Obhohunyurëru 18:10 - Eriiraghano Eriihë

¹⁰ Mbakwimeerera kurë no omoghya uyo gho ghotiina anyaako yaache. Mbakorera bharabhugha, “Horeera nokorighi, horeera nokorighi omoghya omokoro, Bhabheeri, omoghya uno onyi na changuru! Noteniiru ekiina kwo bhwango chwee!”

Obhohunyurëru 18:10 Referans Kwoze

Obhohunyurëru 18:19

Mbakwihomerera orotu mo‑mitu gheebho, kwërëki kubha mbaanyi na amacheeche. Mbakorera bharabhugha, “Horeera nokorighi, horeera nokorighi omoghya omokoro. Omoghya uyo niwe otuköriri itu bhano toonyi na chameeri twamihe gho ghiri e bhwame bhooche. Amare ibheere omoghya woose oghasireekerera kwo riibhagha isuuhu hangʼu.”

Obhohunyurëru 18:8

Gho ghayo, nakubhöna chanaabhi choose kwo rosiko rumu, chanaabhi che roko, na che riirera na che gheecha. Naghwekibhu no omororo kimu, gho kubha Omutëmi Waryobha uno akomotenera ekiina niwe o bhotoro.”

Obhohunyurëru 14:8

Mbe, marayika owonde akarööbhëra, arabhugha, “ˆOghagho! Omoghya omokoro o Bhabheeri ˆoghagho! Omoghya uno nuköriri abhaato bha matöngö ghoose bhanyo adivaayi yaache, bhakarëëwu na amiigha gha bhutaari bhooche.”

Obhohunyurëru 17:12

“Chahëmbë chiire ikomi chino orooche nchiimeereriire abhatëmi ikomi, bhano bhakeere ghukangata. Bhayo bhoose mbakuhaabhu obhotoro bho ghukangata haghirohamu no oghotyenyi ghuyo, amare kwo riibhagha re sa imu hangʼu.

Obhohunyurëru 11:8

Amahundughu gha abhiibhateri bhayo ngaghusaagha mo‑nchëra e moghya omokoro. Niwe omoghya uno Omutëmi waabho amamburu mo‑musarabha. Omoghya uyo noonyi na atëëmö kinya e moghya o Sotoma na ase e Miisiri.

Obhohunyurëru 16:19

Niho omoghya omokoro o Bhabheeri oghataana ebheteneka bhitato ne emeghya emekoro ghe matöngö gheghasarëka ghyose. Naryo Eryobha reteebhuru omoghya wuure omokoro o Bhabheeri. Rekawuhaamereri onyo koru mo‑ghisënchö ke divaayi e ghukarara kwo bhororo bhooche.

Obhohunyurëru 18:18

Hano bhakorighi eryoki re ghosireekerera kwo moghya uyo, mbakorera kwo riiraka bharabhugha, “Toonyi‑ho omoghya owonde kinya omoghya omokoro uno!”

Obhohunyurëru 18:21

Akamara, akarwera marayika umu uno anyi na changuru, aghaghëgha eriibhohe kinya orobhohe, akarirëkëra mo‑nyancha, akabhugha, “Gho changuru chaaru kinya chino, omoghya omokoro o Bhabheeri nokurëkëru na kobhora inkongʼorimu.