2 Timoteo 1:8 - Northern Tepehuan Bible

⁸ Maiti gï agai xi xaïrada aapi aagaitai ix tuma maatï Suxi Kristokïdï tudu. Dai maiti xaïrada aanïkïdï ïpï tomaxi gin maixatu aanï aagaitai aanï Suxi Kristo. Daiñi, oidaga ix makïdï soi gïr buidada ïrhidi oiditai aatïmï Suxi Kristo dai kaxkïdï gï agai xi Diuxi gubukarhigadïkïdï kabakadagi aapi gï ibhïdaga dai bhai gï dukagi ix gin urabagi soimaaxi taatamaitai gin ïmadï.

Tepehuan Northern: Diuusi ñiooquidʌ utuducami oodamicʌdʌ

⁸ Maitisiaa ʌraitai gaaagiada istumaasi ivueeyi gʌrtʌaanʌdamiga Suusi Cristo aapicʌdʌ dai maitisiaa ʌrada maisapicatai aanʌ vaavoitudatai Suusi Cristo, baiyoma baigʌduucai issoimaa taatamadagi giñʌpan duucai vaavoitudaitai Diuusi ñiooquidʌ ismaacʌ aagai cʌʌgacʌrʌ vuvaidaragai. Dai tomasi soimaa taatamai aapi vʌʌscʌrʌ Diuusi gʌmaaquimu guvucadagai sipoduucai maidagitomu aapi gʌvaavoidaraga.

2 Timoteo 1:8 Referans Kwoze

Romanos 1:16

Mai xaïraitai aagai aanï go bhai ïrhiaragai aatagi tudu. Go bhai ïrhiaragai aatagi ïr Diuxi gubukadadï ixtukïdï kïïgakïrï bubuakïi bïïxi óídakami ix makïdï buaboitudagi. Ï ix makïdï ïpïgioma buaboitu ïr Judidiu dai xibi ix makïdï maiti ïr judidiu buaboitudaimi ïpï.

Markos 8:38

Xibi óídakami arhiïxi ïr soimaaxi buadami dai adaimïi ïgai jaa ix makïdï didiuxi aagai ïgai. Daiñi, aanï ïr Diuxi otosadï ix makïdï aagai Diuxi ïïki dai ayimu ixtuigako dibiamu aanï tïbagiañdïrï ïmadï Diuxi tïtïañikarudï dai Diuxi gubukadagakïdï. Aanï aagai sai tomax tuma oidakami xibi ix makïdï xaïradagi aanïkïdï dai gin ñokikïdï aanï ïpï xaïrogidamu ïgaikïdï dibiakai aanï— itïtïdai Suxi.

2 Timoteo 4:5

Dïï gia aapi maiti gï agai ix pobuadagi. Gï agai xi kïïga sïïrhi gï tïgitokagi aapi bhaiyoma dai mai dagitoagi ix gï maitiagi soi ïrhiaragai gï kabakadaitai aapi xïïxkadï soimaaxi taatakagi. Mos sai aapia aagada aapi go bhai ïrhiaragai aatagi aipakoga daidi kïïga ibuada gï aaduindaga ix makïdï gï maa Diuxi.

Apokalipsis 12:11

Dai go buaboitudadami maitï go diabora mukukai go Arhi Kañiru agaikïdï dai aaxtakai ïgai ïradï ïmo daaxdaragai dukai. Ga maitï ïgai buaboidaitai go bhai ïrhiaragai aatagi. Gobai ïr ï galbaaxi aatagi ix makïdï bïïxi aipakoga aagaiña ïgai tudu. Dai mai buamï ïrhidiña ïgai tomaxi jaa kodaiña buaboidaradïkïdï.

2 Timoteo 2:9

Dïï gia oidaga odami ix makïdï soimaaxi gin taatamiturhi gin sobhida ïrhiditai sai mai aagana aanï go bhai ïrhiaragai aatagi. Ïgai asta gin buu kadenakïdï ïmo soimaaxi ibuadami dukai dai gin maixa gin sobhida ïrhiditai. Dïï gia mai tipu xorai kadenakïdï burhiagi Diuxi ñokidï sai maiti ibuada gobai aaduindadï. Mai bhaiga ix sobhidagi gobai tudu.

