Boboloja 4:8 - Nouveau Testament en Ngombe 1961

⁸ Bato babomɔ banɛi badaka na mapapulapu masamano-masamano. Badaka na miso botɔ, a sokolu na a tei. Te bakwake bo’mba yembo na bulu na moi bo, Mosɛnɔke! Mosɛnɔke! Mosɛnɔke! Kumu Njambe yona onɔi na ngulu; Yona odaka, yona odi, na yona odabí na bosusu.

Boboloja 4:8 Referans Kwoze

Boboloja 1:8

Kumu Njambe abalaka bo, Mbi nadi Alepa na Omega, yona odi, yona odaka, yona odi na bosusu, yona onɔi basusu.

Boboloja 4:6

Boso bongɛndɛ bodaka o ekɔmɛli elibale litalatala na kulusutala. Nanɛ koko bato babomɔ banɛi a tei engɛndɛ, na bahikaka ngɛndɛ; badaka na miso botɔ, saboso na sangɔngɔ.

Baebele 13:8

Yesu Masiya adi busa bu, o adaka yo busa bi, na adi boda boa oko na bosusu mɛnɛ.

Boboloja 15:3

Ibo ba’mbaka yembo eMose mokɔmɛli oNjambe, na yembo eMwana-Bata bo, Ee, Kumu Njambe obonɔ! Bilomu biwɛ bidi binɛnɛnɛ, bidi na bokamoa. Ee, Kumu omakota! Njea jiwɛ jidi jitangboake, njea jisoti.

Boboloja 11:17

na basakoa Njambe bo, Bosakoaka wɛ Kumu Njambe obonɔ, yona odi na yona odaka, Mojɔ bo opei ngulu ewɛ enɛnɛ, na okondi a bokumu bowɛ.

Boboloja 16:7

Naka koko litumbu likabale bo, Ee, Kumu Njambe obonɔ, Bisambi biwɛ bibɔngi, bidi bongbebongbe.

Boboloja 7:15

A mojɔ momina, badi a boso bongɛndɛ eNjambe, na bamokɔmɛkɛ a tei etempelo ende na bulu na moi. Iyona odi a ngɛndɛ âda etondo ebu bo babolame ena.

Boboloja 21:22

Nainɛ nongo tempelo a ngando, mojɔ bo tempelo engando edi oko Kumu Njambe yona onɔi, na Mwana-Bata.

Boboloja 19:15

Abɛnɛ monɛnɛ amanaka a monɔkɔ monde a bokwɛlɛ makota mangondo. Tondo ende ebokumu edi tondo eebende a mojɔ mobu. Iyo adi bonda eboka evino ekɛlɛ egbasoake eNjambe obonɔ.

Boboloja 3:7

Sɔnea obwɛnji oDenga diPiladelupia bo, Iyona mosɛnɔke, yona osoti, yona odi na sabe eDawidi, yona odipoaka na pɛpɛ nongo moto odi bodipa, yona odipaka na pɛpɛ nongo moto odi bodipoa, yo abalaka mijɔ mimi.

Boboloja 1:4

Yoane ai Menga sambo maMasiya maya madi a Asia; Monganji ai no na bowi boYona odi, Yona odaka, na Yona odi na bosusu, na miembo sambo mia midi a boso bongɛndɛ ende,

Boboloja 4:4

Mingbelɛngɔ licinda-na-minɛi mihikaka ngɛndɛ. Basuku licinda-na-banɛi badaka a mingbelɛngɔ baya badaka na bisenja bipu, na makongo mawɔlɔ a melo Mibu.

2 Bakolinto 6:18

Mbi nâda sangwa’nu; Ino ôdani bana-bami bambi na bana-bali bambi. Kumu ongulu ebonɔ abalaka boa.

Boboloja 16:14

Miembo mimina midi miembo Mibajabolo; mikɔkɔ mindumba, na mikɛkɛ ai bakumu bangondo esusu bo Mibabolee a mojɔ mobila a busa bua bonɛnɛ boNjambe obonɔ.

Boboloja 14:11

Modidi momosa mobodingoa bobu moweaka diko oko na bosusu; baditi nongo na bowi, isa na bulu isa na moi, basakoi bamina baTito na elimo ende, na baya basɔ embete ekombe ende.

2 Timoteo 4:2

Tɔndɔ Mwako Mopele na bingi, isa na pela, isa na ngange. Lemoa na bato; basia, baleha, na pɛ bongwa nongo bokoja.

1 Timoteo 4:16

Toma sɛnjɛlɛ bopele a mojɔ mowɛ mɛnɛ, na a mojɔ mobokoja bowɛ. Okakɔ boa, odi bohela wɛ mɛnɛ, na odi boheleja bato baya bakaka wɛ.

1 Batɛsalɔnike 2:9

Baninga, otabosakani elomu na monɔngɔ mosu. Yana atɔndɔkɔ so Mwako Mopele moNjambe a tei enu, bokɔkɔ elomu mabulu na mei bo botada nongo muna ai no.

Bikɔmɛli 20:31

Oko boa toma nganjamani. Pɛ bobosani bo mbi naingwa boleha no basusu na mbisoli, mabulu na mei, bianga bisusu bisato.

Boboloja 4:9

Bato babomɔ bakumejaka yona odi a ngɛndɛ, bamosakoaka na bamosepejaka, oko yona odi na bomɔ na bosusu.

Boboloja 5:6

Mbi nanɛ a sibano engɛndɛ na bato babomɔ banɛi, na a tei ebasuku, nanɛ Mwana-Bata yona odaka ami o yona oma gwa. Adaka na njeka sambo, na miso sambo, maya madi Miembo sambo miNja-mbe mia milomama a ngondo esusu.

Boboloja 6:1

Mbi nanjaka yana adipoa Mwana-Bata embete emɔci ebimbete sambo, na naka okina obato babomɔ banɛi. Iyo abala nakɔpi ebɛi bo, Doa!

Boboloja 6:6

Naka koko kɔpi ekamane a ndanda ebato babomɔ banɛi bo, Kɔpɔ emɔci endongo pata emɔci, na kɔpɔ jisato jilɔsɔ pata emɔci; pɛ ko bobeja munɛ na vino.

Boboloja 7:11

Na babwɛnji-baDiko basusu baya bahikaka ngɛndɛ, na basuku, na bato babomɔ banɛi, bakwa a maso mabu a boso bongɛndɛ na basakoa Njambe bo,

Boboloja 14:3

Ba’mba yembo eyene a boso bongɛndɛ, na a boso bobasuku, na a boso bobato babomɔ banɛi. Pɛpɛ nongo okina otongo obwana bokoa yembo emina, oko bato bamina, bato koto mokama domi-inɛi-na-inɛi baya bama sikoama a ngondo.

Boboloja 15:7

Okina obato babomɔ apa babwɛnji sambo kɔpɔ jiwɔlɔ sambo jia jiluma na likundu liNjambe yona odi na bosusu.

Boboloja 19:4

Basuku domi-ibae na banɛi, na bato babomɔ banɛi, basumana a bosakoa Njambe yona odi a ngɛndɛ. Babala bo, Amen. Aleluya!