2 Timotewo 1:10 - Eriiraghano Eriihë

¹⁰ Amare ibheere, ndyërëkiri aghareeya yaache ghokwito, gho kuucha gho Kirisito Yesu Omotoori wiito. Iwe nakindiri changuru che roko, na nëërëkiri obhuhöru bho miishe ghyose gho nchëra e Ngʼana Anchömu.

2 Timotewo 1:10 Referans Kwoze

1 Yohana 1:2

Ibheere obhuhöru bhuyo mbohikeriine, itu tokabhorighi. Ibheere ntokobhabhoorera obhuhëënë na kobharaghaneri angʼana ighoro e uyo anyi obhuhöru bho miishe ghyose. Iwe naare o‑Taata Waryobha, akëërëkibhu ghokwito.

Abharuumi 16:26

na kohetera mo‑Mandëkö Amatööbhiyu gha abharööti, angʼana iyo nimënyuru kwo bhaato bha amatöngö ghoose mo‑se. Eryobha re miishe ghyose niryo rihatëkiri angʼana iyo iraghanibhu mo‑bhaato bhoose, kubha bhayo bhoose bhatore komokumi na komosooka Omutëmi Yesu.

2 Bheetero 3:18

Amare mwëndërërë ghokora mo‑ghareeya na gho komumënya Omutëmi no Omotoori wiito Yesu Kirisito. Aghongibhu, ibheere ne emiishe ghyose! Hawubhaabha.

Tiito 2:11

Ubhe oreeghi amangʼana ghayo ghoose, gho kubha Eryobha ndyërëkiri aghareeya yaache, gho kurëëta obhotoori mo‑bhaato bhoose.

1 Abhakorinto 15:26

Omobhisa uno akorumusera ghosireekereru n‑oroko.

Abharuumi 2:7

Ndekobhaha obhuhöru bho miishe ghyose abhaato bhano bhaghwiköngʼi ghuköra amachömu, gho kubha mbaghutabhara aghongo, na asooko no obhuhöru bhuno bhotaanyi na antenero.

2 Timotewo 1:1

Anyaarubha ino neyandëkiri eni Bhawuro. Eni netomuru kwo mënda gha Ryobha kubha omotomu o Kirisito Yesu, kubha niraghani angʼana e bhuhöru. Eryobha ꞉ndiiraghiri kubha, obhuhöru bhuyo mbokubhönëka gho komokumi Kirisito Yesu.

Abhaebheeso 1:9

Iryo ndehikeriini ghaare reere kwënda gho nchëra e Yesu Kirisito. ꞉Ndiiköriri hangʼu gho kubha, nibhu ꞉reesiighiri retumënyi amangʼana ghaache ghano reere rebhisiri.

Yohana 14:6

Yesu akamugharokeri akabhugha, “Eni n‑anchëra, no obhuhëënë, no obhuhöru. Taanyi‑ho uno aghotora kuucha o‑Taata aribha atahetiire ghokoone.

Obhohunyurëru 22:17

Akörö e Ryobha no omokwiru mbakomobherekera Omutëmi bharabhugha, “Nuuche!” Na abhaato bhoose bhano bhakooghu amangʼana ghayo bhabhughe, “Nuuche!” Wowoose uno anyi na anyööta, uno akwënda amanche, ache anyo amanche gha bhuhöru bhoowa.

Obhohunyurëru 22:14

Ngʼoni abhaato bhano bhakohura chandachana cheebho, kubha bhiisherereru ghusöha omoghya uyo omuhë kohetera ekehita keeche na kurë amakorobhese gha mote o kobhaha abhaato obhuhöru.

Obhohunyurëru 18:1

Hano ghayo ghahetiri, nekarëkëra amiisho nekarighi marayika owonde ariika koru Mwishaaro. Naare no obhotoro bhokoro, no obhokumi bhooche obhokoro bhokarëngaari ase yoose.

Obhohunyurëru 2:7

Uno anyi na amatu atëghëërërë amangʼana ghano Akörö Ahörëëru eghoghabhoorera amakanisa. Omooto wowoose uno aghokinda amasaki, nekomwisherereri kurë amakorobhese gha mote o kobhaha abhaato obhuhöru. Omote uyo noonyi Mwishaaro mo‑kinyaweera ke Ryobha.’”

