï ïr maamaradï. Saidi aapimï ïr gaxixïgi duu tudu. Gin aaduñi, ka urabaka aapimï go buaboitudadami ix makïdï ka ojixi tïbagiana. Xibi ka buaboitudakai aapimï bapakïi aapimï Diuxi buitapi gïn iibhïdagakïdï. Dai ïgai ïr ix makïdï aagada agai xorai kïï dui dai xorai mai kïï dui. Ami Diuxi buitapi xako ajïi aapimï ami daraka go odami ix makïdï kïï buañixi iibhïadï daidi ka koi. Ka urabaka aapimï go buaboitudadami ix makïdï ka kïïgakïrï bubuaka. Ïgai ïr ix makïdï ka bhai duñixi iibhïadï Diuxi bïïtarï tudu.

Kolosenses 2:2

Kabami ipïrhidi aanï tudu sai aapimï ïmadï bïïxkatai ïgai kïïga abïnakian taadakagi dai sai kïïga gïn urabakagi gïn oigïdaitai aipakoga. Kabami ipïrhidi aanï sai biakana aapimï ïmo ixtumaxi kïïga namïakami. Ipïrhidi aanï sai gïn ibhïxtakan taadakagi aapimï kïïga maatïkatai aapimï Suxi Kristo tudu. Daiñi, go óídakami ïïki mai maatïkatadai sai oidaka agai ïmo kïïgakïrï bubiadami ix makïdï odami ïrana oidaka agai. Diuxi mai maaxiturhi ïgai kaxkïdï. Dïï gia ipïrhidi aanï sai aapimï gia kïïga maatïkana.

Efesios 5:20

Bïïxkïrï dai bïïxi aïkatïrï abïr aagida Diuxi gïr Oga xïï bhai gïn ïrhidi aapimï ïgaikïdï. Daidi abïr aagada ïpï sai Suxi Kristo ïgai dai bhai dui gïn bïïtarï xi kaxkïdï aatagïi aapimï Diuxi ïmadï.

1 Korintios 8:6

Dïï aatïmï kïï maatï sai mos arhi ïmaduga Diuxi gïr Oga ix makïdï idui bïïxi aïkatai. Ïgai bïïtarï tudu óídaga aatïmï. Dai mos arhi ïmaduga Gïr Nukadakami ïpï dai ïgai ïr Suxi Kristo. Ïgaikïdï idui Diuxi go oidigi dai ïgai gubukarhigadïkïdï óídaga aatïmï.

Romanos 15:27

Bïïxi bhai ïrhiaradïkïdï ipïrhi ïgai xi otosdagi go soiñi tudu. Dai tomax dukai biakatadai ïgai sïïrhikami xi soiñagi go buaboitudadami Jerusalenïrï, go ix makïdï ïr judidiu tudu. Ïkioma go buaboitudadami judidiu kïïga soi ix makïdï maiti ïr judidiu maakakai ïmo gïdukami soiñi Diuxiañdïrï. Otoxi ïgai xorai maatïtuldagi Diuxi ñokidï tudu. Kaxkïdï xibi ïr sïïrhi xi gobai ix makïdï maiti ïr judidiu otosdagi ïmo soiñi ïïgi gïn buxtuidagañdïrï go Jerusalenïrï óídakami bïïtarï.

Santiago 3:9

Ïïmo imidagai kïïga xadutuadan kaitiña odami Diuxi dai bhodïrï laachkïdï ïgalbaaxi odami galnaaxi ñokaiña buidïrï jaa odami ix makïdï Diuxi idui. Galnaaxi ñokaiña ïgai buidïrï jaa odami tomaxi Diuxi idui go odami sai ïpïamaaxkana ïgai Diuxi tudu.

Hebreos 3:1

Gin aaduñi, Suxi ïgai daidi ïr bhai buadami gïr soimaaxkamiga bïïtarï go bhaitï kïakïdï dadaxdadamikatai ïgai. Dai kaxkïdï kïïga gï agai xi gïn tïgitokagi aapimï xorai go Suxi. Ïgai ïr Otosadï Diuxi tudu daidi ïr Bïïxi Adaama Dadaxdadami gïr bïïtarï. Aatïmï gïr bïïtarï tudu ix makïdï buaboitudai dai aipako aagaiña aatagi aagaitai ïgai. Gobai gï agai xi gïn tïgitokagi aapimï buaboitudadami. Aapimï tudu ïr ïko bubaidadï Diuxi ix makïdï bapaidi ïgai sai oidiña aapimï.

Kolosenses 3:17

Dai bïïxkïrï xïxkadï ñokadagi aapimï xiïpï xïxkadï ibuadagi aapimï ixtumaxi abïr Suxi Kristo bïïtarï ibuada ka urabakatai aapimï ïgai. Dai gïn tïgitobïrai ïpï sai Suxi Kristo ka bhai dui gïn bïïtarï sai biakana aapimï oigaragai xi Diuxiatanamïidana tïdagi Diuxi gïr Oga kaxkïdï dudatai abïr potïda ïgai.

