Boboloja 4:1 - Nouveau Testament en Ngombe 1961

¹ Yana asia ngando jimina, mbi nanja, na nanɛ bo modipe modi bwase oho Diko. Na kɔpi ema mhi ka boso o ekɔmɛli emondule emi ko bala oko na mbi bo, Doa jɔno diko bo nanejae wɛ ngando jia jikɛkɛ adoe ngɔngɔ.

Boboloja 4:1 Referans Kwoze

Boboloja 11:12

Ibo babae baka kɔpi epipo ekahule oho Diko, ekabale na bu bo, Doani jɔno diko! Na bawea a Diko na eyembi, ena ko soki jibu jibanjaka.

Boboloja 1:19

Oko boa, sɔnɔ mijɔ minɛkɛ wɛ, mia midi e dɛye, na mia midi bodoa ngɔndɔ.

Boboloja 1:10

Nadaka a Mwembo a busa boKumu, na naka kɔpi epipo a ngɔngɔ jimbi o mondule bo,

Malako 1:10

Yana aduboaka yo a madiba, Yesu anɛ bokpa bo Diko didipoama, na anɛ Mwembo mokatite ai yo o ekɔmɛli esungu.

Boboloja 22:6

Abala na mbi bo, Bikenge bimina bidi soti, bitakputoa nongo. Na Kumu, Njambe omiembo na obatɔndɔi, alomi obwɛnji onde bo anejae bakɔmɛli bande ngando jia jidi bodoa ngɔngɔ mweka.

Boboloja 16:17

Obwɛnji osambo asopa kɔpɔ ende a pwea. Kɔpi epipo emana a tempelo; kɔpi emina edonga a ngɛndɛ na ebala bo, Mojɔ mosii!

Bikɔmɛli 7:56

Na abala bo, Anjani! Mbi nanɛkɛ Diko bwase, na Mwana ’Moto adi ami a ebɔ ebami eNjambe.

Yoane 16:13

Iyo akadoa, oko Mwembo mosoti, yo âboloja ngando jisusu jisoti ai no. Mojɔ bo yo atabala na kpaci ende mɛnɛ; âbala oko ngando jikaka yo, na âjebeja no ngando jia jidoakini.

Luka 3:21

Yana abatisama bato basusu, Yesu abatisama pongono. Yana angaka yo, Diko didipoama oko bodipoama,

Bikɔmɛli 10:11

Anɛ Diko bwase, na likina libɔkɛ likatite. Lidaka o esenja enɛnɛ yena epeama a matoka manɛi a mojɔ mobosoloja.

Matayo 3:16

Yana abatisama Yesu, aduboa bokpa a madiba. A ehole emina, Diko didipoama oko bodipoaraa; anɛ Mwembo moNjambe mokatite o sungu na mokabakame ai yo.

Boboloja 1:12

Mbi nahekoa a bonɛ kɔpi yena ebalaka na mbi. Ahekoa mbi, nanɛ paka jiwɔlɔ sambo.

Boboloja 11:19

Tempelo eNjambe oho Diko edipoama, na edejai emokongo monde edaka a bohu a tei etempelo ende. Mikalimo mimana a ehole emina, na daka enɛnɛ, na bɛi, na bojonga bongondo, na mbua monɛnɛ omatai akwa.

Boboloja 19:11

Nanɛ bo Diko didi bwase, na nanɛ punda mopu. Okina adaka abaki a punda yona odi na kombe ji, Yona oejimeli, Yona osoti. Iyo asambejaka, na anaka bila oko na bodongo.