2 Timoteo 1:12

Dai xibi maixapi aanï ibuadatai go aaduindagai ix makïdï gin maa ïgai dïï mai xaïrai aanï gokïdï. Kaxkïdï tudu kïïga maatï aanï ix tuiga Suxi Kristo ix makïdï buaboitudai aanï dai gobai ïr ïmo abïnakidaragai gin ibhïdaga bïïtarï. Kïïga buaboitudai aanï tudu dai asta nukaturhi aanï gin ibhïdaga. Kaxkïdï tudu kïï maatï aanï sai ïgai bia gubukarhigai ix gin nukadakagi asta xïïxkadï dibiagi ïgai ïpamu.

Efesios 3:1

Aanï Pabora maixapi xibi mos ïïgiditai aanï Suxi Kristo. Aagaiña aanï go bhai ïrhiaragai aatagi gïn buitapi aapimï ix makïdï maiti ïr judidiu kaxkïdï maixapi aanï xibi.

Filipenses 3:10

Gin aaduñi, kïïga biaka in ïrhidi bamioma urabaragai Suxi Kristo ïmadï. Taata in ïrhidi sai kïïga gubuakami dukai gaatabuadagi ïgai gin ïmadï ïpïan dukai ix dukatai gubuakami aatadui Diuxi go Suxi ïmadï aidïxi duakaturhi ïgai. Biaka in ïrhidi urabaragai Suxi ïmadï soimaaxi taatakai aanï ïpïan dukai xi taata ïgai. Ïpïan tuigaka in ïrhidi aanï Suxi Kristo asta xako ukami bhai gin dukagi ix mukiagi ïpïan dukai ïgai.

Lukas 9:26

Daiñi, aanï ïgai ix makïdï ïr Diuxi otosadï dai kïïrhi busai dai ayimu ixtugako imimu aanï tami oidigi daamaiñdïrï. Dïï gia gokiïrï dibiamu aanï ïpamu gin tïtïañikaruga ïmadï dai maaxitudamu xïïxi ïr gïdukami aanï dai xïïxi ïr gïdukami gin Oga ïpï. Gïn aagidamu aanï ix dukatai iduñimu aanï dibiakai. Amaxi aagadamu aanï sai maiti ïr gin aaduñi xorai mai buaboituda ïrhiada gin ñoki ïmadï xorai gin xaïradagi.

2 Timoteo 1:16

Dïï gia go Onesiforo gia mai podui. Kaxkïdï ipïrhidi aanï ix kïï tuigakagi Gïr Nukadakami go Onesiforo kiidïrï óídakami bui. Mai xaïraiña go Onesiforo ix gin dibidagi tudu tomaxi maixapi aanï dai bhaiyoma gin abïnakidiña gin didibiditai tami Romïrï. Dai aidïxi tukamïrï dibia ïgai tami Romïrï aipakoga gin gaa ïgai asta xïxkadï gin tïï.

Efesios 4:1

Aanï gin maixatu mos ïïgiditai aanï Suxi Kristo. Dai aanï xibi bïïxi gin ibhïdagakïdï gïn abïnakida in ïrhidi xi kïï bhai maaxkami dukai óídakana aapimï. Gï agai xi kïï bhai maaxkami dukai óídakagi aapimï aidï dai podukai maaxitudagi sai gia ïr buaboi sai Diuxi ka ïkobai gïn bubaitu.

Apokalipsis 1:9

Gin aaduñi, kïï maatï aanï sai soimaaxi gïn taatamiturhiña jaa bïïna darakatai aapimï Suxi Kristo dai aanï ïpï taataiña xi soimaaxi gin taatamiturhi jaa bïïna dakatai aanï Suxi Kristo ïpï. Ïmo xïgïmï aatïmï tudu soimaaxi gïr taatamiturhitai jaa aatïmï bïïxkatai. Dïï gia ïmaduga Gïr Nukadakami dai ïgai ïr Suxi Kristo. Dai bïïna darakatai aatïmï ïgai buyiña aatïmï gubukarhigai ixtukïdï gïr kabakadagi go soi ïrhiaragai bui. Gïn aagidamu aanï ix dukatai gin daibusai ïmo imidagai tumiñoko. Ïmo arhi oidigana dajatadai aanï aidï ix makïdï go gïï sudagi ïrana kaatï. Patmos tïgidu go arhi oidigi ïgai. Ami gin maixatutadai jaa aagaitai aanï Diuxi ñokidï dai aagaitai Suxi Kristo. Ami dajatadai aanï tudu dai ïmo imidagai gin tïanïitadai Diuxi Ibhïadï dai aanï kïïga ïïgidimi bai todian dukai ïgai gubukadadïkïdï kaï aanï ix gïgïrï ño ïmoko gin gokiañdïrï. Po ïrhiadan kaiti trompeta.

