Hebreos 13:1 - Northern Tepehuan Bible

¹ Gin aaduñi, ïmo aadunumï aapimï buaboitudadami dai gï agai xi mai ugutai gïn oigïdada aapimï aipakoga.

Tepehuan Northern: Diuusi ñiooquidʌ utuducami oodamicʌdʌ

¹ Gʌaagai mʌsapiagʌnoigʌadagi aipacoga. Aapimʌ ʌrgʌnaadunumu vaavoitudadami cascʌdʌ.

Hebreos 13:1 Referans Kwoze

1 Juan 4:20

Ix pokaitadagi ïmoko sai oigïdai ïmoko Diuxi dïï gia ix kïïdadagi ïgai aaduñdï Diuxi amadïrï aidï gia yaatagïi ïgai dai maiti ïr buaboi ix oigïdai ïgai Diuxi. Mai oigïdai ïgai tomarhi go aaduñdï ix makïdï kïïga nïnïidiña ïgai tudu. Dai kaxkïdï ¿ixdukatai oigïdaiña ïgai Diuxi ix mai nïidi ïgai tomarhi ïmo imidagai di?

1 Pedro 3:8

Gïn maakimu aanï ïpï ïmo ñoki gin aaduñi. Gï agai sai kïï xioma gïn urapïkïda aapimï aipakoga ïmo tïgibudagai biakatai aapimï bïïxkatai. Soigabïr gïn ïrhiada ïmadï gïn aaduñi Diuxi amadïrï xïïxkadï soi gïn ïrhiadagi ïgai. Gïn oigïadabïrai aipakoga tudu ïmo xixïgïmï dukai. Dai kïïga abïr tutiaka jaa bïïtarï mai gïgïrdukïdï gïn ïrhiditai aapimï.

1 Pedro 1:22

Daiñi gin aaduñi, aapimï ka ïïgidi go buaboi aatagi dai ka buañixikami bii gïn ibhïdaga. Kaxkïdï gï agai sai kïïgakïrï gïn oigïdada aapimï aipakoga bïïxi gïn ibhïdagakïdï.

2 Pedro 1:7

Dai bhodïrï ka kïïga ïïgiditai aapimï Diuxi gï agai ïpï mïx kïïga oigïdadagi aapimï gïn aaduñi Diuxi amadïrï ïmo gïn xïgïmï dukai. Dai bhodïrï gï agai sai oigïdada aapimï bïïxi go gaa óídakami ïpï. Podukai abïr óídaka tudu maatïkatai ixtumaxi idui Diuxi gïr bïïtarï.

1 Pedro 2:17

Kaxkïdï abïr xadutuada bïïxi óídakami daidi abïr oigïdada bïïxi go buaboitudadami. Gïn tïgitobïrai xïïxi ïr gïdukami Diuxi daidi abïr xadutuada ïgai. Dai xadutuadabïrai go gïï dunukami romano ïpï.

Hebreos 10:24

Gï agai ïpï xi kïïga gïr tïgito nïijada aatïmï aipakoga dai gaagadagi ix dukatai gïr soikïdagi. Podukai kïïgioma gïr oigïdadamu aatïmï bïïxkatai daidi ibuadamu aatïmï ixtumaxi ïr kïïga.

2 Tesalonicenses 1:3

Gïr susukurhi, dudatai aagidiña aatïmï Diuxi sai bhai gïr ïrhidi aatïmï ïgaikïdï maatïkatai sai kïïga buaboitudai aapimï. Kïïga ïr sïïrhi ix aagiada aatïmï Diuxi sai bhai gïr ïrhidi ïgaikïdï tudu. Kïï maatï aatïmï sai bamioma kabakami dukai buaboitudai aapimï xibi dai sai bïïxkïrï bamioma gïn oigïdai aapimï aipakoga ïpï. Kaxkïdï bia aatïmï sïïrhikami ix potïdagi aatïmï Diuxi sai bhai gïr ïrhidi ïgaikïdï.

1 Pedro 4:8

Podukai gï agai sai óídakagi aapimï tudu. Dai xibi gïn aagidamu aanï ixtumaxi ix makïdï adaama gï agai saidi ibuadagi aapimï. Gï agai aapimï buaboitudadami xi kïïgakïrï gïn oigïdadagi aipakoga tudu. Gobai ïgai dai adaama gï agai saidi ibuada aapimï. Ix gïn oigïdadagi aapimï aipakoga aidï gia tomaxi dudatai soimaaxi gïn buidadagi gïn aaduñi aapimï bïïxkïrï mai bui ñokadamu ïgai. Kaxkïdï gï agai sai gïn oigïdadagi aapimï aipakoga.

