Apokalipsis 12:9 - Northern Tepehuan Bible

⁹ Daidi Diuxi maigo surhi go gïï kïixi tïbagiañdïrï modukai tïtïañikarudï. Podukai bhaigobai oidigi daama surhi go kïixi ix makïdï diabora tïgidu dai satanás tïgidu ïpï. Ïgai tudu ïr go gïï kooyi agaikïdï ix makïdï ïki abhiadïrï ajiopaiña tami oidigi daama dai bupuirumadaiña óídakami. Tami oidigi daama gï surhitu ïgai tudu ïmadï modukai tïtïañikarudï maitïkai Diuxi tïtïañikarudï ïgai bui.

Tepehuan Northern: Diuusi ñiooquidʌ utuducami oodamicʌdʌ

⁹ Cascʌdʌ Diuusi mʌtan suuli tʌvaagiañdʌrʌ ʌgʌʌ cʌisi moduucai sandaarugadʌ. Ʌgai vaa ʌrʌmo cooyi ismaacʌdʌ ʌʌqui abiaadʌrʌ oidigi daama aimʌraiña, dai Diaavora tʌʌgidu dai Satanási vʌʌsi. Ʌgai vaa ʌgai dai vupuiirumadai mui oodami vʌʌsi oidigi daama oidacami saagida.

Apokalipsis 12:9 Referans Kwoze

Lukas 10:18

Dai Suxi potïtïdai, —Ïjï, pomaaxi aba. Bia aapimï gubukarhigai xi maitiagi go diabora. Nïidi aanï xi gïi go diabora tïbagiañdïrï tudu ïmo dukudami dukai. Dai xibi gïn maa aanï gubukarhigai xi maitiagi aapimï.

VUAANA 12:31

—Xibi Diuxi daituda agai go gïgïbidaragai ix makïdï ajïga oidigi dama óídakami. Dai xibi ïpï gamaitï agai Diuxi gobai ix makïdï gatïanïi tanai oidigi daama, gamaitï agai ïgai go diabora tudu— itïtïdai.

Apokalipsis 20:10

Dai bhodïrï ïmo gïï taiyïrï daitudamu Diuxi go diabora ix makïdï gabuirumadatadai go óídakami. Ami gïximu ïgai xako daja go gïmai kïixi ix makïdï Diuxi ñokituldiadamigadï gï aagaiña ïïgi dai maiti ïr buaboi. Ami ïr go gïï taiyïrï xako asufrekïdï mïmïjïi. Dai ami bïïxkïrï bïïtarï apia soimaaxi taata agai táí dai mai tipukamu ibhïxtaragai ïgai bïïtarï.

1 Juan 5:19

Kïïga maatï aatïmï saidi ïr maamaradï aatïmï Diuxi tudu. Dai maatï aatïmï ïpï sai go diabora tïanïi bïïxi go gaa oidigi daama óídakami ix makïdï mai buaboitudai Suxi Kristo.

2 Korintios 4:4

Go diabora ïgai dai gatïanïi tami idi oidigi daama tudu. Dai maatiga maaxi sai buirumadai ïgai go óídakami ix makïdï mai maatï kaïkagi gïr aatagi mai buaboitudaitai ïgai ixtumaxi ïr buaboi. Maiti ipïrhidi go diabora ix óídakami maatï kaïkagi go bhai ïrhiaragai aatagi aagaitai Suxi Kristo tudu. Maiti ipïrhidi ïgai ix maatïkagi óídakami xïï kïï tuiga dai xïï gubuka Suxi Kristo Gïr Nukadakami. Suxi ïmadï Diuxi kïïga ïmadugan maaxi dai ïmadugan tutuiga tudu.

Genesis 3:1

Dai ïmo imidagai sai ami ïxikamiana dibia ïmo kooyi dai aatagidi go oki. Aidïpïrï bamioma saitudagakana go kooyi yaatagi bïïtarï xi bhai xi ïma maaxi oidigana ajiopadami ix makïdï idui Diuxi Gïr Nukadakami. Dai potïtïdai ïgai go oki, —¿Buaboi xi ix gïn daidi Diuxi uxi ibhiadï ix makïdï ïxikamiana guka mïxi mai kukumiagi tomarhi ïmoko?— itïtïdai.

