1 Timotewo 6:16 - Eriiraghano Eriihë

¹⁶ Eryobha eryene chiri niryo retaaghoku, ndikeere mo‑bhwero bhuno omooto taaghotora kobhwishukerera. Wiiki taanyi‑ho omooto uno arerooche, koru uno aghotora korerighi. Iryo resongʼaane asooko na changuru emiishe ghyose. Hawubhaabha.

1 Timotewo 6:16 Referans Kwoze

1 Timotewo 1:17

Eryobha niryo Omutëmi o miishe ghyose, retaaghoku, koru retaakorighibhu, na retaanyi‑ho erende kinya iryo. Eryobha resongʼaane asooko na ghoghongibhu, emiishe ne emiishe. Hawubhaabha.

Yohana 1:18

Taanyi‑ho omooto wowoose uno arerooche Eryobha. Amare n‑Omoona omwene chiri, uno anyi Eryobha, wiiki naanyi haghirohamu na Taata Waryobha, niwe atohunyuriire Eryobha kinya reenyi.

1 Yohana 1:5

Angʼana ino ꞉tooghwire o‑Yesu, niyo tokobharaghaneri, kubha Eryobha no obhwero, retaanyi ne ekengʼuuri ghyokyose moose yaache.

Abhakorosaayi 1:15

Kirisito n‑eghetuubhaani ke Ryobha, rino retaakorighibhu, na niwe omutange o bheghiro bhyose bhino ꞉bhiitëëmuru.

Yohana 6:46

Taanyi‑ho uno amorooche Waryobha Taata, nanyinga eni mwene uno neruure ghokooche.

Obhohunyurëru 22:5

Mo‑moghya uyo, hataakubha no obhotiko wiiki. Abhaato bhataakubha bharëënda obhwero bho romore hamu bho mu, gho kubha Omutëmi Waryobha naakubha obhwero bhoobho. Nabho abhaato bhayo mbaghukangata emiishe ne emiishe.

Obhohunyurëru 4:11

“Omutëmi wiito ne Eryobha riito, nurëngʼaaniire ghoghongibhu, na ghosooku na kubha no obhotoro bhoose. Iye niiye utëëmiri ebheghiro bhyose, gho ghosiigha koocho ꞉mbiitëëmuru, wiiki niho bheenyi.”

Obhohunyurëru 1:6

Natuköriri itu tubhe obhutëmi bho bhachaama kubha torihökëri Eryobha, Ishe waache. Obhokumi obhokoro no obhotoro bhubhe kwo Yesu, emiishe ne emiishe. Hawubhaabha.

Yuuta 1:25

Iryo niryo Eryobha eryene, rino reenyi Omotoori wiito gho kohetera Yesu Kirisito Omutëmi wiito. Eryobha reghongibhu chwee, gho kubha iryo niryo reenyi no obhokumi obhokoro, na changuru, no obhotoro no obhokoro, korwera kare, ni ibheere, na koru emiishe ghyose. Hawubhaabha.

Abhaebheeso 3:21

Eryobha reghongibhu na abhaato kwo mabhagha ghoose emiishe ne emiishe, kwo bhokoro bhooche bhuno bhokorighibhu mo‑riikanisa reeche na Kirisito Yesu! Hawubhaabha.

Obhohunyurëru 7:12

bharabhugha, “Hawubhaabha! Eryobha riito ndeenyi no obhokumi obhokoro, na ndeenyi na amangʼiini, wiiki ndeenyi no obhotoro na changuru choose, toreghongi, toriitabheri, toresooke, emiishe ne emiishe. Hawubhaabha!”

Abheebhuraaniya 13:8

Yesu Kirisito w‑wuure wuure, icho, na reero ne emiishe ghyose.

Obhohunyurëru 21:3

Nekooghu eriiraka ikoro koru mo‑ghetumbe ghe ghitëmi, rerabhugha, “Mutëghëërëra! Obhwikari bho Ryobha n‑haghirohamu na abhaato. Ndeghuköra obhwikari bhooche haghirohamu na abhaato, nabho mbaakubha abhaato bhaache, naryo ndeekubha Eryobha reebho.

Yohana 14:9

Yesu akamugharokeri akabhugha, “Bhiiribho, nibheere haghirohamu na niinyu chaasiko chino choose, iye okeere kuumënya eni? Omooto wowoose uno andooche eni, namorooche Taata. Mbe, ngwake okomboori kubha, ‘Otwërëki Taata’?

Obhohunyurëru 1:8

Omutëmi Waryobha nakobhugha kubha, “Eni neeni Simoka na Antenero, uno anyi‑ho, na korwera simoka naare‑ho na naakubha‑ho. Eni n‑Eryobha re Bhotoro Bhoose.”

Yohana 8:58

Yesu akabhagharokeri akabhugha, “Mahëënë ˆnekabhabhoorera, eriibhagha Abhurahamu akeere kwibhoru, Eni Niwe.”

Abhabhiribhi 4:20

Waryobha, Taata wiito, aghongibhu emiishe ne emiishe. Hawubhaabha.

Yakobho 1:17

Mumënyë egheghiro kyose eghichömu kino tokuhaabhu, ngekoru Mwishaaro kwo Ryobha omutëëmi o mirëngaari. Iryo retaaghotora ghwigharura kinya ekiriiri kehiigharura.

1 Yohana 1:7

Aribha toghwikara mo‑bhwero, kinya bhuure Eryobha reghwikara, niho tookubha no obhumu itu bheene kwo bheene. Wiiki masaahë gha Moona waache Yesu ngaghotweri amasari ghiito ghoose.

1 Yohana 4:12

Taanyi‑ho wowoose uno arerooche Eryobha naabha. Amare torasiighana, nekwërëki kubha Eryobha ndeenyi no obhumu na niitu, obhosiighi bhooche mbohikeriine ghokwito.