Tiito 1:15 - Eriiraghano Eriihë

¹⁵ Abhaato bhayo mbakweghi kubha, mbeenyi‑ho ebheghiro bheghonchu. Amare eni nebhugha kubha, mo‑bhaato bhano bhaanyi na akörö yeero ambërë e Ryobha, ebheghiro bhyose mbemusuru. Abhaato abhaghonchu na bhano bhataanyi abhakumi, ebheghiro bhyose m‑bheghonchu, gho kubha amiihëëbhö ghaabho na amënda ghaabho, ngiichwire obhoghonchu.

Tiito 1:15 Referans Kwoze

Abharuumi 14:14

Kurëngʼaana na ameeghi gha Mutëmi Yesu, nyeeche kwo bhuhëënë kubha, ghetaanyi‑ho ekiinyakurë ghyokyose egheghonchu. Amare aribha omooto akorighi ekiinyakurë nyarebhe n‑gheghonchu, hayo niho ekiinyakurë kiyo gheekubha gheghonchu ghokooche.

Abharuumi 14:20

Otasari emeremo ghe Ryobha gho kurë ekiinyakurë ghyokyose kino okwënda. Mahëënë, ebhiinyakurë bhyose mbeghwisherereru koreebhu, amare n‑kobhe kurë egheghiro ghyokyose kino gheghotora komuköra omooto akörë amasari.

1 Abhakorinto 10:23

Abhaato abhande ghate yaanyu mbakobhugha kubha, “Ntwishereriiru ghuköra ebheghiro bhyose bhino tookwënda.” Amare eni nebhugha kubha, taanyi bhyose bhino bheenyi no obhwëra ghokwito. Nangabha mokobhugha kubha, “Ntwishereriiru ghuköra ebheghiro bhyose bhino tookwënda.” Amare eni nekobhugha kubha, taanyi ebheghiro bhyose bhino bheghusakeri obhokumi bhwito bhuköngʼëri.

Mataayo 15:18

Amare ghyokyose kino gheekoru mo‑monu o mooto, ngekoru mo‑körö yaache, nikyo ghekomuköra omooto kubha moghonchu.

Abharuumi 14:23

Amare, wowoose uno anyi na ahaho ighoro e kiinyakurë kino akurë, uyo naghoteneru ekiina ne Eryobha, gho kubha omooto uyo naghokumi kubha kiire aghuköra n‑kebhe ambërë e Ryobha. Kinya omooto aghuköra ghyokyose kino ataaghokumi kubha n‑ghichömu, hayo niho aghuköra amasari.

1 Abhakorinto 10:31

Mbe, ibheere, ghyokyose kino moghuköra, ibhe n‑kurë, hamu kunyo, hande koru ghuköra egheghiro ghyokyose, mukörë gho ghiri e koreghongi Eryobha.

Amaköri gha Bhatomu 10:15

Eriiraka riyo reramobhoorera wiiki, “Otabhebherekera ebheghiro bhino Eryobha remusiri, kubha m‑bheghonchu.”

1 Abhakorinto 8:7

Amare taanyi abhaato bhoose bhano bhaanyi no obhumënyi bhuyo, gho kubha mbaanyi‑ho abhande bhano ꞉bhaare na chaasughara che ghusëngëra chasanaamu. Koru ibheere, eriibhagha bhaakurë ebhiinyakurë bhino bhiihëriinu mo‑chasanaamu, ebhiinyakurë bhiyo mbekobhaköra bhahiite chasanaamu. Hayo mbakwirighi mo‑metema gheebho kubha mbaghuköra amasari, gho kubha bhataamara bhaköngʼëri mo‑bhokumi.

Abheebhuraaniya 10:22

Mbe, tubhe toraghe ambërë e Ryobha ne emetema myero ghino ghekomokumi kwo bhuhëënë, gho kubha Eryobha ndetomusiri emetema ghiito emebhe gho nchëra e masaahë gha Yesu na ghoghyeghi emebhere ghiito na amanche ameero.

1 Abhakorinto 10:25

Mori kira egheghiro kino gheghoghoru mo‑mitëëra motiikara kobhooribhoori, kubha motanyaaka mo‑metema gheenyu,

1 Timotewo 6:5

wiiki ngaghusari obhoghwani chaasiko choose. Abhaato bhayo mbasarëkiri emitu, bhateeche obhuhëënë. Mbakwihëëbha kubha korisëngëra Eryobha niyo anchëra e kubhöna obhwame.

Abheebhuraaniya 9:14

Amare ibheere amasaahë gha Kirisito ngaanyi na changuru chwee ghokera amasaahë gha chatyenyi chiyo! Gho nchëra e Körö ino enyi e miishe ghyose, iwe ꞉niiruusiri kwo Waryobha kubha amaruusi ghano ghahikeriine. Amasaahë ghaache nigho ghaghotomusa emetema ghiito ighoro e masari ghano ghaghughëri oroko kubha torisëngërë Eryobha rino reenyi ihöru.

Abheebhuraaniya 12:15

Mubhe amiisho kubha ataacha kubha‑ho omooto wowoose uno aghokindu kubhöna aghareeya e Ryobha. Wiiki eriitina re bhosongo retasebhoka rebhanyaaki, reghonchi chaakörö che bhaato bhaaru.