Apokalipsis 12:7

Dai bhodïrï oidatu ïmo kokodi tïbagiana. Go Diuxi tïañikarudï Migirhi tïgidukïdï ïmadï jaa mui Diuxi tïtïañikarudï bui surhi go gïï kïixi omarhigami dai modukai tïtïañikarudï ïpï.

VUAANA 8:44

Aapimï ïr maamaradï go diabora di— itïtïdai. —Dai ojoidi aapimï ix buadagi ixtumaxi ïgai ipïrhidi. Ïgai tukamïrï abhiadïrï mos ïr gamuakamikana dai buidïrï kaatïkamikana ïgai ixtumaxi ïr buaboi. Ïïgi pomaaxi tuigakami ïgai ix kaxkïdï yaatagïi ïgai. Ïgaiñdïrï tudu daibïi bïïxi go yaatagi— itïtïdai.

Apokalipsis 20:8

xi ïgai aipakoga aimïrada agai oidigi daama dai bupuirumadada agai óídakami. Abïnakidamu ïgai mui óídakami sai urabana aidï. Aatïmï Gog dai Magog aagaiña go óídakami ïgai bïïxi oidigi daamaiñdïrï óídakami ix makïdï uraba agai go diabora. Dai go diabora ïmpaidamu ïgai ïmo gïï kokodi bïïtarï. Ïpïan ïïkiduka agai ïgai orai go gïï sudagi ugidïrï. Maiti ïr ïkaldakaruka agai tudu mos ïï muidukatai.

Apokalipsis 12:3

Dai bhodïrï tïbagiana gï maaxitu ïpï ïmo ixtumaxi ix makïdï odami tomarhi ïmo imidagai mai nïidiña. Gï maaxitu ïmo gïï kïixi omarhigami dai bïgikami tudu kubarakami momoakami. Momodïrï gï kïïsaka ïgai kubarakami arhi korona dai bia bhaibuxtama aagadï ïpï.

Apokalipsis 9:1

Dai bhodïrï iba ïpï ïmo Diuxi tïañikarui trompetagadï dai aidïpïrï nïidi aanï ïmo xabugai xi oidigi daama daja. Gïitadai ïgai tïbagiañdïrï mïtai maa ïgai yabigadï go maixakarui ix makïdï ïr ïmo gïï tukabakami dïgai.

Apokalipsis 2:24

Dai bia aanï ïmo ñoki aapimï gïn bïïtarï ix makïdï mai ïïgidi go soimaaxkïdï aatagi ami Tiatirana. Pokaitiña odami sai go aatagi gobai diaborañdïrï imïi dai sai mosïkaxi chïki odami maatï dai kaxkïdï ïmo kïï namïakami aatagi aagaiña ïgai. Dïï aapimï kïïga mai ïïgidi go aatagi gobai xi kaxkïdï bia aanï mos arhi ïmo ñoki gïn bïïtarï.

Apokalipsis 2:13

dai maatï aanï sai go diabora ïgai dai gatïanïi ami go gïï kiikiïrï xako óídaga aapimï. Dai maatï aanï sai tomaxi tïanïi ïgai ami aapimï bïïxkïrï apia gin buaboitudai. Mai dagito aapimï gïn buaboidaraga tudu tomaxi ami xako óídaga aapimï gï muatu go kïïrhi Antipas tïgidukïdï ix makïdï sïïrhi ñokaiña gin bïïtarï aagaitai ixtumaxi ïr buaboi. Maiti gin dagito aapimï tomaxi ami gïn kiikiïrï oidaga go diabora tudu.

1 Pedro 5:8

Gin aaduñi, kïïga abïr gïn tïtïgitoda daidi abïr gïn nukadaka. Bia aapimï gïn buidïrï kaatïkamiga tudu ix makïdï ïr go diabora dai aipakoga aimïrai ïgai xia duada ïrhiditai xorai tïïgiagi ïgai.

