Yohana 5:45 - Eriiraghano Eriihë

⁴⁵ “Motabha moriihëëbha kubha eni nekobhasëma o‑Taata, tiyaanyi! Musa niwe akobhasëma, gho kubha niwe moghwitëngʼëra.

Yohana 5:45 Referans Kwoze

Abhagharatiya 3:10

Amare bhoose bhano bhaghwitëngʼëra ghotooribhu gho ghuköra ghano ghakwëndëru ne emeghiro ghe Musa, bhayo bhiihiimuru. Amandëkö Amatööbhiyu ngakobhugha kubha, “Wowoose uno ataaghughööta na ghuköra ghoose ghano ghaandëkuru mo‑ghitabhu ke meghiro, niihiimuru.”

Abharuumi 2:12

Abhaato bha matöngö bhano ꞉bhaaköriri amasari mbaghosireekereru, koru nangabha bhataare bheeche emeghiro ghe Musa. Abhayahuuti bhano ꞉bhaaköriri amasari ino bheeche emeghiro ghiyo, ibho mbaghoteneru ekiina kurëngʼaana ne emeghiro ghiyo.

Yohana 7:19

Yesu akëëndërëra kobhugha, “Mweche kubha Musa naare abhaheere emeghiro ghe Ryobha. Amare taanyi‑ho omooto koru umu uno aghoghitambana emeghiro ghiyo. Mbe, ngwake mokwënda koonyita?”

Yohana 8:9

Hano bhooghwire ghayo, bhakangʼuutu mo‑metema gheebho, bhaghasëëma ghutanura ke umu umu, abhagharuka nibho bhashamiri ghutanura. Antenero Yesu aghasaagha omwene chiri no omukari uyo, uno are imeeriire ambërë yaache.

Ruuka 16:29

Amare, Abhurahamu aghagharokeri akabhugha, ‘Bhaömöönyu bhayo, mbaanyi na amangʼana ghano ghaandëkuru na Musa na abharööti. Mbakwëndëru ghoghatëghëërëra ghayo!’

Yohana 12:48

Omooto wowoose uno akonyanga eni haghirohamu na amangʼana ghaane, naanyi na uno akuucha komotenera ekiina. Amangʼana ghano nebhughiri nigho ghakuucha komotenera ekiina orosiko ro ntenero.