Yohana 14:6 - Eriiraghano Eriihë

⁶ Yesu akamugharokeri akabhugha, “Eni n‑anchëra, no obhuhëënë, no obhuhöru. Taanyi‑ho uno aghotora kuucha o‑Taata aribha atahetiire ghokoone.

Yohana 14:6 Referans Kwoze

Amaköri gha Bhatomu 4:12

“Obhotoori mbokubhönëka kwo riina re Yesu Kirisito omwene chiri! Retaanyi‑ho eriina erende mo‑se ino rino rekwëndëru ghototoori itu, ne eriina re Yesu eryene chiri!”

Yohana 10:9

Eni neeni eghisëku kiyo. Wowoose uno aghusöha mo‑mowaara kohetera ghokoone naghotooribhu, wiiki naghusöha na kohoroka, na ghuye a‑keriisho.

Abhaebheeso 2:18

Gho ghayo, gho kohetera iwe, itu bhoose Abhayahuuti na abhaato bha matöngö ntoghotora komwishukerera Taata gho nchëra imu, gho kohetera Akörö Ahörëëru.

Yohana 1:4

Niwe simoka e bhuhöru, no obhuhöru bhuyo mbokurëëta obhwero kwo bhaato bhoose.

1 Yohana 5:20

Wiiki ntweche kubha Omoona o Ryobha namariri kuucha, natoheere obhongʼiini, kubha torimënyë Eryobha re hëënë. Ntoonyi no obhumu ne Eryobha re hëënë, gho nchëra e kubha no obhumu no Omoona waache Yesu Kirisito. Rino niryo Eryobha re hëënë, no obhuhöru bho emiishe ghyose.

Yohana 1:14

Angʼana iyo ekabha omooto, aghiikara ghateghate yiito. Itu bhoose tokabhorighi obhokumi bhooche obhokoro, obhokumi bhooche obhokoro iwe uno anyi Omoona omwene chiri o Taata, niichwire aghareeya no obhuhëënë.

Yohana 1:17

Mbe, gho kubha Eryobha ꞉ndeeruusiri emeghiro gheeche gho nchëra e Musa, amare aghareeya no obhuhëënë mbiichiri gho nchëra e Yesu Kirisito.

Abheebhuraaniya 7:25

Gho ghiri iyo, iwe naanyi na changuru che kobhatoori kimu kimu abhaato bhoose bhano bhaaghuye kwo Waryobha kohetera ghokooche, gho kubha iwe muhöru emiishe ghyose, nakobhasabhera kwo Waryobha eriibhagha ryose.

Yohana 8:32

Wiiki mokobhumënya obhuhëënë. Nabho obhuhëënë bhuyo, mbokobhatoora huuru.”

1 Bheetero 3:18

Kirisito woose nanyaakiru mara rimu hangʼu gho ghiri e masari, omooto omuhëënë gho ghiri e bhaato bhano bhataanyi abhahëënë, kubha atughöötani ne Eryobha. Omobhere ꞉wiituru, amare kwo bhotoro bho Akörö Ahörëëru ꞉naabhwine wiiki obhuhöru.

Yohana 5:21

Kebhuno Taata akobharyoki abhaku na kobhaha obhuhöru bho miishe ghyose, hangʼu hangʼu Omoona nahaabhaha obhuhöru abhaato bhano asiighiri kobhaha.

2 Yohana 1:9

Wowoose uno ataakwëndërëra ghughööta ameeghi gha Kirisito, wiiki naghugharura ameeghi ghayo, uyo taanyi no obhumu ne Eryobha. Amare, uno akwëndërëra ghughööta ameeghi gha Kirisito, naanyi no obhumu na Taata Waryobha no Omoona waache.

Obhohunyurëru 20:15

No omooto wowoose uno eriina reeche retaandëkuru mo‑Ghitabhu ke Bhuhöru, woose narëkiiru mo‑nyancha e mororo.

Yohana 15:1

Yesu akëëndërëra kobheeghi arabhugha, “Eni n‑omusabhiibhu o hëënë, na Taata waane niwe omoremi.

Mataayo 11:27

Yesu akëëndërëra kweghi abhaato bhayo arabhugha, “Taata waane, namariri ghotoora ghoose mo‑mabhökö ghaane. Wiiki taanyi‑ho uno amweche Omoona, n‑Ishe omwene. Koru taanyi‑ho uno amweche Ishe, n‑Omoona omwene, na wowoose uno Omoona akwënda komohunyurera.