Udaxi 1:24

Gïn aaduñi, mosïka arhi ïmaduga Diuxi dai ïgai bhai dui go kïïgakïrï bubaidaragai gïr bïïtarï Suxi Kristokïdï ix makïdï ïr Gïr Nukadakami. Kïïga ixtutuidikïi Diuxi ix gïn nukadakagi dai gïn soikïdagi sai mai dagitoagi aapimï gïn buaboidaraga sai podukai mai gïpiïrï surhigiagi aapimï. Dai kïï bhaiga ïgai sai bhai gïn buadagi saidi kïïga bhai ïrhiarakïdï gukakagi aapimï ami xako kabami totoarïi buitapi Diuxi. Kabami totoarïi Diuxi tudu mos ïï kïïga xigiamaaxkatai ïgai dai mos ïï kabami gubuakatai ïgai ïpï. Kïïga ixtutuidikïi ïgai ix bhai gïn duñagi sai mai biakagi aapimï toma lïïchi soimaaxkami gïn abhana dai bhodïrï baan gïn tutusamu ïgai ami buitapi ïgai ka kïïga bhai gïn dunakai ïgai.

1 Pedro 1:5

Dai Diuxi gïn nukadai bïïxi gubukarhigadïkïdï kïïga buaboitudai aapimï kaxkïdï. Gïn nukadai ïgai asta xïïxkadï ka kïïgakïrï bubuakiagi aapimï tudu. Dai xïïxkadï karhioga ugiti agadagi oidigi aidï maaxitulda agai Diuxi ix maaxika agai go bhai ïrhiaragai ix makïdï gïn aji agai ka kïïgakïrï bubuakïkai aapimï.

2 Timoteo 2:3

Aapi Timoteo gï agai ix gï kabakadagi ïmo sandaru dukai sai maiti gï maitïna go soi ïrhiaragai xïïxkadï daibuñagi soimaaxi. Gï aagidamu aanï maaxidaragaikïdï ix maaxi gobai. Daiñi, kïï maatï aapi sai aanï maiti gin daadagitoiña ix gin maitiagi soi ïrhiaragai dai bhaiyoma gin kabakadaiña xïïxkadï soimaaxi taatagi aanï. Dai podukai aapi ïpï gï agai ix gï kabakadagi ïmo sandarugadï dukaikatai aapi Suxi Kristo dai kïïga ïïgiditai ïgai.

1Tesalonicenses 3:4

Baasïkioñdïrï ka podukai gïn aagidiña aatïmï tudu. Dai xibi ka maatï aapimï saidi ïr buaboi ix makïdï gïn aagidi aatïmï. Ka soi gïn buididimi jaa tudu ix dukai gïn aagidi aatïmï.

Filipenses 1:7

Kïïga gïn oigïdai aanï gin aaduñi. Xadïrï maiti gïn oigïdaiña aanï tudu. Aapimï gin soikïiña bïïxi gin aaduindagïrï di. Daiñi, Diuxi kïï tuiga gin bïïtarï dai gin maa oigaragai sai aipakoga aituldana aanï go bhai ïrhiaragai aatagi. Dai gin maa oigaragai saidi gïr buidïrï ñiñokadamiga buitapi maaxituldana aanï saidi ïr buaboi go bhai ïrhiaragai aatagi ïpï. Bïïxi gobai gin maa oigaragai Diuxi sai ibuada aanï. Dai aapimï kïïga gin soikïiña. Dïï gia mai xu xi mosïkaxi gobai bïïtarï gin maa Diuxi oigaragai, gin maa ïgai oigaragai sai maixapikana aanï ïpï. Dai aapimï kïïga gin soikïiña asta maixapikatai aanï tami ïpï. Podukai taatan duu aapimï go soimaaxkami gin ïmadï. Kaxkïdï kïïga gïn oigïdai aanï.

