Efesios 2:10 - Northern Tepehuan Bible

¹⁰ Bhaiyoma Diuxi ïgai dai gïr utuduturhi bïïnakai aatïmï Suxi Kristo. Ïgai ipïrhidi xi aatïmï ibuadagi ixtumaxi ïr kïïga, kaxkïdï pomaaxi bïïtarï gïr utuduturhi ïgai. Dai ipïrhidi ïgai xi óídakagi aatïmï xibi ibuadatai go kïïgadukami aaduindagai ix makïdï ïgai ïkiaxdïrï bhai dui xi buadagi aatïmï.

Tepehuan Northern: Diuusi ñiooquidʌ utuducami oodamicʌdʌ

¹⁰ Dai Diuusi ʌgai daidʌ gʌrmaa ibʌdagai utudui ismaacʌdʌ vaavoitudai Suusi Cristo sai cʌʌgacʌrʌ oidacana. Poduucai isduucai Diuusi ipʌli ʌʌquioma abiaadʌrʌ.

Efesios 2:10 Referans Kwoze

Filipenses 2:13

dai kïïga bhaigakamu aapimï xi pobuadagi. Kaxkïdï tudu Diuxi ïgai dai gïn maakai tïgibudagai saidi ipïldana aapimï xi ibuadagi ixtumaxi ïgai ipïrhidi dai gïn maakai ïgai gubukarhigai saidi ibuada aapimï ïpï.

Kolosenses 1:10

Gïr aaduñi, gï agai xi óídakagi aapimï Diuxi bïïtarï ixdukatai gï agai. Ix dukatai bhai ïrhidi ïgai tudu. Kaxkïdï gïn daanturhiña aatïmï sai kïï bhai dukai óídakana aapimï kïïga xadutudaitai Diuxi. Sai podukai kïïga bhai ïrhiatudana aapimï Gïr Nukadakami bïïxi aïkatïrï. Gïn daanturhiña aatïmï sai apia bamioma kïïga maatïkana aapimï Diuxi. Saidi ibuada aapimï naana maaxi aaduindagai kïkïïgadukami dai sai kïïga bubuakïna naana maaxi kïï bhai maaxkami gïn aaduindagaiñdïrï ïpï.

Hebreos 13:21

Daanïi aanï Diuxi tudu sai gïn maakana ïgai bïïxi aïkatai ixtumaxi aapimï tïgito ixtukïdï ibuadana aapimï ixtumaxi ïgai ipïrhidi. Daanïi aanï saidi gïn soikïiña ïgai saidi Suxi Kristo gubukarhigadïkïdï ibuadana aapimï bïïxi ixtumaxi bhai ïrhidi ïgai. Gï agai sai bïïxi óídakami kïïga ñokadagi Suxi Kristo bïïtarï dai bïïxkïrï bïïtarï aagada xïïxi ïr gïdukami dai namïakami ïgai. Sai pogïduna gobai tudu.

2 Korintios 5:17

Daiñi, odami ka ïmapïbuayi xïïxkadï urabagi ïgai Suxi Kristo ïpï. Diuxi utuduturhi ïgai kaxkïdï. Dai amaxi ka buaboitudakai ïgai ka ugiatïkïi go ïïkidadï oidakaradï dai aidï abhiadïrï ka biakana ïgai ïmo utudui oidakaragai.

2 Korintios 9:8

Dai kïï bhaiga ïgai xi bïïxi aïkatai gïn maakadagi ixtumaxi tïgito aapimï kïï tuigakatai ïgai gin bïïtarï. Dai kïï bhaiga ïgai xi gïn maakadagi asta bhaibitukami ixtumaxi ïpï saidi podukai kïïga biakagi aapimï ixtukïdï soikïdagi jaa.

Efesios 4:24

Daiñi, Diuxi kaxi gïn utuduturhi. Odami utudui aapimï xibi. Kaxkïdï abïr dagito gïn ïkidadï ibhïdaga tïgibudadï dai gïn utudui ibhïdaga tïgibudadï abïr bhïiyi bhaiyoma. Utudui odami aapimï xibi tudu, ix makïdï Diuxi ïïgi ïpïamaaxkami idui. Gïn dui ïgai saidi ïr ïko darasadïkana aapimï ïgai, bai kïï sïïrhi óídakagi aapimï ïïgiditai ix makïdï ïr buaboi.

Filipenses 1:6

Diuxi ïgai dai gï aaga idui ïmo aaduindagai aapimïrï tudu. Dai kïïga buaboitudai aanï sai apia oijadami ïgai go aaduindagai aapimïrï asta xïxkadï ukami dibia Suxi Kristo ïpamu. Aidï gia kïïga naatorhikami bimu gobai.