Yohana 6:51

Eni n‑ekiinyakurë kino gheghwika koru Mwishaaro, kino ghekobhaha abhaato obhuhöru. Omooto wowoose uno akurë ekiinyakurë kiyo, naakubha no obhuhöru bho miishe ghyose. Ekiinyakurë kiyo n‑omobhere waane uno nekoworuusi gho ghiri e bhaato bhoose, kubha bhabhe no obhuhöru bho miishe ghyose.”

Obhohunyurëru 22:17

Akörö e Ryobha no omokwiru mbakomobherekera Omutëmi bharabhugha, “Nuuche!” Na abhaato bhoose bhano bhakooghu amangʼana ghayo bhabhughe, “Nuuche!” Wowoose uno anyi na anyööta, uno akwënda amanche, ache anyo amanche gha bhuhöru bhoowa.

Yohana 8:51

Mahëënë ˆnekabhabhoorera, omooto wowoose uno aghoghatambana ameeghi ghaane, taaghoku naabha.”

1 Yohana 2:23

Omooto uno akomwanga Omoona, tamweche Taata Waryobha. Amare uno akomokumi Omoona ambërë e bhaato, iwe naanyi no obhumu na Taata Waryobha.

Yohana 10:28

Eni neghochiha obhuhöru bho miishe ghyose, koru chetaakobhora naabha. Wiiki taanyi‑ho omooto uno aghotora ghochisara koru mo‑mabhökö ghaane.

Yohana 18:37

Mbe, Bhiraato akamobhoori akabhugha, “Kana, m‑mahëënë kubha iye n‑omutëmi?” Yesu akamugharokeri akabhugha, “N‑iye ˆokabhugha kubha eni n‑omutëmi. Eni niibhwiru mo‑se ino, wiiki niichiri kubha nebheeghi abhaato obhuhëënë. Omooto wowoose uno aghutambana obhuhëënë, naghoghooghu amangʼana ghaane.”

Yohana 6:33

Ekiinyakurë ke Ryobha n‑uno ikiri koru Mwishaaro, kubha abhahë abhaato bhoose bha mo‑se obhuhöru.”

Yohana 14:19

Rekeere eriibhagha isuuhu abhaato bha mo‑se ino bhataakondighi wiiki. Amare inyu mokondighi, gho kubha eni m‑muhöru, na niinyu mookubha abhahöru.

Yohana 6:57

Taata uno antomiri m‑muhöru anyi, na neeni nekubhöna obhuhöru gho kohetera gho Taata. Hangʼu hangʼu, omooto wowoose uno akowure omobhere waane, nakubhöna obhuhöru gho kohetera ghokoone.

1 Bheetero 2:4

Momutambane uno anyi eriibhohe erihöru re kwabhëkëra. Eriibhohe riyo, abhaato ꞉mbaaryangiri, amare Eryobha ꞉ndeeryahwire, wiiki n‑de riighori ikoro mo‑miisho ghaache.

Yohana 10:7

Mbe, Yesu akabhabhoorera wiiki akabhugha, “Mahëënë ˆnekabhabhoorera, eni neeni ekehita ghe changʼöndu.

Abharuumi 5:2

Gho nchëra e komokumi Omutëmi Yesu, Eryobha ꞉ndeetoheere aghareeya yaache. Koru ibheere ntokwëndërëra ghosongʼaana aghareeya iyo. Ntoghuchömëru chwee, gho kubha ntoghwitëngʼëra kubha ntoghusanga haghirohamu ne Eryobha mo‑bhokumi bhooche obhokoro.

Abhakorosaayi 3:4

Obhuhöru bhoonyu mbokurëëtu na Kirisito. Eriibhagha rino akorighibhu, niho na niinyu moghusanga haghirohamu nawe mo‑bhokumi bhooche obhokoro.

1 Abhakorinto 15:45

Mo‑Mandëkö Amatööbhiyu yandëkuru kubha, “Omooto o mumbërë, Ataamu, natëëmuru akabha omooto omuhöru,” amare Ataamu o ntenero, n‑Kirisito, niwe Akörö ino ekobhaha abhaato obhuhöru.

1 Yohana 1:8

Aribha tookobhugha kubha itu totaanyi na amasari, ntokwingʼiina itu bheene, toteeche obhuhëënë.

Yohana 6:68

Simiyooni Bheetero akamugharokeri akabhugha, “Oo Omutëmi, toghi waawe? Iye omwene noonyi na amangʼana ghano ghaghotuha obhuhöru bho miishe ghyose.

