Yakobho 3:15 - Eriiraghano Eriihë

¹⁵ Amangʼiini ghanga ghayo, ghataakoru kwo Waryobha, amare n‑amangʼiini amabhe ghano ghakorwera mo‑se, na mo‑chaasughara che bhaato na mo‑Rishambu.

Yakobho 3:15 Referans Kwoze

Yakobho 3:17

Amare, amangʼiini ghano ghaakoru kwo Waryobha, m‑machömu wiiki n‑gha murëmbë, no obhuhörëëru, igho ngaghutëghëërëra amangʼana gha abhaato. Igho ngiichwire changori na amaköri amachömu, na ghataanyi no obhwahukani koru obhobhiihi.

Yakobho 1:17

Mumënyë egheghiro kyose eghichömu kino tokuhaabhu, ngekoru Mwishaaro kwo Ryobha omutëëmi o mirëngaari. Iryo retaaghotora ghwigharura kinya ekiriiri kehiigharura.

1 Abhakorinto 3:19

Akörë hangʼu, gho kubha amangʼiini gha se ino, n‑gha ghighëëghë ambërë e Ryobha. N‑kinya bhuno yandëkuru mo‑Mandëkö Amatööbhiyu kubha, “Eryobha ndekobhaghööti bha mangʼiini mo‑bhongʼiini bhoobho.”

Abhabhiribhi 3:19

Antenero e bhaato bhayo mbaghosireekerera, gho kubha amiigha ghaabho nigho eryobha reebho. Ibho mbakwihachera amaköri gha chaasoni ghano bhaghuköra. Wiiki mbakwihëëbhëra amangʼana gha mo‑se ino.

1 Abhakorinto 2:14

Amare omooto uno ataanyi na Akörö e Ryobha, taaghosongʼaana ghano ghaakoru mo‑Körö e Ryobha. Ghokooche ghayo n‑gha ghitaraaho, wiiki taaghotora ghoghamënya, gho kubha ngakumënyu kwo bhotoorereri bho Körö e Ryobha.

2 Abhakorinto 1:12

Mbe, itu ntokwihachera rino, mo‑metema ghiito ntoonyi no obhuhëënë kubha, mo‑se hano, na ahanene mo‑bhughöötani bhwito na niinyu, ntumanyiri kwo bhughöröröku na kwo bhuhëënë bhuno bhookoru kwo Waryobha. Totaaköriri hangʼu kwo mangʼiini gha se ino, amare n‑gho ghareeya e Ryobha.

Yakobho 1:5

Amare uno aghosuuheru na amangʼiini, nakwëndëru arisabhe Eryobha naryo ndekomuha, gho kubha ndehaabhaha abhaato bhoose, kwo bhosiighi, koru iryo retaanyi na anyaanyi.

1 Timotewo 4:1

Ibheere, Akörö Ahörëëru neghosiikëra kyono kubha, mo‑rosiko ro ntenero, abhande mbaghotigha obhokumi bho hëënë, na ghutambana chaakörö che bhuröngö, na ameeghi gha misambu.

Yuuta 1:19

Abhaato bhayo nibho bhakurëëta obhwahukani, mbaghwituuri amangʼana gha mo‑se agheene, bhataanyi na Akörö e Ryobha.

1 Abhakorinto 3:3

gho kubha mokeere morakangatu na simoka yaanyu e masari. Kana, aribha ghate yaanyu ndeenyi‑ho eriihari ne eriihë, ghayo ghataakwërëki kubha mokeere morakangatu na amangʼana gha se na kumanya kinya abhaato bha mo‑se?

Yohana 3:17

Eryobha retaamotomiri Omoona waache kubha atenere abhaato ekiina, amare abhaato bhatooribhu gho kohetera iwe.

Obhohunyurëru 12:9

Oghuchöka ghokarëkëru mo‑se. Ghuno nigho oghuchöka ghuure gho kare ghuno ghokobherekeru Ibhiriisi hamu Erishambu. Ngokongʼiina abhaato bhoose mo‑se. Mahëënë ngurëkiiru mo‑se haghirohamu na bhamarayika bhaache.

Obhohunyurëru 9:11

Ncheere no omutëmi uno are marayika omokoro o rirooma re mashambu. Marayika uyo gho Kebhuraaniya nakobherekeru Abhatooni na gho Keyunaani nakobherekeru Abhoriyooni, egheteemoro keeche “n‑Omosireekereri.”

Obhohunyurëru 2:24

Ibheere ghate yaanyu iyo Tiyatira, mbaanyi‑ho abhande bhano bhaanyi abhahëënë. Abhaato bhano bhataaghutambana ameeghi gha Yesebheeri uyo koru bhateeche ghayo abhande bhakobhugha kubha n‑ekebhisere ke Rishambu! Kwo bhaato abhahëënë bhano, nekobhugha kubha, ntëëköbhëëngërëërëri wiiki omorigho owonde.

2 Abhatesaronike 2:9

Eriibhagha re kuucha kooche, Omwigharurani uyo, nakuucha na changuru choose che Rishambu na ghuköra ebhyërëkërëri ne ebhiraghe bhe bhuröngö.

2 Abhakorinto 11:3

Amare ibheere neghotiina kubha, kinya bhuure Haawa angʼiinuru na anchöka yiire angʼiini, na niinyu motaacha kongʼiinu, motighe komosiigha Kirisito kwo bhughöröröku no obhwero.

1 Abhakorinto 1:27

Amare Eryobha ndeghahwire amangʼana ghano ghakorighibhu n‑gha ghighëëghë kwo bhaato bhano bhataryeche, kubha rebhasooki bhano bhaanyi na amangʼiini. Wiiki Eryobha rekaahura amangʼana ghano abhaato bhano bhakorighi kubha ghataanyi ni inguru, kubha rebhasooki bha changuru.

Abharuumi 1:22

Mbakwihacha kubha nibho bhaanyi na amangʼiini, amare m‑bhaghëëghë.

Amaköri gha Bhatomu 13:10

“Iye omoona o Rishambu! Iye n‑omobhisa o ghoose ghano ghaanyi gha hëënë ambërë e Ryobha! Wichwire obhuröngö, nubheere orangʼiina abhaato kwo bhongʼiini na totighiri kobhusa amangʼana gha Mutëmi gha hëënë kubha obhuröngö!

Yohana 8:44

Inyu n‑abhaana bhi iso waanyu Erishambu, wiiki mokwënda ghuköra ghano taata waanyu aghwighomba. Erishambu n‑diiti korwera kare, wiiki retasiighiri kwimeerera mo‑bhuhëënë gho kubha, obhuhëënë bhotaanyi mo‑motema waache. Aribha Erishambu rekobhugha obhuröngö, iyo n‑atëëmö yaache gho kubha iryo n‑iröngö wiiki n‑taata o bharöngö bhoose.

Ruuka 16:8

“Achekumara, omwame akamoghongi omwimeereri uyo ataanyi omuhëënë kwo bhongʼiini bhooche. ˆNekabhabhoorera ghayo gho kubha, abhaato bha ase ino mbaanyi no obhongʼiini chwee, gho kobhihökëri ebheghiro bheebho abheene kwo bheene, ghokera abhaato bha bhwero.