1 Yohana 3:22 - Eriiraghano Eriihë

²² Wiiki ghyokyose kino tokorisabha ndeghotuha, gho kubha ntoghoghesooka emeghiro gheeche na ghuköra ghano ghakorichömëri.

1 Yohana 3:22 Referans Kwoze

Yohana 15:7

Aribha moghwikara moose yaane na amangʼana ghaane ghiikare moose yaanyu, mbe, musabhe Taata ghyokyose kino mokwënda, na niinyu mokuhaabhu.

Yohana 9:31

Ntweche kubha Eryobha retahooghu amasabhi gha bhaköri bha masari, amare ndehooghu omooto wowoose wuure akoresooka na ghuköra amiigha ghaache.

Mataayo 21:22

Aribha moonyi no obhokumi, ghyokyose kino moghusabha Eryobha, ndekobhaha.”

1 Yohana 5:14

Itu ntoonyi no obhosubhesubhe ambërë e Ryobha, gho kubha ntweche kubha ndeghotooghu aribha torarisabha ghyokyose kiire kurëngʼaana na amënda ghaache.

Maariko 11:24

Gho hayo ˆnekabhabhoorera kubha, hano moghusabha ghyokyose, mubhe no obhokumi kubha mokebhwine, na moghokibhöna.

Yohana 14:13

Aribha morasabha egheghiro ghyokyose kwo riina reene, eni neghuköra kebhuno moghusabha. Gho nchëra iyo, nekwërëki obhokumi obhokoro bho Taata kebhuno bhoonyi gho kohetera eni, Omoona.

Yakobho 1:5

Amare uno aghosuuheru na amangʼiini, nakwëndëru arisabhe Eryobha naryo ndekomuha, gho kubha ndehaabhaha abhaato bhoose, kwo bhosiighi, koru iryo retaanyi na anyaanyi.

Yohana 8:29

Uno antomiri naanyi haghirohamu na neeni. Tantighiri eni mwene, gho kubha eriibhagha ryose neghoghaköra ghano ghakomotegheri.”

Abhakorosaayi 1:10

Niho moghotora kumanya kebhuno Omutëmi Yesu akwënda, na komotegheri mo‑mangʼana ghoose. Eriimanya reenyu ndekomotegheri kwo meremo gheenyu emichömu, wiiki moghwiköngʼi korimënya Eryobha.

Yakobho 5:16

Mbe, mubhe moratuukuunerana amasari ghaanyu na ghusabherana kwo Waryobha, kubha mubhönë kuhöribhu amabhabharu ghaanyu. Amasabhi gha mooto omuhëënë ngaanyi no obhotoro bho ghuköra amangʼana amarito.

Abheebhuraaniya 13:21

Eryobha rebhakörë mohikeerane kwo mangʼana amachömu ghoose, mukörë ghano ghaanyi amiigha ghaache. Wiiki abhahë obhotoro bho ghuköra ghano ghakomuchömëri gho ghughöötana na Yesu Kirisito. Iwe aghongibhu emiishe ne emiishe. Hawubhaabha.

Yohana 6:29

Yesu akabhagharokeri akabhugha, “Emeremo ghino Eryobha rekwënda mukörë nighyo ghino, ghonkumi eni, uno netomuru naryo.”

Abhabhiribhi 4:18

Ibheere, ebheghiro bhyose bhiire montomaniiri gho kohetera Ebhabhurotiito, nebhebhwine. Mbiishiri kumara amënda ghaane ghoose, wiiki mbeghokera koru bhino neere kwënda. Obhotoorereri bhuyo mbobheere kinya eriruusi re keneeso ghichömu, amaruusi ghano ghaghwisherereru na ghakoretegheri Eryobha.

Amaköri gha Bhatomu 17:30

Hayo kare, abhaato mbaare bharaköra ghayo kwo bhuraghaanu, Eryobha ndeere reriiköri kinya retaaghogharighi, amare ibheere, ndekobhabhoorera abhaato bhoose bha ahaghiro hoose kubha bhatuukuune.

Yohana 15:10

Aribha moraghööta amaraghereri ghaane, mokwëndërëra ghwikara mo‑bhosiighi bhoone, kinya bhuure eni nighöötiri amaraghereri gha Taata waane na ghwikara mo‑bhosiighi bhooche.

Mataayo 17:5

Hano Bheetero are akeere arasiikëra, mööhi, rekaacha erishaaro rerarëngaari na kobhakundekeri. Bhakamara bhakooghu eriiraka koru Mwishaaro riyo rerabhugha, “Uno n‑Omoona waane omosiighani, neghuchömëru nawe, momutëghëërërë!”

Amaköri gha Bhatomu 20:21

Neere nerabhabhoorera Abhayahuuti haghirohamu na abhaato bha matöngö kubha bhatuukuunere amasari ghaabho kwo Waryobha, wiiki bhamokumi Omutëmi wiito Yesu Kirisito.

Yakobho 4:3

Hano mokorisabha motaakubhöna gho kubha mokorisabha gho nchëra ambe, kubha mubhönë kino mokwënda kwo miighombo ghaanyu amabhe.

1 Yohana 2:3

Torasooka emeghiro ghe Ryobha, niho tookubha no obhuhëënë kubha ntomweche.