1 Korintios 12:8 - Northern Tepehuan Bible

⁸ Daiñi, Diuxi Ibhïadï mamaakai gubukarhigai ïïmoko sai gatïtïïgiada ñoki aagaitai tïgibudagai ix makïdï kïïga ïr soiñi. Dai jaa mamaakai ïgai gubukarhigai ix kïïga maatïkana dai aagaiña ixtumaxi Diuxi gïn tïtïgiadagi.

Tepehuan Northern: Diuusi ñiooquidʌ utuducami oodamicʌdʌ

⁸ Diuusi Ibʌadʌ maacai guvucadagai ʌʌmadutai sai cʌʌga maatʌ aagaiña ismaacʌdʌ aagai Diuusi, dai Diuusi Ibʌadʌ maacai guvucadagai aa sai cʌʌga maatʌ caʌcana Diuusi ñiooquidʌ,

1 Korintios 12:8 Referans Kwoze

2 Korintios 8:7

Daiñi, aapimï kïï bhai maaxi ibuayi mui naana maaxi ixtumaxiïrï, dukami kïïga buaboitudai aapimï, dai kïïga saitudaga gïn tïgibudaga dai kïïga gatïtïïgidi aapimï ñoki. Bïïxi gïn bhai ïrhiarakïdï ibuayi aapimï ixtumaxi, dai kïïga gïr oigïdai aapimï. Bïïxi gobiïrï kïïga ibuayi aapimï tudu. Mosïkaxi biïga ix pokaxi kïïga ibuadagi aapimï gaïmapaiditai soiñi gïr aaduñi soititigami bïïtarï dai ix bïïxi gïn bhai ïrhiarakïdï gamaakadagi aapimï ïpï.

1 Korintios 1:30

Daiñi, mos ïïgi Diuxi gubukarhigadïkïdï bïïna daraja aatïmï Suxi Kristo. Aatïmï maiti idui tomarhi ïmo ixtumaxi. Suxi Kristokïdï tudu gïr maa Diuxi ïïgi tïgibudadï dai Suxi Kristokïdï ïpï bhai dui Diuxi sai kïïgakïrï gïr nïidiña ïgai ïpï. Suxi Kristo ïgai ix makïdï ïkobai gïr bubaitu sai mos ïïgi Diuxi bïïtarïkana aatïmï dai ïgai aa namïki gïr buatuldaraga ïpï sai kïïgakïrï bubuakïna aatïmï.

1 Korintios 13:8

Bhaitoma bïïxi ixtumaxi bia ix tuigako ugitiagi dïï gia bïïxkïrï bïïtarï oidaka agai go oigïldaragai. Gobai gia mai ugiti agai. Daiñi, ayimu ix tuigako ka maiti gï agadamu go gubukarhigai ixtukïdï aagagi ñoki ix makïdï Diuxiañdïrï imïi dai ka ugitimu go gubukarhigai gobai. Dai ka mai tipukamu ïpï go gubukarhigai ixtukïdï todian dukai ñokadagi ïmoko ïma maaxi ñokadami ñokidïkïdï. Gobai ugitimu ïpï. Dai xibi kia oidaga xorai biakagi go gubukarhigai Diuxiañdïrï sai maatïkaïkana ixtumaxi xijiakami ïpï dïï gia xïxkadï ïmadï darakagi aatïmï Diuxi ka maiti gï aagadamu go gubukarhigai gobai. Bïïxi go gubukarhigai gobai ugitimu tudu. Dïï gia go oigïldaragai apia kïïkiada agai bïïxkïrï bïïtarï.

Mataibo 13:11

Daidi Suxi potïtïdai, —Gin aaduñi, ïkioma mai tipukatadai xorai maatïkatadai ix dukatai gaatabuayi Diuxi gatïanïitai ïgai. Dai xibi kaxi gïn maa Diuxi oigaragai sai aapimï gia maatïkana ix dukatai aatabuayi ïgai. Dïï gia go gaa óídakami mai maatï ix dukatai aatabuayi Diuxi.

