Abheebhuraaniya 4:2 - Eriiraghano Eriihë

² Na niitu nturaghaniiru Angʼana Anchömu kinya bhuno bhasookoro bhiito bhoose ꞉bhooghwire. Amare ibho eriibhagha ꞉bhooghwire amangʼana ghayo, ghatabhatooriri ghyokyose gho kubha bhataaghakumiri.

Abheebhuraaniya 4:2 Referans Kwoze

1 Abhatesaronike 2:13

Gho ghayo, itu ntokoriitabheri Eryobha totaaghotigha naabha, gho kubha hano mutëghëëriire angʼana yaache koru ghokwito, motayiisheriiri kinya angʼana e mooto. Amare kinya angʼana e Ryobha, na hëënë hangʼu keenyi. Angʼana iyo niyo eghuköra emeremo moose e metema gheenyu, inyu bhano momokumiri.

Abheebhuraaniya 11:6

Taanyi‑ho omooto uno aghotora koretegheri Eryobha aribha ataanyi no obhokumi. Omooto woose uno akwënda korisëngëra Eryobha, nakwëndëru ghokumi kubha Eryobha ndeenyi‑ho, na kubha ndekobhaha atuho bhano bhaghwiköngʼi koritabhara.

Abheebhuraaniya 3:12

Inyu abhahiiri bhaane, mubhe miisho kubha ataacha kubhönëka omooto wowoose ghateghate yaanyu uno anyi no omukörö omobhe, uno ataaghokumi, uno akwiyaahura koru kwo Ryobha rino reenyi ihöru.

1 Timotewo 4:8

Nimënyuru kubha, “Kowuhöki omobhere ubhönë changuru nkoonyi no obhwëra bhosuuhu hangʼu. Amare, ghuköra ghano ghakwëndëru ambërë e Ryobha, nkoonyi no obhwëra mo‑ghoose, gho kubha ngoghotuha obhuhöru bho miishe ghyose bhuno Eryobha returaghiire, bhwi ibheere na bhuno bhokuucha.”

Abharuumi 2:25

Oghusaaru koocho ngookubha no obhwëra, erabha oghuköra kinya bhuno emeghiro ghekwërëkërëri. Amare arabha noghusari emeghiro, iye nookubha kinya omooto uno atasaaruru.

Amaköri gha Bhatomu 13:46

Koru hangʼu, Bhawuro na Bharinaabha bhakabhagharokeri Abhayahuuti bhayo kwo bhosubhesubhe bharabhugha, “Angʼana e Ryobha ꞉yëëndiiru imënyu ghokoonyu inyu Abhayahuuti singa. Amare mumööhërëri! Gho kubha moyaangiri, na motirooche kubha mokurëngʼaanera obhuhöru bho miishe ghyose, ntokobhatigha na ghwigharurera abhaato bha matöngö.

Yakobho 1:21

Gho ghayo, mutaane no obhobhe bhoose, haghirohamu na amabhe maaru ghano ghaghashiri. Moyighöötë gho kwinyööhi angʼana ino Eryobha retooriri mo‑metema gheenyu, gho kubha niyo eghotora kobhatoori.

Abheebhuraaniya 4:6

Nangabha bhasookoro bhiito ꞉bhaare a bhambërë kooghu angʼana anchömu e koweera, koru hangʼu bhataatoriri ghusöha ahaghiro hayo gho kubha bhataare bharaghakumi ghano Eryobha reere rerabhugha. Kurëngʼaana na amangʼana ghayo, noonyi‑ho omweya o bhaato abhande ghusöha ahaghiro hayo ha koweera.

1 Abhakorinto 13:3

Wiiki neraruusi obhwame bhoone bhoose na kobhaha abhahabhe, na koru neraruusi omobhere waane kubha weekibhu mo‑mororo, amare aribha ntighöötë obhosiighi, nteekubhöna egheghiro ghyokyose.

1 Bheetero 1:12

Eryobha ndebhahunyuriire abharööti bhayo kubha, amangʼana ghano ꞉bhaare bhararööta, ghataare ghaghaabho abheene, amare n‑gho ghiri yaanyu. Amangʼana ghano ꞉bhaabhughiri, nigho muraghaniiru na abhaato bhano bhabharëëtiire Angʼana Anchömu ighoro e Yesu Kirisito kwo bhotoro bho Akörö Ahörëëru ino etomuru koru Mwishaaro. Amangʼana ghayo, koru bhamarayika mbaghwighomba chwee ghoghamënya.

1 Abhatesaronike 1:5

Ntweche hangʼu gho kubha, hano toore toraraghani Angʼana Anchömu bhowaanyu, totaraghiini kwo mangʼana agheene hangʼu. Amare nturaghiini gho changuru na gho Körö Ahörëëru na kwo bhuhëënë. Inyu mweche bhoheene bhuno toore haghirohamu na niinyu, kubha tobhatoorereri.

Abhagharatiya 3:8

Amandëkö Amatööbhiyu ꞉ngëërëkiri korwera kare kubha, Eryobha ndekobhabhara abhaato bha matöngö kubha abhahëënë ambërë yaache gho ghokumi koobho. Eryobha ꞉ndiikangatiri komuraghaneri Abhurahamu Angʼana Anchömu kubha, “Kohetera ghokoocho, abhaato bha matöngö ghoose mbaghwitabheru.”

Abhagharatiya 4:13

Mweche kubha hayo ekeenyuma, obhubhabharu bhuno neere nabho, nibho ꞉bhuughëriri nekabhöna omweya o kobharaghaneri Angʼana Anchömu.

Amaköri gha Bhatomu 3:26

Mbe, hano Eryobha remwahwire omutamishi waache Yesu, ꞉ndeemotomiri ghokoonyu singa, kubha abhiitabheri gho koruusi mooto woose mo‑mabhe ghaache.”

Abharuumi 3:3

Amare Abhayahuuti abhande bhataare abhahëënë gho ghughööta amangʼana ghaache. Mbe, tobhughe kubha bhuure ꞉bhaare Abhayahuuti bhayo, ꞉mbaaköriri Eryobha ryose retighe kubha ihëënë gho ghuköra amangʼana ghano ꞉reebhughiri?

Abhagharatiya 3:2

Nekwënda kwegha angʼana imu koru ghokoonyu. Kana, mosongʼaaniri Akörö Ahörëëru gho ghughööta emeghiro, ghasi gho ghokumi ghaare mooghwire ighoro e Yesu?