2 Pedro 2:1 - Northern Tepehuan Bible

¹ Ka agai aatïmï go ñiñokituldiadamigadï Diuxi ix makïdï óídakatadai ïïki saagida go Israelitas. Ïgai gatïtïïgidiña mosïkaxi ixtumaxi ïr buaboi. Dïï gia oidakatadai jaa ix makïdï ñokituldiadamigadï Diuxi gïn aagaiña ïïgi dïï maiti ïr ñiñokituldiadamigadï ïgai Diuxi. Ga tïtïïgidiña ïgai yaatagi bhaiyoma. Dai oidakamu pomaaxkami aapimï buaboitudadami gïn saagida ïpï. Oidaka agai tïtïïgiadami yaatagi ïpï tudu. Sastudakami dukai ñokadamu ïgai dïï gia ïxtotai dukai basamu ïgai yaatagi saagida aatagidï daidi aagada agai saidi Suxi Kristo maiti ïr ï Tïanïdami. Mai Tïanïdami aagamu ïgai Suxi Kristo tudu tomaxi Suxi ka dáí go namïgadï go kïïgakïrï bubaidaragai ixtukïdï kïïgakïrï bubuakiagi ïgai. Gajiadïrï bipiadamu ïgai Suxi Kristo tudu dai podukai ïïgi abhana aituldamu ïgai ïmo gïgïbidaragai ix makïdï todian dukai ayimu.

Tepehuan Northern: Diuusi ñiooquidʌ utuducami oodamicʌdʌ

¹ Dʌmos ʌjudidíu saagida oidacatadai mamaatʌtuldiadami yaatavogami ʌʌpʌ. Dai aapimʌ gʌnsaagida ʌʌpʌ oidaca agai mamaatʌtuldiadami yaatavogami. Ʌgai gamamaatʌtuldiadamu Diuusi ñiooquidʌ dai saagida agadamu istumaasi maitʌrvaavoi dai poduucai vupuiirumadadamu ʌgai oodami. Dai vui ñioocadamu ʌgai Suusi Cristo ismaacʌdʌ cʌʌgacʌrʌ vuvaidi oodami. Dai todian duucai Diuusi soimaasi taatatulda agai ʌgai.

2 Pedro 2:1 Referans Kwoze

Mataibo 7:15

—Gïn nukadabïrai sai maiti gïn bupuirumadagi jaa ix makïdï tïtïïgiadami gïn aagai Diuxi ñokidï dai maiti ïr buaboi. Ïgai kïï tutiakami maaxi dïï gïn nukadabïrai. Ipïrhidi ïgai sai óídakami kañiñiru tutiakami ïrhiadagi dïï ïgai sïsïïyi gïn dukami bhaiyoma galtutiakatai. Soi buadana ïgai óídakami tudu— itïtïdai.

2 Pedro 2:3

Koimudadï tutiaka agai go tïtïïgiadami ñoki ïgai tudu dai gïn bupuirumadamu ïgai muidutai aapimï aatagidïkïdï gïn popoida ïrhiditai gïn tuminxiga. Dïï gia ka aagai Diuxi ïïki sai gïgïbitulda agai ïgai dai otoma ayimu gïgïbidaradï.

2 Timoteo 4:3

Ayimu ixtuigako go odami mai kaïka ïrhiadamu go buaboikïdï aatagi tudu dai bhaiyoma ibuada ïrhiadamu ïïgi ixtumaxi ipïrhiadagi. Dai kaxkïdï gaagadamu ïgai mui maakadami aatagi sai biakana xorai aagidagi ixtumaxi kaïka ïrhiadagi ïgai.

Mataibo 24:11

Dai oidaka agai mui yaatabogami aidï ix makïdï ñokituldiadamigadï Diuxi gïn aagadamu dai podukai bupuirumada agai ïgai mui óídakami— itïtïdai.