1 Korintios 13:2

Tomaxi bhaigakagi ïmoko ix naana maaxi ibuadagi dïï ix mai oigïdadagi ïmoko jaa gobai ix makïdï ibuadagi ïmoko maiti ïr soiñi. Daiñi, tomaxi ïr ïmo Diuxi ñokituldiadamigadïkagi ïmoko dai maatïkagi bïïxi Diuxi tïgibudadï ix makïdï maiti gïr aagidi kia dai tomaxi maatïkagi ïmoko bïïxi aïkatai dai tomaxi kïï gubuakagi buaboidaradï dai asta bhaigakagi aagidagi ïmo tubidaki sai maigobai imïna dai go tubidaki kïïga ïïgidagi ¿Tumaxi ïr soiñi gobai ix mai oigïdadagi ïmoko jaa?

Hechos 6:3

Kaïkabïrai tudu gïr aaduñi daidi gaaga kubarakami kïkïïrhi gïn saagidañdïrï ix makïdï kïï tutiakami duu nïidi odami dai ix makïdï Diuxi Ibhïadï tïanïi dai ix makïdï xioma kïï maatï aatabuadagi. Ïgai tïïgidamu aatïmï go soiñi xi ïgai takoidana bhaiyoma.

Romanos 15:14

Gin susukurhi Diuxiïrï, kïï maatï aanï sai kïï tutuiga aapimï dai kïï maatï aapimï ixtumaxi ïr buaboi. Kïï bhaiga aapimï xi ïïgi gïn maakiagi ñoki aipakoga.

1 Korintios 2:16

¿Maiti ix podukai ojixi Diuxi ñokidïrï? Ami ikaiti sai, Tomarhi ïmo oidakami mai maatï ix tumaxi gï tïtïitoi Diuxi Dai mai tipu ïpï xorai maakiagi ñoki Diuxi, ikaiti ojai. Dïï aatïmï gia maatï kaï Diuxi Ibhïadï maatïtuldaradï. Aatïmï bia Suxi Kristo tïgibudadï tudu kaxkïdï.

1 Korintios 14:6

Daiñi, ¿Tumaxi ïr soiñikana ix gïn dibidagi aanï dai gïn aagidagi aatagi ïma maaxi ñokikïdï ix makïdï mai maatï kaïkagi aapimï? Maiti ïr soiñi gobai ¿aba? Gï agai ix gïn aagidagi aanï ixtumaxi ïr soiñi bhaiyoma. Dukami gï agai ix gïn aagidagi aanï bhaiyoma ixtumaxi gin maatïturhi Diuxi xiïpï ïma maaxi ix makïdï máí aanï xiïpï ïmo ñoki Diuxiañdïrï xiïpï ïmo maatïtuldaragai maaxi. Gobai gia ïr soiñi gïn bïïtarï. Kaxkïdï tudu gï agai ix maatï kaïkagi aapimï go ñoki. Ïma dukai maiti ïr soiñi gobai.

1 Korintios 14:26

Ipïrhidi aanï tudu ix maatïkagi aapimï sai gï agai ix ïr soiñikagi jaa bïïtarï bïïxi ixtumaxi ibuadagi aapimï ïmpaiñdaragïrï. Gï agai ix ïr soiñikagi gobai bïïxkatai bïïtarï sai bamioma gïrana buaboidaradï. Daiñi, xïïxkadï gïn ïmpaidadagi aapimï ïïmoko ganïyi ïrhidiña ïmo nïidagai dai ïïmoko biakana ïmo maatïtuldaragai bïïxkatai bïïtarï dai jaa aaga ïrhidiña ixtumaxi maatïturhi Diuxi dai jaa todian dukai ñokaiña ïma maaxi ñokikïdï. Dai jaa maaxi aagaiña ix tïiya ïrhidi. Dai bïïxi gobai gï agai ix ibuadagi aapimï sai podukai bamioma gïrana buaboidaradï bïïxkatai.

