Mataayo 2:11 - Eriiraghano Eriihë

¹¹ Mbe, bhaghasöha mo‑nyumba, bhakamorighi omoona haghirohamu na Mariyamu nyina waache, bhakiihiinya mbagha haase, bhakamusëngëra omoona uyo. Bhaghasaasura emerigho gheebho, bhakamoruuseri chaatuho che sahaabhu, ne ebheneeso na manemane.

Mataayo 2:11 Referans Kwoze

Ruuka 2:16

Mbe, bhaaghaye bhwango bhwango, bhakabhöna Mariyamu na Yusubhu, bhakarighi ekengʼwerere, kiraaruru mwitore.

Mataayo 2:2

Bhakabhoori, “Hayi anyi uno ibhwiru Omutëmi o Bhayahuuti? Ntoyerooche anchöta yaache erarwera roghoro, gho ghayo, ntwichiri komusëngëra.”

Obhohunyurëru 19:10

Niho neghagho kebhuuma ambërë e marayika uyo, kubha nemusëngërë. Amare akamboorera akabhugha, “Tigha! Eni woose n‑omutamishi mughëndi waacho neenyi. Nturëngʼiine na abhahiiri bhaacho abharööti, na abhande bhoose bhano bhakoruusi obhwibhateri ighoro e Yesu. Mbe, usëngërë Eryobha eryene chiri! Gho kubha, obhuhëënë bhuno Yesu ërëkiri, nibho bhoghughëri abhaato bhararuusi obhurööti.”

Mataayo 14:33

Mbe, abhaanabheegha bhano ꞉bhaasaaghiri mo‑bhwato, bhakamusëngëra Yesu bhakabhugha, “Mahëënë, iye n‑Omoona o Ryobha onyi!”

Obhohunyurëru 5:8

Hano akiimokiri eghitabhu kiyo, ebhetyenyi bhiire na abhagharuka bhaare bhaaghagho kebhuuma ambërë yaache. Omooto woose naare ne eritingo na ebhetibha bhe sahaabhu bhiichwire ebheneeso. Ebheneeso bhiyo nigho amasabhi gha bhatööbhiyu.

Ruuka 2:38

Kwo riibhagha riyo, Ana akahika hayo ꞉bhaare Simiyooni, na Yusubhu, na Mariyamu no omoona uyo, aghasëëma koreghongi Eryobha. Arabhabhoorera amangʼana gha moona uyo, mo‑bhaato bhayo ꞉bhiitëngʼiire kubha, Eryobha ndeghotoori Yerusareemu.

Mataayo 1:18

Ghano nigho amangʼana gha kwibhoru kwo Yesu Kirisito. Mariyamu nyina Yesu, naare arwachiiru obhuku na Yusubhu. Amare hano bhaare bhakeere komisi haghirohamu, Mariyamu akarighibhu n‑inda anyi kwo bhotoro bho Körö Ahörëëru.

Mataayo 2:10

Hano bharooche anchöta yiire, bhaghachömëru chwee.

Mataayo 12:46

Hano Yesu are akeere arasiikëra ne erikinda re bhaato, kwo riibhagha riyo riyo nyina na bhaömööbhö ꞉mbiichiri na kwimeerera anche, bharëënda ghosiikëra nawe.

Yohana 19:39

Niho Nikoteemu uno eriibhagha rimu aghiire o‑Yesu obhotiko, akaacha na amaghuta gha keneeso ghichömu ghasangeriini na manemane, ngaare chakiiro miröngö etato.