2 Bheetero 3:2

Nekwënda mohiite amangʼana ghano ꞉ghaaghamburu kare na abharööti abhatööbhiyu, no omoghiro o Mutëmi no Omotoori uno abhatomu bhaache ꞉bhaabharëëtiire.

2 Bheetero 2:20

Abhaato bhano bhamariri kungʼösa obhoghonchu bho se ino, bhakamënya bhoheene Omutëmi no Omotoori wiito Yesu Kirisito, bharaghöötu wiiki na ghokindu no obhoghonchu, antenero e riimanya reebho ndeekubha ibhe chwee ghokera e rimbërë.

2 Bheetero 1:11

Gho ghuköra hangʼu, moghughënëhu bhoheene mo‑bhutëmi bho miishe ghyose bho Mutëmi no Omotoori wiito Yesu Kirisito.

2 Bheetero 1:3

Eryobha kohetera mo‑bhotoro bhooche, ndetoheere amangʼana ghoose ghano tookwënda, kubha tubhe no obhuhöru, na tukörë ghano ghakwëndëru ambërë yaache. Ndetoheere ghayo gho nchëra e korimënya rino atobherekiire gho ghiri e bhokumi obhokoro no obhuhöriicho bhooche eryene.

Abheebhuraaniya 10:32

Amare mohiite chaasiko chiire ꞉muusëëmiri komokumi Kirisito. Nangabha moore morabhöna anyaako inkoro, koru hangʼu moore moraghumereri anyaako iyo.

Tiito 3:4

Niho Eryobha, Omotoori wiito, reghatwërëki obhuhöriicho no obhosiighi bhooche, reghatotoori.

Tiito 2:13

Tughöötë amangʼana ghano, toraghanya na ghwitëngʼëra orosiko ruure oruchömu ro ghugharuka kwo Kirisito Yesu. Orosiko ruyo nakorighibhu mo‑bhokumi bhooche obhokoro. Iwe niwe Eryobha riito Eriikoro no Omotoori wiito.

2 Abhatesaronike 2:8

Hayo niho Omwigharurani uyo akorighibhu, amare Omutëmi Yesu hano akuucha, nakomwita no omwika koru mo‑monu waache. Wiiki nakomosireekereri kwo murëngaari o kuucha kooche.

Abhaebheeso 1:18

Kurëngʼaana na kubha Eryobha ndebhatooriri korimënya, neghusabha rebhatoori kumënya eriitëngʼërö rino ꞉moosongʼaaniri eriibhagha rino rebhabherekiire. Wiiki motore kumënya obhwame bho ghabho yaache kwo bhatööbhiyu,

Abhagharatiya 5:4

Aribha moghwitëngʼëra mokubharu kubha abhahëënë ambërë e Ryobha gho ghughööta emeghiro, mumënyë kubha mwiyahwire gho Kirisito, na moonyi kurë na aghareeya e Ryobha.

2 Abhakorinto 5:4

Eriibhagha tokeere toonyi ne emebhere ghino ghenga kinya n‑ekebhuru, ntokubhabhara gho ghiri e ghokeyu mo‑maaru. Taanyi kubha ntokwënda koruusi emebhere ghino gheeghoku, amare kino tookwënda n‑kobheeku emebhere ghino ghetaaghoku, kubha emebhere ghino gheeghoku ghemeru na ghino ghetaaghoku.

1 Abhakorinto 4:5

Ibheere, motighe ghotenera ekiina abhaato eriibhagha reeche rekeere kohika, mughanye mbagha orosiko runo Omutëmi Yesu akuucha. Iwe niwe akobhetoora haheero ebheghiro bhyose bhino bhebhisuru mo‑kengʼuuri na kwërëki bhino bheenyi mo‑metema ghe bhaato. Niho omooto woose akubhöna aghongo ino emurëngʼaaniire, koru kwo Waryobha.

Abharuumi 6:6

Ntweche kubha eriimanya riito re kare ꞉ndiimamburu haghirohamu na Kirisito mo‑musarabha, kubha changuru che masari chetatukangata wiiki, na ghotuköra tubhe abhasësë bha masari.

Abharuumi 3:31

Ibheere kana, hano tokuhënërëra komokumi Yesu, niko kobhugha kubha emeghiro ghe Musa ghetaanyi no obhwëra? Tiyaanyi! Amare toramokumi Yesu, niho tookubha tohikeriini ghoose ghano emeghiro ghe Musa ghyërëkëriiri.

