Hebreos 1:9 - Northern Tepehuan Bible

⁹ Dai Diuxi potïtïdai ïpï sai, Aapi gin Maara sïïrhikïdï ojoidi ixtumaxi ïr sïïrhi dai mai ojoidi aapi ixtumaxi maiti ïr sïïrhi. Kaxkïdï gï maakimu aanï ïmo gïdukami sïïrhikami sai kïïga gï xadutudaiña jaa. Bamioma gï maakai aanï xadutudaragai dai bhai ïrhiaragai xi bhai bïïxi gï aaduñi ix makïdï gï urabaka tudu. Aanï ïr gï Diuxiga dai ka podukai aagai aanï, itïtïdai.

Tepehuan Northern: Diuusi ñiooquidʌ utuducami oodamicʌdʌ

⁹ Aapi oojoidi istumaasi ʌrsʌʌlicami dai sʌʌlicʌdʌ maioojoidi istumaasi maitʌrsʌʌlicami. Cascʌdʌ vaamioma baigʌʌliatu aanʌ aapi siaa. Astʌtʌdai Diuusi.

Hebreos 1:9 Referans Kwoze

Galatas 5:22

Dïï gia xïïxkadï ïïgiadagi aatïmï Diuxi Ibhïadï gïr ïrana aatabuayi ïgai dai bhai buayi naana maaxi kïïgadukami gïr ïrañdïrï. Ïïgiditai aatïmï Diuxi Ibhïadï oigïdaiña aatïmï jaa dai bhai gïr ïrhidiña dai gïr ibhïxtakan taadakana aatïmï gïr ibhïdagïrï. Kïïga gïr kabakadaiña aatïmï ïpï xïxkadï soimaaxi taatamadagi. Kïï tutiakana aatïmï jaa bïïtarï dai ibuadana ixtumaxi ïr kïïga. Bïïxkïrï ibuadana aatïmï ix tumaxi aagagi aatïmï ïpï.

Romanos 15:13

Diuxi ïgai dai gïr maakai gubukarhigai xi aatïmï bhai ïrhiarakïdï nïnïrakana ixtumaxi bia ïgai gïr bïïtarï. Kaxkïdï daanïi aanï sai ïgai kabami gïn bhai ïrhiatudana dai sai gïn maakana ïmo kïïgadukami ibhïxtaragai. Aidï gia Diuxi Ibhïadï gubukarhigakïdï kïïga bhai gin ïrhiadamu aapimï nïnïrakatai ixtuma kïïgadukami bia Diuxi gïn bïïtarï.

Lukas 4:18

Diuxi Ibhïadï gin ïmadï daja. Ïgai tudu gin maa sïïrhikami ansai aituldana go bhai ïrhiaragai aatagi go odami ix makïdï bamioma ïr soititigami. Gin otoi ïgai tudu ansai aagidana aanï ix makïdï maamaixapikan duu sai oidaga kïïgakïrï bubaidaragai ïgai bïïtarï. Dai gin otoi ïpï ansai nïadatudana odami ix makïdï mai nïadagan duu. Dai sai kïïgakïrï bubaidana aanï ix makïdï soi dukai óídaga soi buididitai jaa.

1 Juan 1:3

Daiñi, aatïmï ix makïdï ïr ojotosadï Suxi Kristo bia ïmo kïïgadukami urabaragai Diuxi ïmadï dai Suxi Kristo ïmadï ïpï ix makïdï ïr Diuxi Maradï. Dai kaxkïdï gïn aagidimi aatïmï gobai ix makïdï nïidi aatïmï dai kaï ïpï ix makïdï gïr tïtïïgidi Suxi Kristo. Ipïrhidi aatïmï sai biakana aapimï urabaragai Diuxi ïmadï dai Suxi Kristo ïmadï ïpï gïr ïpïan dukai kaxkïdï.

