Mateo 7:15 - KILOMBENO KIHYA KIA NFUMWETU YESU KIDISITU

¹⁵ Dimukai batemuki bamadimi abafiki kwanudi mu misokya ya mikoko, anka munda mwabo be bu tumishi twi na bukyelo.

Mateo 7:15 Referans Kwoze

I Yoano 4:1

Anwe batomibwe kifulo, tanukuminanga bikudi bioso, anka tompai bikudi su mbia kw’Efile Mukulu; mwanda batemuki ba madimi bebungi mbahalakane hanohansenga.

Mateo 24:11

Batemuki ba madimi be bungi abakēbō, abakōngola be bungi.

Bena Kolose 2:8

Dimukai tala su nanyi su nanyi akenulwisha na mīsambo ya binangu bimoo na ya kudimba kwa bisumanga, mwiyile kwilondeshena kwa mīsambo ya bantu, na ya bileshesho bia hanohansenga, mushī mwiyile Kidisitu, ooo.

Kibafumulwe 19:20

Biabia nyamae-bukyelo bakwatshilwe, na winyi mutemuki amadimi bakitshine bitundwilo ku mpala kwe, nyi bibōngwele n’abio baba abatambwile kitundwilo kia nyama-e-bukyelo, n’aba abalangudile kihwandjikisho kie. Bano babidi abedibwe abatala mwishiba dia kālo aditembe na soufre.

Yuda 1:4

Mwanda kwi bamo bantu abadi ababembela mwanudi ku bukunkula, aba nyi abasangwilwe kala ku kuno kuhīshwa, bantu bashī na bwin’Efile Mukulu mpaa na ku mudioholo w’eshimba dibi, na kutuna Mwana’etu umunenka, Nfumwetu Yesu Kidisitu.

Ii Petelo 3:17

Binyibiabia anwe batomibwe kifulo, ha kwiuka yino myanda kwibedi, dimukai, tala’nwe (namu) ha kōngolwa na kuluba kwa bebubi, anukahono ku kushimata kwenu ku na mwinyi.

Luka 6:26

Mpombo kwanudi ahakenwakwila bantu boso buwa! mwanda biabia nyi bibakitshine bashabo-kulu kwi batemuki ba madimi.

Ii Temote 3:13

Anka bantu babi na bansesa abakēnd’ābafwimanga na kufwima kwa ku bubi, na kōngoshena na kwiongola (bana bene).

Ii Temote 4:3

Mwanda kihindji akikafiki kiabakahele lulambukisho lulombane; anka mwiyile ngabiabi yabo abakefwimisha kwi’bo bana bene balambukishi, basha matwi e na kibāba;

Bena Fidihai 3:2

Dimukai mbwa, dimukai bakitshi ba bubi, dimukai bakwilamuna.

Bena Efisesa 4:14

eshi, tatwikalanga bu bakinga bakī batoka abasunkumishwa, na kuhahulwa na mpahi yoso ya lulambukisho, ku ndjindji ya bantu, na ku bulamalama bukilekile kwabadi bemene kudimbananga, ooo,

Bena Ngalatea 2:4

Biabia nyi mpa mwanda wa bakwetuba madimi, abetwesheshe munkatshi mwetu (ha mwanda wa) kitadīla, ku bufyefye’shi; Twikale bampūha ku buluñantu bwabadi n’abo mu Kidisitu Yesu, mwabadi kwitufishisha mu buhika.

Luka 12:15

Biabia e bebālulwile’shi: Dimukai, nwilame ku malaka: mwanda muwa wa muntu tawi mu bungi bwa bintu biadi n’abio, ooo.

Kibafumulwe 16:13

Namwene namu bikudi bi butete bisatu bifwane bīlwa abituku mu kanwa mwa kinyoka, na mwa nyama-e-bukyelo, na mwa mutemuki a madimi;

Bena Efisesa 5:6

Tanudimbibwanga na muntu e na myanda ya bisumanga; nyi mpa mwanda wa yino myanda bukyelo bw’Efile Mukulu abufikā ha bana ba bashī na kukokyela.

Bikitshino 13:40

Binyibiabia dimukai, tala kiakia kibākwilwe mu batemuki kiakafikila hanudi.

Yoano 10:12

Mufubi’ēfuto, ta nkatshunga ka mikoko ka na mwinyi, na mikoko tangye, amono kamishi kakwete kufika, alekye mikoko, tasuku: na kamishi akeyikwata, na kwiyihalakasha.

Mateo 16:11

A nkinyi kianushī bashingule’shi, ntshī mwinwakule ha mwanda wa mampa, ooo, nenulungulanga kudimuka kitatusho kia Bafadiseo na Basadusea.

Mateo 16:6

Binyibiabia Yesu bebalungwile’shi: Talai, mudimukye kitatusho kia Bafadiseo, n’akia kia Basaduseo.

Mateo 10:17

Anka dimukai bantu, mwanda abakenufishishe ku bimu, n’abakenukuhila mu bitumbwilo biabo.

Kibafumulwe 17:6

Namwene namu winyi mwana mukashi mukolwe na mase a bahatulwe bekishila, na mase a tumonyi twa Yesu: hanamumwene nakanyine na kukanya kwi moo.

Bikitshino 13:6

Habahwile kwenda, abasambushene kīla, mpaa na ku Mpahose; abasañene kwanka mwina Yuda ñanga a kubuka, mutemuki a madimi, eshina die dibadi bu Balayesu.

Mateo 7:14

Mwanda’kia kibelo akīshwa ku muwa-autala, nyi nkibuname, A! kintshantshantsha, n’eshinda dihela hamune, n’abakedimono be bahela.

Kibafumulwe 20:10

Na kafilefile, winyi bebōngwele, belelwe mwishiba dia kālo na soufre, mwi nyama-e-bukyelo na mutemuki a madimi; banakamweshibwe mitanyo kanya na bufuku, mpaa na kwikala-ika.