Galatas 2:4

Maiti gï circuncido go Tito tudu tomaxi go odami ix makïdï buaboitudadami gïn aagaiña ïïgi dai maiti ïr buaboitudadami, ïgai gia pokaititadai sai gï agaitadai ix gï circuncidandoagi ïgai. Go odami ïgai kajiomatadai ïmo aatagi aatïmïkïdï ix makïdï bïïna daraja Suxi Kristo. Kajioma ïgai sai ka mai gubuakïdï bia aatïmï xi ïïgiadagi go Moises sïïrhikamigadï tudu. Dai mai bhai ïrhidi ïgai gokïdï. Ami ayitadai ïgai gïr saagida dai ïxto dukai nïida ïrhiditadai ix dukatai ibuadana aatïmï. Ipïrhiditadai ïgai xi gubuakïdï ïïgiadagi aatïmï go sïïrhikami ïpamu dai xi gïr circuncidandoagi aatïmï.

1 Juan 4:1

Gin aaduñi, mui odami aipakoga óídakami ikaitiña sai ïgai ïr ñiñokituldiadamigadï Diuxi dai yaatagïiña ïgai. Maiti gï agai sai buaboitudadagi aapimï tudu. Gï agai bhaiyoma sai kïïga gïn tïgito kaïkagi aapimï dai maatïkagi xorai tïgibudadïkïdï ñokai ïgai. Ix bhai Diuxi Ibhïadïkïdï ñokai ïgai xi ïmai tïgibudadïkïdï ïpï.

Kolosenses 2:8

Daiñi, Suxi Kristo kïïgakïrï ïr Diuxi ïpïan ïxi Ogadï. Mai bii toma lïïchi xi kïïgakïrï ïr Diuxika ïgai ïpïan ïxi Ogadï tudu. Tomaxi gïr ïpïamaaxi biatu ïgai tukugadï bïïxkïrï kïïgakïrï ïr Diuxi ïgai. Dai kaxkïdï buaboitudakai aapimï ka bïïna bii aapimï Suxi Kristo dai ka maiti gïn biïga ixtumaxi gïn ibhïdagïrï. Ïgai tudu bïïxi adaama ïr Tïanïdami. Ïgai bamioma ïr gatïanïdami xi bhai tomax makïdï gubukadagai bipiakami tudu. Kaxkïdï maiti abïr gïn dagito xi gïn bupuirumadagi odami ix makïdï tïtïïgidi mosïkaxi óídakami tïgibudadï ix makïdï maiti ïr buaboi. Gobai maiti ïr soiñi. Aagaiña ïgai bituldaradï óídakami mosïkaxi dai mai aagai ïgai Suxi Kristo. Maiti abïr ïïgiada aatagidï ïgai. Tadu maamaixapikan dukai bii aapimï ïïgiditai aatagidï.

Tito 3:10

Aapi Tito, kïïga gï tïgito nïida ix makïdï gï urapïkïi gï aaduindagïrï. Dai ix oidakagi xorai gatïtïïgiadagi aatagi ix makïdï maiti ïr buaboi dai podukai ïjïkobai darasadan buadagi go buaboitudadami gï agai xi daidagi aapi. Gï agai xi aagidagi sai ix apia oijadagi ïgai gïpiïrï gïximu. Bhaiga aapi xi asta gokoakoga podukai maakadagi ñoki ix makïdï pomaaxi ibuadagi. Dïï gia ix mai ïïgiadagi ïgai gï ñoki aidï gia ka mai uurapïkïda aapi.

Tito 1:11

Dai pomaaxi aatagikïdï maitïkïiña ïgai tuminxi dai gobai maiti ïr sïïrhi. Gï agai xi daidagi xi ka mai pomaaxi aatagaiña. Kaxkïdï tudu ix makïdï ïïgiadagi aatagidï koidamako imïiña buaboidaradï. Dai ami Kretana mui gadïïdïdï ïmadï modukai maamaradï ïïgidiña dai xia buimi ïïgi buaboidaradï.