2 Korintios 11:14

Gin aaduñi, kïïga maatiga maaxi ix tuixi podukai buirumada ïrhidiña ïgai óídakami. Go diabora ïgai daidi ïr tïanïdamigadï kaxkïdï. Dai kïï maatï aatïmï sai go diabora ïmo tïañikarudï Diuxi dukai gï dadasai buirumada ïrhiditai ïgai go óídakami.

2 Korintios 2:11

Maiti ipïrhidi aanï sai tïïgiagi go diabora ixtukïdï soimaaxi gïr buidadagi mai oigïldakai aatïmï go soimaaxi ibuadami kaxkïdï. Kïï maatï aatïmï sai podukai aatabuayi go diabora tudu soi gïr duada ïrhiditai ïgai.

Romanos 16:18

Ix makïdï pomaaxi gamamaakai aatagi maiti ibuayi Kristo Gïr Nukadakami aaduindadï tudu. Dai bhaiyoma ïïgi ibuayi ixtumaxi bhai ïrhidi ïgai. Xigian dukai aatagaiña ïgai dai aagai ïïgi ix ixtumaxi kaïka ïrhiadagi óídakami. Podukai buirumadai ïgai mui ix makïdï maiti gïn nukadatai óídaga.

Hechos 26:18

Dai tïïgidamu aapi ixtumaxi ïr buaboi bai ïgai dagitona go soimaaxkïdï tïgibudagai tukamukïdï dai oijadana go kïïgadukïdï tïgibudagai ix makïdï ïr kudagi tudu. Sai ka maiti gïn tïanïna go diabora dai Diuxi gïn tïanïna bhaiyoma. Daidi oigïrhixikami bimu soimaaxkamigadï gin buaboitudaitai ïgai dai uraba bimu ïgai Diuxi ïko bubaidadï— gin tïtïdai Suxi— itïtïdai Pabora.

Lukas 22:31

Dai bhodïrï maa Suxi ïmo ñoki go Ximuñi dai potïtïdai, —Daiñi aapi Ximuñi, go diabora gatáí oigaragai xi gïn duiñdagi naana maaxi soimaaxi sa bhai ka mai buaboitudada aapimï dai podukai ïkobai gïn darasana ïgai aanïañdïrï. Ïpïan duñimu ïgai xïïxkadï odami gigidagi kosadï tïrhigi sai ïkobai biïna go kosadï. Soimaaxi gïn taatamitulda agai ïgai tudu— itïtïdai.

2 Korintios 11:3

Buamï in ïrhidi gïn bïïtarï sai maiti gïn bupuirumadagi jaa ïpïan dukai ix dukai go diabora buirumagi go Eba ïïki tudu. Maiti ipïrhidi aanï sai kuga imïdagi gïn buaboidaraga tadu oijadagi aapimï ïmai dai mai mosïkaxi Suxi Kristo oijadagi aapimï. Gobai ïbhïidi aanï tudu.

Lukas 22:3

Daidi go Diabora baa Udaxi ïrana aidï gatïanïda agaitai. Go Udaxi ïr ïmoko go bhaibuxtama dan goka ojotosadï Suxi dai óídakami Iskariote aagaiña ïpï.

Lukas 8:12

Dai gobai ix makïdï boi ugidïrï surhi ïr ïpïan dukami odami ix makïdï kaïkana go ñoki dïï go diabora maigobai dadasaiña go ñoki ibhïgadïañdïrï sai mai buaboitudaiña ïgai dai mai kïïgakïrï bubuakïna.

Mataibo 25:41

Dai bhodïrï ñokidamu aanï ïgai ix makïdï gin ogixapadïrï gukaka agai, ix makïdï mai buaboitudai tudu. Dai potïdamu aanï, —Iimibïrai aapimï tabhiadïrï. Diuxi mai kïïgakïrï gïn nïidi tudu. Iimibïrai xako bïïxkïrï bïïtarï mïïkana táí, xako bhai dui Diuxi gïgïbidaragai bïïtarï go diabora ïmadï tïtïañikarudï. Gamo abïr iimi tudu.

