Abhaebheeso 6:12 - Eriiraghano Eriihë

¹² Nekobhugha hangʼu gho kubha, eriihë riito retaanyi ghate yiito na abhaato. Amare ntokurööna ne emisambu ghino gheenyi no obhotoro, ghino gheghukangata ase ino e kengʼuuri, ghyose ghino ngighöötëriire mo‑se ino etaakorighibhu.

Abhaebheeso 6:12 Referans Kwoze

Abhakorosaayi 1:13

Natotooriri koru mo‑bhutëmi bho kengʼuuri, aghatusaami na ghotusöhi mo‑bhutëmi bho Moona waache omosiighani.

2 Abhakorinto 4:4

Angʼana Anchömu timënyuru mo‑bhaato bhano gho kubha, Erishambu rino reenyi omutëmi o se ino, ndehunyiri obhongo bho bhano bhataakomokumi Yesu. ꞉Ndiiköriri hangʼu kubha bhakindu korighi obhwero bho Angʼana Anchömu e bhokumi obhokoro bho Kirisito, uno anyi eghetuubhaani ke Ryobha.

Abhaebheeso 2:2

Eriibhagha riyo moore moratambana amiigha amabhe gha mo‑se ino, mookabha morasooka Erishambu, omutëmi o misambu ghino gheenyi na changuru mwighoro. Iryo niryo ibheere rekobhakangata abhaato bhano bhataakoresooka Eryobha.

Abhakorosaayi 2:15

Gho nchëra e musarabha, Eryobha rekahöka emisambu obhutëmi no obhotoro bhoobho, reghakinda gho chandiryato, reghaghesooki haheero.

Amaköri gha Bhatomu 26:18

gho ghiri obhahunyure amiisho, mbagha bharu mo‑kengʼuuri bhiigharurere obhwero, na bharu mo‑bhukangati bho Rishambu, bhiigharurere Eryobha. Hangʼu niho bhakwabhëru amasari ghaabho, mbaakubha haghirohamu na abhande bhoose bhano bhamusuru gho nchëra e ghonkumi.’

Abhaebheeso 1:21

Iyo Kirisito naghukangata ighoro e bhakangati bhoose bha bhotoro na changuru. Naghukangata ighoro e manga ghoose gha bhukangati bhuno bhoghutaru hano mo‑se na mo‑se ino ekuucha.

Abharuumi 8:38

Nyeeche kwo bhuhëënë kubha ghetaanyi‑ho egheghiro kino gheghotora ghotutaani no obhosiighi bho Ryobha ghokwito. Taanyi oroko hamu obhuhöru, taanyi bhamarayika hamu bhano bhaanyi na changuru Mwishaaro. Koru amangʼana ghano ghakorwera kwi ibheere hamu mo‑riibhagha rino rekuucha, taanyi kwo bhano bhaanyi no obhotoro,

Abhaebheeso 3:10

Nebhatoorere haheero kubha, gho nchëra e riikanisa, abhakangati na bhano bhaanyi no obhotoro mo‑se ino etaakorighibhu, bhamënyë amangʼiini gha Ryobha ghano ghaanyi gha manga maaru.

Abhaebheeso 1:3

Mbe, reghongibhu Eryobha, Taata o Mutëmi wiito Yesu Kirisito! Iryo niryo retoheere orubhango ro mo‑chaakörö ro manga maaru mo‑se ino etaakorighibhu gho nchëra e ghughöötana kwito na Kirisito.

1 Abhakorinto 15:50

Abhahiiri bhaane, kino nekwënda kobhugha n‑kubha, emebhere ghiito ghe chaanyama na amasaahë ghetaaghotora ghusöha mo‑bhutëmi bho Ryobha, wiiki emebhere ghino gheghusarëka ghetaaghotora kubha no obhuhöru bho miishe ghyose.

1 Bheetero 3:22

Iwe naghiire Mwishaaro, ni ibheere niikeere okubhökö gho kwiro kwo Waryobha, ahaghiro ha sooko chwee. Naghukangata bhamarayika, ne ebhetyenyi bhyose bhe bhotoro, na bhe changuru.

Abheebhuraaniya 12:1

Mbe, gho kubha ntoonyi ne erikinda ikoro re bhiibhateri bhano bhatwinariiri, tobheruusi bhyose bhino bheghotuhööchërëra, wiiki toghatighe amasari ghano ghaghotoghwishi. Wiiki toyaare ahönta ino Eryobha retooriri ambërë yiito kwo bhoghumereri.

Yohana 14:30

Nteeghotora ghosiikëra na niinyu amangʼana maaru, gho kubha omokoro o se ino akaacha. Amare taanyi no obhotoro ighoro yaane.

Yohana 12:31

Ibheere ˆrekahika eriibhagha re Ryobha ghotenera ekiina ase ino. Ibheere ˆrekahika eriibhagha re Eryobha kuhëëbha Erishambu mo‑bhukangati bho se ino.

Yohana 16:11

Naakubha arabhëërëki kubha Eryobha ndekuucha kobhatenera ekiina gho kubha, ndimariri ghotenera ekiina Erishambu omokoro o se ino.

Ruuka 22:53

Chaasiko choose neere haghirohamu na niinyu Mwisëngërö, amare motangöötiri! Amare ibheere, rino niryo eriibhagha reenyu, re bhukangati bho Rishambu.”

Ruuka 13:24

“Mwiköngʼi bhoose ghusöha gho kohetera ekehita egheghute. ˆNekabhabhoorera kubha, abhaato bhaaru mbaghusaki ghusöha, amare bhataaghotora.

2 Timotewo 2:5

Koru omooto uno aghokinda mo‑riibhina, taaghotora kuhaabhu atuho e bhokindi, araanga ghotereera amëërëkërëri gha riibhina.

Mataayo 16:17

Yesu akamobhoorera akabhugha, “Oo Simiyooni mwërëëti o Yoona, witabhiiru gho kubha taanyi‑ho omooto uno akohunyuriire rino, amare n‑Taata waane uno anyi Mwishaaro.

Abheebhuraaniya 12:4

Nangabha moghwiköngʼi ghoghakinda amasari, koru hangʼu mokeere kurööna eriihë mbagha kohikera ghwita amasaahë ghaanyu.

Abhagharatiya 1:16

kohunyurera kinya Omoona waache anyi. ꞉Ndiiköriri hangʼu kubha niraghani Angʼana Anchömu ighoro e Moona waache mo‑bhaato bha matöngö. Eni ntitabhiire omooto wowoose o kundaghereri kino neghuköra.

Maariko 4:19

amare, ibho mbaghwituuri chwee ighoro e mangʼana gha riimanya rino. Wiiki mbaghwighomba kubha no obhwame bhwaru haghirohamu na ghutabhara ebheghiro ebhichömu ebhende. Ghayo ngahabhandereri angʼana, nayo ekindu ghuköra emeremo.

2 Abhakorinto 11:14

Mo‑ghayo totaakoroghoora, gho kubha Erishambu eryene ndehiiköri kinya marayika o bhwero.