Filipenses 3:19

Ïgai taata agai gïgïbidaragai bïïxkïrï bïïtarï tudu. Ïïgidiña ïgai mosïkaxi ixtumaxi tanïdagi tukugadï dai podukai ïïgi tukugadï ïmo diuxi dukai nïidiña. Ojoidi ïgai xi aagadagi go soimaaxkami ix makïdï ibuayi ïgai dai gï agaitadai bhaiyoma xi xia ïïradagi ïgai gokïdï. Dai buamï gïn ïrhidi ïgai mosïkaxi ixtumaxi tami oidigi daama oidaga.

1 Korintios 6:20

Dai bhaiyoma xibi Suxi aa namïki ixtumaxi gï agaitadai dai gïn sabïrhi ix kaxkïdï xibi ïgai tuidadï aapimï. Kaxkïdï gïn tukugakïdï abïr maaxitudagi xïïxi ïr gïdukami Diuxi xibi. Podukai abïr ibuada ïmo xadutudaragai dukai ïgai bïïtarï.

Markos 13:22

—Dai dadimu jaa ïpï daidi tïimu saidi ïr Diuxi otosadï daidi ïr gïn bhaitï kïakamiga. Dai jaa tïimu saidi ïr aituldadami Diuxi ñokidï odami buitapi ïpï. Naana maaxi iduñimu ïgai ix makïdï odami ïïgi xadïrï ixtuidana dai podukai maaxituda agai xïï gupuka ïgai. Podukai buirumada agai mui odami. Dai asta go ix makïdï Diuxi ïko bubaitu katoma buaboituda agai ïpï dïï ïgai gia xadïrï gïn buirumadana go yaatabogami.

Apokalipsis 5:9

Dai ami ganïyi ïgai ïmo utudui nïidagai ix makïdï ikaiti, —Aapi Kañiru kïïga bia sïïrhikami xi bhïiyagi go libro dai upandagi seseyogadï ixtukïdï kuupidi gobai. Aapi tudu gï ïrakïdï dáí namïgadï bïïxi óídakami dai podukai sabïlturhi aapi Diuxi. Bïïxi go naana maaxi óídakami saagidañdïrï sabïrhi aapi ïïmoko, bïïxi go naana maaxi ñokadami saagidañdïrï tudu dai go naana maaxi gïgïr kiikiañdïrï óídakami.

Apokalipsis 2:9

Maatï aanï bïïxi ixtumaxi ibuayi aapimï. Kïï maatï aanï tudu xïï kabami soi taatamaiña aapimï dai xïïxi ïr soititigami aapimï ïpï mai biakatai bhaitoma ixtumaxi oidaga tami idi oidigi daama. Dïï gia bïïxkïrï ka bia aapimï mui namïakami ixtumaxi ix makïdï gïn maa Diuxi gïn ibhïdaga bïïtarï xi kaxkïdï gia ïr gïn bipidakami aapimï gïn ibhïdagakïdï. Maatï aanï ix makïdï pokaitiña sai kïïgakïrï ïr judidiu dai pokaitiña saidi ïr gin aaduñi dïï maiti ïr buaboi. Ïgai galnaaxi ñokai gin bui tudu pokaititai saidi ïr gin aaduñi. Urabaka ïgai go diabora bhaiyoma di.

Hebreos 10:29

Podukai gïgïbiturhiña ïgai ix makïdï mai ïïgiadagi go Moises sïïrhikamigadï tudu. Dai go utudui sïïrhikamigadï Suxi Kristo gobai gïïpi bamioma namïga xi bhai go Moises sïïrhikamigadï. Kaxkïdï gï maatï sai bamioma soi taadakamu ix makïdï mai buaboitudagi Suxi Kristo dai gajiadïrï dukai biagi. Gobai ïr ïpïan dukami xi ïmo tukuragai dukai nïijadagi ïgai Diuxi Maradï dai kïixonagi. Tukurakami dukai nïidi ïgai go aaduindagai ix makïdï idui Suxi Kristo aidïxi aaxi ïgai ïradï tudu. Dai Suxi Kristo ïradï ïgai dai namïaturhi go utudui sïïrhikami ixtukïdï ïkobai darakami bipiïyi aatïmï Diuxi bïïtarï. Daiñi, Diuxi Ibhïadï kïï tuiga gïr bïïtarï. Dai xi mai buaboituda ïrhiada ïmoko Suxi Kristo gobai ïr ïmo gïdukami parunaragai gï dukami Diuxi Ibhïadï buidïrï.

