Aapi bhai dui ïgai bïïtarï sai Diuxi ïgai dai gatïanïna aaduñdïkatai ïgai Diuxi. Dai bhai dui aapi sai ïr dadaxdadamikana ïgai ïpï ibuadatai daxdaragai gïr Diuxiga. Dai gokiïrioma go odami ix makïdï sabïrhi aapi gatïanïda agai bïïxi go oidigi— ikaiti go maakoba duduakakami ixtumaxi ïmadï go ïmokobhai dan maakoba bhaitï gukakami.
Daiñi, Diuxi kïïgakïrï gïr bubaitu dai gïr báí saidi ïr ïko darasadïkana aatïmï. Dai mai xu ix kïïga idui aatïmï xi kaxkïdï ïkobai gïr bubaitu ïgai dai bhaiyoma kïï tuiga dai ïgai podukai gï tïgito ïïki mai kia tipukatai oidigi. Kaxkïdï kïïgakïrï gïr bubaitu ïgai.
Dai tïïgidamu aapi ixtumaxi ïr buaboi bai ïgai dagitona go soimaaxkïdï tïgibudagai tukamukïdï dai oijadana go kïïgadukïdï tïgibudagai ix makïdï ïr kudagi tudu. Sai ka maiti gïn tïanïna go diabora dai Diuxi gïn tïanïna bhaiyoma. Daidi oigïrhixikami bimu soimaaxkamigadï gin buaboitudaitai ïgai dai uraba bimu ïgai Diuxi ïko bubaidadï— gin tïtïdai Suxi— itïtïdai Pabora.