1 Tomoteo 6:4 - Northern Tepehuan Bible

⁴ Dai ix makïdï gatïtïïgiadagi ïma maaxi ñoki podukai ïïgi gïgïrdukïdï gïn ïrhidiña. Bupuiruga ïgai tudu. Ojoidi ïgai ix aatagadagi naana maaxi ix makïdï maiti ïr soiñi dai ojoiditai ïpï xi gïn bupui ñokadagi aipakoga. Odami ix makïdï pobuayi ïjïgakoitïraga dai kïïdaiña ïgai jaa dai aagaiña galnaaxi ñoki jaa buidïrï dai otoma pobïnïrhidiña xi jaa mai kïïga ibuayi tomaxi mai kïï maatï ix bhai ïr buaboi sai mai kïïga ibuayi.

Tepehuan Northern: Diuusi ñiooquidʌ utuducami oodamicʌdʌ

⁴ Ʌmamaatʌtuldiadami yaatavogami aliʌ gʌgʌrducʌdʌ gʌnʌlidiña dai maicʌʌ maatʌ istumaasi gamamaatʌtuldi. Dai ʌgai oojoidi isaipacoga gʌnvupui ñioocadagi. Gomaasiaiñdʌrʌ vusacʌi muuquimudagai, dai baamudagai dai ñiooquidaragai dai maivaavoitudaiña ʌgai istumaasi caʌcagi,

1 Tomoteo 6:4 Referans Kwoze

2 Timoteo 2:23

Dïï gia mai bapakïda aapi go aatagiïrï xako gïn bupui ñokadagi odami aagaitai naana maaxi ixtumaxi ix makïdï maiti ïr soiñi. Kïïga maatï aapi sai abhiadïrï daibïi go kokodi tudu.

2 Timoteo 3:4

Aidï óídakami tïtïgiada agai asta ïïgi aaduñdï sasayudï. Dai mai buamï ïrhiditai soimaaxi ibuadamu mos ïï namïakami gïn ïrhiditai ïïgi. Mai oigïdadamu ïgai Diuxi dai bhaiyoma ojoidadamu xi adaimuagi ïïgi bhai ïrhiaradï.

1 Tomoteo 3:6

Dai ïmo kïïrhi ix makïdï utudami buaboitu maiti gï agai ix nukadakami dasagi ïpï. Tadu ïmo gïdukami dukai gï ïrhiada ïgai ïïgi ka bhïkai go sïïrhikami ka nukadamikatai ïgai dai podukai go diabora gïpiïrï daitudagi.

Udaxi 1:10

Dïï gia go tïtïïgiadami yaatagi ix makïdï gïn saagida bapai ïgai mos parunaiña ixtumaxi mai maatï kaïkagi ïgai. Tïgibudadï ïpïan maaxi buxtaki tïgibudadï. Buxtaki dukai ïïgidiña ïgai bïïxi ixtumaxi tañiagi tukugadï daidi ibuayi naana maaxi soimaaxkami tudu. Dai mos ugiti agai ïgai pobuadatai. Pokaitiña ïgai sai kïïga maatï ïgai ixtumaxi dïï pupuiruga ïgai bhaiyoma.

2 Pedro 2:12

Daiñi, go tïtïïgiadami yaatagi ïgai parunaiña ixtumaxi mai maatï mai kïïga biakatai tïgibudagai. Naana maaxi soimaaxi buirudagai ibuayi ïgai mai kïïga gïn tïgitokatai ïpïan dukai go oidigana kïkïixi ix makïdï go óídakami buyiña dai kodaiña. Dai gïn kodituda agai ïgai ïpïan dukai kïkïixi ïpï.

2 Timoteo 2:14

Aapi Timoteo soiñañi go buaboitudadami sai tïgito ajiopaiña ïgai idi ojai. Dai tïañiñi sai maiti gïn bupui ñokaiña ïgai aipakoga aagaitai ix tïiya ïrhidi go aatagi xïïxkadï mai xii maatï kaïkagi ïgai. Aagidañi sai Diuxi kïïga tïgito nïidiña ixtumaxi ibuadagi go buaboitudadami ix kaxkïdï maiti gï agai ix gïn bupui ñokada ïgai aipakoga. Maiti ïr soiñi tudu ix gïn bupui ñokada ïgai podukai dai bhaiyoma sobhikïiña gobai odami sai mai kïïga buaboitudaiña.

