2 Pedro 1:3 - Northern Tepehuan Bible

³ Gin aaduñi, kaxi gïr maa Suxi Kristo bïïxi aïkatai ixtumaxi tïgito aatïmï buaboitudadami saidi bhaigakana aatïmï xi kïïga buañixikami oidakagi Diuxi buitapi. Podui ïgai ïïgi gubukarhigadïkïdï tudu Diuxikatai ïgai. Ka máí aatïmï Suxi Kristo tudu dai kaxkïdï gïr maa ïgai bïïxi ixtumaxi tïgito aatïmï. Gïr tïtïgidi ïgai xïïxi ïr gïdukami ïgai tudu dai xïïxi kïï tuiga ïpï dai ka maatïkatai aatïmï gobai ka ipïrhi aatïmï xi oijadagi. Gïr tïtïïgidi ïgai xïïxi ïr gïdukami ïgai dai xïï kïï tuiga dai gobai ïr ïmo abïnakidaragai dukai gïr bïïtarï ix urabagi aatïmï. Podukai gïr abïnaki ïgai ix urabagi aatïmï tudu.

Tepehuan Northern: Diuusi ñiooquidʌ utuducami oodamicʌdʌ

³ Diuusi aliʌ viaa guvucadagai. Dai ʌgai casi gʌrmaa vʌʌsi istumaasi tʌgito aatʌmʌ dai cʌʌgacʌrʌ oidacagi dai siaa duutuadagi ʌgai. Diuusi gʌrsoi tʌsai maatʌna Suusi Cristo. Ʌgai ʌcovai gʌrvuvaitu. Dai ʌgai aliʌ viaa guvucadagai daidʌ idui naana maasi istumaasi gʌgʌrducami.

2 Pedro 1:3 Referans Kwoze

1 Pedro 5:10

Kïï tuiga Diuxi gïn bïïtarï tudu dai gïn báí ïgai saidi aapimï ïpï gïn ajiagi go gïdukami xadutudaragai ix makïdï biakamu ïgai bïïxkïrï bïïtarï. Aapimï gïn aji agai go xadutudaragai gobai bïïnakatai aapimï Suxi Kristo tudu. Dïï gia gï agai sai soimaaxi taatamadagi aapimï kia dïï gia mai xii tïbïragaka agai go soimaaxi taataragai. Dai gokiïrï bhai gïn buadamu Diuxi sai maiti gïn biïgakagi tomarhi ïmo ixtumaxi gïn ibhïdagïrï. Kïïga gïn gupurtuda agai ïgai aidï gïn ibhïdagïrï saidi mai tipukagi ixtukïdï dagitoagi aapimï gïn buaboidaraga. Po duñimu Diuxi kïï tuigakatai ïgai gïn bïïtarï tudu.

2 Timoteo 1:9

Daiñi, Diuxi kïïgakïrï gïr bubaitu dai gïr báí saidi ïr ïko darasadïkana aatïmï. Dai mai xu ix kïïga idui aatïmï xi kaxkïdï ïkobai gïr bubaitu ïgai dai bhaiyoma kïï tuiga dai ïgai podukai gï tïgito ïïki mai kia tipukatai oidigi. Kaxkïdï kïïgakïrï gïr bubaitu ïgai.

Romanos 8:32

Daiñi, Diuxi mai tudayitai gatïïgi ïïgi maradï sai mukuna gïr bïïtarï. Kaxkïdï kïïga maatï aatïmï sai gïr maakimu ïgai bïïxi aïkatai go gaa ixtumaxi ix makïdï bia ïgai gïr bïïtarï ïpï.

2 Korintios 12:9

Dai bhaiyoma pobai in tïtïdai Diuxi sai, —Maiti an maigo imituda iñagai gobai— in tïtïdai ïgai. —Dïï gia kïï tuiga aanï gï bïïtarï dai gï maakimu aanï gubukarhigai saidi gï kabakadagi aapi go soimaaxi taataragai bïïtarï. Mosïkaxi gobai tïgito aapi tudu. Xïïxkadï mai gubuakagi aapi amaxi kïïga maaxkana gin gubukarhiga gï soikïitai aanï tudu— in tïtïdai ïgai. Kaxkïdï kïïga bhai ïrhiarakïdï aagaiña aanï xïïxi mai gubuka aanï. Bhai gin ïrhidiña aanï maatïkatai sai podukai kïïgioma maaxkana gubukarhigadï Suxi Kristo gin abhana gaatabuadatai ïgai tudu.

