1 Yohana 2:17 - Eriiraghano Eriihë

¹⁷ Ase haghirohamu na amiigha ghaache amabhe, mbekoheta. Amare wowoose uno aghuköra amënda gha Ryobha, naakubha no obhuhöru bho miishe ghyose.

1 Yohana 2:17 Referans Kwoze

Mataayo 24:35

Erishaaro na ase mbekoheta, amare amangʼana ghaane ghataakoheta naabha.

Abharuumi 12:2

Moteegha chaasughara che bhaato bha mo‑se ino, amare motighe Eryobha righarure emetema gheenyu, kubha mubhe na amiihëëbhö amahë. Hayo niho mokwegha kumënya kebhuno Eryobha rekwënda mukörë. Mokumënya n‑amangʼana ghaahë ghano ghaanyi amachömu, na ghano ghakoretegheri, wiiki na ghano ghahikeriine.

1 Abhakorinto 7:31

Abhaato bhano bhakunyaaka na amangʼana gha mo‑se ino, bhabhe kinya bhataakunyaakera bhobhe amangʼana ghayo, gho kubha ase ino kinya tokoyerighi ibheere, nekoheta.

1 Bheetero 4:2

Gho nchëra iyo, eriimanya reeche ryose rino risaaghiri, nakumanya kurëngʼaana na bhuno Eryobha rekwënda, taanyi gho ghutambana amiigha gha bhaato.

Abheebhuraaniya 10:36

Mokwëndëru mubhe moraghumereri kubha eriibhagha mookubha moraköra ghano Eryobha rekwënda, mubhönë kiire Eryobha ꞉reebharaghiire kobhaha.

Maariko 3:35

Gho kubha omooto wowoose uno aghuköra ghano ghaanyi amiigha gha Eryobha, uyo niwe omwito na niwe yiima.”

1 Bheetero 1:5

Eryobha ndekobhachonga inyu gho changuru cheeche, gho nchëra e komokumi Yesu Kirisito. Moghochongu mbagha hano mokubhöna obhotoori bhuno bhokorighibhu mo‑chaasiko che ntenero.

1 Abhatesaronike 4:3

Eryobha ndekwënda mubhe abhatööbhiyu, motighe ghuköra obhutaari.

Yohana 4:14

Amare omooto aranyo amanche ghano nekomuha eni, taakooghu anyööta emiishe ghyose. Amanche ghano nekomuha eni ngaakubha kinya ekerika ke manche moose yaache, ghataakooma naabha, ngaakubha gharamuha obhuhöru bho miishe ghyose.”

Mataayo 7:21

“Taanyi omooto woose uno akomboorera, ‘Oo Omutëmi, oo Omutëmi,’ uno aghusöha mo‑bhutëmi bho Mwishaaro. Amare omooto uno aghuköra amiigha gha Taata waane uno anyi Mwishaaro, uyo, niwe aghusöha.

Yakobho 4:14

Inyu moteeche kebhuno eriimanya reenyu reekubha tabhoori! Obhuhöru bhoonyu n‑ghento ke? Nekobhugha hangʼu gho kubha, inyu n‑kinya omooki uno okorighibhu kwo riibhagha isuuhu hano okumara obhora.

Yohana 6:58

Mbe, eni n‑ekiinyakurë kino ghiikiri koru Mwishaaro, ghetanga kino bhasookoro bhaanyu ꞉bhaariire bhaaghaku. Amare omooto wowoose uno akurë ekiinyakurë kino, naakubha no obhuhöru bho miishe ghyose.”

Mataayo 21:31

Kana, mo‑bhabhere bhayo, n‑niwe uno aköriri kinya bhuno ishe waache ꞉ëndiri?” Bhaghagharokeri bhakabhugha, “Wuure o mumbërë.” Niho Yesu akabhabhoorera akabhugha, “Mahëënë ˆnekabhabhoorera, abhatöbhi bha righööti na abhasöngörëëri mbaghukangata ghusöha mo‑bhutëmi bho Ryobha.

1 Abhatesaronike 5:18

Mwitabheri Eryobha mo‑ghoose, gho kubha ghayo nigho iryo rekwënda mubhe moraköra kinya bhuure Kirisito Yesu ꞉aköriri.

Abhakorosaayi 4:12

Ebhaabhura, omutamishi o Yesu Kirisito, no omooto o bhowaanyu, nakobhakëëri. Eriibhagha ryaru naghwiköngʼi kobhasabhera inyu kubha muköngʼëri, na muköngʼë mo‑chaakörö na kubha bhasubhesubhe gho ghoose ghano Eryobha rekwënda.

Abhakorosaayi 1:9

Gho ghiri iyo ntokobhasabhera chaasiko choose korwera riibhagha rino tooghwire amangʼana ghaanyu. Ntoghusabha kubha Eryobha rebhahë obhumënyi bhoose gho ghaare iryo rekwënda, na amangʼiini ghoose no obhumënyi koru mo‑Körö Ahörëëru.

Yohana 7:17

Omooto wowoose uno akwënda ghuköra amiigha gha Ryobha, nakumënya kubha ameeghi ghano gharuure kwo Waryobha, na kubha nteeghosiikëra amangʼana ghaane eni omwene.