2 Tesalonicenses 1:8 - Northern Tepehuan Bible

⁸ Dai aidï gï sïïrhiñdamu Suxi ïmadï go odami ix makïdï maiti ipïrhi ix urabagi Diuxi. Gïgïbituldamu ïgai tudu ix makïdï mai buaboitu go bhai ïrhiaragai aatagi ix makïdï aagai Suxi Kristo.

Tepehuan Northern: Diuusi ñiooquidʌ utuducami oodamicʌdʌ

⁸ Dai soimaa taatatuldamu ʌgai ismaacʌdʌ maivaavoitudai Diuusi dai tomali maiʌʌgidi Diuusi ñiooquidʌ ismaacʌdʌ aagai isSuusi Cristo ʌrcʌʌgacʌrʌ vuviadami.

2 Tesalonicenses 1:8 Referans Kwoze

1 Pedro 4:17

Gin aaduñi, ka ayi sai aagadagi Diuxi xorai kïïga idui dai xorai mai kïïga idui. Dai ïpïgioma aagada agai ïgai ix bhai kïï idui aatïmï ix makïdï ïr aaduñdï. Aatïmï ix makïdï kïïgakïrï bubuakimi tudu. Poduña agai Diuxi aatïmïkïdï tudu. Dïï gia xïï kabami bïïtïka agai gobai go odami bïïtarï ix makïdï mai ïïgidi go bhai ïrhiaragai aatagi ix makïdï gïr maa Diuxi. Diuxi aagada agai ix bhai kïi idui ïgai ïpï dai ïgai mai buaboitu. Kabami bïïtïka agai gobai ïgai bïïtarï tudu.

2 Pedro 3:7

Dai xibi go ñokidï gubukadadïkïdï nukadai ïgai go oidigi ïmadï tïbagi asta xïïxkadï bïïxi mïidagi ïgai táíkïdï. Po gï duñimu gobai xïïxkadï aiyagi ix aagadagi Diuxi xorai kïïga idui dai xorai mai kïïga idui tudu. Amaxi bïïxi nato xia duadamu ïgai go odami ix makïdï mai ïïgidi.

Hebreos 10:27

Ix modukai maiti ipïrhiada ïgai ix buaboitudagi aidï gia ka mos duadimuka agai ïgai nïnïrakatai sai Diuxi aagadagi ix bhai kïïga dui ïgai ix mai kïïga dui ïpï. Dai gokiïrï taatamu ïgai gïgïbidaragai go gïï taiyïrï xako xia gïn duñimu go buidïrï bïïtïkamigadï Diuxi.

Hebreos 10:30

Maiti gï agai xi gajiadïrï biagi aatïmï Suxi Kristo ka mai buaboituda ïrhiditai tudu. Daiñi, kïï maatï aatïmï ix kaiti Diuxi ojadïrï. Ïgai adukai ikaiti, Aanï ïr Diuxi dai gin sïïrhiñdamu aanï go soimaaxi ibuadami ïmadï. Maakimu aanï go gïgïbidaragai ix makïdï ajïga ïgai tudu, ikaiti Diuxi. Daidi ikaiti ïgai ïpï, Aanï ïr Ga Tïanïdami dai aagadamu aanï ix bhai kïï dui gin aaduñi ix mai kïï dui ïpï, ikaiti.