2 Timoteo 3:17

Diuxi gïr maa ñokidï aatïmï buaboitudadami gïr bïïtarï tudu sai ïgaikïdï bhai gïr dukana aatïmï dai ibuadana bïïxi ixtumaxi ïr kïïga. Sai ïgaikïdï biakana aatïmï bïïxi ixtumaxi ixtukïdï ibuadagi ixtumaxi Diuxi ipïrhidi tudu. Pomaaxi bïïtarï gïr maa Diuxi ñokidï.

Efesios 4:1

Aanï gin maixatu mos ïïgiditai aanï Suxi Kristo. Dai aanï xibi bïïxi gin ibhïdagakïdï gïn abïnakida in ïrhidi xi kïï bhai maaxkami dukai óídakana aapimï. Gï agai xi kïï bhai maaxkami dukai óídakagi aapimï aidï dai podukai maaxitudagi sai gia ïr buaboi sai Diuxi ka ïkobai gïn bubaitu.

2 Timoteo 2:21

Dai pomaaxi aapi ïpï. Aapi bhaiga xi ïko dakagi dai mosïkaxi ïmo namïakami aaduindagai bïïtarïkagi ïpï ïpïan dukai go ajasokorhi namïakami. Bhaiga aapi xi mosïkaxi Diuxi aaduindadï bïïtarïkagi tudu. Dïï gia ix ipïrhiadagi aapi ix ïr mosïkaxi Diuxi aaduindadï bïïtarïkagi gï agai ix ïkobai dakagi aapi go soimaaxkamiañdïrï buañixikami dukai oidakatai. Ix pobuadagi aapi aidï gia kïï bhaiduñixikamu aapi Diuxi aaduindadï bïïtarï. Aidï gia kïïga ïr soiñikamu aapi bïïxi kïïgadukami aaduindagai bïïtarï ix makïdï tañiagi Gïr Nukadakami.

Tito 2:14

Suxi Kristo tudu ïgai dai gï dagito ix gï muatudagi kïïgakïrï gïr bubaiditai gïr soimaaxkamiañdïrï. Podukai bhai dui ïgai saidi ïr aaduñdïkana aatïmï Diuxi kïïga buañixikami gïr biakai ïgai. Dai xibi ka kïïgakïrï buabuakïkai aatïmï ipïrhidi ïgai sai bïïxi gïr bhai ïrhiarakïdï ibuadagi aatïmï ixtumaxi ïr kïïga.

Efesios 1:4

Daiñi, ïïki, mai kia kïkibakai oidigi, Diuxi gïr darai sai aatïmï ïr ïko bubaidadïkana bïïna darakatai aatïmï Suxi Kristo. Aidïpïrï ïkiaxdïrï kaxi ïko gïr bubaitutadai Diuxi saidi aatïmï ïr ïko darasadïkana daidi sai mai tipukana soimaaxi gïr abhana ixtumaxi gïpiïrï gïr daitudagi ixtumaxi Diuxi buitapi.

1 Tomoteo 6:18

Aagidañi go buaboitudadami ix makïdï kïïga gïn bidaka sai kïïga ibuada ixtumaxi ïr soiñi. Sai bïïxi bhai ïrhiaradïkïdï maakana soiñi xorai tïgitokagi tudu.

Tito 3:14

Pobuadatai tïïgidamu aapi go gaa ix dukatai gï agai xi buidadagi buaboitudadami. Gï agai tudu xi gïr aaduñi ix makïdï gïr uurapïkïi ami Kretana ïïmadadagi xi soikïdadagi jaa xïïxkadï kabami tïgitokagi. Podukai ïïmadadamu ïgai xi kïïga ibuadagi. Ix pobuadagi ïgai aidï gia kïïga ïr soiñikamu ïgai.

Hebreos 10:24

Gï agai ïpï xi kïïga gïr tïgito nïijada aatïmï aipakoga dai gaagadagi ix dukatai gïr soikïdagi. Podukai kïïgioma gïr oigïdadamu aatïmï bïïxkatai daidi ibuadamu aatïmï ixtumaxi ïr kïïga.

Tito 3:8

Idi ñoki ix makïdï gï ojidi aanï kïïga ïr buaboi. Kaxkïdï gï agai xi mai duadikuitai gamaakada aapi aatagi aagaitai gobai. Podukai soiñamu aapi go ix makïdï buaboitudai Diuxi sai tïgito ajiopada ïgai ix dukatai kïïga ibuadagi. Idi ñoki ix makïdï gï ojidi aanï kïïga ïr soiñi bïïxi óídakami bïïtarï tudu.

Kolosenses 3:10

Xibi ka bhïiyi aapimï go utudui oidakaragai dai ka utudutudaimi aapimï. Xibi Diuxi ix makïdï gïn idui aatabuayi aapimïrï dai ka ïpïan tuigakami bijimi aapimï Diuxi. Gïn utudutuldaimi Diuxi sai podukai kïïga maatïkana aapimï ïgai dai kïïga ïmadaiña aapimï ïpï.