Mataibo 4:10

Daidi Suxi potïtïdai, —Imïdañi tabhiadïrï aapi diabora— itïtïdai. —Diuxi ojadï ikaiti sai, Mosïkaxi Diuxi Gïr Nukadakami buidïrï gï agai xi oigïda ñokada aatïmï dai xadutuada podukai— itïtïdai.

Mataibo 4:8

Dai bhodïrï go diabora baidakai go Suxi kugïrï ïmo tubidaki daama kïïga tïkabakami daidi abhiadïrï tïtïgidi ïgai bïïxi go oidigi aipakoga xako gatïanïi dudunukami. Tïtïgidi ïgai xïï gupuka go óídakami dai dudunukami dai xïï kïïga naana maaxi bia namïakami ïpï.

Mataibo 4:5

Dai bhodïrï baidakai go diabora go Suxi Jerusaenamu dai ami Jerusalenïrï go gïï kiupai daama xako bamioma tïkabaga tïtïsai ïgai.

Mataibo 4:1

Dai gokiïrï xi gï bakoanatu go Suxi ami go aki Jordanïrï sai bhodïrï jii ïgai abhiadïrï kïïga ïïgiditai ïgai Diuxi Ibhïadï. Dai Diuxi Ibhïadï baidaja go Suxi oidigamu saidi buidïrï aïna go Diabora saidi ïgai abïnakidana sai soimaaxi duna go Suxi.

Genesis 3:13

Bhodïrï Diuxi Gïr Nukadakami bhagaimi go oki dai potïtïdai, —Tuipïxi imaaxi idui— itïtïdai. Dai go oki potïtïdai, —Go kooyiaba ïgai daidi gin buirumagi antai gauu aanï go uxi ibhiadï— itïtïdai.

Apokalipsis 19:20

Dai ami kokodiïrï gï bhïitu go gïï kïixi modukai ïmadï go gïmai ix makïdï Diuxi ñokituldiadamigadï gï aagaiña ïïgi dai maiti ïr buaboi. Ïgai tudu ïgai dai ibuadana naana maaxi maaxidaragai soikïitai go kïïxi sai odami buaboitudaiña. Podukai bupuirumadaiña ïgai mui óídakami. Bupuirumadaiña ïgai ix makïdï gïn dagito ix gïn tïpaltudagi tïtiaradïkïdï go kïïxi tudu dai ix makïdï xadutudaiña go kïixi maaxkami ubixi. Gï bhïitu tudu go gïï kïixi ïmadï modukai go gïmai bupuirumadami óídakami dai apia dukai duduakakami gïn surhitu ïgai go gïï taiyïrï xako asufrekïdï mïmïjïi táí.

Apokalipsis 16:14

Ix makïdï bubuaka tïñidïañdïrï go kïkïixi ïr diabora tïañikarudï tudu. Dai kïïga biakana gubukarhigai ïgai dai ibuadana naana maaxi maaxidaragai. Dai daibidiña ïgai bïïxi go gïgïrï tïtïanïdami oidigi daama óídakami dai ïmapidi xakoga Armagedón tïgidu oidigi Hebreokïdï. Ami ïmpagi ïgai dai abïnaki sai bui surhigïna ïmo gïï kokodiïrï Gïr Nukadakami, sai bui surhigïna ïgai Diuxi ix makïdï bïïxi adaama ïr gubuakïdï tudu. Dai aidï gïn ïmpaidakai ïgai todian dukai gïn ayimu gïgïbituldaragai Diuxiañdïrï. ¿Mai ix pokaiti Diuxi ojadïrï? Ami ikaiti sai, —Todian dukai ayimu aanï ïpïan dukai ïmo ïxibugami todian dukai ajïi ïmo kiiyïrï. Kaxkïdï bhai gïn ïldamu odami ix makïdï kïïga bhai gïn dukagi gin nïnïrakatai. Ix makïdï mai kosokatai gin nïnïrakagi tudu kïïga gïn aadatikatai yukuxi. Ïgai gia mai xaïradamu nïiditai jaa. Dïï gia ix makïdï mai bhai gïn dukagi dibiakai aanï gia xaïradamu— ikaiti go ojai. Dai gokïdï kaxi naadamikatadai go tïtïañikaru ix makïdï daitutadai gïgïbidaragai.