1 Pedro 2:21

Kïïgakïrï gïn bubaitu Diuxi mïsai kïïga ibuada aapimï tudu. Dai ïgai ipïrhidi sai apia kïïga ibuada aapimï tomaxi soimaaxi gïn taataturhiadagi jaa kïïga ibuadatai aapimï. Suxi Kristo soimaaxi taata kïïga ibuadatai ïgai tudu dai gï agai sai kïïga gïn tïgito nïidagi ixdukatai ibuadana ïgai dai podukai ibuadagi aapimï ïpï.

2 Tesalonicenses 2:14

Gïn báí ïgai sai kïïgakïrï bubuakïna aapimï gïn aagidakai aatïmï go bhai ïrhiaragai aatagi. Dai xibi ka buaboitudakai aapimï gïn ajiagai xi urabagi Suxi Kristo xïïxkadï bhïiyagi ïgai gïdukami xadutudaragai gï maaxitudakai xïïxi ïr gïdukami. Aidï aapimï bui agai gïdukami xadutudaragai ïgai ïmadï ïpï.

1 Pedro 2:9

Dïï aapimï gia mai taata agai gïgïbidaragai podukai. Aapimï ïr ïko bubaidadï Diuxi tudu dai ïr ix makïdï maa ïgai sïïrhikami saidi ïr dadaxdadamigadïkana aapimï. Ïmo aadunumï aapimï xibi ïkobai darasadïkatai aapimï Diuxi dai ïgai tuidadï aapimï. Kaxkïdï xibi bhaiga aapimï xi maaxitudagi jaa bïïtarï xïï kïï tuiga Diuxi. Kaxi gïn busaitu ïgai abhiadïrï xako tukapi dukai óídakatadai aapimï mai maatïkatai ixtumaxi ïr buaboi tudu. Dai xibi gia kaxi gïn daibuñtu ïgai xako xigiamaaxi gïn oidakaraga kïïga tonoraka maaxkatai gobai.

1Tesalonicenses 4:7

Diuxi gïr báí mai xu sai soimaaxi ibuadagi aatïmï tudu dai bhaiyoma gïr báí sai ïgai bïïtarïkana aatïmï.

1 Pedro 1:15

Daiñi, ikaiti Diuxi ojadïrï sai, Aanï ïr Diuxi dai ïkobai daja aanï bïïxi go soimaaxkamiañdïrï. Kaxkïdï gï agai sai ïkobai óídaka aapimï bïïxi soimaaxkamiañdïrï ïpï, ikaiti Diuxi. Diuxi ïgai dai ïkobai gïn bubaitu tudu. Dai kaxkïdï gï agai sai kïïga buañixikami óídakagi aapimï ïkobai darakatai bïïxi go soimaaxkamiañdïrï. Gï agai sai podukai óídakagi aapimï bïïxi aïkatïrï ix makïdï ibuadagi aapimï tudu.

Efesios 4:1

Aanï gin maixatu mos ïïgiditai aanï Suxi Kristo. Dai aanï xibi bïïxi gin ibhïdagakïdï gïn abïnakida in ïrhidi xi kïï bhai maaxkami dukai óídakana aapimï. Gï agai xi kïï bhai maaxkami dukai óídakagi aapimï aidï dai podukai maaxitudagi sai gia ïr buaboi sai Diuxi ka ïkobai gïn bubaitu.

1 Korintios 1:9

Dai kïïga gï maatï sai Diuxi gïn soiñamu ix kabakan dukai gukibana aapimï kaxkïdï tudu ïgai kïï sïïrhi aatabuayi dai mai yaatagïi. Dai ïgai kaxi ïkobai gïn darai sai bïïnakan darakagi aapimï Maradï. Kaxkïdï ïpï gï maatï sai Diuxi gïn soiñamu ix kabakan dukai gukibana aapimï gïn buaboidaragïrï asta go kugatïrï tasïrï ukami. Ka bïïna daraka aapimï Suxi Kristo Gïr Nukadakami kaxkïdï.