Hebreos 2:3

Dïï gia go utudui ñoki aagaitai go kïïgakïrï bubaidaragai bamioma namïga xi bhai go sïïrhikami ïkidadï. Gïr Nukadakami ix makïdï adaama namïga ïgai dai gïr aiturhi go utudui ñoki tudu dai mai xu xi go tïtïañikarudï ïgai dai gïr aiturhi gobai. Kaxkïdï bamioma namïga go utudui ñoki xi bhai go sïïrhikami ïïkidadï. Diuxi Maradï ïgai dai xibiapioma gïr aiturhi go utudui aatagi tudu aagaitai go kïïgakïrï bubaidaragai. Dai naana maaxi oidaga maaxidaragai saidi ïr buaboi aatagidï Suxi Kristo. Daiñi, kaxi gïr aagidakai ïgai go utudui aatagi bai go odami ix makïdï kaïkana kïïga gïr aagidiña ïpï saidi ïr buaboi gobai. Dai Diuxi ibuadana naana maaxi maaxidaragai ïpï sai podukai ïpï maatïkana aatïmï saidi ïr buaboi go utudui aatagi. Dai ïkobïrakoga xïïxkadï ipïrhiadagi Diuxi gamamaakai ïgai naana maaxi gubukarhigai go odami ix makïdï buaboitudai go aatagi ïpï. Diuxi Ibhïadï ïgai dai mamaakai go naana maaxi gubukarhigai buaboitudadami tudu. Dai nïiditai aatïmï sai go buaboitudadami biakana gubukarhigai Diuxi amadïrï saidi ibuada ïgai naana maaxi aaduindagai, gokïdï maatï aatïmï saidi ïr buaboi go aatagi ix makïdï buaboitudai ïgai ïpï. Naana maaxikïdï gï maatï saidi ïr buaboi go aatagi tudu. Sïïrhikïdï namïga go ñoki aagaitai go kïïgakïrï bubaidaragai tudu. ¿Kaxkïdï dukatai kïïgakïrï bubuakïna aatïmï ix mai buaboitudagi aatïmï? Gïr Nukadakami ïgai dai gïr aiturhi gobai di.

Galatas 4:8

Dïï bïïxkïrï duadikui aanï xïduñada ïpamu oi aapimï gïn ïïkidadï buaboidaragai dai go aaduindagai ix makïdï idui aanï gïn saagida ka maiti ibuadagi soiñi. Daiñi, ïkioma didiuxi dukai nïidiña aapimï naana maaxi ixtumaxi dukami uubixi maaxi dai biakana aapimï xi gaatabuadagi pipioñi dukai ïïgiditai pomaaxi buaboidaragai. Aidï mai kia maatïkatadai aapimï ïgai ix makïdï ïr Diuxi kïïgakïrï kaxkïdï.

Romanos 6:16

Daiñi, kïï maatï aapimï sai xudu ïmoko biaka ïrhiadagi gï amu, ïgai biakamu ix ïïgiadagi amudï tomax dukai. Dai po maaxi xibi gïn bïïtarï ïpï. Kïï bhaiga aapimï xibi xi gïn tïïgidagi xi go soimaaxkami gïn amukagi ïïgiditai aapimï go soimaaxkami. Dïï gia go soimaaxkami go ïï mukigami buapai. Dïï gia xi gïn tïïgidagi aapimï Diuxi xi ïr gïn amukagi ïgai ïïgiditai aapimï aidï gia ïgai kïïgakïrï gïn nïijadamu.

Mataibo 25:41

Dai bhodïrï ñokidamu aanï ïgai ix makïdï gin ogixapadïrï gukaka agai, ix makïdï mai buaboitudai tudu. Dai potïdamu aanï, —Iimibïrai aapimï tabhiadïrï. Diuxi mai kïïgakïrï gïn nïidi tudu. Iimibïrai xako bïïxkïrï bïïtarï mïïkana táí, xako bhai dui Diuxi gïgïbidaragai bïïtarï go diabora ïmadï tïtïañikarudï. Gamo abïr iimi tudu.

Apokalipsis 20:10

Dai bhodïrï ïmo gïï taiyïrï daitudamu Diuxi go diabora ix makïdï gabuirumadatadai go óídakami. Ami gïximu ïgai xako daja go gïmai kïixi ix makïdï Diuxi ñokituldiadamigadï gï aagaiña ïïgi dai maiti ïr buaboi. Ami ïr go gïï taiyïrï xako asufrekïdï mïmïjïi. Dai ami bïïxkïrï bïïtarï apia soimaaxi taata agai táí dai mai tipukamu ibhïxtaragai ïgai bïïtarï.