Tito 2:7

Gï agai tudu xi kïïga ibuadagi aapi Tito dai podukai kïïga maaxitudagi ix dukatai ibuadagi go gaa. Gï agai xi sïïrhi ibuadagi dai ñokadagi aapi dai kïïga xadutudaitai dukai gamaakadagi ñoki.

1 Korintios 3:9

Aanï ïmadï go Apolos ïr pipioñigadï Diuxi tudu dai ïmadï aatabuayi aatïmï Diuxi dai aapimï ïr ïpïan dukami ïïxidï Diuxi. Gin aaduñi, kaxi aagai aanï sai aapimï ïr ïpïan dukami ïïxidï Diuxi dai xibi aanï aagai sai aapimï dai ïr ïpïan dukami Diuxi bakidï ïpï ix makïdï bañidimi ïgai.

1 Pedro 2:12

Gïn tïgitobïrai sai go óídakami ix makïdï mai buaboitudai gïn tïgito nïidiña ix dukatai óídaga aapimï. Kaxkïdï abïr kïïga ibuada bïïxi aïkatïrï. Podukai tomaxi gïpiïrï gïn bupada ïrhiadagi jaa mai tïïgimu ïgai ixtukïdï. Dai xïïxkadï aagagi Diuxi ix bhai kïï idui óídakami aidï gia go ix makïdï gïpiïrï gïn bupaitadai biakamu xi aagadagi sai kïï idui aapimï. Dai aidï gia kïïga ñokadamu ïgai Diuxi bïïtarï ïpï nïiditai xïï kïïga ibuadana aapimï gïn soikïitai Diuxi.

Tito 3:1

Aapi Tito, maakañi ñoki go buaboitudadami ami Kretana ixdukatai gï agai xi óídakagi ïgai. Tadu mai tïgito ïgai sai gï agai xi xadutuadagi gubukadagai bipiakami kïïga ïïgiditai ïgai. Gï agai xi kïïga abokan dukai ibuadagi aaduindagai ixtumaxi ïr soiñi tudu.

1 Juan 2:6

Ix pokaitadagi ïmoko sai urabaka Diuxi aidï gia gï agai sai ïpïandukai oidakagi ïgai Suxi Kristo ïma dukai yaatagïi ïgai tudu.

Mataibo 5:16

Ïmo kudakarui dukai aapimï tudu buitapi óídakami. Dai kaxkïdï aanï aagai sai gï agai sai kïïga maaxiko dukai óídakagi aapimï ibuadatai ixtumaxi ïr kïïga óídakami buitapi. Podukai go óídakami gïn tïgito nïijadamu ix dukatai óídaga aapimï. Dai maatï nïijadamu ïgai sai Diuxi gïr Oga ix makïdï tïbagiana daja ïgai dai gïn soikïi sai podukai óídakagi aapimï dai kïïga ñokadamu óídakami Diuxi bïïtarï nïiditai gobai— itïtïdai.

VUAANA 3:21

Dïï gia odami ix makïdï ïïgidi Diuxi ïgai gia oigïdai go kudagi. Kïï ojoidi ïgai ix kudidakagi go kudagi sai kïï maaxkana sai ka bïïna daraka ïgai Diuxi dai kïïga ibuayi. Kaxkïdï ojoidi ïgai go kudagi— itïtïdai Suxi go Nikodemo.

Romanos 8:29

Diuxi ka ïkiaxdïrï maatïkatadai xorai aatïmï daidi ïr ïko bubaidadïka agai. Dai ïgai dáí sai aatïmï ïpïamaaxkana gï maara Suxi Kristo. Podukai Suxi Kristo bïïxi adaama ïr namïakami dai muidu aatïmï ix makïdï ïr susukurhidï.

Hechos 9:31

Dai aidï chïki tasai xioma óídakatadai go buaboitudadami Judeïrï dai Galileïrï dai Samarhiïrï mai tipukatai buidïrï bïïtïkami. Kïïga xadutudaiña ïgai Diuxi dai Diuxi Ibhïadï gamaakaiña gubukadagai xi ïgai bamioma kïïga muidaimi.

2 Korintios 5:5

Dai Diuxi ka bhai dui ix dukatai biakagi aatïmï gïr tukugai utudui. Asta gïr maa ïgai ïïgi Ibhïadï sai gïr ïmadï dakana tudu. Kaxkïdï kïïga maatï aatïmï saidi iduñimu Diuxi ixtumaxi gïr aagidi. Kïïga maatï aatïmï sai buaboikïdï gïr maaki agai gïr tukugai utudukami tudu. Ïma dukai xadïrï gïr maakimudai ïgai Ibhïadï sai gïr ïmadï dakana tudu.