Udaxi 1:16

Galtutuiga go tïtïïgiadami yaatagi ïgai tudu. Tomax maaxi imïdagi oidakaradï mai biïga ixtukïdï soi kaitiada ïgai buidïrï Diuxi dai buidïrï jaa dai tomax dukai mai bhai gïn ïrhidiña ïgai. Adaimïi ïgai ïïgi bhai ïrhiaradï ibuadatai ïïgi ixtumaxi ipïrhiadagi ïgai. Gïgïr tïtïanïdami dukai ñokai kabami tïkabi gïn tïgitokatai ïgai. Yaatagïi ïgai dai ïgai aagidiña go óídakami ixtumaxi odami kaïka ïrhidiña saidi podukai bhai gïn ïldagi odami ïgaikïdï kaïkatai aatagidï sai podukai ibuadagi go odami ixtumaxi ïgai ipïrhidi.

2 Pedro 2:18

Kïïga gïgïrdukami gïn aagai ïgai ïïgi dai ñokidï kïïga yoobikan kaiti dïï gia maiti ibuayi soiñi bïïtarï ix makïdï kaïkagi. Pokaiti ïgai sai bia aatïmï oigaragai xi ibuadagi ïïgi ixtumaxi ipïrhiadagi aatïmï, ixtumaxi gïr tanïdagi gïr tukuga tudu. Dai podukai abïnakidi ïgai odami sai soimaaxi ibuadagi. Podukai gïpiïrï surhigai ïgai odami ix makïdï utudami bhïjimi go kïïgadukïdï boi dai utudami ka mai uurapïkïi go soimaaxi ibuadami.

1 Tomoteo 1:7

Ga tïanïdan dukai ñokai ïgai gatïtïïgiada ïrhiditai Moises sïïrhikamigadï dïï gia tomarhi ïïgi ïgai mai maatï ix tïiya ïrhidi ix tumaxi aagaiña.

1 Tomoteo 1:4

Aagidañi sai ka mai ïïgiada ïgai go naana maaxi aatagi ix makïdï ïr ïïgi odami aatagidï tudu. Ojoidi ïgai xi aatagadagi aagaitai ix tïtïgidukatadai óídakami ïïki. Tïbïpi aatagaiña ïgai gokïdï dai mai naato aagaiña ix tïtïgidu mos ïï mudukatai go ïïki óídakami. Aagidañi sai ka mai pobuada ïgai. Kaxkïdï tudu gïn bupui ñokaiña ïgai aagaitai pomaaxkami aatagi dai gobai maiti ibuayi soiñi. Mai soikïi gobai odami sai maatïkana Diuxi tïgibudadï tudu. Kaxkïdï tudu mosïkaxi buaboidaitai ix tumaxi ïr buaboi gï maatïkana Diuxi tïgibudadï. Dai go gaa aatagidï maiti ïr buaboi. Kaxkïdï gï bia aanï amïï Efesoana tudu sai daidana aapi go gaa sai ka mai pomaaxi aatagada.

Santiago 1:19

Gin aaduñi, kïïga abïr gïn tïgito kaïka ixtumaxi gïn aagida iñagai xibi. Daiñi, gï agai sai kïïga kaïkagi aatïmï ixtumaxi gïr aagidagi jaa. Dai gï agai ïpï sai kïïga gïr tïgitokatai ñokadagi aatïmï. Dai maiti gï agai ix otoma bhaakokodagi aatïmï ïpï.

Tito 3:9

Dïï gia oidaga ïïmo odami ix makïdï dudatai gïn bupui ñokaiña aagaitai ix tïtïgidutadai ïïki óídakami dai aagaitai sa xorai ïr piipixaradï ïgai. Dai gïn bupui ñokaiña ïgai aagaitai ix kaiti go judidiu sïïrhikamigadï ïpï. Maiti gï bapasïda aapi pomaaxi aatagiïrï. Maiti ïr soiñi gobai.

