2 Timotewo 3:8 - Eriiraghano Eriihë

⁸ Abhaato bhayo, bhaghusöha mo‑chaaka che bhaato, mbakwanga obhuhëënë, kinya Yaane na Yambure, bhano ꞉bhaashangʼaaniri na Musa. Abhaato bhayo obhongo bhoobho m‑bhobhe, mbatighiri korekumi Eryobha.

2 Timotewo 3:8 Referans Kwoze

Obhohunyurëru 2:20

Amare neenyi na angʼana imu ino ekunyaaki ighoro yaanyu. Inyu motaaghoghanga amangʼana gha mukari wuure Yesebheeri. Iwe nakwibherekera kubha m‑murööti, amare tiyaanyi. Mokomwisherereri angʼiine abhatamishi bhaane gho kobheeghi bhakörë obhutaari, na kurë ebhiinyakurë bhino ꞉bhiihëriinu amaruusi gho sanaamu.

1 Timotewo 6:5

wiiki ngaghusari obhoghwani chaasiko choose. Abhaato bhayo mbasarëkiri emitu, bhateeche obhuhëënë. Mbakwihëëbha kubha korisëngëra Eryobha niyo anchëra e kubhöna obhwame.

Tiito 1:16

Abheene mbakobhugha kubha mbeeche Eryobha, amare amaköri ghaabho ngakwërëki kubha, mbakoryanga. Bhayo mbaghukarari, na m‑bhiigharori, na bhataakurëngʼaanera kwo ngʼana yoyoose anchömu.

1 Yohana 4:1

Abhasiighani bhaane, motamokumi omooto woose uno akobhugha naanyi na Akörö e Ryobha. Amare mumööhi bhoheene aribha omooto uyo naghukangatu na Akörö e Ryobha hamu tiyaanyi. Nekwëndëru mumööhi gho kubha abharööti bhaaru bha bhuröngö mbarweriire mo‑se.

2 Bheetero 2:14

Amiisho ghaabho ngiichwire obhutaari no obhwighombi bhoobho bho ghuköra amasari bhotaanyi na antenero. Mbaghotebhitebhi abhaato bhano bhataamara bhaköngʼëri mo‑bhokumi kwo mangʼana bhaghöötë amaköri ghaabho amabhe. Emetema gheebho nginariri ghwighomba obhwame. Abhaato bhayo mbiihiimuru!

2 Timotewo 4:15

Na niiye woose wikabhaahe nawe, gho kubha naare araanga chwee ameeghi ghiito.

Abhaebheeso 4:14

Mbe, totaakubha wiiki ke bhaana, torarëkëru na kohiru ino na ino no obhukama bho meeghi ghano ghakurëëtu na abhaato abhabhiihi, kubha bhatongʼiine tutambane chanchëra cheebho.

1 Timotewo 4:2

Ameeghi ghayo, ngaakubha ghareeghibhu na chaghughuuti, wiiki m‑bharöngö bhano amiihëëbhö gha chaakörö cheebho ghateeche amachömu na amabhe, n‑kinya gheekuru no omororo.

1 Timotewo 1:19

Gho ghayo, ughöötërërë obhokumi na kubha no omotema omuchömu. Abhaato abhande bhatatereeriri ghuköra ghaare bheeche kubha n‑gha hëënë, ghayo ngabhaköriri bhasari obhokumi bhoobho.

Abharuumi 16:18

Abhaato kinya bhayo bhataakomuhökëri Kirisito, Omutëmi wiito, amare mbaghukörëra chanda cheebho abheene. Mbaghosiikëra amangʼana amachömu gha ghotegheri, amare bharangʼiina abhakumi bhano bhakeere bhataamara bhaköngʼëri mo‑bhokumi.

Obhohunyurëru 2:6

Amare neenyi‑ho angʼana ayende ino muköriri bhoheene. Murëghiri amaköri amabhe gha Abhanikoraayi ghano bhaghuköra. Ghayo, koru eni woose negharëghiri chwee.

1 Yohana 2:18

Abhaana bhaane abhasiighani, eriibhagha re ntenero ndehikiri! Mooghwire kubha omobhisa o Kirisito nakuucha, na koru ibheere abhabhisa bhaaru bha Kirisito mbamariri kuucha. Kiyo nikyo gheghughëri toramënya kubha, ntoonyi mo‑riibhagha re ntenero.

Tiito 1:10

ˆNeghakobhoorera hangʼu, gho kubha hayo Kireete mbaanyi‑ho abhaato bhaaru bhano bhataanyi na asooko, mbaghosiikëra amangʼana ghano ghataanyi no obhwëra, wiiki m‑bhabhiihi, abhamu m‑bhano bhahënëriire emeghiro ghe Kiyahuuti. Abhaato bhayo otabhiisherereri kweghi,

Abharuumi 1:28

Mbe, gho kubha abhaato mbaangiri korimënya Eryobha, ryose ndebhatighiri bhabhe bharatambana amiihëëbhö ghaabho ghano ghakobharumeeri. Ibheere mbaghuköra amangʼana ghano ghataakurëngʼaanera ghuköru.

Amaköri gha Bhatomu 15:24

Ntooghwire kubha abhaato abhamu koru bhowiito mbabhabhooriire amangʼana gha kobhanyaaki, mbagha bhaghaghëri emetema gheenyu gheekabha na ahaho. Amare bhayo bhaköriri ghayo, taanyi itu ꞉toobhatomiri.