Apokalipsis 13:14

Diuxi maa ïgai oigaragai saidi ibuadana maaxidaragai podukai dai bupuirumadaiña ïgai bïïxi oidigi daama óídakami ibuadatai naana maaxi maaxidaragai ami buitapi go kïixi ix makïdï ka duayi. Dai tïjai ïgai óídakami saidi ibuadana ïmo ubixi ïpïamaaxkami go kïixi ix makïdï gï muragi dai duayi. Po buadana ïgai ipïrhiditai xi odami xadutuadagi ïgai.

Apokalipsis 9:20

Gïïpi naana maaxi daibusai soimaaxi tudu dai mui óídakami koi dïï modukai mai ïma dukai gïn tïtïgito go odami ix makïdï bitadai kia. Apia xadutudaiña ïgai ixtumaxi ibuadana ïïgi ïgai dukami oro dai plata dai bhronse dai odai dai asta uxi duñixikami uubixi. Xadutudaiña ïgai go diabora tïtïañikarudï tudu pomaaxi xadutudaitai uubixi maaxi ix makïdï mai duduaka. Go maaxi uubixi mai nïayi tudu dai mai kaidaga dai mai bhaiga imidagai ïpï. Dïï bïïxkïrï go odami maiti ipïrhi xi dagitoagi go uubixi dai Diuxi xadutuadagi bhaiyoma.

Apokalipsis 3:9

Dai tïañimu aanï go gaa ix makïdï pokaitiña sai kïïgakïrï ïr judidiu dai yaatagïi urabakatai go diabora, tïañimu aanï sai kuikïskïda ïgai aapimï gïn buitapi. Dai podukai maaxitudamu ïgai ix maatï sai aapimï ïr ix makïdï kïïga oigïdai aanï.

Apokalipsis 2:9

Maatï aanï bïïxi ixtumaxi ibuayi aapimï. Kïï maatï aanï tudu xïï kabami soi taatamaiña aapimï dai xïïxi ïr soititigami aapimï ïpï mai biakatai bhaitoma ixtumaxi oidaga tami idi oidigi daama. Dïï gia bïïxkïrï ka bia aapimï mui namïakami ixtumaxi ix makïdï gïn maa Diuxi gïn ibhïdaga bïïtarï xi kaxkïdï gia ïr gïn bipidakami aapimï gïn ibhïdagakïdï. Maatï aanï ix makïdï pokaitiña sai kïïgakïrï ïr judidiu dai pokaitiña saidi ïr gin aaduñi dïï maiti ïr buaboi. Ïgai galnaaxi ñokai gin bui tudu pokaititai saidi ïr gin aaduñi. Urabaka ïgai go diabora bhaiyoma di.

Udaxi 1:9

Daiñi, kïïga maatï aatïmï sai oidaga ïmo tïañikarudï Diuxi Migirhi tïgidukami dai ïgai bamioma tïanïi xi bhai jaa tïtïañikarudï Diuxi. Dïï gia tomaxi bamioma tïanïi ïgai bïïxkïrï aidïxi gïn bupui ñokaitadai ïgai ïmadï go diabora dai gïn dadaiditadai ïgai go tukugadï go Moiseskaru ka mukukai ïgai, aidï go Migirhi po gï ïrhidi sai mai bia sïïrhikami xi kabami bhagaidadagi ïgai go diabora. Maiti ipïrhi ïgai tomarhi xi ïmo soimaaxi ibuadami aagagi tudu. Dai bhaiyoma mosïkaxi potïtïdai ïgai sai, —Diuxi gï bhagaidana aapi diabora— itïtïdai.

