Efesios 4:14 - Northern Tepehuan Bible

¹⁴ Podukai gïr soikïitai go mui soikïdadami ix makïdï Diuxi darai gïr bïïtarï ka mai aarhi dukaikamu aatïmï. Go aarhi gia otoma bhïiyiña ïmai tïgibudagai kaïkatai aatagidï jaa. Otoma buaboitudaiña ïgai yaatabogami tudu ix makïdï bupuirumadai odami. Dïï aatïmï gia mai pomaaxkamu aidï.

Tepehuan Northern: Diuusi ñiooquidʌ utuducami oodamicʌdʌ

¹⁴ Dai poduucai camaiʌpan ducamicamu aatʌmʌ aali ismaacʌdʌ tomasioorʌ vupuiirumadai aagiditai ʌma maasi vaavoidaragai. Dai camaitistutiadamu oodami sastuduacami isgʌrvupuiirumadadagi gʌmamaatʌtuldiaragacʌdʌ ismaacʌdʌ maitʌrvaavoi.

Efesios 4:14 Referans Kwoze

Hebreos 13:9

Kaxkïdï maiti abïr gïn dagito sai ïmapïbuadagi gïn buaboidaraga ïpï. Maiti abïr bhïbhïda ïma maaxi tïgibudagai ix makïdï maiti ïr buaboi tudu. Dukami maiti abïr bhïbhïda tïgibudagai ix makïdï gïr daidi ïïmo kuadagai. Daiñi, xïïxkadï maatïkagi aatïmï xïï kïï tuiga Diuxi gïr bïïtarï dai buaboitudagi aatïmï, gobai gïr soikïi dai gïr mamaakai gubukarhigai gïr iibhïdagïrï. Dïï gia xorai oijadagi go sïïrhikami ïïkidadï ix makïdï gadaidi sai kuadana ïgai ïïmo kuadagai, gobai mai soikïi xi bhïiya ïgai gubukarhigai ibhïgadïrï. Dai xadïrï gïr soikïiña gobai aatïmï ïpï.

1 Korintios 14:20

Gin susukurhi, gï agai ix gïgïr odami tïgibudagai biakagi aapimï kïïga gïn tïgitokatai. Dïï gia go soimaaxkamikïdï gia gï agai xi xixïñi dukai ibuadagi maiti ibuadatai soimaaxi.

1 Juan 4:1

Gin aaduñi, mui odami aipakoga óídakami ikaitiña sai ïgai ïr ñiñokituldiadamigadï Diuxi dai yaatagïiña ïgai. Maiti gï agai sai buaboitudadagi aapimï tudu. Gï agai bhaiyoma sai kïïga gïn tïgito kaïkagi aapimï dai maatïkagi xorai tïgibudadïkïdï ñokai ïgai. Ix bhai Diuxi Ibhïadïkïdï ñokai ïgai xi ïmai tïgibudadïkïdï ïpï.

2 Korintios 2:17

Diuxi ïgai dai gïr maa ïmo sïïrhikami tudu. Dai kaxkïdï Diuxi gubukarhigadïkïdï aatabuayi aatïmï dai kïïga sïïrhi ñokai aatïmï ojotosadïkatai aatïmï Suxi Kristo. Dai mai xu xi tuminxikïdï gaatabuayi aatïmï gatïtïïgiditai Diuxi ñokidï aipakoga. Jaa gia go ïï tuminxikïdï gatïtïïgidiña ñoki dïï aatïmï gia cho. Kïïga maatï aatïmï sai Diuxi bïïxi nïidi ixtuma ibuadagi aatïmï kaxkïdï.

Santiago 1:6

Dïï gia gï agai sai kïïga buaboitudaitai daanïdagi aapimï, kïïga kabakami dukai buaboitudatai tudu. Odami ix makïdï mai kïïga kabakami dukai buaboitudai dudatai ïmadukai gïn tïïtïitoiña dai ka mai maatïkana ix tumaxi gïn tïtïgitoagi. Tïgibudadï ïpïan buayi go sudagi ix makïdï bïïxi aipakoga oiñïiña go ïbïrhikïdï tudu. Odami pomaaxkami maiti gï maatï ix gïn tïgitoagi tudu.

Efesios 6:11

Gïn aadabïrai tudu bïïxi go aaduinkaru ix makïdï gïr maakai Diuxi kokodi bïïtarï. Podukai bhaigakamu aapimï xi bui gukibagi go diabora xudu gaagadagi ïgai xi gïn buirumadagi.