1 Pedro 1:3

Gin aaduñi, gï agai sai kïïga ñokada aatïmï Diuxi bïïtarï. Gï agai sai kïïga ñokada aatïmï bïïtarï ïgai ix makïdï ïr Diuxigadï Gïr Nukadakami Suxi Kristo tudu. Soi ïlda gïr tïï ïgai kaxkïdï daidi gïr maa ïmo utudui oidakaragai. Gï duakatu Suxi Kristo ïpamu tudu gokiïrï xi mutadai ïgai dai kaxkïdï bia aatïmï ïmo kïïgadukami nïnïraragai xibi. Dai kïïga gupuka antaadakana aatïmï gïr utudui oidakaragai bïïtarï maatïkatai sai bia aatïmï go kïïgadukami nïnïraragai gobai.

Hebreos 7:26

Suxi Kristo tudu ïr go adaama kïïgadukïdï dadaxdadami ix makïdï bamioma kïï bhaiga ix gïr soikïdagi. Kïïga ïko daja ïgai go soimaaxkamiañdïrï tudu mai biakatai ixtukïdï gïpiïrï kaatïkagi. Kïï buañixi ïgai dai ka ïkobai daja ïgai soimaaxi ibuadamiañdïrï amïï tïbagiana dakatai ïgai. Dai bïïxi adaama bia ïgai xadutudaragai amïka tïbagiana dakatai ïpï.

Filipenses 2:9

Ïïgi gï dumaltu Suxi Kristo tudu xi kaxkïdï Diuxi kïïga tïkabi dáí sai bïïxi adaama xadutudaiña bïïxkatai óídakami. Maa ïgai go adaama namïakïdï tïtiaragai tudu maakakai go sïïrhikami sai bïïxi adaama gatïanïda ïgai.

Efesios 1:3

Gï agai xi oigïda ñokadagi aatïmï Diuxi bïïtarï. Ïgai ïr Diuxigadï Suxi Kristo Gïr Nukadakami dai ïr Ogadï ïpï. Diuxi gïr maa bïïxi aïkatai bhai ïrhiaragai ix makïdï oidaga tïbagiana gïr ibhïdaga bïïtarï. Diuxi gïr maa idi bhai ïrhiaragai mos bïïnakai aatïmï Suxi Kristo.

1 Korintios 1:9

Dai kïïga gï maatï sai Diuxi gïn soiñamu ix kabakan dukai gukibana aapimï kaxkïdï tudu ïgai kïï sïïrhi aatabuayi dai mai yaatagïi. Dai ïgai kaxi ïkobai gïn darai sai bïïnakan darakagi aapimï Maradï. Kaxkïdï ïpï gï maatï sai Diuxi gïn soiñamu ix kabakan dukai gukibana aapimï gïn buaboidaragïrï asta go kugatïrï tasïrï ukami. Ka bïïna daraka aapimï Suxi Kristo Gïr Nukadakami kaxkïdï.

VUAANA 20:17

Daidi go Suxi itïtïdai, —Maiti bhïbhïda gin tukuga, mai kia tïsai aanï mïïka xako daja gïr Oga— itïtïdai. —Bhaiyoma imi dai mïï aagida gin mamaatïrdamiga sai ka imïda iñagai aanï mïïka xako daja Diuxi gin Oga. Aagidañi sai Diuxi gin Oga ïr aapimï gïn Diuxiga dai aapimï gïn Oga ïpï— itïtïdai.

VUAANA 1:41

Dai otoma jii ïgai dai mïï aagidi Ximuñi daidi itïtïdai, —Ka tïï aatïmï go Ga Tïanïdami ix makïdï nïnïraka aatïmï— itïtïdai.

Apokalipsis 2:15

Dai podukai mamaakai aatagi ïïmadutai aapimï ïpï. Ïgai ix makïdï oidiña aatagidï go nikolaitas agaikïdï tudu. Ïgai abïnakidiña odami ïpïan dukai ibuadana go Balaam. Abïnakidiña ïgai sai buaboitudaiña uubixi tudu dai sai ïmadï bopoyiña jaa aipakoga. Dai gobai mai bhai ïrhidi aanï.

