Josue 1:1 - Northern Tepehuan Bible

¹ Kaxi mutadai go Moises ix makïdï ïr otosadïkatadai Gïr Nukadakami dai Gïr Nukadakami aataga ïmadï go Josue. Go Josue ïr maradï ïmo kïïrhi Nun tïgidukami dai soikïiña ïgai Moises. Bhodïrï mukukai Moises sai Gïr Nukadakami aataga ïmadï Josue daidi itïtïdai,

Josue 1:1 Referans Kwoze

Deu 34:9

Dai ïmo maradï Nun, Josue tïgidukïdï, Israelitas bhaitï kïakamigadï bii xibi. Aidïxi kia dajatadai Moises, go Moises darai noonobidï Josue dama dai podukai daibuna kïï sïïrhiñikami tïgibudagai. Kaxkïdï go Israelitas ïïgida kaï go Josue dai ïïgidi go sïïrhikami ïpï ix makïdï Gïr Nukadakami ka maatadai go Moises ïkioma.

Exodo 24:13

Bhodïrï Moises báí ïmo kïïrhi ix makïdï Josue tïgidu xi ïgai oidana tubidakiamu. Dai mai kia iji ïgai dai mïï aatagidi ïgai go bhaitï gukakamigadï go Israelitas daidi potïtïdai, —Tami abïr gïr nïnïraka aapimï. Aatïmï tïïtïigiaragai tubidakiamu xako daja Diuxi. Dai xi biakagi aapimï aatagi xi tumaxi bhai duñagi mai kia dadakai aatïmï abïr aatagida go Aaron ïmadï go Hur xi gobai gïn soiñamu— itïtïdai.

Romanos 1:1

Aanï ïr Pabora dai gïn otoxi idi ojai. Aanï ïr tïañikarudï Suxi Kristo. Dai Diuxi gin dáí an saidi ïr otosadïkana dai ïkobai gin busaitu ïgai ïpï an sai óídakami buitapi aagaiña go bhai ïrhiaragai aatagi ix makïdï Diuxi gïr maa.

Hechos 7:45

Dai gokiïrï mui umigikïdï aidïxi kaxi gatïanïitadai go Josuekaru bai gïr aaduñi apia kia kusu ajiopaiña go ikuxi kiupai. Aidïpïrï gïr aaduñi bui surhi go aa ïma maa ñokadami ix makïdï tanai óídakatadai dai popoki tanai oidigi. Diuxi gubudakïdï bubaitu go ïkidï óídakami tabhaidïrï tudu dai maa ïgai tami oidigi gïr aaduñi sai tami óídakana ïgai. Dai gï aaduñi ïïki bhaigobai bua go ikuxi baki dai ami xadutudaiña Diuxi asta aidïxi dibia go Rey Dabidkaru.

Deu 34:5

Dai Moises, go otosadï, Diuxi ugidagai ami Moabïrï. Ïkiaxdïrï ka podukai agaitadai Gïr Nudakakami dai ka pobïduiyi.

Apokalipsis 1:18

Aanï ïgai dai tomax tuigako oidaga tudu. Muu aanï ïmo imidagai dïï gia xibi ka duaka aanï dai bïïxkïrï bïïtarï oidaka iñagai. Dai bia aanï bamioma gubuka xi bhai go mukigami dai gobai bhaiga xi aiyagi mosïkaxi asta xako ukami dagitoagi aanï. Dai bia aanï gubukarhigai xi gatïanïdagi ami xakoga daraka koidadï ïpï— in tïtïdai.

Santiago 1:1

Aanï ïr Santiago ix makïdï gïn ojidi idi ojai. Ïmo pioñigadï aanï Diuxi dai Suxi Kristo Gïr Nukadakami ïpï. Ïmo biatuldaragai bïïtarï bïïxkatai aapimï judidiu ix makïdï ïr buaboitudadami dai ix makïdï aipakoga mïïmïkaxi óídaga oidigi daama, aapimï ix makïdï ïr piipixaradï go bhaibuxtama dan goka maamaradï go Jakobokaru tudu.

Tito 1:1

Bhaiga Tito. Aanï ïr Pabora ix makïdï gï otoxdi idi ojai. Pioñigadï aanï Diuxi ix makïdï gin maa ïmo sïïrhikami saidi ïr otosadïkana aanï Suxi Kristo. Aatabuayi aanï soiña iñïrhiditai buaboitudadami, kaxkïdï tudu Diuxi ïko bubaidadï ïgai. Soiña in ïrhidi sai kïïga buaboitudana ïgai. Kaxkïdï tïtïïgidiña aanï ixtumaxi ïr buaboi sai buaboitudaiña dai Diuxi maaxi tutiakana ïgai.

Lukas 16:10

—Daiñi— itïtïdai. —Ïïmo odami kïïga ibuayi xïïxkadï gïn nukatuldagi ïgai ixtumaxi. Bïïxkïrï kïïga ibuayi ïgai tomaxi gïn nukatuldagi ixtumaxi mai xii kabami namïakami tudu. Kïïga ibuayi ïgai nukadatai ixtumaxi mai xii namïakami xi kaxkïdï gï maatï ïpï sai kïïga ibuadamu ïgai ix gïn nukatuldagi ixtumaxi kabami namïakami ïpï. Dai podukai ïpï ix mai kïï ibuadagi ïgai nukadatai ixtumaxi mai xii namïakami gokïdï gï maatï ïpï sai mai kïï ibuada antaada ix gïn nukatuldagi ixtumaxi kabami namïakami ïpï.

Josue 1:2

—Ka mai tipu go Moises ix makïdï ïr gin otosaga. Xibi aapi gï agadamu xi go gïï aki Jordan basadïrï baidakagi go Israelitas bai bapakia ïgai Kanaanïrï. Gïn maakia iñagai aanï go Kanaan sai ami óídakagi aapimï— itïtïdai Gïr Nukadakami. Gïr Nukadakami ka aagiditadai go Moises mai kia mukukai ïgai sai go Israelitas bui surhigïna go Kanaanïrï óídakami dai sai popoidana dïdïbïradï tudu.