Kolosenses 2:18

Gin aaduñi oidaga tïtïgiadami ñoki ix makïdï gïgïrdukami gïn ïrhidi aagaitai ixtumaxi tïïtïkiïrï dukai tïï ïgai dai adaimïitai ïïgi tïgibudadï. Gïgïrdukïdï gïn ïrhidi ïgai dai maiti ïr gïgïrdukïdï. Dai pokaitiña ïgai sai gï agai odami xi Diuxi dukai xadutuadagi Diuxi tïtïañikarudï dai sai gï agai xi ïïgi soimaaxi gï taatamituldagi ïmoko tukugadï sai Diuxi kïïgakïrï nïidiña. Maiti abïr ïïgiada ïgai tadu gïn popoki ïgai gïn bhai ïrhiaraga.

Efesios 4:14

Podukai gïr soikïitai go mui soikïdadami ix makïdï Diuxi darai gïr bïïtarï ka mai aarhi dukaikamu aatïmï. Go aarhi gia otoma bhïiyiña ïmai tïgibudagai kaïkatai aatagidï jaa. Otoma buaboitudaiña ïgai yaatabogami tudu ix makïdï bupuirumadai odami. Dïï aatïmï gia mai pomaaxkamu aidï.

Mataibo 24:24

—Dai dadimu jaa ïpï daidi potïimu saidi ïgai ïr go otosadï Diuxi ix makïdï nïnïraka go judidiu dai jaa potïimu ïpï saidi ïr ñokituldiadamigadï Diuxi. Naana maaxi buirumadaragai iduñimu ïgai ix makïdï odami ïïgi maiti ixtutuidiña xi ibuadagi dai podukai maaxituda agai xïï gupuka ïgai. Podukai bupuirumada agai ïgai mui odami. Dai asta ix makïdï Diuxi ka ïko bubaitu katoma buaboituda agai ïpï— itïtïdai.

Mataibo 10:33

Dïï gia aagidamu aanï sai maiti ïr gin aaduñi ïgai ix makïdï maiti ipïrhi xi maaxiko aagadagi saidi gin buaboitudai— itïtïdai.

Apokalipsis 13:14

Diuxi maa ïgai oigaragai saidi ibuadana maaxidaragai podukai dai bupuirumadaiña ïgai bïïxi oidigi daama óídakami ibuadatai naana maaxi maaxidaragai ami buitapi go kïixi ix makïdï ka duayi. Dai tïjai ïgai óídakami saidi ibuadana ïmo ubixi ïpïamaaxkami go kïixi ix makïdï gï muragi dai duayi. Po buadana ïgai ipïrhiditai xi odami xadutuadagi ïgai.

Apokalipsis 2:13

dai maatï aanï sai go diabora ïgai dai gatïanïi ami go gïï kiikiïrï xako óídaga aapimï. Dai maatï aanï sai tomaxi tïanïi ïgai ami aapimï bïïxkïrï apia gin buaboitudai. Mai dagito aapimï gïn buaboidaraga tudu tomaxi ami xako óídaga aapimï gï muatu go kïïrhi Antipas tïgidukïdï ix makïdï sïïrhi ñokaiña gin bïïtarï aagaitai ixtumaxi ïr buaboi. Maiti gin dagito aapimï tomaxi ami gïn kiikiïrï oidaga go diabora tudu.

