Hebreos 7:25 - Northern Tepehuan Bible

²⁵ Kaxkïdï bia ïgai gubukarhigai ix kïïgakïrï bubiadagi odami ix makïdï urapïkïdagi Diuxi buaboitudaitai ïgai Suxi Kristo. Bïïxkïrï bïïtarï daja Suxi tudu dai bïïxkïrï bïïtarï apia gadaanturhiada agai ïgai xorai urabagi.

Tepehuan Northern: Diuusi ñiooquidʌ utuducami oodamicʌdʌ

²⁵ Cascʌdʌ istutuidi iscʌʌgacʌrʌ vuviadagi vʌʌscatai ismaacʌdʌ vaavoitudai isiimia agai Diuusi ʌʌmadu dai tomastuigaco oidacagi vaavoitudaitai Suusi Cristo. Ʌgai tomastuigaco oidaga cascʌdʌ, dai daanʌi Diuusi sai soicʌiña vʌʌsi vaavoitudadami.

Hebreos 7:25 Referans Kwoze

Romanos 8:34

Dai Suxi Kristo ïgai dai muu gïr bïïtarï ïpï dai gï duakatu ïpamu dai Diuxi sïïrhixapadïrï daja ïgai xibi. Ami gadaanïi ïgai Diuxi gïr bïïtarï. ¿Xorai potïdana aidï saidi gïr ajïga gïgïbidaragai ami dajatai Suxi dai daanïitai ïgai gïr bïïtarï? ¡Tipu xorai!

1 Tomoteo 2:5

Ipïrhidi ïgai tudu sai odami maatïkana sai mos arhi ïmo Diuxi oidaga dai mos arhi ïmaduga ix makïdï bhai buayi gïr bïïtarï Diuxi ïmadï dai ïgai ïr Suxi Kristo ix makïdï ïmo kïïrhi busai. Mai tipu ïmai.

Udaxi 1:24

Gïn aaduñi, mosïka arhi ïmaduga Diuxi dai ïgai bhai dui go kïïgakïrï bubaidaragai gïr bïïtarï Suxi Kristokïdï ix makïdï ïr Gïr Nukadakami. Kïïga ixtutuidikïi Diuxi ix gïn nukadakagi dai gïn soikïdagi sai mai dagitoagi aapimï gïn buaboidaraga sai podukai mai gïpiïrï surhigiagi aapimï. Dai kïï bhaiga ïgai sai bhai gïn buadagi saidi kïïga bhai ïrhiarakïdï gukakagi aapimï ami xako kabami totoarïi buitapi Diuxi. Kabami totoarïi Diuxi tudu mos ïï kïïga xigiamaaxkatai ïgai dai mos ïï kabami gubuakatai ïgai ïpï. Kïïga ixtutuidikïi ïgai ix bhai gïn duñagi sai mai biakagi aapimï toma lïïchi soimaaxkami gïn abhana dai bhodïrï baan gïn tutusamu ïgai ami buitapi ïgai ka kïïga bhai gïn dunakai ïgai.

VUAANA 14:6

Daidi Suxi itïtïdai, —Aanï tudu ïr go boi ixtukïdï ajïi odami xako daja Diuxi. Mosïkaxi aanïkïdï mamaatïrïi odami ixtumaxi ïr buaboi. Dai mosïkaxi aanïkïdï kïïgakïrï óídaga odami ïpï. Mai tipu xorai aiyagi mïïka xako daja Diuxi ix maiti gin buaboitudadagi ïgai.

Efesios 2:18

Tomax dukai, xi ïr judiukagi aatïmï xi maiti ïr judiukagi ïpï, tomax dukai Suxi Kristo gïr maa baakigai xi urabana aatïmï gïr Oga. Xibi Diuxi Ibhïadïkïdï bhaiga aatïmï xi aatagiadagi ïgai tudu.

Romanos 5:2

Buaboidakai aatïmï Suxi Kristo baa aatïmï ïmo gïdukami bhai ïrhiaragïrï ix makïdï gïr maa Diuxi gïr oigïdaitai. Dai xibi bhai ïrhiarakïdï nïnïraka xi urabagi aatïmï Diuxi xudu gï maaxitudagi ïgai xïïxi ïr gïïdukami.

Hebreos 11:6

Dai gokïdï gï maatï sai go Enok kïïga buaboitu Diuxi. Xi ïmo odami mai buaboitudagi xadïrï bhai ïrhidiña Diuxi ïgaikïdï tudu. Kaxkïdï tudu xorai uraba ïrhiadagi Diuxi gï agai xi buaboitudagi ix oidaga Diuxi. Dai gï agai ïpï xi buaboitudagi sai Diuxi kïïga buidada agai ïgai kabami gï aajagïitai gaagaitai urabaragai Diuxi ïmadï.

