Yakobho 1:17 - Eriiraghano Eriihë

¹⁷ Mumënyë egheghiro kyose eghichömu kino tokuhaabhu, ngekoru Mwishaaro kwo Ryobha omutëëmi o mirëngaari. Iryo retaaghotora ghwigharura kinya ekiriiri kehiigharura.

Yakobho 1:17 Referans Kwoze

Yohana 3:27

Yohana akabhagharokeri akabhugha, “Omooto taaghotora kubhöna egheghiro ghyokyose, aribha Eryobha retamoheere.

Mataayo 7:11

Nangabha moonyi bha masari, mweche kobhaha abhaana bhaanyu ebheghiro ebhichömu. Mbe! Taanyi hëënë kubha, Taata waanyu uno anyi Mwishaaro naghuköra ghokera ghayo? Mahëënë nakobhaha ebhichömu bhoose bhano bhakomusabha!

Abheebhuraaniya 13:8

Yesu Kirisito w‑wuure wuure, icho, na reero ne emiishe ghyose.

Yohana 8:12

Mbe, Yesu akëëndërëra ghosiikëra wiiki ne erikinda riire akabhugha, “Eni neeni obhwero bho se. Omooto wowoose uno aghuntambana eni, taaghughënda mo‑kengʼuuri naabha, amare naakubha no obhwero bhuno bhokomukangata mo‑bhuhöru bho miishe ghyose.”

1 Yohana 1:5

Angʼana ino ꞉tooghwire o‑Yesu, niyo tokobharaghaneri, kubha Eryobha no obhwero, retaanyi ne ekengʼuuri ghyokyose moose yaache.

Yakobho 3:17

Amare, amangʼiini ghano ghaakoru kwo Waryobha, m‑machömu wiiki n‑gha murëmbë, no obhuhörëëru, igho ngaghutëghëërëra amangʼana gha abhaato. Igho ngiichwire changori na amaköri amachömu, na ghataanyi no obhwahukani koru obhobhiihi.

Abhaebheeso 2:8

Mbe, hangʼu nibhu aghareeya e Ryobha ebhatooriri, gho nchëra e komokumi Yesu Kirisito. Obhotoori bhuyo bhotabhönëkiri gho ghwiköngʼi koonyu, Eryobha niryo retoheere kinya atuho.

Ruuka 11:13

Nangabha moonyi bha masari, mweche kobhaha abhaana bhaanyu ebheghiro ebhichömu. Mbe! Taanyi hëënë kubha, Taata waanyu uno anyi Mwishaaro naghuköra ghokera ghayo? Mahëënë nakobhaha Akörö Ahörëëru bhano bhakomusabha!”

1 Abhakorinto 4:7

Ibheere, n‑niwe, uno aghuköriri kubha mokoro ghokera owonde? Taanyi Eryobha niryo rekoheere ebheghiro bhyose bhino onyi nabhyo? Aribha nuhaabhuru, ngwake okwihacha kinya bhuno tuhaabhuru?

1 Yohana 4:10

Bhuno nibho obhosiighi, taanyi kubha niitu ꞉tooresiighiri Eryobha, amare iryo niryo ꞉reetosiighiri itu. Nikyo ꞉reemotomiri Omoona waache, abhe amaruusi gha ghosinchu kubha aruusi amasari ghiito na ghotutëmëërani ne Eryobha.

Abhaebheeso 1:18

Kurëngʼaana na kubha Eryobha ndebhatooriri korimënya, neghusabha rebhatoori kumënya eriitëngʼërö rino ꞉moosongʼaaniri eriibhagha rino rebhabherekiire. Wiiki motore kumënya obhwame bho ghabho yaache kwo bhatööbhiyu,

Yohana 1:9

Uyo niwe obhwero bho hëënë, nakurëngaareri omooto woose, naare ichiri mo‑se.

Obhohunyurëru 21:23

Omoghya uyo toonyi na amënda gha bhwero bho ryobha hamu omwëri, gho kubha obhokumi obhokoro bho Waryobha mbokowurëngareri, no Omoona o Ngʼöndu niwe oromore rooche.

2 Abhakorinto 4:6

Eryobha rino ꞉reebhughiri kubha, “Obhwero bhurëngaari mo‑kengʼuuri,” niryo riyo rirëngaariri mo‑metema ghiito, na ghotuköra tumënyë obhokumi bhooche obhokoro bhuno bhokurëngaari mo‑bhosho bho Yesu Kirisito.

Obhohunyurëru 22:5

Mo‑moghya uyo, hataakubha no obhotiko wiiki. Abhaato bhataakubha bharëënda obhwero bho romore hamu bho mu, gho kubha Omutëmi Waryobha naakubha obhwero bhoobho. Nabho abhaato bhayo mbaghukangata emiishe ne emiishe.

Yakobho 1:5

Amare uno aghosuuheru na amangʼiini, nakwëndëru arisabhe Eryobha naryo ndekomuha, gho kubha ndehaabhaha abhaato bhoose, kwo bhosiighi, koru iryo retaanyi na anyaanyi.

Abharuumi 6:23

Omooto wowoose uno anyi omusësë o masari, amareho ghaache n‑oroko ro miishe ghyose. Amare itu, Eryobha ndeghotuha obhuhöru bho miishe ghyose. Obhuhöru bhuyo taanyi amareho, amare n‑atuho ino toghosongʼaana kohetera Kirisito Yesu, Omutëmi wiito.

Yakobho 3:15

Amangʼiini ghanga ghayo, ghataakoru kwo Waryobha, amare n‑amangʼiini amabhe ghano ghakorwera mo‑se, na mo‑chaasughara che bhaato na mo‑Rishambu.

Abhabhiribhi 1:29

Motahaabhuru komokumi Kirisito okwene, amare muhaabhuru koru kunyaakibhu gho ghiri yaache.

Amaköri gha Bhatomu 11:18

Hano Abhayahuuti bhayo bhooghwire ghayo, bhataare na re ghugharokeri. Bhakaritöghösi Eryobha bhakabhugha, “Kana, Eryobha ndebhaheere abhaato bha matöngö aghande omweya o ghotuukuunera amasari ghaabho, kubha bhabhönë obhuhöru bho miishe ghyose!”

Amaköri gha Bhatomu 5:31

Rekamoghongi na komuha omweya gho komotoora eribhaara reeche re kwiro, abhe Omukangati no Omotoori. Eryobha ꞉ndiiköriri hangʼu kubha retukörë itu Abhiisiraeri totighe inkongʼorimu amasari ghiito, twabhëru.

Yohana 3:3

Yesu akamugharokeri akabhugha, “Mahëënë ˆneghakobhoorera, taanyi‑ho omooto uno aghotora ghusöha mo‑bhutëmi bho Ryobha aribha atibhwiru mara e kabhere.”

1 Timotewo 6:16

Eryobha eryene chiri niryo retaaghoku, ndikeere mo‑bhwero bhuno omooto taaghotora kobhwishukerera. Wiiki taanyi‑ho omooto uno arerooche, koru uno aghotora korerighi. Iryo resongʼaane asooko na changuru emiishe ghyose. Hawubhaabha.