1 Tomoteo 2:10

Bhaiyoma gï agai xi ibuadagi ïgai ix makïdï kïïgadukagi dai ix makïdï bhai maaxkagi jaa bïïtarï. Gobai tudu bhai maaxi ïmo oki bïïtarï ix makïdï xadutudai Diuxi dai mai xu xi ipïrhiada xi jaa tïgito nïijadagi yukuxidï.

1 Tomoteo 5:10

Gï agai xi jaa kïïgakïrï nïijadagi ïpï nïiditai ixtumaxi ibuayi ixtumaxi ïr kïïga. Gï agai xi tïgito nïida aapi ix bhai kïïga gïïrhidi maamaradï dai ix bhai kïïga miadïgidiña ïgai go buaboitudadami xibhïadïrï óídakami. Gï agai ïpï ix mai tiodiantuigakagi soikïitai go buaboitudadami tomax tuma aaduindagïrï. Gï tïgito nïida ïpï sa bhai gamaakaiña ïgai soiñi xorai soimaaxi taatamaiña. Ix makïdï gïn ojagi ami gï agai xi ïr bipiudukagi ix makïdï kaxi ibuadana naana maaxi aaduindagai kïïgadukami tudu. Ix pomaaxkagi ïgai aidï gia bhaiga ïgai xi gïn ojagi ami paperhiïrï xako ojixi budami soiñi.

1 Juan 1:7

Dïï gia ix buañixikagi aatïmï dai aagagi aatïmï ixtumaxi ïr buaboi ïpïan dukai Diuxi, aidï gia kïïga biakana aatïmï ïmo urabaragai aipakoga bïïxi go buaboitudadami ïmadï. Dai aidï gia bïïx tasai apia buanai Diuxi bïïxi gïr soimaaxkamiga ïradïkïdï Suxi Kristo ix makïdï aaxi ïgai mukukai gïr bïïtarï.

Hechos 9:36

Aidï Jopeïrï oidakatadai ïmo oki. Buaboitudadami ïgai dai Tabita tïgidu. Griego ñokikïdï Dorkas ikaidakatadai tïtiaradï. Go Tabita kïï tuigakana dai soikïiña ïgai soititigami.

Galatas 6:15

Ami tudu kuruxiana gïr utuduturhi Suxi Kristo. Kaxkïdï maiti ïr ixtumaxi ix circuncidadukagi ïmoko ix cho ïpï. Maiti ïr ixtumaxi namïakami gobai. Dïï gia Diuxi gïr utuduturhi dai gobai gia ïr ixtumaxi namïakami.

Romanos 8:1

Aa gia ïr buaboi gobai ix makïdï gïn aagidi aanï. Kaxkïdï xibi ka mai tipu gïgïbidaragai odami bïïtarï ix makïdï bïïnakami bii Suxi Kristo.

Efesios 2:2

Aidïpïrï adaimïiña aapimï go odami tïgibudadï dai ïïgidiña aapimï go diabora pobuadatai. Go diabora ïgai dai tïanïi go soimaaxi iibïdagami ix makïdï mos ïbïltapi ajiopai. Dai xibi aatabuayi ïgai iibhïadïrï odami ix makïdï mai ïïgidi Diuxi ïpï.

Efesios 1:1

Bhaiga. Aanï ïr Pabora dai gïn otoxi idi ojai. Ïmo otosadï aanï Suxi Kristo, Diuxi ipïrhi xi ïr otosadïkana aanï kaxkïdï. Xibi gïn ojidi aanï idi ojai aapimï Efesoïrï óídakami ix makïdï Diuxi ïko bubaitu. Aapimï ix makïdï biïna daraka Suxi Kristo tudu dai mai dagitokai buaboitudai ïgai.

Efesios 2:6

Diuxi gïr duakaturhi Suxi Kristo ïmadï dai tïbagiïrï gïr darai Suxi Kristo ïmadï ïpï bïïnakai aatïmï ïgai.

Efesios 2:13

Aidïpïrï mai uraba darakana aapimï Diuxi dïï xibi gia ka kïï miadïrï uraba óídaga aapimï. Suxi Kristo ïgai dai bhai dui gïn bïïtarï ïradïkïdï dai miadïrï gïn darai bïïnakai aapimï ïgai.

Efesios 2:15

Suxi Kristo bhai dui mukukai kuruxiana saidi ïr ïmo aadunumïkana go judidiu ïmadï ix makïdï maiti ïr judidiu mos buaboidakai ïgai. Mukukai ïgai ugiturhi go sïïrhikami ix makïdï go judidiu biakatadai xi ïïgiadagi. Go sïïrhikami ïgai dai ïjïkobaiturhi go judidiu ïmadï ix makïdï maiti ïr judidiu tudu. Kaxkïdï mukukai bhai dui Suxi sai go judidiu ïmadï ix makïdï maiti ïr judidiu gïn oigïadagi aipakoga.