Efesios 3:20

¡Gï agai tudu xi kïïga xadutuadagi aatïmï Diuxi! Ïgai gubukarhigadï tudu aatabuayi gïr ïrabiadïrï. Dai ïgai bia gubukarhigai ixtukïdï ibuadagi gïïpi bamioma ixtumaxi xi bhai ix makïdï aatïmï bhaiga xi gïr tïgitoagi xi ïpï xi tañiagi ïpï.

Hebreos 7:19

Go ïïkidadï sïïrhikami toma lachi mai soi óídakami ix kïïga biïna Diuxi ïmadï tudu. Dïï xibi gia mamaakai Diuxi sïïrhikami go Suxi Kristo saidi ïr dadaxdadamikana. Dai podukai gïr maa ïgai ïmo kïïgadukamioma buaboidaragai ix makïdï gia kïïga gïr soikïi dai kïï kabaka. Kïïga maatï aatïmï tudu sai go utudui buaboidaragaikïdï gia kïïga bia aatïmï oigaragai ix aiyagi Diuxi buitapi dai biagi ïmo urabagi ïgai ïmadï.

VUAANA 14:13

Aidïpïrï iduñimu aanï bïïxi aïkatai ix tumaxi gin tañiagi aapimï gin mamaatïrdamikatai aapimï. Dai podukai nïijadamu odami xïïxi ïr gïdukami gin Oga ibuadatai aanï ix tumaxi gin tañiagi aapimï.

Hebreos 5:7

Daiñi, aidïxi tami oidigi daama aimïraitadai Suxi Kristo kïïga maatïkatadai ïgai sai Diuxi bhaigakatadai xi soiñagi sai mai mukuna ïgai. Dai kaxkïdï suakaiña ïgai dai asta iñakaiña daanïitai Diuxi sai mai dagitona ix soimaaxi taatagi ïgai. Dïï gia bïïxkïrï kïïga xadutudaiña dai ïïgidiña ïgai Diuxi xi kaxkïdï Diuxi kaïkana ixtumaxi daanïdagi ïgai.

Isa 53:12

Kaxkïdï Gïr Nukadakami maakimu gubukadagai. Dasamu ïgai xi ïr gïï bhaitï kïakamigadï ka agai mui aaduñdï. Maatïmu ïgai buidïrï ix makïdï bui bïïtï. Dai bhodïrï gïïpi bhai ïrhiarakïdï takobida agai maitïkidï aaduñdï ïmadï. Ïïgi gï tïïgitu ïgai mïtai mua. Odami ïmo soimaaxi ibhïdagami dukai nïidi. Dïï ïgai muu kusu imïitai mui odami soi maaxkamigadï ix makïdï mai ïïgidi Diuxi. Podukai gï báí ïgai bïïtarï ix makïdï mai ïïgiditadai Diuxi.

Hebreos 13:15

Gin aaduñi, Suxi Kristo ka bhai dui gïr bïïtarï ixdukatai aatagada aatïmï Diuxi ïmadï. Dai kaxkïdï gï agai xibi xi mai dagitokatai kïïga ñokadagi aatïmï Diuxi bïïtarï. Nïnïraka aatïmï ix gïr aiyagi go oidakaragai ïmo utudui kiikiïrï tudu. Kaxkïdï kïïga gï agai xi aagadagi aatïmï xïïxi bhai gïr ïrhidi Diuxi ïmadï tudu. Daidi maiti abïr dagitotai ibuadagi ixtumaxi ïr kïïga dai soikïdabïrai xorai tïgitokagi ïpï. Kaxkïdï tudu xïxkadï podukai ibuadagi aatïmï ixtumaxi ïr kïïga gobai ïr ïmo xadutudaragai Diuxi bïïtarï. Ïmo daxdaragai gï dukami gobai Diuxi bïïtarï tudu dai bhai gï ïrhidi ïgai gobaikïdï.

Hebreos 2:18

Ka soimaaxi taata ïgai tudu gïr ïpïan dukai. Bïïxi máí ix taadaga aatïmï xïïxkadï go soimaaxi gïr abïnakiadagi gïr tïgibudagai sai soimaaxi ibuada aatïmï tudu. Gïr ïpïan taadatu ïgai dai kaxkïdï kïïga ixtutuidikïi ïgai xi gïr soikïdagi xïïxkadï ïïgiada antaadakagi aatïmï soimaaxi tïgibudagai. Suxi gia ïr go adaama kïïgadukïdï gabhaitïkïakami dadaxdadami tudu.