Kolosenses 3:15

Gin aaduñi, Diuxi gïr báí tïsaidi ïmo tukugai dukamikagi aatïmï ïmo aadunumïkatai aatïmï. Kaxkïdï kïïga abïr gïn tïgito nïijada ixtumaxi ibuadagi aapimï. Oijadabïrai tudu go ibhïxtaragai dai urabaragai ix makïdï gïr maa Suxi Kristo. Sai gobai ïgai dai gïr tïanïna tudu. Dai dudatai abïr aagiada Diuxi sai bhai gïn ïrhidi aapimï ïgaikïdï ïpï.

Efesios 5:4

Kaxkïdï maiti gï agai xi galnaxi ñokada aapimï tomarhi xi aagadagi buirudagai maaxi. Tomarhi tïtïïbïitai maiti gï agai xi aagada aapimï ïmo galnaaxi ñoki. Bhaiyoma gï agai xi aagadagi aapimï xïï bhai gïn ïrhidi Diuxikïdï.

Efesios 4:6

Ïmaduga Diuxi gïr Oga ix makïdï ïr tïanïdamigadï bïïxi óídakami dai gïr ïrana daja dai aatïmïkïdï gï maaxitudai.

1 Korintios 9:23

Bïïxi gobai ibuayi aanï ipïrhiditai sai aipakoga aïna go bhai ïrhiaragai aatagi. Dai pobuayi aanï biaka iñïrhiditai urabaragai mui buaboitudadami ïmadï ïpï buyitai aatïmï go bhai ïrhiaragai ix makïdï bia Diuxi gïr bïïtarï.

Romanos 11:17

Go judidiu ïr ïpïan dukami ïmo mamaaradï guikomidikami ïmo oliboañdïrï kïï finuakami. Dai aapimï ix makïdï maiti ïr judidiu ïr ïpïan dukami ïmo mamaaradï ïmai oliboañdïrï korientegami ix makïdï Diuxi guikoma dai ïpamu saitu go finuakïdï olibo kïakamiïrï. Xibi aapimï ix makïdï maiti ïr judidiu bhïjimi go gubukarhigai ix makïdï ïr go finuakami olibo mamaaradï bïïtarïkatadai. Bhïjimi aapimï gubukarhigai ix makïdï ïr go judidiu bïïtarïkatadai tudu.

Romanos 9:23

Dïï tomaxi gïr ajïakatadai ix taatagi gïgïbidaragai bïïxkïrï Diuxi soi gï ïrhidi gïr nïiditai. Gïr tïtïgida ïrhiditadai ix xïï kabami ïr gïdukami ïgai dai xïï kïï tiodi. Kaxkïdï maiti gï dagito ïgai xi gï maitagi go ojodaragai. Diuxi ïkiaxdïrï dáí saidi aatïmï kïïgakïrï ïpïamaaxkana ïgai, aatïmï ix makïdï ïr ïko bubaidadï tudu. Dai odami tïgibudadïrï mai ajïi xi maatiagi xïiduru Diuxi gubukarhigadï ïmadï bhai ïrhiaradï ïpï ix makïdï bia ïgai gïr bïïtarï.

VUAANA 20:17

Daidi go Suxi itïtïdai, —Maiti bhïbhïda gin tukuga, mai kia tïsai aanï mïïka xako daja gïr Oga— itïtïdai. —Bhaiyoma imi dai mïï aagida gin mamaatïrdamiga sai ka imïda iñagai aanï mïïka xako daja Diuxi gin Oga. Aagidañi sai Diuxi gin Oga ïr aapimï gïn Diuxiga dai aapimï gïn Oga ïpï— itïtïdai.

VUAANA 4:23

—Gin tïkakai aapi ix dukatai ïr kïïga ix xadutuada odami Diuxi. Daiñi, Diuxi ïr ïï ibhïdagai, ïbïrhi gï dukami ïgai tudu dai kaxkïdï ipïrhidi ïgai ix odami kïïga xadutuadagi gïn ibhïdagakïdï. Dai ka miadaimi ixtuigako Diuxi Ibhïgadï maakimu tïgibudagai odami dai maatïtuldamu ix dukatai xadutuada ïgai Diuxi dai bïïxi odami ix makïdï kïïgakïrï xadutuada ïrhidi kïïga ïïgiadamu Diuxi Ibhïgadï. Diuxi ipïrhidi ix podukai xadutuadagi odami ïgai tudu, ïïgiditai Diuxi Ibhïgadï. Dai aanï aagai sai xibi ka ayi ix tuigako odami kïïga ïïgiadamu Diuxi Ibhïgadï dai podukai buaboikïdï xadutuadamu Diuxi— itïtïdai.