2 Pedro 1:2

Gïn daanturhiña aanï saidi bamioma kïïga maatïkana aapimï Diuxi ïmadï Suxi Kristo Gïr Nukadakami, saidi podukai maatï taatana aapimï xïï kïï tuiga ïgai gïn bïïtarï dai sai kïïga ibhïxtakan taadakana gïn ibhïdaga.

2 Pedro 1:5

Kaxkïdï ka maatïkatai aapimï ixtumaxi idui Diuxi gïr bïïtarï gï agai sai kabami gïn aajagïdagi aapimï dai apia oijadagi gïn buaboidaraga kïïga buaboitudaitai aapimï Suxi Kristo. Dai bhodïrï ka kïïga buaboitudaitai aapimï gï agai ïpï sai kabami gïn aajagïdagi dai kïï bhai tutiakagi ïpï mai soimaaxi ibuadatai. Dai bhodïrï ka kïï bhai tutiakatai aapimï gï agai ïpï sai kabami gïn aajagïdagi dai bamioma mamaatïrdagi ixtumaxi ïr buaboi.

1 Pedro 3:9

Xïxkadï soimaaxi gïn buidadagi jaa maiti abïr aadïrï soimaaxi ibuada ïpï. Ix soimaaxi ñoki gïn aagidagi ïmai maiti abïr aa noraida soimaaxi ñoki dai bhaiyoma abïr aagiada ïmo bhai ïrhiaragai ñoki. Pomaaxi bïïtarï kïïgakïrï gïn bubaitu Diuxi tudu saidi kïïga buidadagi aapimï jaa. Dai Diuxi gïn maakimu naana maaxi bhai ïrhiaragai ix pobuadagi aapimï.

Kolosenses 1:16

Suxi tudu bïïxi idui ixtúmaxi. Bïïxi idui ïgai ixtumaxi oidaga tïbagiana dai tami oidigi daama ïpï. Idui ïgai ixtúmaxi maaxkana odami bïïtarï dai ïpï ixtumaxi mai maaxi. Idui ïgai asta go tïtïanïdami dai go dudunukami dai go gupudagai bipiakami bïïxi. Suxi Kristokïdï idui Diuxi bïïxi aïkatai tudu dai Suxi Kristo bïïtarï idui gobai.

Efesios 4:4

Ïmo aadunumï aatïmï tudu bïïxkatai ix makïdï bia Diuxi Ibhïadï dai ïgai mos arhi ïmaduga. Dai ïmaduga ïpï go gïï bhai ïrhiaragai ix makïdï nïnïrakatai ajiopai aatïmï bïïxkatai.

Filipenses 4:8

Ïpï ïmo ixtumaxi gïn aagida in ïrhidi aanï aapimï gïn aaduñi Diuxi amadïrï. Daiñi, gïn aagidamu aanï ixtumaxi gï agai xi tïgito ajiopadagi aapimï. Tïgitodabïrai ixtumaxi ïr buaboi tudu dai ixtumaxi ïr kïï sïïrhi dai ixtumaxi ïr buañixi dai ixtumaxi xigiamaaxi. Gïn tïtïgitodabïrai ixtumaxi ïr kïï bhai maaxkami tudu.

Mataibo 28:18

Dai ami buidïrï ayi Suxi go mamaatïrdamigadï daidi potïtïdai, —Ka bhïiyi aanï ïmo sïïrhikami dai bïïxi adaama ïr Tïanïdami aanï tami oidigi daama dai mïï tïbagiana ïpï.

Hebreos 1:3

Diuxi Maradï kïïga ïmadugan tuiga Diuxi ïmadï dai maatïkatai aatïmï Diuxi Maradï podukai máí aatïmï xïï gïïdu dai xïï xigiamaaxi Diuxi. Dai ñokidï Diuxi Maradï sïïrhikïdï gubuka. Go ïïgi ñokidïkïdï gatïanïi ïgai bïïxi ixtumaxi dai nukadai ïpï sai mai xia gï buadagi. Ïgai tudu bhai dui ix dukatai gï buanadagi gïr soimaaxkamiga gïr ibhïdagïrï. Dai bhodïrï kaxi gïr buanakai jii ïgai tïbagiamu dai ami daiba sïïrhixapadïrï Diuxi ix makïdï bïïxi adaama gubuka.

