1 Timotewo 5:10 - Eriiraghano Eriihë

¹⁰ Abhe omooto uno aghoghongibhu gho ghiri e maköri kinya ghano, abhe omooto uno arëriri abhaana bhoheene, na uno aghënëhiri abhaghëni, na uno abhahökiiri abhakumi gho kobheeghi amaghoro ghaabho, na uno abhasakiiri bhano bhakunyaakibhu. Gho ghayo, abhe omooto uno iruusiri ghuköra amaköri ghoose amachömu.

1 Timotewo 5:10 Referans Kwoze

1 Timotewo 6:18

Wiiki obhabhoorere bhakörë amachömu, kubha bhabhe abhaame mo‑maköri amachömu. Bhabhe bhararuusi na ghusanga obhwame bhoobho na abhande.

Tiito 3:8

Angʼana iyo n‑e hëënë. Nekwënda iye oyihënërërë, kubha bhoose bhano bhakorekumi Eryobha, bhaghaghöötë na ghwiköngʼi ghuköra amachömu. Amangʼana ghayo m‑machömu, wiiki ngaanyi no obhwëra mo‑bhaato bhoose.

Amaköri gha Bhatomu 9:36

Mo‑moghya o Yoobha naare‑ho omukari umu omughëndi o Yesu, eriina reeche Tabhiita. (Na mo‑ghighambo ghe Keyunaani, eriina riyo n‑Torikaasi, egheteemoro keeche n‑asuma.) Torikaasi uyo naare arabhasakeri abhahabhe, akabha araköra amaköri amachömu.

Tiito 3:1

Ubhe orabhahiiti abhaato kubha, bhabhasooke na kobhoghwera abhakangati na bhano bhaanyi no obhotoro. Bhabhe bhiisëëmiri ghuköra angʼana yoyoose anchömu.

Tiito 2:7

Iye woose, mo‑mangʼana ghaacho ghoose, ubhe eghetuubhaani ghe kweghu gho ghuköra amachömu. Mo‑meeghi ghaacho, wërëki asooko no obhuhëënë.

2 Timotewo 3:17

Gho ghayo, Amandëkö ghayo ngaghuköra abhaato bha Ryobha bhabhe bhiisëëmiri na ghusëëmibhu ghuköra amaköri amachömu.

Abharuumi 12:13

Mobhatoori abhakumi abhaghëndi bhaanyu mo‑mënda ghaabho, wiiki mubhe bhango kobhaghënëhi abhaghëni mo‑chaaka cheenyu.

Ruuka 7:44

Hayo hayo, Yesu akamwishororeri omukari uyo, akamobhoorera Simiyooni akabhugha, “Okamorighi omukari uno? Nisöhiri awaacho, amare tungënëhiri gho kuuha amanche gha ghwishaabhi amaghoro ghaane. Amare iwe, naachachiri amaghoro ghaane na changishori cheeche, na ghoghatareki gho chanchweri cheeche.

Mataayo 5:16

Hangʼu hangʼu ne emirëngaari gheenyu ngekwëndëru ghirëngaari kwo bhaato, kubha bhabhönë korighi amaköri ghaanyu amachömu, bhamoghongi Iso waanyu uno anyi Mwishaaro.

1 Bheetero 2:12

Mobhakörërë amachömu abhaato bhano bhataryeche Eryobha, kubha eriibhagha bhaakubha bharabhabhiihera amangʼana amabhe, bharighi amaköri ghaanyu amachömu. Niho bhaghotora koreghongi Eryobha gho ghiri yaanyu, mo‑rosiko ro kuucha kooche.

Abheebhuraaniya 13:21

Eryobha rebhakörë mohikeerane kwo mangʼana amachömu ghoose, mukörë ghano ghaanyi amiigha ghaache. Wiiki abhahë obhotoro bho ghuköra ghano ghakomuchömëri gho ghughöötana na Yesu Kirisito. Iwe aghongibhu emiishe ne emiishe. Hawubhaabha.

Abheebhuraaniya 13:2

Wiiki mwëndërërë kobhaghënëhi abhaghëni mo‑chaaka cheenyu, gho kubha gho ghuköra hangʼu, abhaato abhande ꞉mbaabhaghënëhiri bhamarayika bha Ryobha ino bhateeche.

Abheebhuraaniya 10:24

Wiiki totereere bhuno toghotoorana omukörö, kubha tosiighane na ghukörërana amachömu itu bheene kwo bheene.

Tiito 3:14

Abhakumi bhaghëndi bhiito nabho, bheeghe ghuköra amachömu, kubha bhabhatoori bhano bhaanyi na amënda gha hëënë. Bharaköra hangʼu, eriimanya reebho ndeekubha no obhwëra.

Tiito 2:14

꞉Niiruusiri gho ghiri yiito, kubha atotoori koru mo‑mabhe ghoose. ꞉Nëëndiri ghotomusa, kubha hëënë tubhe abhaato bhaache, bhano bhiiruusiri ghuköra amachömu.

Ruuka 7:38

Akiimeerera anyuma e Yesu, haghuhe na amaghoro ghaache. Aghasëëma korera, changishori cheeche cheekabha cheramutöönyëra Yesu mo‑maghoro. Akabha aramutareki na chanchweri cheeche, akamutahata amaghoro ghaache, na ghoghahaka amaghuta gha keneeso.