Hechos 15:2

Go kïkïïrhi aatagidï mai ïpïan duu agaitadai go Pabora ïmadï Bernabe aatagidï xi gokïdï kabami gïn bupui ñokaitadai ïgai. Ka maiti ixtui ïgai xi ïmo tïgibudagai biakagi xi go buaboitudadami aagidi Pabora dai Bernabe ïmadï jaa chïki buaboitudadami sai mïï nïnïabana go ojotoxikami Jerusalenïrï dai sai ami bhai buadana go aatagi. —Mïïka abïr aagida go ojotoxikami ïmadï kïkïrhiodami bhaitï gukakami bai ïgai aagana ix bhai ïr buaboi xi gï agai ix gïr circuncidandoagi, aatïmï ix makïdï maiti ïr judidiu— itïtïdai ïgai go buaboitudadami.

Apokalipsis 3:17

Aapimï po kaitiña sai ka bia aapimï bïïxi ixtumaxi gï agai gïn ibhïdaga bïïtarï. Kaxkïdï gïn bipidakami gïn ïrhidi aapi ïïgi gïn ibhïdagakïdï po gïn ïrhiditai sai maiti gïn biïga ixtumaxi gïn ibhïdaga bïïtarï. Dïï mai maatï nïidi aapimï ixtumaxi ïr buaboi. Gï agaitadai bhaiyoma xi maatï nïijada aapimï xïï soi dukai óídaga aapimï gïn ibhïdagakïdï. Soititigami aapimï gïn ibhïdagakïdï tudu. Mai nïñiadami dai mai yukusukami duu aapimï di.

2 Tesalonicenses 2:4

Go kïïrhi ïgai gï dasamu ïïgi saidi ïr bhaitï kïakamigadïkana bïïxi óídakami dai asta ipïldamu ïgai ix odami Diuxi dukai nïijada ïgai. Dai asta daidamu ïgai odami ix Diuxi dukai xadutuadagi ïmai kaxkïdï tudu ipïldamu ïgai ix mosïkaxi ïgai gï xadutuadagi. Dai asta baakimu ïgai kiupaigadïrï Diuxi Jerusalenïrï dai parunadamu Diuxi. Ami daibamu ïgai dai pokaitadamu saidi ïgai ïr Diuxi.

Kolosenses 2:18

Gin aaduñi oidaga tïtïgiadami ñoki ix makïdï gïgïrdukami gïn ïrhidi aagaitai ixtumaxi tïïtïkiïrï dukai tïï ïgai dai adaimïitai ïïgi tïgibudadï. Gïgïrdukïdï gïn ïrhidi ïgai dai maiti ïr gïgïrdukïdï. Dai pokaitiña ïgai sai gï agai odami xi Diuxi dukai xadutuadagi Diuxi tïtïañikarudï dai sai gï agai xi ïïgi soimaaxi gï taatamituldagi ïmoko tukugadï sai Diuxi kïïgakïrï nïidiña. Maiti abïr ïïgiada ïgai tadu gïn popoki ïgai gïn bhai ïrhiaraga.

Filipenses 2:14

Gin aaduñi Diuxi amadïrï, maiti abïr soi kaitiada aapimï dai tomarhi maiti abïr naana kaitiada aipakoga tomax tuma aaduindagai ibuadagi aapimï.

Filipenses 2:3

Maiti abïr ibuada tomarhi ïmo ixtumaxi ïïgi gïn bïïtarï mosïkaxi ïïgi gïn bïïtarï buamï gïn ïrhiditai aapimï. Dai maiti abïr ibuada tomarhi ïmo ixtumaxi ipïrhiditai ix namïakami bubuakiagi aapimï jaa bïïtarï. Abïr bhaiyoma mai namïakami dukai gïn nïijada ïïgi aapimï. Dai bamioma namïakami dukai abïr nïijada aapimï jaa.