Amaköri gha Bhatomu 13:23

“Mo‑rwibhoro ro Tawuti nimu Eryobha ꞉reebharëëtiire Abhiisiraeri Omotoori Yesu, kinya bhuure ꞉reebharaghiire.

Amaköri gha Bhatomu 5:31

Rekamoghongi na komuha omweya gho komotoora eribhaara reeche re kwiro, abhe Omukangati no Omotoori. Eryobha ꞉ndiiköriri hangʼu kubha retukörë itu Abhiisiraeri totighe inkongʼorimu amasari ghiito, twabhëru.

Yohana 20:31

Amare ebhyërëkërëri bhino bheenyi mo‑ghitabhu kino bhyandëkuru motore ghokumi kubha Yesu niwe Kirisito, Omoona o Ryobha, na gho komokumi mubhönë obhuhöru bho miishe ghyose kwo riina reeche.

Yohana 5:40

Amare inyu motaakwënda kuucha ghokoone, kubha mubhönë obhuhöru bho miishe ghyose.

Yohana 4:42

Bhakamobhoorera omukari uyo bhakabhugha, “Mbagha ibheere ntomokumiri omooto uno taanyi gho ghiri e ghano ꞉otobhooriire agheene. Amare ibheere ntokomokumi gho kubha ntooghwire itu bheene ghano abhughiri. Wiiki ntumënyiri kubha, mahëënë niwe Omotoori o se.”

Yohana 1:9

Uyo niwe obhwero bho hëënë, nakurëngaareri omooto woose, naare ichiri mo‑se.

Ruuka 13:7

Ibheere, akamobhoorera omutamishi o moghondo uyo akabhugha, ‘Mööhi! Ibheere neenyi ne emeeka etato neraacha ghutabhara amakorobhese mo‑mote o motiini, koru ntiimara mböna ghyokyose! Mbe, nowonunge, otiikara orasari eriiröbhë bhoowa.’

Ruuka 11:36

Aribha omobhere waacho woose noonyi ne emirëngaari, toonyi ne ekengʼuuri ghyokyose, nokurëngaari, kinya oromore runo roghokomorekera.”

Ruuka 2:11

Reero ino mo‑moghya o Tawuti, Omotoori waanyu niibhwiru. Omotoori uyo niwe Kirisito Omutëmi.

1 Yohana 4:14

Itu ntorooche na ntokobhabhoorera obhuhëënë kubha, Taata Waryobha ꞉naamotomiri Omoona waache mo‑se ino, kubha abhe Omotoori o bhaato bhoose.

2 Bheetero 1:1

Anyaarubha ino neyandëkiri eni Simiyooni Bheetero, omutamishi no omotomu o Yesu Kirisito. ˆNekabhaandëkëra inyu bhano mobhwine obhokumi bhuno bho riighori ikoro, kinya bhuno itu bhoose ꞉toobhwine gho kohetera obhuhëënë bho Ryobha no Omotoori wiito Yesu Kirisito.

Obhohunyurëru 20:14

Hano ghayo ghasiriri, oroko na nyaari bhekarëkëru mo‑nyancha e mororo. Anyancha iyo e mororo niyo oroko ro kabhere.

2 Timotewo 1:8

Mbe, otarighi chaasoni ghughambera angʼana ighoro e Mutëmi wiito Yesu Kirisito, hamu korighi chaasoni gho kubha eni neenyi mo‑kibhöhö gho ghiri yaache. Amare, oghumereri mo‑nyaako haghirohamu na neeni, gho ghiri e Ngʼana Anchömu, kurëngʼaana na changuru chino okuhaabhu ne Eryobha.

2 Timotewo 4:1

ˆNeghakuraghereri ghano ambërë e Ryobha na ambërë e Kirisito Yesu, uno aghotenera ekiina abhaato abhahöru na bhano bhakuure. Kirisito Yesu niwe akuucha ghukangata ase ino anyi Omutëmi.

2 Timotewo 4:8

Ibheere neghughanya okwene kuhaabhu atuho e bhuhëënë. Omutëmi Yesu, omoteni o kiina uno anyi obhuhëënë, nakuuha atuho orosiko ruure ro ghugharuka kooche. Atuho iyo nteekuhaabhu eni mwene, amare na abhande bhoose bhano bhaghwitëngʼëra kwo miigha ghugharuka kooche.