Abhabhiribhi 2:15 - Eriiraghano Eriihë

¹⁵ Gho ghayo, mubhe abhaana bha Ryobha bhano bhaghörörökiri na bhataanyi ni isörö. Wiiki mubhe abhaato bhano bhataaghughambu kobhe ghateghate e bhaato bhi ibheere bhano bhiichwire amabhe no obhuröngö. Ghateghate e bhaato bhayo, inyu morighibhu kinya emirëngaari ghino ghe kurëngaari mo‑se.

Abhabhiribhi 2:15 Referans Kwoze

1 Bheetero 2:12

Mobhakörërë amachömu abhaato bhano bhataryeche Eryobha, kubha eriibhagha bhaakubha bharabhabhiihera amangʼana amabhe, bharighi amaköri ghaanyu amachömu. Niho bhaghotora koreghongi Eryobha gho ghiri yaanyu, mo‑rosiko ro kuucha kooche.

Mataayo 5:45

Mbe, hayo mookubha abhaana bha Taata waanyu uno anyi Mwishaaro, gho kubha iwe nahaarëngaari eryobha kwo bhaato abhahëënë na abhabhe. Wiiki, nahaatëëki ambura kwo bhaghöröröku haghirohamu na bhano bhaanyi na amasari.

1 Abhatesaronike 5:23

Eryobha eryene niryo reghotuha omurëmbë, rebhamuse inyu mo‑ghoose. Reghechonge emetema gheenyu no obhuhöru bhoonyu ne emebhere gheenyu, kubha mubhe motaanyi ni isörö mbagha kohikera eriibhagha re kuucha Omutëmi wiito Yesu Kirisito.

2 Bheetero 3:14

Gho ghayo abhasiighani bhaane, eriibhagha moghughanya orosiko ruure, mukörë ghwiköngʼi araacha kuucha abhönë moonyi no omukörö mwero motaanyi ne eriisari ambërë e Ryobha, na mubhe no omurëmbë.

1 Abhakorinto 1:8

Iryo ndekobhaköngʼi mbagha mo‑ntenero kubha motaacha kubha ni isörö, orosiko ruure Omutëmi wiito Yesu Kirisito akuucha ghotenera ekiina abhaato.

Tiito 2:10

Wiiki bhatabha abhiibhi, amare bhabhe abhahëënë inkongʼorimu, kubha emeremo gheebho ghyose, ghighëri abhande bharutu na ameeghi gha Waryobha Omotoori wiito.

1 Bheetero 2:9

Amare inyu n‑orwibhoro orwahöru, na abhachaama bha ghitëmi, na abhaato abhatööbhiyu, na abhaato bha Ryobha eryene, kubha muraghani amaköri amakoro gha Ryobha. Iryo ndebhabherekiire koru mo‑kengʼuuri, moghi mo‑bhwero bhooche obhokoro bho koroghoori.

Mataayo 5:48

Mbe, mubhe bhaghöröröku kinya bhuure Taata waanyu uno anyi Mwishaaro anyi mughöröröku.

1 Timotewo 3:10

Bhayo wiiki, nekwëndëru bhasakibhu singa. Bhararighibhu kubha bhataanyi ni isörö, niho bhakörë emeremo ghiyo.

1 Timotewo 3:2

Mbe, asikoofu uyo, abhe omooto uno ataanyi ni isörö. Abhe no omukari umu hangʼu, na abhe ne ekirëngërë, wiiki abhe uno anyi na amangʼiini. Abhe omooto uno aghosooku, na abhe omooto uno asiighiri ghughënëhi abhaato, na uno eche kweghi abhaato angʼana e Ryobha.

Abhabhiribhi 1:10

kubha mubhönë ghoghiishereri ghaare ghaanyi gha hëënë. Hayo niho mookubha bheero, na motaanyi ni isörö mbagha orosiko ruure Kirisito aghugharuka.

Abhaebheeso 5:27

꞉Nëëndiri ibhönërë eriikanisa eritööbhiyu, rino retaanyi ne eriisari koru obhoghonchu bhobhoose.

Abharuumi 16:19

Abhaato bhoose mbooghwire kebhuno mokomosooka Omutëmi Yesu. Angʼana iyo neghontegheri chwee. Koru hangʼu, nekwënda mubhe na amangʼiini chwee gho ghuköra amangʼana amachömu, na motabha ni isörö ryoryose gho ghuköra amabhe.

Amaköri gha Bhatomu 2:40

Bheetero akëëndërëra kobhabhoorera abhaato bhayo amangʼana aghande maaru gha kobhashaangʼi. Akabhakumereri arabhugha, “Musabhe Eryobha rebhatoori, retaacha kobhatenera ekiina haghirohamu na abhaato bha rwibhoro runo orobhe!”

