2 Bheetero 1:5 - Eriiraghano Eriihë

⁵ Gho ghayo, mubhe moriiköngʼi kubha obhokumi bhoonyu bhwëngëru obhuchömu, no obhuchömu bhuyo bhwëngëru obhumënyi.

2 Bheetero 1:5 Referans Kwoze

Abhabhiribhi 4:8

Antenero, bhahiiri bhaane, motoore amiihëëbhö ghaanyu ghoose ighoro e mangʼana ghano ghaanyi gha hëënë, na amangʼana gha sooko, na amangʼana ghano ghataamara ghusangerani no obhobhe, na amangʼana gha ghotegheri, ghoose ghano ghaanyi no obhuchömu. Bhorabha-ho obhuhöriicho bhobhoose, bhorabha-ho obhokumi obhuchömu bhobhoose, moghiihëëbhërë amangʼana ghayo.

2 Bheetero 3:18

Amare mwëndërërë ghokora mo‑ghareeya na gho komumënya Omutëmi no Omotoori wiito Yesu Kirisito. Aghongibhu, ibheere ne emiishe ghyose! Hawubhaabha.

2 Bheetero 1:10

Mbe, abhahiiri bhaane, mwiköngʼi chwee kwërëki kubha Eryobha ndebhabherekiire na kobhaahura. Aribha eriimanya reenyu hangʼu reenyi, motaakobhora naabha.

Abheebhuraaniya 6:11

Neghwighomba chwee kubha, omooto woose iköngʼi ghuköra amangʼana ghayo mbagha mo‑ntenero kubha moghasongʼaane ghaare ghoose moghwitëngʼëra.

Abhabhiribhi 1:9

Mbe, nekobhasabhera kwo Ryobha kubha, obhosiighi bhoonyu bhwëndërërë kwiyëngëra chwee, wiiki mubhe na amangʼiini no obhongo,

2 Bheetero 3:14

Gho ghayo abhasiighani bhaane, eriibhagha moghughanya orosiko ruure, mukörë ghwiköngʼi araacha kuucha abhönë moonyi no omukörö mwero motaanyi ne eriisari ambërë e Ryobha, na mubhe no omurëmbë.

Abheebhuraaniya 11:6

Taanyi‑ho omooto uno aghotora koretegheri Eryobha aribha ataanyi no obhokumi. Omooto woose uno akwënda korisëngëra Eryobha, nakwëndëru ghokumi kubha Eryobha ndeenyi‑ho, na kubha ndekobhaha atuho bhano bhaghwiköngʼi koritabhara.

Abhaebheeso 5:17

Gho ghayo, motabha bhaghëëghë, amare mwiköngʼi ghoghamënya amiigha gha Mutëmi Yesu.

Abhabhiribhi 2:12

Mbe, abhasiighani bhaane, hano neere bhowaanyu, moore moraresooka Eryobha chaasiko choose. Hangʼu hangʼu, koru ibheere hano neenyi kurë na niinyu mwiköngʼi ghuköra ghano gharëngʼaaniire mo‑bhaato bhano bhatooriibhu ne Eryobha. Mukörë ghayo gho ghosingisa kuno ghokorwera gho koretiina Eryobha.

Abhakorosaayi 2:3

Moose yaache neebhisuru agharinga yoose e mangʼiini no obhumënyi.

Yohana 6:27

Motakörëra emeremo ebhiinyakurë bhino bheghusarëka, amare mubhe moraköra gho ghiri e kubhöna ebhiinyakurë bhino bhetaaghusarëka, bhino bhekobhaha abhaato obhuhöru bho miishe ghyose. Eni Omoona o Mooto nekobhaha abhaato ebhiinyakurë bhiyo, gho kubha Taata Waryobha naaheere obhotoro ghuköra ghayo.”

Ruuka 24:21

Itu ntoore toriitëngʼëra kubha iwe niwe akobhatingori Abhiisiraeri. Ibheere, korwera hayo ghakörëkiine, reero n‑orosiko ro ghatato.

Abhakorosaayi 1:9

Gho ghiri iyo ntokobhasabhera chaasiko choose korwera riibhagha rino tooghwire amangʼana ghaanyu. Ntoghusabha kubha Eryobha rebhahë obhumënyi bhoose gho ghaare iryo rekwënda, na amangʼiini ghoose no obhumënyi koru mo‑Körö Ahörëëru.

1 Bheetero 3:7

Inyu abhasubhe, mwikare na abhakari bhaanyu kwo bhongo, moramënya kubha bhataanyi ni inguru kinya inyu. Mobhatughe gho kobhasooka, gho kubha ibho bhoose mbaghughabha aghareeya e bhuhöru. Gho ghayo abhasubhe, mukörë hangʼu, kubha amasabhi ghaanyu ghatahööchërëru.

Abheebhuraaniya 12:15

Mubhe amiisho kubha ataacha kubha‑ho omooto wowoose uno aghokindu kubhöna aghareeya e Ryobha. Wiiki eriitina re bhosongo retasebhoka rebhanyaaki, reghonchi chaakörö che bhaato bhaaru.

1 Abhakorinto 14:20

Abhahiiri bhaane, motiihëëbha kinya abhaana, amare mubhe moriihëëbha kinya abhantomonkoro. Amare ighoro e mabhe, mubhe kinya ebhengʼwerere.

Ruuka 16:26

Ghokera ghayo, ghate yiito na niinyu, hatooruru rirooma ikoro chwee. Ndetooruru kubha, bhaare bhakwënda koru ino kuucha ghokoonyu, bhatatora korekera, na bhaare bhakwënda koru iyo kuucha ino, bhatatora.’

2 Bheetero 1:11

Gho ghuköra hangʼu, moghughënëhu bhoheene mo‑bhutëmi bho miishe ghyose bho Mutëmi no Omotoori wiito Yesu Kirisito.