Hebreos 12:29

Kaxkïdï tudu xïxkadï gïr Diuxiga gïgïbituldagi soimaaxi ibuadami ïpïan dukai ibuayi ïgai ïmo táí ix makïdï nato mïmïidi bïïxi ixtumaxi mai buañixikagi.

Apokalipsis 21:8

Dïï jaa gia surhigimu aanï go gïï taiyïrï ix makïdï mïmïjïi asufrekïdï. Taiyïrï surhigimu aanï bïïxkatai ix makïdï dagito xi maitiagi duadimudagai tudu dai ix makïdï mai buaboitudai dai ix makïdï tukurhimagi ïïgi ibhïadï soimaaxi ibuadatai. Surhigimu aanï ix makïdï ïr gakodadami ïpï dai ix makïdï ïmadï bopoyiña jaa aipakoga dai taapïgami dai ix makïdï xadutudai uubixi dai ix makïdï ïr yaatabogami. Bïïxkatai ïgai gïn ajiagai xi go gïï taiyïrï surhigiagi. Gobai ïr go kugadïrï mukigami agaikïdï tudu— in tïtïdai Diuxi.

Apokalipsis 6:10

Dai gïgïrï daanïiña ïgai Diuxi dai potïtïdaiña, —Gïr Nukadakami, aapi gia ïkobai daja go gaa óídakamiañdïrï dai buaboi ñokai aapi. Gïr aagidañi xïï tïbïpidamu ix aagagi aapi xorai biaka agai gïgïbidaragai dai xorai mai biaka agai. Ka tïbïpi nïnïra aatïmï xi gïgïbitulda aapi go odami ix makïdï gïr koi— itïtïdaiña.

1Tesalonicenses 4:5

Maiti gï agai tudu ix ïïgiada aapimï gïn tukuga xïïxkadï gïn tanïda gobai sai soimaaxi ibuada aapimï. Daiñi, go gaa ix makïdï mai buaboitudai Diuxi adaimïiña ixtumaxi ipïrhidi ïïgi tukugadï dai aapimï maiti gï agai ix pobuadagi.

Romanos 1:28

Odami maiti ipïrhi xi xadutuadagi Diuxi tudu. Kaxkïdï Diuxi dagito xi adaimuagi ïgai tïgibudagai ix makïdï maiti ïr sïïrhi. Dagito ïgai xi odami ibuadagi naana maaxi ix makïdï maiti agai xi ibuadagi.

Hechos 6:7

Dai aidïpïrï odami bïïxi aipadïrï óídakami kaïkana Diuxi ñokidï. Jerusalenïrï bamioma muidaimi go buaboitudadami dai muidutai go dadaxdadami judidiu buaboitu ïpï.

VUAANA 3:19

—Aanï ïr kudagi gï dukami tïtïgiditai odami ix tumaxi ïr buaboi. Dai ayi aanï tami oidigi daama dïï odami ibuadana soimaaxkami dai xioma ojoidiña ix ïxto biagi gïn soimaaxkamiga tukapiïrï dukai oidakatai. Mai ojoidi ïgai ix gï kudaidagi go soimaaxi ix makïdï ibuadana ïgai sai maaxikana. Bhaiyoma ïxto biaka ïrhidi ïgai gïn soimaaxkamiga. Kaxkïdï Diuxi gïgïbitulda agai ïgai.

Mataibo 25:46

Dai ix makïdï potïdagi aanï ka maigobai iimïda agai xako bïïxkïrï bïïtarï taata agai gïgïbidaragai. Dïï gia ix makïdï kïïga buañixi iibhïadï gia iimimu xako kïïgakïrï óídaka agai bïïxkïrï bïïtarï— itïtïdai Suxi go mamaatïrdamigadï.

Exodo 5:2

Daidi go Ejipituana Rey mos parunadan kaiti aidï daidi itïtïdai —Dukatai ïïgidana aanï go Nukadakami ix makïdï aagai aapimï. Tomarhi mai maatï aanï xorai ïgai di. Maiti an dagitoagi aanï go Israelitas xi iimiagi tudu— itïtïdai.