Filipenses 1:15

Mui odami aipakoga aagaiña go Suxi tudu dai gokïdï bhai gin ïrhidi aanï. Ïïmoko aagaiña go Suxi gin oigïdaitai dai maatïkatai sai Diuxi gin maa sïïrhikamai sai maaxitudana aanï xïïxi ïr buaboi go bhai ïrhiaragai aatagi. Kïï bhai maaxkami bia ïgai tïgibudagai tudu dai aagaimi go Suxi. Dïï gia oidaga jaa ix makïdï ïjïgakoñi dai gin bui bïïtï. Gin maita ïrhidi ïgai tudu dai kaxkïdï aipakoga aagaiña ïgai go aatagi. Gïgïrdukïdï bubuakia ïrhidi ïgai dai kaxkïdï aipakoga aagaiña ïgai go Suxi tudu. Mai kïkïïgadu ïgai tïgibudadï. Ipïrhidi ïgai sai kabamioma soi taadakana aanï tami maixapikatai dai kajiomakatai aanï ix tuma ibuayi ïgai.

Galatas 6:3

Daiñi, aanï aagai sai ïïgi gï buirumadai ïmoko ix pokaitadagi sai mai bia xi soikïdagi jaa xïïxkadï mai kïï ibuadagi ïgai. Ix mai soiña ïrhiada ïmoko jaa gobai itïiya ïrhidi sai ïmo gïdukïdï gï ïrhidi ïïgi dai gobai maiti ïr buaboi xi ïr gïdukïdï. Xorai mai soiña ïrhiada jaa maiti ïr ïmo gïdukïdï toma lïïchi tudu mos ïïgi po gï ïrhidi ïgai.

Galatas 5:26

Maiti gï agai tudu xi gïgïrdukïdï gïr ïrhiadagi aatïmï ïïgi xiïpï xi gïr bupui bïïtïkagi xiïpï xi koimudadï tutiakagi aatïmï.

Galatas 5:15

Dai sïïrhikïdï maiti gï agai xi gïn bupui surhigiagi aapimï aipakoga. Maiti gï agai tudu xi ïpïan buadagi aapimï googoxi ix makïdï aipakoga gïn kïkïiña gïn kïïdatai. Xïduñada xia buadagi aapimï gïn buaboidaraga dai gïn urabaraga gïn kokodaitai podukai.

2 Korintios 11:20

Daiñi, aapimï kïïga mai ojodatai kaïkana jaa tomaxi gïn bui ñokaiña ïgai dai tomaxi kabami gïn tïanïiña ïgai pipioñigadï dukai dai asta gïn kaitïskïiña ïgai gïn buibasana. Dai bïïxi gobai mai buamï ïrhidiña aapimï dai bhaiyoma bhai ïrhiarakïdï kaïkana aatagidï. Gïn bupuirumadaiña ïgai tudu dai gïn popoidiña gïn buxtuidaga dai bhodïrï abhiadïrï gïn buxtuidagañdïrï óídakaiña ïgai. Gïgïrdukïdï gïn ïrhidiña ïgai tudu dai kabami gïn bhagaidiña kabami gïn tïanïda ïrhiditai.

1 Korintios 11:16

Kaxi gïn aagidi aanï tudu ixdukatai ibuadagi oki ïmpaiñdaradïrï buaboitudami. Dai ix oidakagi xorai ñokadagi po ïrhiditai ix mai kïï aagai aanï gokïdï aanï mosïkaxi ïmo ixtumaxi aagidiña. Mosïkaxi aagidiña aanï sai bïïxi go gaa ojotosadï Suxi Kristo gin ïpïandukai aagai gokïdï. Dai bïïxi go buaboitudadami ix makïdï aipakoga gïn ïmpaidiña podukai ibuayi ixdukai aagai aanï ïpï. Kaxkïdï mai tipu ñoki.