Udaxi 1:18

Ïkiaxdïrï gïn aagidi ïgai sai xïïxkadï karhioga ugiti agadagi oidigi saidi oidaka agai mui parunadami. Ïgai adaimuda agai ïïgi bhai ïrhiaradï ibuadatai ïïgi ixtumaxi bhai ïrhiadagi ïgai. Po kaiti go ojotosadï Suxi Kristo baasïkioma tudu dai ipïrhidi aanï saidi gïn tïgitokagi aapimï gobai.

1 Juan 2:26

Gin aaduñi, oidaga odami ix makïdï gïn tïïgida agai yaatagi gïn bupuirumada ïrhiditai dai kaxkïdï gïn ojidi aanï idi ojai mïsai maatïkana dai gïn nukadakana.

1 Pedro 1:8

Gin aaduñi, kïïga oigïdai aapimï go Suxi Kristo, tomaxi mai nïidi aapimï. Apia buaboitudai aapimï tomaxi mai nïidi aapimï kia tudu. Dai mai tipu ñoki ixdukatai aagagi xïï kabami bhai gïn ïrhidi aapimï buaboitudatai aapimï Suxi.

Efesios 1:7

Suxi Kristo aaxi ïïgi ïradï gïr bïïtarï tudu. Kaxkïdï kïïgakïrï bubuaka aatïmï dai oigïrhikami bii aatïmï gïr soimaaxkamigakïdï bïïnakai aatïmï Suxi Kristo. ¡Xïï kïï tuiga Diuxi aidï!

Galatas 5:20

Naana maaxi ibuadana odami ix makïdï ïïgidiña ïïgi tïgibudadï tudu. Diuxi dukai xadutudai ïgai ixtumaxi ix makïdï maiti ïr Diuxi. Kïkïïdarakana ïgai ïpï. Gïn kïïdaiña aipakoga dai gïn bupui ñokaiña. Ïjïgakoitïrïkana ïgai dai bhakoitudakana. Mosïkaxi ïïgi gïn bïïtarï buamï gïn ïrhidiña ïgai. Ïjïkobai buiyiña ïgai naana maaxi tïgibudagai dai ïjïkobai bipiïyiña oiditai go naana maaxi tïgibudagai ïpï.

Galatas 4:17

Daiñi, kïï maatï aanï sai oidaga jaa ix makïdï ipïrhidi sai ïmo gïn buidïrï kaatïkami dukai gin nïijadagi aapimï. Ïgai gïn aagidiña naana maaxi aatagi ix makïdï maiti ïr buaboi. Ïgai kabami gaagadan buayi ixtumaxi ïr soiñi aapimï gïn bïïtarï dai maiti ïr buaboi. Mos ipïrhidi ïgai xi urabagi aapimï kaxkïdï pobuayi ïgai. Gïn oigïdadan buayi ïgai tudu dïï maiti ïr buaboi. Bhaiyoma pobuayi ïgai ipïrhiditai sai ka maiti gin urabagi aapimï. Ipïrhidi ïgai xi mosïkaxi ïgai urabagi aapimï tudu. Ipïrhidi ïgai xi ïkobai gïn biagi aatïmïañdïrï ix makïdï aagai ixtumaxi ïr buaboi. Kaxkïdï gïn oigïdadan buayi ïgai.

Romanos 16:18

Ix makïdï pomaaxi gamamaakai aatagi maiti ibuayi Kristo Gïr Nukadakami aaduindadï tudu. Dai bhaiyoma ïïgi ibuayi ixtumaxi bhai ïrhidi ïgai. Xigian dukai aatagaiña ïgai dai aagai ïïgi ix ixtumaxi kaïka ïrhiadagi óídakami. Podukai buirumadai ïgai mui ix makïdï maiti gïn nukadatai óídaga.