Efesios 3:13

Kaxkïdï tudu gïn daanïi aanï xi maiti gïn dagitoagi aapimï ix soi gïn ïrhiadagi gin maixatudakai aanï tanai. Daiñi, gï agai xi kïïga xadutuadan taadakagi aapimï bhaiyoma xi gïn soikïitai gin maixatu aanï.

Romanos 16:25

Tï oigïda ñokada Diuxi bui tudu xadutudaitai ïgai. Kïïga ixtutuidikïi ïgai xi gïn gupurtudagi go bhai ïrhiaraga aatagikïdï ix makïdï aanï gamamaatïturhiña aagaitai Suxi Kristo. Ïkioma mos ïxtokikana go maatïtuldaragai ix makïdï aagai go Suxi Kristo. Mai kia kïkibakai oidigi abhiadïrï ïxtokikana gobai.

1 Juan 4:14

Dai aatïmï ïr nïijadami ix Diuxi gïr Oga otoi Maradï tami oidigi daama sai ïgai ïr kïïgakïrï bubaidadamikana bïïxi óídakami bïïtarï. Gobai aagidiña aatïmï óídakami tudu.

2 Timoteo 4:17

Dai tomaxi jaa gin dagito mai ïïgi bii aanï ami. Diuxi gin ïmadï dajatadai dai gin maa gubukarhigai sai bïïxi aagaiña aanï go bhai ïrhiaragai aatagi ami dudunukami bui. Dai gin soi ïgai xi aiturhi aanï go aatagi mui odami ix makïdï maiti ïr judidiu ïpï. Go dudunukami maiti ïr judidiukatadai di dai go gaa ix makïdï gin kaïkana ami maiti ïr judidiu ïpï. Kïïga gin soi Diuxi ami tudu dai kïïgakïrï gin busaitu sai mai tïañiagi gin muaragai go dudunukami aidï.

Filipenses 4:13

Tomax dukai Suxi Kristo ïgai dai gin mamaakai go gubukarhigai. Dai ïgaikïdï ixtutuidikïi aanï tomax tuma daibuñagi.

Romanos 9:33

Podukai tudu ojixi Diuxi ñokidïrï. Ami Diuxi ikaiti, Kïïga abïr gïn tïgito nïida. Daiñi, Israelïrï dasai aanï ïmo odai xako utuba agai mui odami mai buaboidakai ïgai. Dïï gia toma lïïchi mai xaïrogidamu tomarhi ïmo odami ix makïdï gia buaboitudagi ïgai, ikaiti Diuxi.

Hechos 5:41

Daidi go ojotoxikami bubuaka abhiadïrï xako darajatadai go bhaitï gukakami dai kïï gïn bhai gïn ïrhiatugai ïgai soimaaxi taatakai Suxi bïïtarï.

Apokalipsis 19:10

Pobai in tïtïdai ïgai antai totonakïdï kïkiba ïkasodï sonoana xadutuda iñagaitai Diuxi dukai. Dïï mos ïgai pobai in tïtïdai aidï, —Maiti pobuada. Aanï ïpï mos ïr pioñigadï Diuxi ïpïan dukai aapi ïmadï bïïxi go gaa ix makïdï aipakoga aagaiña Suxi Kristo ñokidï. Daiñi, Diuxi ñokituldiadamigadï aatïmï tudu xïïxkadï aagagi aatïmï Suxi Kristo ñokidï. Kaxkïdï gï agai xi mosïkaxi Diuxi xadutuada aatïmï dai maiti gï agai xi Diuxi dukai gin nïijada aapi— in tïtïdai ïgai.

Apokalipsis 1:2

Dai tami idi libroïrï oja aanï bïïxi ixtumaxi gin tïtïgidi ïgai dai ix makïdï gin tïtïgidi ïgai ïr ïmo ñoki Diuxiañdïrï imïdami dai aagai gobai go Suxi Kristo. Gobai tudu ïr go ñoki ix makïdï oja aanï idi libroïrï.

1 Korintios 1:6

Go ñoki ix makïdï gïn aagidi aanï aagaitai Suxi Kristo kïïga gubuakan dukai idui soiñi aapimïrï tudu.