Hebreos 2:14

Aatïmï tudu ïr maamaradï Diuxi ix makïdï aagai ïgai. Dai bia aatïmï gïr tukugadï dai mumukui aatïmï. Kaxkïdï gïr ïpïamaaxi tukuga bhïiyi Suxi. Biatu Suxi tukugadï ïpïan dukai aatïmï sai bhodïrï mukuna ïgai dai podukai popoidan dui ïgai gubukarhigadï go diabora ixtukïdï gïr buapidi ïgai go mukigami.

2 Timoteo 3:13

Dai xibi bhaitiakoga apia bamioma xigarhi bujidamu go galtutuigakami ix makïdï bupuirumada agai óídakami. Ïgai apia tïtïïgiadamu ñoki go jaa yaatagikïdï dai podukai bupuirumadamu ïgai mui. Dai go ix makïdï ïr bupuirumadami jaa ïïgi kuga iimimu kaïkatai aatagi ix makïdï maiti ïr buaboi ïpï. Dai podukai apia bamioma kuga iimimu ïgai.

1 Tomoteo 2:14

Dai aidïxi gïpiïrï surhi Adán ïmadï Eba go oki Eba ïgai dai buaboitu go diabora ñokidï dai gïpiïrï gïï dai mai xu xi go kïïrhi buaboitu. Kaxkïdï maatiga maaxi sai oki maiti gï agai xi tïanïdagi kïkïïrhi.

2 Tesalonicenses 2:3

Maiti gï agai ix gïn dagitoagi aapimï sai gïn bupuirumadagi jaa tudu. Daiñi, dibiagai Gïr Nukadakami dïï mos gokiïrioma kia. Ïpïgioma bhaitoma bïïxi óídakami bui surhigi agai Diuxi. Dai ïpïgioma dibiagai ïmo kïïrhi ïpï ix makïdï adaama ïr soimaaxi buadamika agai dai ix makïdï Diuxi maaki agai gïgïbituldaradï bïïxkïrï bïïtarï.

Efesios 4:14

Podukai gïr soikïitai go mui soikïdadami ix makïdï Diuxi darai gïr bïïtarï ka mai aarhi dukaikamu aatïmï. Go aarhi gia otoma bhïiyiña ïmai tïgibudagai kaïkatai aatagidï jaa. Otoma buaboitudaiña ïgai yaatabogami tudu ix makïdï bupuirumadai odami. Dïï aatïmï gia mai pomaaxkamu aidï.

2 Korintios 12:7

Kaxi gïn aagidi aanï saidi ipïrhidi aanï ix maatïkagi aapimï xïïxi mai gubuka aanï tudu. Kaxkïdï gïn aagidamu aanï ïpï ïmo ixtumaxi ix makïdï taatamaiña aanï. Daiñi, kïïga ïr buaboi sai Diuxi gin tïïgi naana maaxi xigiamaaxkami tïbagiïrï dïï gia gin nukadai ïgai dai maiti ipïrhidi ix ïmo gïdukami dukai gin ïrhiadagi aanï ïïgi. Kaxkïdï dagito Diuxi saidi gin ajiagi ïmo ixtumaxi diabora amadïrï ix makïdï bïïx tasai gin tomituskïi ïmo sïïxigai dukai gin tukugïrï. Diuxi dagito saidi gin ajiagi gobai sai podukai mai ïmo gïdukïdï dukai gin ïrhiadagi aanï ïïgi tudu.

Romanos 16:20

Diuxi ïgai dai gïr maakai xi ibhïxtakan taadakagi aatïmï. Dai otoma naato popokimu ïgai gubukarhigadï go diabora dai dumaltuda agai xi aapimï mos kïixoramu kaxi gamaitïkai aapimï ïgai bui. Diuxi gubukarhigadïkïdï gamaitïmu aapimï aidï. Dai xibi ipïrhidi aanï xi taatagi aapimï xïï kïï tuiga Suxi Kristo gïn bïïtarï.