Mataibo 24:24

—Dai dadimu jaa ïpï daidi potïimu saidi ïgai ïr go otosadï Diuxi ix makïdï nïnïraka go judidiu dai jaa potïimu ïpï saidi ïr ñokituldiadamigadï Diuxi. Naana maaxi buirumadaragai iduñimu ïgai ix makïdï odami ïïgi maiti ixtutuidiña xi ibuadagi dai podukai maaxituda agai xïï gupuka ïgai. Podukai bupuirumada agai ïgai mui odami. Dai asta ix makïdï Diuxi ka ïko bubaitu katoma buaboituda agai ïpï— itïtïdai.

2 Timoteo 4:3

Ayimu ixtuigako go odami mai kaïka ïrhiadamu go buaboikïdï aatagi tudu dai bhaiyoma ibuada ïrhiadamu ïïgi ixtumaxi ipïrhiadagi. Dai kaxkïdï gaagadamu ïgai mui maakadami aatagi sai biakana xorai aagidagi ixtumaxi kaïka ïrhiadagi ïgai.

Udaxi 1:12

Go tïtïïgiadami yaatagi ïgai ïr ïmo xaïraragai gïn bïïtarï gïn saagida darakatai ïgai xïïxkadï ibuadagi aapimï ïmo urabaragai kuadagaikïdï. Ïpïan dukami gobai xïïxkadï gïr yukuxi sarabidikagi tukuragai. Xaïraraga gobai tudu. Go kïkïïrhi ïgai bhaibitukami gakuadana gïn urabaragïrï tudu dai mai buamï gïn ïrhidi ïgai ix gïn tïgitokagi ix tuma bïïtarï go urabaragai. Mosïkaxi ïïgi bïïtarï buamï ïrhidi ïgai tudu. Maiti ibuayi ïgai soiñi jaa bïïtarï tudu. Ïpïan dukamikana ïgai iikomai ix makïdï bhïï aimïrai ïbïrhi dai mai dukitudai oidigi. Dai ïpïan dukami ïgai uxi ix makïdï ka bainkumi dai mai taataka dai mai ibhiatai ka gakixakai gobai ïpï. ¿Tumaxi ïr soiñikana ïgai tudu?

Apokalipsis 19:20

Dai ami kokodiïrï gï bhïitu go gïï kïixi modukai ïmadï go gïmai ix makïdï Diuxi ñokituldiadamigadï gï aagaiña ïïgi dai maiti ïr buaboi. Ïgai tudu ïgai dai ibuadana naana maaxi maaxidaragai soikïitai go kïïxi sai odami buaboitudaiña. Podukai bupuirumadaiña ïgai mui óídakami. Bupuirumadaiña ïgai ix makïdï gïn dagito ix gïn tïpaltudagi tïtiaradïkïdï go kïïxi tudu dai ix makïdï xadutudaiña go kïixi maaxkami ubixi. Gï bhïitu tudu go gïï kïixi ïmadï modukai go gïmai bupuirumadami óídakami dai apia dukai duduakakami gïn surhitu ïgai go gïï taiyïrï xako asufrekïdï mïmïjïi táí.

Galatas 3:1

Aapimï gin aaduñi Galasiïrï óídakami, sïïrhikïdï mai kïïgadu gïn tïgibudaga. Gïn bupuirumagi ïrhi aanï ixtumaxi. ¿Xorai ïgai dai gïn bupuirumagi tudu? ¿Mai ix kïïga gïn tïtïgidi aatïmï ix tuma bïïtarï muu Suxi Kristo kuruxiana?

Mataibo 24:11

Dai oidaka agai mui yaatabogami aidï ix makïdï ñokituldiadamigadï Diuxi gïn aagadamu dai podukai bupuirumada agai ïgai mui óídakami— itïtïdai.

1 Juan 2:26

Gin aaduñi, oidaga odami ix makïdï gïn tïïgida agai yaatagi gïn bupuirumada ïrhiditai dai kaxkïdï gïn ojidi aanï idi ojai mïsai maatïkana dai gïn nukadakana.

2 Timoteo 3:13

Dai xibi bhaitiakoga apia bamioma xigarhi bujidamu go galtutuigakami ix makïdï bupuirumada agai óídakami. Ïgai apia tïtïïgiadamu ñoki go jaa yaatagikïdï dai podukai bupuirumadamu ïgai mui. Dai go ix makïdï ïr bupuirumadami jaa ïïgi kuga iimimu kaïkatai aatagi ix makïdï maiti ïr buaboi ïpï. Dai podukai apia bamioma kuga iimimu ïgai.