Abharuumi 5:21

Mbe, eriisari ndeere na changuru che ghukangata abhaato na kobharëëtëra oroko. Hangʼu hangʼu, aghareeya e Ryobha nehaakangata abhaato, gho kobhabharera kubha mbaanyi no obhuhëënë, na kobhaha obhuhöru bho miishe ghyose, kohetera kwo Mutëmi wiito Yesu Kirisito.

Obhohunyurëru 1:5

na koru kwo Yesu Kirisito, ghibhe haghirohamu na niinyu. Uyo niwe omwibhateri omuhëënë. Niwe o mumbërë koryoka koru mo‑bhaku, kubha abhe omukangati o bhatëmi bhoose mo‑se. Yesu niwe atosiighiri aghatusaasura koru mo‑masari ghiito gho nchëra e masaahë ghaache.

1 Bheetero 1:21

Kohetera gho Kirisito, mokorekumi Eryobha, rino remoryokiri koru mo‑bhaku na komuha obhokumi obhokoro. Gho ghayo, mokomokumi na koriitëngʼëra Eryobha.

Obhohunyurëru 19:11

Hano ghayo ghahetiri, nekarighi eriirighi erende. Nekarighi erishaaro riighokiri. Nekarighi abharaasi ayeero no omooto ikeere ighoro yaache. Omooto uyo nabherekiiru, “O Muhëënë” no “O Mahëënë.” Iwe nahaatena ekiina na kurööna eriihë kwo bhuhëënë.

Abhakorosaayi 2:9

gho kubha, obhohikeerani bhoose bho Ryobha mboonyi mo‑mobhere o Kirisito.

1 Yohana 5:6

Mbe, Yesu Kirisito niwe ichiri kwo manche gha bhubhatiiso na kwo masaahë gha roko rooche. Taanyi kwo manche agheene, amare na kwo masaahë ghaache ghano ꞉ghiitëkiri mo‑musarabha.

Obhohunyurëru 3:14

Omooto uyo kinya Omoona o Mooto akëëndërëra kobhugha, “Omwandëkërë marayika o riikanisa re Rawotikiya, no omobhoorere obhughe, ‘Eni neeni nekobherekeru Hawubhaabha, gho kubha nekuhëënëhi obhuhëënë bho Ryobha kwo mahëënë. Eni neeni omutange o bhetyenyi bhyose bhino ꞉bhiitëëmuru ne Eryobha. Mutëghëërërë ghano nekobhabhoorera!

Abhakorosaayi 2:17

Ghayo ghoose n‑ekiriiri ke mangʼana ghano gha kuucha, obhuhëënë bho mangʼana ghayo n‑Kirisito omwene.

Obhohunyurëru 3:7

Omooto uyo kinya Omoona o Mooto akëëndërëra kobhugha, “Omwandëkërë marayika o riikanisa re Bhirateribhiya, no omobhoorere obhughe, ‘Eni neeni Omutööbhiyu uno neenyi o muhëënë. Wiiki eni neenyi no orohunguro ro bhukangati ro mutëmi Tawuti. Neriighara orwighe, taanyi‑ho owonde uno aghotora ghwighora. Neriighora, taanyi‑ho owonde uno aghotora ghwighara.

Amaköri gha Bhatomu 3:15

Mbe, mokamwita uno anyi omutangi o bhuhöru! Amare Eryobha rekamoryoki koru mo‑bhaku, na niitu n‑abhiibhateri bha koryoka kooche toonyi.

Obhohunyurëru 22:1

Akamara marayika uyo akanyëërëki orooche ro manche gha bhuhöru, ndoore rorabhari kinya ekiröri na ndorweriire irungu re ghetumbe ghe ghitëmi ke Ryobha no Omoona o Ngʼöndu.

Abheebhuraaniya 9:8

Akörö Ahörëëru nehaatwërëki kubha anchëra e ghusöha Ahaghiro Ahatööbhiyu ha Hatööbhiyu ekeere ghwighoru kwo bhaato abhande gho kubha, eriibhuru riire e rimbërë rekeere reraköra emeremo.

Abharuumi 15:16

kubha nibhe omutamishi o Kirisito Yesu kwo bhaato bha matöngö. Nihaabhuru emeremo ghe bhuchaama ghe kobharaghaneri Angʼana Anchömu koru kwo Waryobha, kubha bhabhe kinya amaruusi ghano ghakoretegheri Eryobha, ghano ghamusuru na Akörö Ahörëëru.

Amaköri gha Bhatomu 9:2

akamusabha amuhë anyaarubha ino aghuye nayo mo‑masinaghooghi gha moghya o Tamaasiko, kubha arabhabhöna iyo abhaghëndi bha Yesu, abhasubhe na abhakari, abhaghöötë, na kobharëëta Yerusareemu.