2 Korintios 1:12

Gin aaduñi, aanï ïmadï Timoteo kïïga maatï gïr ibhïdagïrï sai tomarhi ïmo imidagai mai yaatagidi aatïmï go óídakami dai mai buirumagi aatïmï. Kïïga ibhïxtakan taadaga gïr iibhïdaga kïï sïïrhi ibuadatai aatïmï óídakami bïïtarï tudu gïr soikïitai Diuxi. Dai asta bamioma kïïga ibuadana aatïmï aapimï gïn bïïtarï gïr aaduñikatai aapimï Diuxi amadïrï. Kïïga sïïrhi ibuadana aatïmï tudu oiditai Diuxi tïgibudadï dai mai xu xi oidiña aatïmï go oidigi daama óídakami tïgibudadï. Dai pokaiti aatïmï sai gobai gia kïïga namïga, sïïrhi ibuadatai aatïmï tudu.

2 Korintios 2:14

Kïïga ïr buaboi tudu sai mai ibhïxtakan taadakana aanï mos ïï buamï in ïrhiditai gïn bïïtarï. Dïï gia gï agai sai maatïkagi aapimï sai mai soi gin ïrhidi aanï dai bhaiyoma bhai gin ïrhidi Diuxikïdï maatïkatai sai ka urabaka aatïmï Suxi Kristo dai maatïkatai ïpï sai xibi Diuxi gïr bhaitï imïi toma xako ajiopadagi aatïmï ka maitïkai ïgai go buidïrï bïïtïkamigadï. Dai xibi aatïmïkïdï aatabuayi Diuxi saidi óídakami aipakoga maatïna xorai go Suxi Kristo. Dai gobai kïïga bhai ïrhiaraga, xïïxkadï óídakami ka kïïga maatïkagi Suxi Kristo tudu. Ïpïan bhai ïrhiaraga gobai xïïxkadï po gï buadagi ïmo daxdaragai kïï xigian ubadami Diuxi bïïtarï. Kïïga bhai ïrhiaraga gobai.

2 Korintios 4:6

Daiñi, Diuxi ño ïïki aidïxi kia tukamukatadai oidigi daidi itïi ïgai, Ipïrhidi aanï sai oidakana kudagi, itïi ïgai. Dai ka oidatu kudagi dai ka kudidikami bii oidigi. Dai xibi ka kudidakan dukai bia ïgai gïr iibhïdaga ïpï gïr tïtïïgiditai ïgai ixtumaxi ïr buaboi. Po dui ïgai sai ka maatïkana aatïmï xïïxi ïr gïdukami ïgai dai xïï xigian tuiga. Gïr tïgito nïiditai aatïmï Suxi Kristo podukai kïïga mamaatïrïi aatïmï xïïxi ïr gïdukami Diuxi dai xïï xigian tuiga ïgai tudu.

2 Korintios 6:6

Aatïmï naana dukai mamaaxidi go óídakami buitapi sai sïïrhi aatabuayi aatïmï tudu. Daiñi, go óídakami kïïga nïidiña sai bïïxi ixtuma ibuadagi aatïmï kïïga buañixi Diuxi bïïtarï. Dai kïïga nïnïidiña ïgai ïpï sai aatïmï kïïga maatï dai kïïga oidiña ixtumaxi ïr buaboi. Mai bhakoikana aatïmï buidïrï jaa dai bhaiyoma kïï tutiakana aatïmï jaa bïïtarï. Diuxi Ibhïadï gubukarhigadïkïdï óídaga aatïmï tudu dai kïïga oigïdaiña aatïmï bïïxi óídakami.

2 Korintios 11:6

Tomaxi mai xii saitudaga aanï gatïtïïgiditai ñoki ïmpaiñdaragiana dïï gia kïïga maatï aanï go aatagi ix makïdï gïr biturhi Diuxi. Kïïga maatï aapimï saidi ïr buaboi gobai. Kïïga máí aapimï sai gia maatï aanï ixtumaxi ïr buaboi tudu nïiditai aapimï gin aaduindagai dai kaïkatai gin aatagi ïpï.