2 Korintios 4:2

aagaitai ixtumaxi ïr buaboi. Oidaga jaa ix makïdï ïxtotai dukai ibuadana naana maaxi xaïrarakami dai bupuirumadai ïgai óídakami mai sïïrhi aagaitai ïgai Diuxi ñokidï. Dïï gia aanï ïmadï ix makïdï gin soikïi gin aaduindagïrï mai pobuayi. Aatïmï bhaiyoma aagai mosïkaxi ixtumaxi ïr buaboi gïr nïiditai Diuxi. Pobuayi aatïmï saidi bïïxi óídakami kïïga maatïkana iibhïadïrï sai mai yaatagïi aatïmï.

Mataibo 11:7

Dai bhodïrï ka ijitadai go ojotosadï Juan abhiadïrï daidi Suxi aagidi go odami ïmo ñoki aagaitai go Juan daidi potïtïdai, —Kïï maatï aanï sai muidutai ajiopaiña aapimï oidigana nïida ïrhiditai aapimï go Juan amïka. ¿Dai ix tuigakami ïrhidi aapimï go Juan dai mïï nïida ïrhiditadai aapimï tudu? ¿Pobïn ïrhiditadai mïxi sai ïgai mai xïï kïï maatï ix tuma buaboitudagi dai sai dudatai ïmapïbuayi ñokidï ïpïan dukami ïmo basoi ix makïdï aipakoga oiñïi ïbïrhikïdï? ¿Po tuigakami kïïrhi mïx nïida ïrhiditadai? Cho ¿aba?

1 Korintios 12:2

Daiñi, kïïga maatï aapimï sai ïkioma aidïxi mai kia buaboitu aapimï naana dukai gïn bapaidiña ixtumaxi sai buaboitudaiña aapimï uubixi tomaxi go uubixi tomarhi mai ñokai. Ix makïdï gïn bapaidiña mai ïïgiditadai Diuxi Ibhïadï tudu gïn bapaiditai.

Hechos 23:21

Dïï mos maiti agai ix buaboituda aapi. Daiñi, bhaibitukami gokobhai kïkïïrhi no gïn ïjïxto daraka xibi dai sobhida agai boiyïrï dai sai mai kia aïkai ïgai ka mua agai. Kaxi as bhai dui ïgai sai mai dïïka agai kuadagai tomarhi sudagi asta xïxkadï mua. Dai agai ïpï sai Diuxi gïïgïbidana ix mai poduña ïgai ixdukatai aagai ïgai gïn nïiditai Diuxi. Dai xibi ka bhai gïn duduna dai mos nïnïraka ix tïiya aapi— itïtïdai go arhi gïrhi.

1 Juan 2:19

Go odami ix makïdï ïr buidïrï bïïtïkamigadï Suxi ix makïdï aagai aanï xibi ïgai gïr urapïkïiña ïkioma dïï gia gïr dagito ïgai dai ïkobai iji. Kaxkïdï gï maatï ix maiti ïr gïr aaduñi ïgai. Ix gïr aaduñikamudai ïgai kïïgakïrï aidï gia gïr urabakamudai ïgai kia. Podukai gïn mamaaxidi ïgai ix maiti ïr gïr aaduñi kïïgakïrï tudu gïr dagitokai ïgai.

2 Pedro 2:18

Kïïga gïgïrdukami gïn aagai ïgai ïïgi dai ñokidï kïïga yoobikan kaiti dïï gia maiti ibuayi soiñi bïïtarï ix makïdï kaïkagi. Pokaiti ïgai sai bia aatïmï oigaragai xi ibuadagi ïïgi ixtumaxi ipïrhiadagi aatïmï, ixtumaxi gïr tanïdagi gïr tukuga tudu. Dai podukai abïnakidi ïgai odami sai soimaaxi ibuadagi. Podukai gïpiïrï surhigai ïgai odami ix makïdï utudami bhïjimi go kïïgadukïdï boi dai utudami ka mai uurapïkïi go soimaaxi ibuadami.

Santiago 3:4

Dai gobai ïpïamaaxi go gïgïr barkos ïpï. Tomaxi kïïga gïgïrdu ïgai dai go ïbïrhi kïïga gubuka ïpï dai aipakoga nïituskïi dïï gia odami ïmo arhi timonkïdï1 tïanïi go barkos sai iimïna sïïrhi xako ipïrhiadagi go odami.

1 Tomoteo 3:6

Dai ïmo kïïrhi ix makïdï utudami buaboitu maiti gï agai ix nukadakami dasagi ïpï. Tadu ïmo gïdukami dukai gï ïrhiada ïgai ïïgi ka bhïkai go sïïrhikami ka nukadamikatai ïgai dai podukai go diabora gïpiïrï daitudagi.

2 Timoteo 1:15

Kïï maatï aapi Timoteo sai baasïkioma gin dagito go Figelo dai Hermogenes ïmadï bhaiton bïïxi go gaa buaboitudadami Asiañdïrï ïpï. Bïïxkatai ïgai gin dagito bhaitoma.