Hechos 5:3

Daidi go Piduru itïtïdai aidï, —¿Aapi Ananias tuipïxi bhïiyi Diabora tïgibudadï? Kaxi yaatagidi aapi Diuxi Ibhïadï dai ïïgi gï bïïtarï bhïiyi aapi chïki go tuminxi go dïbïrai namïgadï.

VUAANA 16:11

Dai Diuxi Ibhïgadï maatïtulda agai óídakami ïpï sai Diuxi maakia agai gïgïbidaragai bïïxi soimaaxi buadami. Ka aagai Diuxi ix gïgïbitulda agai go Diabora ix makïdï gatïanïi tami oidigi daama tudu. Dai kaxkïdï gï maatï sai Diuxi gïgïbitulda agai bïïxi soimaaxi buadami ïpï oiditai ïgai go Diabora— itïtïdai.

VUAANA 14:30

Ka mai xii tïbïpi aatagadamu aanï gïn ïmadï xibi tudu. Ka karhioga dibia go Diabora ix makïdï gatïanïi tami oidigi daama. Ïgai mai bia gubukarhigai ix gin tïanïdagi

Lukas 13:16

¿Kaxkïdï mai ix ïr sïïrhi xi soiñagi aanï idi oki ïpï? Daiñi, go diabora ka burakami duu biakatadai idi oki bhaibuxtama dan mamaakoba umigi kokoadïkatai gobai. ¿Mai ix gï agai ix duadiagi gobai tomaxi ibhïxtaragai tasïrïkagi gobai? Ïmo pipiixaradï gobai go Abraamkaru ïpïan dukai aapimï di— itïtïdai.

Mataibo 24:24

—Dai dadimu jaa ïpï daidi potïimu saidi ïgai ïr go otosadï Diuxi ix makïdï nïnïraka go judidiu dai jaa potïimu ïpï saidi ïr ñokituldiadamigadï Diuxi. Naana maaxi buirumadaragai iduñimu ïgai ix makïdï odami ïïgi maiti ixtutuidiña xi ibuadagi dai podukai maaxituda agai xïï gupuka ïgai. Podukai bupuirumada agai ïgai mui odami. Dai asta ix makïdï Diuxi ka ïko bubaitu katoma buaboituda agai ïpï— itïtïdai.

Mataibo 13:39

Ix makïdï ïi go basoi gobai ïr go diabora. Dai go yoobaragai gobai aagadankaiti xïïxkadï ugiti agai oidigi. Dai go pipioñi ix makïdï gayoba agai ïr tïtïañikarudï Diuxi— itïtïdai.

Apokalipsis 18:2

Daidi gïgïrï iñakimi ïgai daidi ikaitimi, —Ka xia tui go gïï kiiki Babilonia tïgidukïdï. Xibi ïr diabora tïtïañikarudï kiidï gobai dai ïr kiidï ujurugi tukurakami dai soimaaxkami.

Apokalipsis 12:8

Dai go gïï kïixi ïmadï tïtïañikarudï maiti ixtui Diuxi tïtïañikarudï bui dai ka mai bhaigakatadai xi ami biiyagi tïbagiana.

Apokalipsis 12:12

Gia bhai ïrhiaraga gobai tudu. Asta go Diuxi tïtïañikarudï bïïxi bhai gïn ïrhidiña nïiditai sai go buaboitudadami mai buamï ïrhidi tomaxi jaa kodagi kïïga buaboidaitai ïgai. Dïï gia xibi gï busaitu go diabora tïbagiañdïrï dai ka ayi oidigi daama óídakami saagida. Dai sïïrhikïdï bhamu maatïkatai sai ka mai xii tïbïpi bhaigakamu xi gaatabuadagi. Kabami bhamu ïgai tudu xi kaxkïdï sogigi bïïxi go oidigi daama óídakami dai go sudagiïrï óídakami ïpï— ikaiti go makïdï gïgïrï ñokai tïbagiana.