VUAANA 19:35

Aanï ix makïdï ibuayi idi ojai ïr nïijadami ix dukatai pogïdui dai mai yaatagïi aanï. Buaboi aagai aanï tudu bai kïïga buaboitudana aapimï ix makïdï kaïkagi idi ñoki.

Kolosenses 1:24

Gin aaduñi Diuxi amadïrï, aanï soimaaxi taatamai xibi ibuadatai ïmo aaduindagai ix makïdï ïr soiñi gïn bïïtarï. Dïï gia tomaxi soimaaxi taatakagi aanï bïïxkïrï bhai gin ïrhidiña aanï maatïkatai sai aapimï gïn bïïtarï soimaaxi taataimi aanï. Daiñi, Suxi Kristo soimaaxi taata go buaboitudadami bïïtarï baasïkioma dai xibi aanï in ajïga xi soimaaxi taatagi go buaboitudadami bïïtarï ïpï ïpïan dukai ïgai.

Efesios 4:17

Aanï Pabora ñokai xibi gubukadagaikïdï ix makïdï gin maa Gïr Nukadakami. Dai aanï aagai sai mai ïpïan dukai óídakagi aapimï go ix makïdï mai buaboitudai Diuxi.

2 Korintios 6:7

Dai Diuxi gubukarhigadïkïdï gatïtïïgidi aatïmï ñoki ix makïdï ïr buaboi Diuxi Sandadarugadï dukai gaatabuadatai aatïmï tudu. Dai bui gugukaiña aatïmï go odami ix makïdï buidïrï bïïtï Diuxi dai maiti ixtutuidiña ïgai gïr bui kïïga buañixikatai gïr oidakaraga. Kïïga buañixikami óídaga aatïmï tudu dai gobai gïr soikïi xïïxkadï gïr bui ñokadagi jaa. Gobai gïr soikïi sai mai biakagi ïgai ixtukïdï gïr bui ñokadagi tudu.

Romanos 8:36

Po tudu ikaiti Diuxi ojadïrï. Ami ikaiti sai, Bïïx tasai gïr kodadan kaiti omarhigakami mos gï oiditai aatïmï. Kañiñiru dukai maaxi aatïmï ïgai bïïtarï. Mos kodituda bïïtarï dukai gïr nïidi ïgai tudu, ikaiti go ojai.

VUAANA 15:27

Dai aapimï gin mamaatïrdamiga gï aagai ix gamamaakada ñoki gin aagaitai ïpï. Gin ïmadï ajiopaiña aapimï aidï abhiadïrï ix tukamïrï gin aaga aanï gin aaduindaga kaxkïdï gï aagai ix gamamaakada aapimï ñoki ïpï— itïtïdai Suxi go mamaatïrdamigadï.

1 Tomoteo 2:6

Ïïgi gï tïïgitu Suxi Kristo tudu sai muana jaa ïmo daxdaragai dukai. Podukai bhai dui ïgai bïïxi óídakami bïïtarï sai ïgaikïdï kïïgakïrï bubuakïna óídakami. Ïgai dibia tami oidigi daama ixtuigako Diuxi ipïrhi xi dibiana dai gïr maaxiturhi sai Diuxi ipïrhidi ix kïïgakïrï bubuakïna bïïxkatai óídakami.

Kolosenses 1:11

Daanïiña aatïmï Diuxi ix makïdï kabami gubuka kïï gïdukatai ïgai tudu. Daanïi aatïmï Diuxi sai gin maakana gubukarhigadï. Podukai bhaigakamu aapimï xi mai ojodatai buidïrï gukiba go soimaaxi. Ipïrhidi aatïmï sai kïïga bhai ïrhiarakïdï

2 Timoteo 1:10

Dai xibi dibiakai Suxi Kristo gïr maaxitu ïgai xïï kïï tuiga Diuxi. Suxi Kristo bamioma ixtui ix bhai go mukigami tudu dai gïr aagidi sai xorai buaboitudagi go bhai ïrhiaragai aatagi kïïgakïrï oidaka agai bïïxkïrï bïïtarï.

2 Timoteo 2:8

Kïï maatï aapi sai Suxi Kristo ïr pipiixaradï go rey Dabidkaru. Dai kïï maatï aapi ïpï sai muu Suxi Kristo dai sai ïpamu duakatu. Gobai tudu ïr go bhai ïrhiaragai aatagai ix makïdï aagidiña aanï go óídakami.