Yakobho 3:18 - Eriiraghano Eriihë

¹⁸ Abhaato bha murëmbë, bhareemi chaatëtërë che murëmbë, mbaghughësa obhuhëënë.

Yakobho 3:18 Referans Kwoze

Mataayo 5:9

Ngʼoni bhano bhaanyi abharwachi, gho kubha Eryobha ndekobhabherekera abhaana bhaache.

Abhabhiribhi 1:11

Eriimanya reenyu ndeghwichora amangʼana gha hëënë ghano ghakubhönëka gho nchëra e Yesu Kirisito. Ghayo ghoose gharekumi na koreghongi Eryobha.

Abhagharatiya 6:8

Mbe, omooto uno aghutambana amiigha ghaache amabhe, naghughësa ghosireekereru na amiigha ghayo. Amare uno aghutambana Akörö Ahörëëru, naghughësa koru gho Körö Ahörëëru obhuhöru bho miishe ghyose.

Abheebhuraaniya 12:11

Taanyi‑ho omooto uno aghuchömëru hano akuröönu, amare naghwitumata. Abhaato bhano bhakwegha kubha na atëëmö inchömu gho nchëra e kuröönu, mbaakubha no omurëmbë na ghuköra amangʼana gha hëënë.

Yakobho 1:20

gho kubha, hano omooto aghukarara, taaghuköra ghano ghakwëndëru ambërë e Ryobha.

Yohana 4:36

Omughësi nakubhöna amareho ghaache, na ghokoma omunöghö gho ghiri e bhuhöru bho miishe ghyose. Mbe, omobhusuri no omughësi bhoose mbaghuchömëru haghirohamu.