Galatas 5:22

Dïï gia xïïxkadï ïïgiadagi aatïmï Diuxi Ibhïadï gïr ïrana aatabuayi ïgai dai bhai buayi naana maaxi kïïgadukami gïr ïrañdïrï. Ïïgiditai aatïmï Diuxi Ibhïadï oigïdaiña aatïmï jaa dai bhai gïr ïrhidiña dai gïr ibhïxtakan taadakana aatïmï gïr ibhïdagïrï. Kïïga gïr kabakadaiña aatïmï ïpï xïxkadï soimaaxi taatamadagi. Kïï tutiakana aatïmï jaa bïïtarï dai ibuadana ixtumaxi ïr kïïga. Bïïxkïrï ibuadana aatïmï ix tumaxi aagagi aatïmï ïpï.

Galatas 5:13

Daiñi gin aaduñi, Diuxi gïn báí mïsai kïïgakïrï óídakana aapimï. Gïn báí ïgai sai ka mai biakagi aapimï xi pipioñi dukai ïïgiadagi ïmo sïïrhikami tudu kabami gïn tïanïitai gobai. Ka kïïgakïrï gïn bubaitu ïgai tudu. Kaxkïdï kabami soi gin ïrhidiña aanï gïn aagiditai jaa sai bia aapimï xi ïïgiadagi go sïïrhikami. Maiti ïr podukai di. Daiñi, kïïga ïr buaboi tudu sai mai gubuakïdï bia aapimï xi ïïgiadagi go sïïrhikami sai podukai kïï biïna Diuxi ïmadï. Dïï gia maiti abïr po gïn ïrhiada ïpï sai bhaiga aapimï xi ibuadagi ïïgi ixtumaxi iduña ïrhiada aapimï oiditai ïïgi gïn tïgibudaga. Gï agai bhaiyoma xi aipakoga gïn soikïdagi aapimï gïn oigïdatai aipakoga.

Apokalipsis 2:4

Dïï bïïxkïrï mai bhai gin ïrhidi aanï maatïkatai sai mai kïï ibuayi aapimï ïmo ixtumaxiïrï. Ka mai kïïga gin oigïdai aapimï tudu ixdukai gin oigïdaiña aidïxi tukamïrï buaboitu aapimï. Gokïdï gia mai kïïga ibuayi aapimï.

1 Juan 3:23

Diuxi gïr tïjai sai buaboitudaiña aatïmï Maradï, sai buaboitudana aatïmï Suxi Kristo tudu. Dai gïr tïjai sai gïr oigïadagi aatïmï aipakoga ïpï. Gobai ïr go sïïrhikami ix makïdï gïr maa Diuxi tudu.

Galatas 5:6

Ka bïïna daraka aatïmï Suxi Kristo tudu xi kaxkïdï mai xudu xi circuncidadugakagi ïmoko xiïpï xi mai circuncidadugakagi ïpï. Maiti ïr ixtumaxi gobai. Xibi mosïkaxi namïga xi buaboitudagi aatïmï Suxi Kristo dai xi gïr oigïdadagi aipakoga. Podukai tudu gïr oigïdaitai aipakoga maaxitudai aatïmï sai kïïgakïrï buaboitudai aatïmï.

VUAANA 15:17

Gin mamaatïrdamiga aapimï tudu dai gïn tïanïi aanï sai gïn oigïdada aapimï aipakoga— itïtïdai.

Efesios 5:2

Kïïga abïr oigïada jaa aidï. Daiñi, Suxi Kristo gïr oigïdai kaxkïdï ïïgi gï dagito ïgai sai gï muatudana ïmo daxdaragai dukai. Podukai bhai dui ïgai gïr bïïtarï soimaaxi idunakai aatïmï. Dai Diuxi kïï bhai ïlda tïï Suxi Kristo daxdaradï. Kïï xigian dukai ubagi ïgai.

Efesios 4:3

Bïïxi gïn gubukarhigakïdï abïr gaaga ixdukatai mos ïmo tïgibudagai biaka aapimï daidi ïmo aadunumï dukai abïr óídaka. Diuxi Ibhïadï ïgai dai gïn soikïi tudu xi kïï xioma óídakagi aapimï ïmo aadunumï dukai.

Hechos 4:32

Dai ka muidukana buaboitudadami dai bïïxkatai biakatadai ïmo tïgibudagai aidï. —Ix makïdï bia aatïmï gïr buxtuidaga bïïxkatai gïr aaduñi ïr tuidadï gobai— gïn ïrhidiña ïgai.

Hechos 2:1

Bhodïrï ka aïkai go gïï tasai xadutudikïdï Pentekostes tïgidukïdï bai gïn ïmpagi bïïxi go buaboitudadami ïmo kiiyïrï.