Abhagharatiya 3:11 - Eriiraghano Eriihë

¹¹ Obhuhëënë n‑kubha taanyi‑ho omooto uno akubharu kubha omuhëënë ambërë e Ryobha gho ghughööta emeghiro ghe Musa, gho kubha Amandëkö Amatööbhiyu ngakobhugha, “Uno anyi omuhëënë, nakumanya kwo bhokumi.”

Abhagharatiya 3:11 Referans Kwoze

Abharuumi 1:17

Angʼana Anchömu iyo nekwërëki haheero kinya bhuno Eryobha rekubharera abhaato kubha abhahëënë ambërë yaache. Abhaato mbakubhareru kubha abhahëënë ambërë e Ryobha gho nchëra e ghokumi okwene. N‑kinya bhuno Amandëkö Amatööbhiyu ghakobhugha kubha, “Uno anyi omuhëënë, nakumanya kwo bhokumi.”

Abheebhuraaniya 10:38

Uno anyi omuhëënë, nakumanya kwo bhokumi. Amare aribha aghotigha ghuntambana, eni nteeghuchömëru nawe naabha.”

Abhagharatiya 2:16

Amare itu ntweche kubha, omooto taaghotora kubharu kubha omuhëënë ambërë e Ryobha gho ghughööta emeghiro ghe Musa. Amare n‑gho komokumi Kirisito Yesu omwene chiri, niko ghoghughëri omooto abhe omuhëënë ambërë e Ryobha. Koru itu bhoose, ntomokumiri Kirisito Yesu kubha tubharu abhaato bha hëënë ambërë e Ryobha gho komokumi Kirisito, taanyi gho ghughööta emeghiro ghe Musa. M‑mahëënë kubha taanyi‑ho omooto uno aghotora kubharu kubha muhëënë ambërë e Ryobha gho ghughööta emeghiro ghe Musa.

Obhohunyurëru 5:9

Bhakamwembera Omoona o Ngʼöndu omwembo omuhë uno ore orabhugha, “Iye nokurëngʼaanera kwimoki eghitabhu kiyo, na kunaanura emehuuri gheeche ghe nyaghame, gho kubha iye ꞉noosinchuru. Amasaahë ghaacho, ghakareghorera Eryobha abhaato bha matöngö ghoose, na bha bhighambo bhyose, na abhahiiri bhoose na chaase choose.

Yakobho 3:2

Kwo bhuhëënë, itu bhoose ntohaataasi gho chanchëra haghare haghare. Aribha omooto wowoose ataaghutaasi gho ghosiikëra kooche, iwe n‑omooto uno anchakiine, iwe naghotora kowuhööchërëra omobhere waache woose.

Yakobho 1:27

Amaköri ghano ghakomotegheri Waryobha Taata wiito na ghano ghataanyi ni isörö, nigho ghano, kobhatoori abhaana abhahabhe na abhasino kurëngʼaana na chanyaako cheebho, na gho ghwisacha amasari gha mo‑se ino.