Mataayo 10:16

“Ibheere mutëghëërëra, ˆnekabhatoma kinya changʼöndu ghateghate e chasuuche. Mbe, mubhe na amangʼiini ghe nchöka, wiiki mubhe bhahörëëru ghe sarari.

Abheebhuraaniya 7:26

Omuchaama Omokoro anga uyo nakwëndëru chwee ghokwito gho kubha iwe m‑Mutööbhiyu, na taanyi ni isörö, wiiki taaköriri amasari ghoghoose ghaare. Eryobha ndemwahwire koru mo‑bhaköri bha masari, rekamotiiri ghuye Mwishaaro.

Tiito 2:15

Mbe, ubhe oreeghi amangʼana ghayo ghoose. Wishereriiru kobhaköngʼi na kobhatöngëra abhaato kwo bhotoro bhoose. Gho ghayo, omooto wowoose ataghutaraaha.

Tiito 1:6

Omugharuka o riikanisa, nakwëndëru abhe omooto uno ataanyi ni isörö ryoryose. Abhe omosubhe o mukari umu hangʼu, na abhaana bhaache bhabhe abhakumi, bhatabha abhatiriighanu hamu bhano bhataanyi na asooko.

1 Timotewo 5:20

Amare abhagharuka bhano bhakwëndërëra ghuköra amasari, obhahiinye ambërë e bhaato bhoose, kubha abhande bhatiine.

Amaköri gha Bhatomu 20:30

Wiiki koru ghate yaanyu inyu bheene, mbakorwera‑mu abhaato bhano bhakobhugha amangʼana ghano ghataanyi gha bhuhëënë gho kobhangʼiina abhaanabheegha, kubha bhabhatambane ibho.

Yohana 5:35

Yohana Omubhatisaachi naare kinya oromore runo rohaaka na komoreka mo‑kengʼuuri, na niinyu muchömiiru no obhwero bhuyo kwo riibhagha isuuhu.

Ruuka 6:35

“Amare inyu, mobhasiighe abhabhisa bhaanyu, mobhatoori, mobhahë asiire, motiitëngʼëra kubha mbakobhagharokeri. Moraköra hangʼu niho mokubhöna atuho inkoro, na kubha abhaana bha hëënë bha Waryobha Omokoro o Bhyose. Gho kubha, Eryobha ndeghusakëri koru bhaare bhataakoriitabheri, na abhaköri bha mabhe.

Mataayo 17:17

Yesu akabhagharokeri akabhugha, “Inyu orwibhoro runo rotaaghokumi, runo rorumeeriri! Neghwikara na niinyu na kobhaghumereri mbagha nyingake? Momurëëtë hano omoona uyo!”

Obhohunyurëru 3:9

Mutëghëërërë! Nekobharëëtëra inyu abhaghëndi bha Rishambu, bhano bhakwibherekera n‑Abhayahuuti, abhaato bha Ryobha, amare tiyaanyi, m‑bharöngö. Mbe, bhano nekobhaköra bhaache bhabhahighamere. Niho bhakumënya kubha, nebhasiighiri inyu.

1 Timotewo 5:14

Ibheere, nekwënda abhasino bhano bhakeere abhasubhaati, bhabhe bharakwiru, bhiibhore abhaana na kumööhi chaaka cheebho, kubha abhabhisa bhiito bhatighe ghotughamba kobhe.

1 Timotewo 5:7

Amangʼana ghayo ghoose, obhabhoorere abhakumi, kubha bhataacha ghutëmu amasörö.

2 Abhakorinto 6:17

Gho ghayo Omutëmi Waryobha ꞉naabhughiri wiiki kubha, “Moru ghateghate yaabho, mwiyaahukani nabho. Motaturi egheghiro egheghonchu, niho na neeni nekobhaghënëhi.

Ruuka 1:6

Bhayo bhabhere mbaare bhahëënë ambërë e Mutëmi Waryobha, na mbaare bharasooka emeghiro gheeche ghyose, na bhataaghitaasiri.

Abhabhiribhi 3:6

Wiiki ꞉niiköngʼiri chwee ghuköra ghano ꞉niituuriri kubha nigho Eryobha resiighiri. Kiyo nikyo ꞉ghiinköriri nekabharëëtëra Abhakirisito anyaako. Kwo mangʼana gha hëënë ighoro e meghiro, eni nteere ni isörö ryoryose.

Obhohunyurëru 2:5

Mohiite ghano ꞉muuköriri eriibhagha moore mokeere ghotigha obhosiighi bhoonyu. Moramara motuukuune, mukörë ghaare ꞉muuköriri eriibhagha riire. Moraanga ghotuukuuna, nekuucha na koruusi egheghiro keenyu ghe ghotoorera‑mu oromore.