Mataibo 25:34

Dai bhodïrï aanï ix makïdï ïr go gïï Rey aagidamu ïmo ñoki go buaboitudadami gin sïïrhixapadïrï darakatai ïgai dai potïdamu aanï, —Gimibïrai aapimï ix makïdï Diuxi gin Oga ka maa ïmo gïdukami bhai ïrhiaragai. Aidï abhiadïrï xi mai kia kïkibatadai oidigi Diuxi ka bhai buayitadai ixdukatai gïn tïanïdagi tudu dai gobai ïr gïn bhai ïrhiaraga. Dai xibi ka ayi ix bhïiyagi aapimï gïn bhai ïrhiaraga urabakatai aapimï Diuxi aaduñdï ix makïdï gatïanïi ïgai.

Apokalipsis 22:14

Odami ix makïdï bapakoi yukuxidï dai ka bia oigaragai xi kukumiagi ibhiadï go uxi ixtukïdï kïïgakïrï óídaga odami, gobai gia bia ïmo gïdukami bhai ïrhiaragai. Bia ïgai oigaragai xi bapakïdagi go gïï utudui kiikiïrï tudu.

Apokalipsis 22:5

Dai ami ka mai tipukamu tukagi dai maiti gï agadamu tomarhi ïmo kudakarui dai tomarhi maiti gï agadamu tasai ami dakatai Diuxi Gïr Nukadakami. Ïgai tudu kudaidaka agai buaboitudadami. Dai go buaboitudadami bhïimu sïïrhikami dai bïïxkïrï bïïtarï gatïanïda agai.

1 Juan 1:3

Daiñi, aatïmï ix makïdï ïr ojotosadï Suxi Kristo bia ïmo kïïgadukami urabaragai Diuxi ïmadï dai Suxi Kristo ïmadï ïpï ix makïdï ïr Diuxi Maradï. Dai kaxkïdï gïn aagidimi aatïmï gobai ix makïdï nïidi aatïmï dai kaï ïpï ix makïdï gïr tïtïïgidi Suxi Kristo. Ipïrhidi aatïmï sai biakana aapimï urabaragai Diuxi ïmadï dai Suxi Kristo ïmadï ïpï gïr ïpïan dukai kaxkïdï.

1 Pedro 5:1

Xibi ojamu aanï ïmo ñoki go bhaitï gukakamigadï go buaboitudadami bïïtarï. Gin kaïkabïrai, aanï ïpï ïr ïmo bhaitï kïakamigadï go buaboitudadami ïpï dai nïidi aanï aidïxi soimaaxi taatamaitadai Suxi Kristo. Aanï ïpï urabamu Suxi xïïxkadï dibiagi ïgai dai gï maaxitudagi xïïxi ïr gïdukami ïgai.

Tito 2:14

Suxi Kristo tudu ïgai dai gï dagito ix gï muatudagi kïïgakïrï gïr bubaiditai gïr soimaaxkamiañdïrï. Podukai bhai dui ïgai saidi ïr aaduñdïkana aatïmï Diuxi kïïga buañixikami gïr biakai ïgai. Dai xibi ka kïïgakïrï buabuakïkai aatïmï ipïrhidi ïgai sai bïïxi gïr bhai ïrhiarakïdï ibuadagi aatïmï ixtumaxi ïr kïïga.

2 Korintios 11:14

Gin aaduñi, kïïga maatiga maaxi ix tuixi podukai buirumada ïrhidiña ïgai óídakami. Go diabora ïgai daidi ïr tïanïdamigadï kaxkïdï. Dai kïï maatï aatïmï sai go diabora ïmo tïañikarudï Diuxi dukai gï dadasai buirumada ïrhiditai ïgai go óídakami.

Efesios 2:18

Tomax dukai, xi ïr judiukagi aatïmï xi maiti ïr judiukagi ïpï, tomax dukai Suxi Kristo gïr maa baakigai xi urabana aatïmï gïr Oga. Xibi Diuxi Ibhïadïkïdï bhaiga aatïmï xi aatagiadagi ïgai tudu.

Efesios 5:8

Ïkioma aapimï mos ïr ïï tukamudagaikana dïï xibi gia ïr kudagi aapimï buaboidakai Gïr Nukadakami. Kaxkïdï abïr bhai maaxkami dukai óídaka dai kïïga maaxituda xi gia ïr kudagiïrï óídakami aapimï xibi.

Efesios 5:11

Maiti abïr urapïkïda ix makïdï soimaaxi ibuayi. Ïgai ibuayi ixtumaxi maiti ïr soiñi dai aapimï maiti gï agai xi pomaaxi ibuadagi. Bhaiyoma abïr maakada ïgai ñoki dai kïï maaxiko biada ix makïdï ïgai buayi.