Lukas 21:8

Dai Suxi potïtïdai, —Mui dadimu kia jaa ix makïdï pokaitadamu sai bia gin sïïrhikamiga. Pokaitadamu ïgai saidi ïr Diuxi otosadï gabhaitïkïakami tudu. Dïï aapimï gï agai xi gïn nukadakagi sai maiti gïn bupuirumadagi ïgai. Jaa pokaitadamu sai ka aijimi Diuxi otosadï ïpï dïï maiti abïr buaboitudada ïgai.

Lukas 6:26

—Dai sogigi aapimï ix makïdï bïïxi go óídakami kïïga ñokadagi gïn bïïtarï. Daiñi, go óídakami ïïki kïïga ñokaiña bïïtarï go ix makïdï ñokituldiadamigadï Diuxi gïn aagaiña dai maiti ïr buaboikana. Ïgai mos bupuirumadaiña óídakami aagiditai mosïkaxi ixtumaxi kaïka ïrhiditadai óídakami. Dai xibi xi kïïga ñokadagi óídakami aapimï gïn bïïtarï ïpï gobai itïiya ïrhidi sai aapimï ïpï mos aagidimi odami mosïkaxi ixtumaxi kaïka ïrhidi dai mai xu xi ixtumaxi Diuxi ipïrhidi. Ix buaboikïdï tïtïgiadagi aapimï ñoki ixdukatai Diuxi ipïrhidi aidï gia xadïrï kïïga ñokaiña bïïxi odami gïn bïïtarï— itïtïdai.

Galatas 3:13

Dïï gia Suxi Kristo taata go gïgïbidaragai gïr bïïtarï mukukai kuruxiana1 dai kïïgakïrï gïr bubaitu. ¿Mai ix podukai aagai go Diuxi ojadï? Ami ikaiti sai, Xorai uxiana nagiïkagi tukugadï ïgai maaxitudai sai bia ïgai ïmo gïgïbidaragai Diuxiañdïrï, ikaiti go ojai. Kaxkïdï gï maatï sai Suxi Kristo taata go gïgïbidaragai gïr bïïtarï.

1 Korintios 7:23

Sïïrhikïdï gïïpi aa namïki Diuxi dai gïn sabïrhi tudu dai kaxkïdï xibi ïr pipioñigadï aapimï Diuxi dai ka mai bia sïïrhikami ix ïïgiadagi tïgibudadï oidigi daama óídakami.

Apokalipsis 3:8

Kïï maatï aanï bïïxi ixtumaxi ibuayi aapimï. Daiñi, tomaxi mai xii gupuka aapimï bïïxkïrï kïïga ïïgidi aapimï gin ñoki dai mai ïxto xi gin buaboitudai. Kaxkïdï gïn maa aanï oigaragai sai aagada aapimï gin ñoki dai mai tipu xorai gïn sobhidagi.

Lukas 12:9

Dïï gia xorai pokaitadagi jaa buitapi ix maiti gin buaboitudai aanï ïpï pokaitadamu sai ïr buaboi ix maiti gin buaboitudai. Pokaitadamu aanï Diuxi tïtïañikarudï buitapi tudu— astïdai.

1 Tomoteo 5:8

Dïï gia xi ïmadutai go buaboitudadami mai nukadakagi ïïgi aaduñdï gobai itïiya ïrhidi sai ka dagito ïgai buaboidaradï dai bamioma galtuiga xi bhai go gaa ix makïdï mai buaboitudai. Dai bamioma ïr galtuigakami ïgai ix mai nukadakagi maamaradï dai dïïdïdï.

Apokalipsis 6:10

Dai gïgïrï daanïiña ïgai Diuxi dai potïtïdaiña, —Gïr Nukadakami, aapi gia ïkobai daja go gaa óídakamiañdïrï dai buaboi ñokai aapi. Gïr aagidañi xïï tïbïpidamu ix aagagi aapi xorai biaka agai gïgïbidaragai dai xorai mai biaka agai. Ka tïbïpi nïnïra aatïmï xi gïgïbitulda aapi go odami ix makïdï gïr koi— itïtïdaiña.