1 Pedro 1:5

Dai Diuxi gïn nukadai bïïxi gubukarhigadïkïdï kïïga buaboitudai aapimï kaxkïdï. Gïn nukadai ïgai asta xïïxkadï ka kïïgakïrï bubuakiagi aapimï tudu. Dai xïïxkadï karhioga ugiti agadagi oidigi aidï maaxitulda agai Diuxi ix maaxika agai go bhai ïrhiaragai ix makïdï gïn aji agai ka kïïgakïrï bubuakïkai aapimï.

Romanos 9:24

Aatïmï tudu ïr ïko bubaidadï Diuxi. Ïïmadutai aatïmï ïr judidiu dai jaa gia cho.

Filipenses 3:8

Daiñi, aanï in bïïtarï gïïpi bamioma namïga sai urabaka aanï Suxi Kristo gin Tïanïdamiga dai bïïxi gobai ix tumaxi ibuadana aanï ïkioma ka mai namïga in bïïtarï. Ïmo boixibharu dukai nïidi aanï bïïxi gobai ix makïdï ibuadana aanï tudu. Bïïxi gobai ka dagito aanï tudu sai podukai biakana aanï urabaragai Suxi Kristo ïmadï

2 Pedro 1:6

Dai bhodïrï gï agai sai maatiagi aapimï ixdukatai gïn nukadakagi ïpï sai maiti ibuada aapimï soimaaxkami ix makïdï gïn tanïdagi ïïgi gïn tïgibudaga. Dai bhodïrï gï agai sai apia buaboitudada aapimï ïpï xïïxkadï soimaaxi taatamadagi aapimï. Dai gï agai ïpï sai ïïgiada aapimï Diuxi bïïxi aïkatïrï ixtumaxi ibuadagi aapimï.

2 Pedro 1:8

Daiñi, ix bïïx tasai bamioma po tutiakagi aapimï ix dukatai ojixi tami, gobai gïn soiñamu sai bamioma kïïga ïmadagi aapimï Suxi Kristo Gïr Nukadakami. Dai kïïga ibuadamu aapimï naana maaxi ixtumaxi kïkïïgadukami ïpï ka kïïgioma ïmadatai aapimï Suxi.

2 Pedro 1:10

Maiti abïr pobuada aapimï gin aaduñi dai bhaiyoma abïr kabami gïn aaga daidi kïï bhai tutiaka ix dukai aagai idi ojai. Podukai maatiga maaxkamu sai buaboikïdï ïr ïko bubaidadï aapimï Diuxi. Ix kabami gïn aagagi dai kïï bhai tutiakagi ix dukai aagai aanï aidï gia tomarhi ïmo imidagai mai gïpiïrï surhigimu aapimï.

2 Pedro 2:20

Daiñi, ïïmo odami mamaatïrïi sai Suxi Kristo ïgai daidi ïr go Tïanïdami dai saidi ïr kïïgakïrï bubiadamigadï óídakami ïpï. Dai podukai mamaatïrïi ïgai ixdukatai bhaiga odami xi buañixikami dukai óídakagi Diuxi buitapi. Dai ka maatïkatai ïgai go Suxi ka daadagitoiña ïgai go soimaaxkami ix makïdï oidaga tami oidigi daama. Dïï gia xi gokiïrï gïn bapasadagi ïgai ïpamu go soimaaxkamiïrï dai gïn dagitoagi ix gïn tïanïdagi gobai asta xako ka mai tïtïïgai ïgai ix dukatai dagitoagi, aidï gia bamioma soimaaxi bipiïyi ïgai xi bhai xi aidïxi mai kia maatïkatadai ïgai Suxi.

2 Pedro 3:18

Kïïga abïr óídaka bhaiyoma saidi podukai bïïx tasai bamioma maatï taatana aapimï xïï kïï tuiga Suxi Kristo Gïr Nukadakami gïn bïïtarï. Gïr kïïgakïrï bubiadamiga ïgai tudu dai gï agai sai bïïx tasai bamioma kïïga maatïkagi aapimï ïgai. Podukai bamioma kabakatudamu gïn buaboidaraga gin aaduñi. Ipïrhidi aanï sai bïïxi óídakami xadutuadana Suxi Kristo dai kïïga ñokadana ïgai bui bïïxkïrï bïïtarï. Sai pogïduna gobai tudu. Mosïkaxi.