Filipenses 3:21

Ïgai tudu bia gubukarhigai xi tïanïdagi bïïxi ixtumaxi dai bïïxi ixtumaxi bia xi ïïgiadagi. Dai go galbaaxi gubukarhigakïdï ïma maaxtuda agai Suxi gïr tukuga aidï dibiakai ïgai. Xibi mai xii gubuka gïr tukuga dai otoma ugiatïi. Dïï aidï gia gïr maakimu ïgai gïr tukuga utudui ix makïdï ïpïan maaxkamu ix makïdï bia ïgai. Dai ïgai tukugadï gia kïï gubuka dai kïï tiodi dai mai ugiti agai. Pomaaxika agai gïr tukuga utudui tudu.

VUAANA 14:16

Dai aanï daañimu gin Oga ix ïgai gïn otosdamu ïmai soikïdami ix makïdï gïn ïmadï dakamu bïïxkïrï bïïtarï— itïtïdai.

2 Timoteo 1:12

Dai xibi maixapi aanï ibuadatai go aaduindagai ix makïdï gin maa ïgai dïï mai xaïrai aanï gokïdï. Kaxkïdï tudu kïïga maatï aanï ix tuiga Suxi Kristo ix makïdï buaboitudai aanï dai gobai ïr ïmo abïnakidaragai gin ibhïdaga bïïtarï. Kïïga buaboitudai aanï tudu dai asta nukaturhi aanï gin ibhïdaga. Kaxkïdï tudu kïï maatï aanï sai ïgai bia gubukarhigai ix gin nukadakagi asta xïïxkadï dibiagi ïgai ïpamu.

Hebreos 7:24

Dïï gia Suxi bïïxkïrï bïïtarï oidaga dai mai ugutai oijada agai aaduindadï dadaxdamikatai ïgai bïïxkïrï bïïtarï.

Efesios 3:12

Suxi Kristo kïïga idui ixdukatai Diuxi gï tïgito ïïki kaxkïdï aatïmï xibi mai duadimudakïdï aatagïi Diuxi ïmadï mos buaboidakai aatïmï Suxi Kristo. Xibi kïïga bia aatïmï ïïmadaragai ïmadï Diuxi.

Hebreos 7:8

Daiñi, go dadaxdadami ix makïdï ïr piipixaradï go Lebi budana chïchïki buxtuidadï go óídakami. Buyiña chïchïki ix makïdï kiupiïrï gatïïgidiña óídakami tudu. Dai go dadaxdadami ïgai mumukui ïpïan dukai toma xorai dai ïgai. Dïï gia go Melkisedek mai taadaga ix mukiagi ïgai. Dai ïgai buiyi asta chïki buxtuidadï go Abraam. Kaxkïdï gï maatï sai bamioma namïga go Melkisedek xi bhai go gaa dadaxdadami ix makïdï ïr piipixaradï go Lebi.

Romanos 5:10

Ïkioma gïr bupuidïrï bïïtïkana aatïmï ïmadï Diuxi dïï gia Suxi Kristo, Diuxi maradï, muu dai podukai bhai dui sai ïpamu biakana aatïmï urabaragai Diuxi ïmadï. Suxi Kristo ïpamu duakatu aidïxi ka mutadai. Kaxkïdï xioma maatiga maaxi xibi sai kïïgakïrï bubuakimu aatïmï, ïpamu oidakatai ïgai tudu.

1 Korintios 1:21

Dïï gia Diuxi tïgibudadï gia saitudaga. Dai ïgai podukai gï tïgito dai podukai dáí sai odami tïgibudadïkïdï mai kïïga maatïkana odami Diuxi. Diuxi bhai ïrhi bhaiyoma sai mosïkaxi odami ix makïdï buaboitudagi go bhai ïrhiaragai aatagi gia kïïgakïrï bubuakïna. Dïï óídakami mos buirudagai dukai kaïkana go bhai ïrhiaragai aatagi dai mai buaboitudai.

Hebreos 2:9

Dïï gia Suxi gia ka bhïiyi sïïrhikami dai kaxi gatïanïi ix dukai aagai go ojai. Baasïkioma chïki tasai dumarhioma bii ïgai xi go tïtïañikarudï Diuxi aidïxi ïmo kïïrhi busai ïgai. Dai taata ïgai go mukigami bïïxi óídakami bïïtarï. Po dui ïgai mos ïï kïï tuigakatai Diuxi gïr bïïtarï. Dïï gia xibi ka bhïiyi Suxi gïdukami xadutudaragai ïmo gïï gatïanïdamikatai xibi ix dukai aagai go ojai.