Genesis 3:24

Bhodïrï ka busaidakai go kïïrhi ïxikamiañdïrï sai bhobai xarhi apako tutu Diuxi goka nunukadakami. Tïtïañikarudï Diuxi go Nukadakami ïgai dai ajana ïgai bïï gokatai. Dai ami tïï Diuxi ïmo maxtai táí ïpï xi no xikorhi aimïrada ïgai bai mai bapakiagi tomarhi ïmadutai ami xako kïïka go uxi ixtukïdï tomax tuigako oidakagi odami.

1 Pedro 3:6

Dukami, go Sarakaru tïanïdami aagaiña ïgai go Abraamkaru xadutudaitai dai kïïga ïïgidiña. Kïïga xigian tuigatadai go Sara tudu. Dai aapimï ïpïan tutiakamu go Sara ïpï ix mai duadikoitai ibuadagi aapimï ixtumaxi ïr sïïrhi mai buamï gïn ïrhiditai ix gïn buidadagi gïn kukuna.

1 Pedro 1:2

Diuxi gïr oga ka ïkiaxdïrï maatï bïïxi aïkatai ixtumaxi daibuña agai dai kaxkïdï podukai gï tïgito ïgai dai ïïki abhiadïrï ka ïkobai gïn bubaitutadai ïgai saidi ïr aaduñdïkana aapimï. Ka ïkobai gïn buaboitu Diuxi Ibhïadï tudu saidi Suxi Kristo ïradï ix makïdï aaxi ïgai namïakana gïn bïïtarï saidi oigïldana Diuxi gïn soimaaxkamiga dai sai kïïga ïïgidiña aapimï ïgai. Gin aaduñi, ipïrhidi aanï ix Diuxi bamioma gïn tïïgidana xïï kïï tuiga ïgai gïn bïïtarï dai sai gïn maakana ibhïxtaragai gïn ibhïdagïrï.

Hebreos 11:8

Go Abraamkaru kïïga buaboitu ïpï dai kaxkïdï buaboidaitai ïïgidi ïgai Diuxi. Diuxi aagidi sai dagitona kiidï dai sai imïna xibhïakoga xako Diuxi maaki agai ïmai dïbïrai xako oidakagi. Dai bïïxkïrï ïïgidi ïgai tomaxi mai maatïkatadai xako imi agai kia.

Hebreos 5:9

Kïïga ïïgidi ïgai tudu tomaxi soimaaxi taata dai podukai bïïxi naato idui ïgai bïïxi aïkatai ixtumaxi gï agaitadai saidi ïr go bhaitï kïakïdï dadaxdadamikana ïgai gïr bïïtarï. Dai aidïxi kaxi iduitadai ïgai bïïxi ixtumaxi gï agai aidï gia Diuxi maa go sïïrhikami saidi ïr dadaxdadamikana ïgai bïïxkïrï bïïtarï. Dai kaxkïdï xibi kïï bhaiga Suxi Kristo ix kïïgakïrï bubiadagi odami bïïxkïrï bïïtarï ix makïdï ïïgiadagi. Diuxi ïgai dai maa sïïrhikami go Suxi tudu ïpïan dukai xi maa ïgai sïïrhikami go Melkisedek ïïki.

Galatas 3:1

Aapimï gin aaduñi Galasiïrï óídakami, sïïrhikïdï mai kïïgadu gïn tïgibudaga. Gïn bupuirumagi ïrhi aanï ixtumaxi. ¿Xorai ïgai dai gïn bupuirumagi tudu? ¿Mai ix kïïga gïn tïtïgidi aatïmï ix tuma bïïtarï muu Suxi Kristo kuruxiana?