1 Korintios 3:18

Gin aaduñi, kïïga abïr gïn tïgito nïida dai bhïiyi go tïgibudagai ix makïdï ïr Diuxi tïgibudadï kaxkïdï tudu gobai kïïga ïr buaboi. Kaxi abïr mai oijada ïïgi gïn tïgibudaga tudu kaxkïdï tudu odami tïgibudadï gia yaatagïi. Ix saitudakami ïrhiada aapimï ïïgi gïn tïgibudaga ka bhïiyi aapimï ïmo yaatagi. Daiñi, mos ïr ïï buirudagai Diuxi bïïtarï go tïgibudagai ix makïdï óídakami saitudakami ïrhidi. Kaxkïdï gï aagai ix ïmadukai gïn tïtïgitoagi odami ix makïdï kïïga mamaatïkami gïn ïrhidi ïïgi oiditai tïgibudadï óídakami. Ïgai gï aagai ix ïma dukai gïn tïtïgitoagi dai buiyagi Diuxi tïgibudadï bhaiyoma tomaxi óídakami bupuirugami dukai nïijadamu gokiïrï. Ix bhïiyagi ïgai Diuxi tïgibudadï aidï gia sastudakami dukai biimu ïgai Diuxi bïïtarï. Daiñi, Diuxi ojadïrï ikaiti sai, Diuxi daadagitodai go odami sai bhaiyoma gïn bupuirumadaiña ïïgi go ix makïdï mamaatïkami gïn ïrhidi ïïgi.

1 Korintios 3:3

Apia kia ïïgidimi aapimï go odami tïgibudadï gïn tïanïda ïrhiditai aapimï ïïgi. Kia gïn ïjïgakorïi aapimï dai gïn bupui ñokai aapimï ïpï. Kaxkïdï maatiga maaxi sai kia adaimïi aapimï go oidigi daama óídakami tïgibudadï.

Romanos 14:1

Aapimï buaboitudadami Romïrï óídakami abïr kïïgakïrï nïijada jaa buaboitudadami ïpï tomaxi mai xii gubuakagi ïgai buaboidaradï kia. Maiti abïr bui ñokada ïgai aagiditai ix tumaxi ïr sïïrhi xi buadagi ïgai tudu xi ïpï ix tumaxi maiti gï agai xi ibuadagi.

Romanos 13:13

Tïtai kïïga bhai maaxkami dukai óídaka aidï, tonorakïrï dukai. Xibi ka maiti gï agai xi nabaakorïdagi aatïmï. Maiti gï agai xi okimïrhiakagi, gï agai xi dagitoagi gobai. Dai maiti gï agai xi ïgamotïrakagi aatïmï ïpï tomarhi xi omarhigakagi

Romanos 12:16

Ïmadugan dukai abïr tïgito nïida gïn aaduñi aipakoga ix maaxi daraja. Dai maiti abïr gïgïrdukami gïn ïrhiada ïïgi aapimï pobai gïn ïrhiditai xi bamioma maatï aapimï xi bhai jaa. Kïïga abïr nïijada ix makïdï ïr soititigami ïpï.

Romanos 2:8

Dïï gia Diuxi kabami bhamuka agai buidïrï ix makïdï ïïgi gïn tïgito ajiopadagi dai maiti ibuayi ixtumaxi ïr sïïrhi apia adaimïitai ïgai go soimaaxkami.

Hechos 18:15

Dïï aapimï mos ïïgi gïn ñokikïdï gïn bupui surhigïi dai ïïgi gïn sïïrhikamigakïdï. Kaxkïdï abïr ïïgi bhai duñi aapimï tudu. Aanï maiti ipïrhidi xi baakiagi go maaxiïrï— itïtïdai go dunukami.

Hechos 8:9

Dai ami Samariana oidakatadai ïmo kïïrhi Ximuñi tïgidukami. Ïkioñdïrï abhiadïrï ïr tabïgamikana ïgai dai naana maaxi ibuadana ïgai yaatagiditai óídakami. Dai óídakami mai tïtïgaiña ixtumaxi gïn tïtïgitoagi nïiditai ixtumaxi ibuadana ïgai. Ïïgi pokaitiña ïgai saidi ïr ïmo gïdukami maatïkami. Gïdukami gï ïrhidi ïgai daidi ikaiti.