Yohana 6:70 - Eriiraghano Eriihë

⁷⁰ Niho Yesu akabhabhoorera akabhugha, “Nebhahwire inyu ikomi na bhabhere kubha abhaanabheegha bhaane, amare umu ghate yaanyu n‑o Rishambu.”

Yohana 6:70 Referans Kwoze

Yohana 13:27

Yuuta hano amariri kwimoki egheteneka kiire ke mughaate, Erishambu rekamusöhërëra Yuuta. Yesu akamobhoorera akabhugha, “Ghano okwënda ghuköra, ghakörë bhwango!”

Yohana 13:2

Yesu na abhaanabheegha bhaache bhaghiikara kurë ekiinyakurë ke mughörööbha. Eriibhagha riyo, Erishambu ndeere remotebhiritebhiri Yuuta, omoona o Simiyooni Isikariyoote, kubha amwigharurani Yesu.

Yohana 17:12

Eriibhagha nibheere haghirohamu nabho nebhachongiri kwo bhotoro bho riina reecho rino oheere. Nebhachongiri bhoheene kubha netamorumeeri koru umu mo‑bhaare, nanyinga wuure omorumeeri, kubha ghahikeerane ghano ghaandëkuru mo‑Mandëkö Amatööbhiyu.

Yohana 13:18

“Nteeghosiikëra ghano gho ghiri yaanyu bhoose. Nebheeche abhaato bhano nebhahwire kubha abhaanabheegha bhaane. Amare ngakwëndëru ghahikeerane Amandëkö Amatööbhiyu ghano ghakobhugha kubha, ‘Musaani waane uno are araraaghëra haghirohamu na neeni, aghiigharura kubha omobhisa waane.’

Yohana 6:64

Amare mbaanyi‑ho abhande ghateghate yaanyu bhano bhakwanga ghonkumi.” Yesu ꞉naabhughiri hangʼu gho kubha ꞉naamënyiri koru simoka kubha m‑bhawe bhano bhakwanga komokumi, na kubha n‑niwe uno akuucha komwigharurani.

1 Yohana 3:8

Amare omooto wowoose uno akwëndërëra ghuköra amasari, n‑omooto o Rishambu. Ntweche ghayo gho kubha Erishambu ndyëndëriire ghuköra amasari korwera kare. Nikyo Omoona o Ryobha ꞉ichiri mo‑se, kubha aghisari emeremo ghe Rishambu.

1 Timotewo 3:11

Abhakari bhaabho nabho, bhabhe bhano bhaanyi na atëëmö inchömu, bhatabha abhitaamereri bha bhaato, bhabhe ne ekirëngërë, wiiki bhabhe abhahëënë mo‑mangʼana ghoose.

Amaköri gha Bhatomu 1:17

Yuuta naare omotomu mughëndi wiito, ntuhaabhuru emeremo ghino haghirohamu nawe.”

Yohana 15:19

Aribha mongabheere abhaato bha mo‑se ino, bhayo mbangabheere bhabhasiighiri kinya bhuno ase esiighiri abhaato bhaache. Amare inyu motaanyi bha se ino, gho kubha nebhahwire koru mo‑se ino, nikyo gheghughëri abhaato bha mo‑se ino ˆbhakabharëgha.

Yohana 15:16

Inyu motanyahwire eni, amare n‑eni nebhahwire inyu. Nebhahwire kubha, musöngë amakorobhese ghano ghataaghosira naabha. Moraköra hangʼu, ghyokyose kino morasabha kohetera eriina reene, Taata nakobhaha.

Yohana 13:21

Hano Yesu amariri kobhugha ghayo, aghiitumata chwee mo‑körö yaache, akabhugha haheero kubha, “Mahëënë ˆnekabhabhoorera, umu ghate yaanyu nakuucha ahaane mo‑mabhökö gha bhabhisa.”

Yohana 8:44

Inyu n‑abhaana bhi iso waanyu Erishambu, wiiki mokwënda ghuköra ghano taata waanyu aghwighomba. Erishambu n‑diiti korwera kare, wiiki retasiighiri kwimeerera mo‑bhuhëënë gho kubha, obhuhëënë bhotaanyi mo‑motema waache. Aribha Erishambu rekobhugha obhuröngö, iyo n‑atëëmö yaache gho kubha iryo n‑iröngö wiiki n‑taata o bharöngö bhoose.

Tiito 2:3

Bhuure bhuure abhaghiikoro abhakungu, obhabhoorere kubha bhabhe no orughëndö runo rokoreghongi Eryobha. Bhatabha abhitaamereri bha bhaato, na bhanyo bha maro, amare mbakwëndëru kweghi amangʼana amachömu.

Amaköri gha Bhatomu 13:10

“Iye omoona o Rishambu! Iye n‑omobhisa o ghoose ghano ghaanyi gha hëënë ambërë e Ryobha! Wichwire obhuröngö, nubheere orangʼiina abhaato kwo bhongʼiini na totighiri kobhusa amangʼana gha Mutëmi gha hëënë kubha obhuröngö!

Yohana 2:2

Yesu na abhaanabheegha bhaache bhoose mbaare bharaghiinu, mwirugha riyo.

Yohana 6:67

Niho Yesu akabhabhoori abhaanabheegha bhaare ikomi na bhabhere akabhugha, “Kana, na niinyu mokwënda ghontigha?”

Yohana 6:71

Hayo Yesu naare aramosiikërëra Yuuta mwërëëti o Simiyooni Isikariyoote. Uyo niwe ꞉ichiri komwigharurani Yesu, koru nangabha are umu mo‑bhaanabheegha bhaache ikomi na bhabhere.

Yohana 20:24

Mbe, umu mo‑bhaanabheegha ikomi na abhere bha Yesu, eriina reeche Tomaso, uno bhamobherekiire Eghisare, taare haghirohamu na abhaanabheegha abhande eriibhagha Yesu akobharwera.