Obhohunyurëru 14:10 - Eriiraghano Eriihë

¹⁰ omooto uyo woose naakunyo adivaayi e bhororo bho Ryobha. Adivaayi iyo n‑indoro kinya amaro ghano ghatasangeriini na amanche. Eryobha eryene ndekomwitoorerera omooto uyo mo‑ghisënchö ke bhororo bhooche, anyo. Eryobha ryose ndekomunyaaki mo‑mororo muhaari chwee ambërë e bhamarayika abhatööbhiyu na ambërë e Moona o Ngʼöndu.

Obhohunyurëru 14:10 Referans Kwoze

Obhohunyurëru 16:19

Niho omoghya omokoro o Bhabheeri oghataana ebheteneka bhitato ne emeghya emekoro ghe matöngö gheghasarëka ghyose. Naryo Eryobha reteebhuru omoghya wuure omokoro o Bhabheeri. Rekawuhaamereri onyo koru mo‑ghisënchö ke divaayi e ghukarara kwo bhororo bhooche.

Obhohunyurëru 20:10

Mbe, Erishambu, rino rebhangʼiiniri, ndekurëkëru mo‑nyancha e mororo muhaari chwee. Hayo niho ahaghiro hano bharëkiire oghotyenyi ghuure no omurööti wuure o bhuröngö. Ibho mbakunyaakibhu iyo obhotiko no omwishe, emiishe ne emiishe.

Obhohunyurëru 19:20

Amare oghotyenyi ghuyo, haghirohamu no omurööti o bhuröngö uno aköriri ebhyërëkërëri ambërë yaache, ꞉mbiimokiibhu ke bhano bhaghööturu mwihë. Gho ghuköra ebhyërëkërëri bheeche bhiyo, omurööti uyo o bhuröngö nangʼiiniri abhaato bhano bhatoriiru ekingʼöchö no oghotyenyi ghuyo na ghusëngëra asanaamu yaache. Bhoose bhabhere ꞉mbaarëkiiru bhaanyi abhahöru mo‑nyancha e mororo muhaari chwee.

Obhohunyurëru 18:6

Kinya abhaköriire abhande, inyu bhoose momukörërë hangʼu hangʼu. Wiiki momukörërë amabhe mara kabhere e ghano abhaköriire abhande. Mwimoki eghisënchö keeche, momotoorere obhororo mara kabhere e bhuno ꞉abhatooriire inyu.

Obhohunyurëru 21:8

Amare abhatiini, na bhano bhataakorekumi Eryobha, na bhano bhakorikarari Eryobha, na abhiiti, na abhataari, na abhaturutumbi, na abhasëngëri bha misambu, na abharöngö, bhayo bhoose ahaghiro haabho n‑anyancha e mororo muhaari chwee. Na ruyo niro oroko ro kabhere.”

Mataayo 25:41

“Niho nekobhabhoorera bhaare bhaanyi okubhökö koone gho kumosi nebhughe, ‘Mondwere hano inyu bhano Eryobha riihiimiri! Moghi mo‑mororo o miishe ghyose uno Eryobha riisëëmiri gho ghiri e Rishambu na bhamarayika bhaache.

Yuuta 1:7

Wiiki, mohiite ghano ꞉ghaabhabhwine abhaato bha meghya ghe Sotoma na Ghomora, na bha meghya ghe haghuhe. Bhayo ꞉mbaaköriri amangʼana ghaare ghaare kinya bhamarayika bhayo ꞉bhaaköriri. Mbaare bharaköra obhutaari na ghutambana amiigha gha mobhere kinya etaakwëndëru na kebhuno ꞉bhaatëëmuru. Ghoteneru ekiina koobho, nkoore ghosireekereru no omororo na kuyo nkubheere eghetuubhaani ghe nchagho e mororo o miishe ghyose kwo bhaato bhoose.

Obhohunyurëru 18:3

Nooghwire gho kubha abhaato bha matöngö ghoose mbanywire adivaayi yaache, mbarëëwuru na amiigha gha bhutaari bhooche, na abhatëmi bha se mbaare bhataariri nawe. Abhasorocha bha mo‑se ꞉mbaamihiri gho ghiri e bhwaru bho bhwame bhooche bhuno bhotaanyi ne ekirëngërë.”

Mataayo 26:39

Aghiishuka ambërë hasuuhu, akiirëkëra haase kebhuuma kubha asabhe Eryobha, akabhugha, “Oo Taata waane, aribha ekubha, neghoghusabha onduuseri eghisënchö kino ke nyaako! Otaacha ghuköra kinya bhuno nekwënda, amare ukörë kinya bhuno okwënda.”

Mataayo 20:22

Yesu aghagharokeri akabhugha, “Moteeche ghano moghusabha. Kana, moghotora kunyaaka kebhuno neeghuye kunyaakibhu?” Bhaghagharokeri bhakabhugha, “Ntoghotora.”

Maariko 8:38

Eriibhagha Omoona o Mooto neghwika na bhamarayika abhatööbhiyu mo‑bhokumi obhokoro bho Taata waane, nekomorigheri chaasoni omooto wowoose uno akondigheri eni chaasoni na ameeghi ghaane kwo riibhagha rino abhaato bhaghuköra amasari na bhataaghotereera Eryobha.”

Amaköri gha Bhatomu 10:22

Bhakamobhoorera, “Ntotomuru no omokoro umu o bhaashirikare, akobherekeru Korineeriyo. Korineeriyo uyo m‑mooto omuhöriicho uno akoryoghwera Eryobha, na ghoghongibhu na Abhayahuuti bhoose. Ibheere marayika omutööbhiyu namobhooriire aghughënëhi awaache, kubha atëghëërërë amangʼana ghano okomobhoorera.”

2 Abhatesaronike 1:7

na ndekobhaweeri inyu bhano mokunyaakibhu, haghirohamu na niitu. Ndeghuköra ghayo hano Omutëmi Yesu akuucha koru Mwishaaro ne emirëngaari ghe mororo, haghirohamu na bhamarayika bhaache bhano bhaanyi na changuru.

Obhohunyurëru 15:7

Umu o bhetyenyi bhiire bhine akabhaha bhamarayika bhayo mohungate kira umu eghetibha ghe sahaabhu kino ghiichwire obhororo bho Ryobha rino reenyi ihöru emiishe ne emiishe.

Obhohunyurëru 19:15

Ekinyamiino ekyeghi nkehaaru mo‑monu waache kubha, ahiche abhaato bha matöngö. Naghoghakangata no obhotoro bhokoro. Iwe niwe ahaatacha chasabhiibhu mo‑gheghiro ghe ghochemitera, kino ghekwërëki obhororo bho Ryobha re Bhotoro Bhoose.

Obhohunyurëru 20:14

Hano ghayo ghasiriri, oroko na nyaari bhekarëkëru mo‑nyancha e mororo. Anyancha iyo e mororo niyo oroko ro kabhere.

Maariko 9:44

Iyo niho chaangʼunyu cheeche chetaaghoku, no omororo waache tookorima.]