2 Korintios 11:31

Daiñi, bïïxkïrï bïïtarï kïïga ñokada ragai Diuxi bïïtarï ix makïdï ïr Ogadï Suxi Kristo Gïr Nukadakami. Dai ïgai kïïga maatï saidi ïr buaboi ixtumaxi gïn aagida iñagai xibi. Dai gobaikïdï ix makïdï gïn aagida iñagai aanï gobaikïdï kïïga maatïkamu aapimï sai mai bia aanï gubukarhigai xi ïïgi ibuadagi gin aaduindaga.

Romanos 12:9

Gï agai xi kïïgakïrï gïn oigïada aapimï. Gajiadïrï abïr bia gobai ix makïdï ïr soimaaxkami daidi abïr kabami bhïiyi ix makïdï gia ïr kïïga.

Hechos 10:38

Dai kïïga maatï aapimï ïpï sai Diuxi maa ïïgi Ibhïadï go Suxi ix makïdï ïr Nasaretïrï oidakami sai ïgai biakagi gubukadadï Diuxi Ibhïadï. Aipakoga aimïraiña go Suxi dai Diuxi Ibhïadï gubukadadïkïdï soi ïgai mui odami dai duduadi ïgai mui ix makïdï Diabora soi buididitadai. Diuxi ïmadï dakatadai go Suxi kaxkïdï pomaaxi ibuadana ïgai— itïtïdai Piduru.

Hechos 4:27

Dai go buaboitudadami apia daanïi Diuxi daidi ikaiti, —Xibi ka buaboi busai ñokidï go Dabidkaru. Xibi tanai Jerusalenïrï gïn ïmpagi Erodïxi ïmadï Poncio Pilato ïmadï judidiu dai jaa ix makïdï maiti ïr judidiu ïpï. Ïgai buidïrï surhi gï maara Suxi tomaxi ïgai mos ïr ïïgidadami aapi Diuxi dai aapi dáí go Suxi saidi ïr Gïr Bhaitï Kïakamigakana.

VUAANA 3:34

Diuxi aagidi Maradï ix tuma ñoki aituldana ïgai óídakami dai mïkadïrï otoi maakakai bïïxi Diuxi Ibhïgadï gubukarhigadï. Dai Diuxi Maradï mai aagaiña ïma maaxi, mosïkaxi gobai ix makïdï Diuxi aagidi. Kaxkïdï gï maatï saidi ïr buaboi ñokidï aagaitai ïgai go baaxi ñoki ix makïdï Diuxi aagidi.

Hebreos 2:11

Daiñi, Suxi ïgai dai ïkobai gïr bubaidi Diuxi bïïtarï. Dai xibi Suxi Ogadï ïr aatïmï gïr Oga ïpï. Kaxkïdï mai xaïrai Suxi gïr aagaitai sai aatïmï ïr susukurhidï.

VUAANA 10:17

Kïïga gin oigïdai gin Oga maatïkatai sai gin dagito iñagai aanï ix gin muatudagi. Mukimu aanï tudu dïï gokiïrï ïpamu duaka iñagai kaxkïdï gin oigïdai ïgai.

Hechos 4:26

bïïxkatai go reyes oidigi daama oidakami ïmadï go gaa bhaitï gukakami gïn ïmpagi dai bui surhigi agai Gïr Nukadakami ïmadï Diuxi Otosadï Gïr Bhaitï Kïakamiga— ikaiti go Dabidkaru ïki.

Hebreos 2:9

Dïï gia Suxi gia ka bhïiyi sïïrhikami dai kaxi gatïanïi ix dukai aagai go ojai. Baasïkioma chïki tasai dumarhioma bii ïgai xi go tïtïañikarudï Diuxi aidïxi ïmo kïïrhi busai ïgai. Dai taata ïgai go mukigami bïïxi óídakami bïïtarï. Po dui ïgai mos ïï kïï tuigakatai Diuxi gïr bïïtarï. Dïï gia xibi ka bhïiyi Suxi gïdukami xadutudaragai ïmo gïï gatïanïdamikatai xibi ix dukai aagai go ojai.