2 Korintios 10:5

Maitïkïi aatïmï bïïxi go tïgibudagai ix makïdï sobhikïi odami ix maatiagi Diuxi tudu. Dai maigobai ïkobai bipiayi aatïmï bïïxi go tïgibudagai ix makïdï gïr sobhikïdagi ix ïïgiadagi aatïmï Suxi Kristo ïpï. Po buayi aatïmï saidi bhodïrï bïïxkatai aatïmï bhïna mosïkaxi go tïgibudagai ix makïdï ipïrhidi Suxi Kristo xi oijadagi aatïmï.

1 Korintios 15:34

Kïïga abïr gïn tïgito tudu daidi maigobai dasa go soimaaxi tïgibudagai. Daiñi, aanï aagai sai ïïmadutai ix makïdï gïn urapïkïi gïn ïmpaiñdaragïrï mai maatï Diuxi. Gï agaitadai ix soiñamudai aapimï sai maatïkana dïï mai kia soi aapimï dai gokïdï gï agaitadai ix xaïradagi aapimï.

Romanos 16:26

Dïï xibi gia mos nïiditai aatïmï ojadï go aagadami Diuxi ñokidï ka máí aatïmï gobai ix makïdï ïxtokikana ïkioma. Podukai tudu tïjai Diuxi dai ïgai bïïxkïrï mo maaxkana. Dai xibi kaxi bïïxi aipako óídakami buitapi ayi go bhai ïrhiaragai aatagi bai podukai buaboidaitai ïïgiadagi ïgai.

Romanos 15:18

Xibi mai duadimukai aagai aanï ix tumaxi dui Suxi Kristo aanïkïdï. Suxi Kristo ipïrhidi xi odami ix makïdï maiti ïr judidiu ïïgiadagi Diuxi kaxkïdï aatadui ïgai aanïkïdï. Go odami ix makïdï maiti ïr judidiu kaïkana ixtumaxi aagaiña aanï dai nïidiña ixtuma ibuadana kaxkïdï ïïgidi ïgai Diuxi.

Romanos 10:16

Dïï mai xu bïïxi óídakami buaboitu go bhai ïrhiaraga aatagi. Go Isaiaskaru ïpï pokaiti ïki sai mai xu bïïxi óídakami buaboitudai. Ïgai gatïkaka Diuxi aidï daidi ikaiti, Gïr Nukadakami, ¿Oidaga xi ïmadutai xorai buaboida kaï gïr aatagi? ikaiti.

Romanos 1:5

Suxi Kristo kïï tuiga aatïmï ojotosadï gïr bïïtarï kaxkïdï gïr dáí ïgai saidi ïr ojotosadïkana aatïmï bai jaa mui odami ix makïdï maiti ïr judidiu buaboitudaiña dai ïïgidiña ïgai. Podukai gïr otoi Suxi Kristo baidi mui odami ix makïdï maiti ïr judidiu kïï xadutuadana ïgai.

VUAANA 8:19

Daidi go gaa itïtïdai, —¿Bako daja gï oga?— itïtïdai. Daidi Suxi itïtïdai, —Aapimï mai maatï xorai aanï dai mai maatï aapimï ïpï xorai ïr gin Oga— itïtïdai. —Ix gin maatïkamudai aapimï xorai aanï aidï gia maatïkamudai aapimï gin Oga ïpï— itïtïdai.

Udaxi 1:7

Dai podukai ïpï go ïïkidadï óídakami Sodomana dai Gomorana ïmadï bïïxkatai ix makïdï miadïrï óídakatadai ami. Galnaaxi idui ïgai ïpï gaïmadï bopodatai aipakoga. Ibuadana ïgai buirudagai tukugadïkïdï tudu ïmadï bopodatai ïgai ix makïdï maiti ïr sïïrhi. Kïï maatï aapimï sai Diuxi gïgïbiturhi ïgai. Dai gokïdï gïr tïtïïgidi Diuxi sai taiyïrï gïgïbitulda agai ïgai bïïxi soimaaxi ibuadami. Dai gïgïbidaradï bïïxkïrï bïïtarïka agai dai mai ugiti agai.