3 Yohana 1:12

Abhaato bhoose mbaghotobhoorera kubha Temetiiriyo m‑mooto muchömu. Eriimanya reeche ndeghotegheri Eryobha, na nekwërëki kubha iwe m‑muhëënë. Koru na niitu, ntokobhugha kubha m‑mooto muchömu, na nweche kubha amangʼana ghiito n‑nga hëënë.

1 Bheetero 4:9

Mubhe abhaato bha ghwighënëhi inyu bheene kwo bheene ino motakwingʼunyerangʼunyera.

2 Timotewo 3:15

Wiiki, weeche Amandëkö Amatööbhiyu koru bhoona. Amandëkö ghayo ngaanyi no obhotoro bho ghokumënyi kubha obhotoori mbokubhönëka gho nchëra e komokumi Kirisito Yesu.

2 Timotewo 2:21

Ibheere, omooto ariiyeri gho ghotigha obhobhe bhuyo bhoose, naakubha kinya egheghiro ghe sooko kino kyahwiru. Naakubha arëngʼaaniire mo‑Mutëmi waache, naakubha isëëmiri mo‑meremo ghyose emichömu.

2 Timotewo 1:5

Wiiki, nekohiita obhokumi bhoocho bho hëënë. Obhokumi bhuyo, naare nabho nyaghokoro Rooyisi na nyako Ewunike. Neenyi no obhuhëënë kubha iye woose noonyi nabho.

1 Timotewo 5:25

Hangʼu hangʼu, amaköri amachömu ngakorighibhu haheero. Na ghaare ghakeere ghabhisuru, ghataaghusaagha hangʼu hangʼu, ngakuucha kubha haheero.

1 Timotewo 2:10

Amare ghwichöcha koobho, kubhe kwo maköri amachömu, kinya bhuno ekwëndëru mo‑bhakari bhano bhiisheriiri korisëngëra Eryobha.

Abhakorosaayi 1:10

Niho moghotora kumanya kebhuno Omutëmi Yesu akwënda, na komotegheri mo‑mangʼana ghoose. Eriimanya reenyu ndekomotegheri kwo meremo gheenyu emichömu, wiiki moghwiköngʼi korimënya Eryobha.

Abhaebheeso 2:10

Itu ne emeremo ghe mabhökö gha Ryobha toonyi. ꞉Ndeetobhombiri bhuhë gho ghotughöötani na Kirisito Yesu kubha tukörë amaköri amachömu, ghano ꞉reetusëëmiire tubhe toraköra.

Amaköri gha Bhatomu 22:12

“Hayo Tamaasiko naare‑ho omooto umu, eriina reeche Ananiya. Ananiya uyo naare ariiköngʼi chwee ghosooka emeghiro ghiito, wiiki naare araghongibhu na Abhayahuuti bhoose bha iyo kubha n‑omooto omuhöriicho.

Amaköri gha Bhatomu 10:22

Bhakamobhoorera, “Ntotomuru no omokoro umu o bhaashirikare, akobherekeru Korineeriyo. Korineeriyo uyo m‑mooto omuhöriicho uno akoryoghwera Eryobha, na ghoghongibhu na Abhayahuuti bhoose. Ibheere marayika omutööbhiyu namobhooriire aghughënëhi awaache, kubha atëghëërërë amangʼana ghano okomobhoorera.”

Amaköri gha Bhatomu 9:39

Mbe, Bheetero aghatanura haghirohamu nabho. Hano bhahikiri Yoobha, bhakamohira mo‑kenyumba kiyo. Hano bhahikiri‑mu, abhasino bhaaru bhakamwinaareri bhararera, bhakamwërëki chandachana, na amaghööti ghano Tabhiita are abhatumiire, eriibhagha are akeere anyi muhöru.

Amaköri gha Bhatomu 6:3

Mbe, bhahiiri bhiito mumööhi ghate yaanyu, mwahure abhaato mohungate bhano bhamënyëkiine na abhaato bhakobhaghamba kubha mbaanyi na asughara inchömu, na amangʼiini na bhano bhiichoriibhu Akörö Ahörëëru. Bhayo nibho tobhatoore mo‑meremo ghino ghe kuhööhi abhaato ebhiinyakurë,

1 Timotewo 5:16

Aribha omukari omokumi anyi na abhasino mo‑bhahiiri bhaache, nakwëndëru abhatoori, kubha eriikanisa retakeyu. Niho, eriikanisa reekubha no omweya o ghotoori abhasino abhande bhano bhataanyi no obhotoorereri.

1 Timotewo 3:7

Wiiki, nakwëndëru abhe omooto uno aghughambu bhoheene koru mo‑bhaato bhano bhataanyi Abhakirisito, ataacha ghutëmu amasörö na ghwighööti mo‑muhëtö o Rishambu.

1 Timotewo 3:2

Mbe, asikoofu uyo, abhe omooto uno ataanyi ni isörö. Abhe no omukari umu hangʼu, na abhe ne ekirëngërë, wiiki abhe uno anyi na amangʼiini. Abhe omooto uno aghosooku, na abhe omooto uno asiighiri ghughënëhi abhaato, na uno eche kweghi abhaato angʼana e Ryobha.

Mataayo 25:17

Hangʼu hangʼu, omusësë uno ahaabhuru chataranta ibhere, aghaye nacho mo‑bhosorocha na kubhöna obhwëra bho chende ibhere.