1 Timotewo 4:16 - Eriiraghano Eriihë

¹⁶ Wëndërërë ghochonga atëëmö yaacho na ameeghi ghaacho. Örëëndërëra ghuköra hangʼu, noghwitoori iye omwene na bhano bhaghoghutëghëërëra.

1 Timotewo 4:16 Referans Kwoze

Tiito 1:9

Abhe araghööta bhoheene angʼana e bhuhëënë ighoro e Yesu Kirisito, kinya eghuru. Hayo niho aghotora ghuköngʼi abhaato mo‑meeghi gha bhuhëënë, na ghokinda bhano bhakwanga ameeghi ghayo.

Tiito 2:7

Iye woose, mo‑mangʼana ghaacho ghoose, ubhe eghetuubhaani ghe kweghu gho ghuköra amachömu. Mo‑meeghi ghaacho, wërëki asooko no obhuhëënë.

2 Timotewo 4:2

Ibheere, ubhe oraraghani Angʼana Anchömu e Ryobha. Ubhe wiisëëmiri ghuköra hangʼu eriibhagha ryoryose, kwo riibhagha rino rirëngʼaaniire na rino retarëngʼaaniire. Ubhe oratöngëra, no orahiinya no orabhaköngʼi abhaato. Ukörë hangʼu, ino oreeghi kwo bhoghumereri bhoose.

Abhaebheeso 4:14

Mbe, totaakubha wiiki ke bhaana, torarëkëru na kohiru ino na ino no obhukama bho meeghi ghano ghakurëëtu na abhaato abhabhiihi, kubha bhatongʼiine tutambane chanchëra cheebho.

Abheebhuraaniya 13:9

Motangʼiinu na ameeghi aghande amahë gha ghighëni, gho kubha changuru che metema gheenyu nchekoru mo‑ghareeya e Ryobha, taanyi mo‑meghiro ghe bhiinyakurë. Emeghiro ghiyo ghetaakobhatoori ghyokyose bhano bhaghoghitambana.

Abheebhuraaniya 12:15

Mubhe amiisho kubha ataacha kubha‑ho omooto wowoose uno aghokindu kubhöna aghareeya e Ryobha. Wiiki eriitina re bhosongo retasebhoka rebhanyaaki, reghonchi chaakörö che bhaato bhaaru.

2 Timotewo 3:14

Amare iye, noonyi no obhuhëënë kubha amangʼana ghano weghuru n‑gha mahëënë. Ibheere uköngʼëri mo‑ghayo, gho kubha weeche bhano ꞉bhaakweghiri.

Ruuka 21:34

“Mubhe miisho, motaacha ghokeyu no obhohobhaaru, no obhurëëbhi, na anyaako e riimanya rino. Wiiki moraanga kubha miisho, orosiko runo ro ntenero ndokobhahikera bhwango na kobhataki!

1 Timotewo 4:6

Orabheeghi abhahiiri bhiito bhoose amangʼana ghayo, niho okubha omutamishi omuhöriicho o Kirisito Yesu. Wiiki nookubha orarëru bhoheene mo‑bhuhëënë bho bhokumi bhwito na mo‑meeghi amachömu ghano iye oghutambana.

1 Timotewo 1:3

Eriibhagha rino ꞉niitanwire ghuye mo‑mukööwa o Maketoniya, ꞉neeghusabhiri wiikare mo‑moghya o Ebheeso, obhashaangʼi abhaato bhano bhakweghi iyo, kubha bhatëëndërëra kweghi ameeghi gha bhuröngö.

Abharuumi 16:17

Ibheere, abhahiiri bhaane, ˆnekabhasasaama kubha, mubhe miisho na abhaato bhano bhakurëëta obhwahukani ghate yaanyu, abhaato bhayo mbakwënda ghusari obhokumi bhoonyu, na mbakwanga ameeghi ghano ꞉mweeghuru. Mwikare kurë nabho, gho kubha ameeghi ghaabho ghataaghuye haghirohamu na ghano ꞉mweeghuru!

2 Timotewo 2:10

Gho ghayo, neghoghumereri ghoose gho ghiri e bhaato bhano bhaahwiru ne Eryobha bhabhe abhaato bhaache. Neghuköra hangʼu, kubha bhoose bhasongʼaane obhotoori kohetera Kirisito Yesu, na ghusanga obhokumi bhooche obhokoro bho emiishe ghyose.

1 Abhakorinto 9:27

Amare nekowunyaaki na kowunari omobhere waane ghoghumereri, kubha ndamara kobharaghaneri abhaato Angʼana Anchömu, eni omwene netaacha kwangu ambërë e Ryobha.

Amaköri gha Bhatomu 6:4

kubha itu twëndërërë korisabha Eryobha, na kweghi abhaato Angʼana yaache.”

Maariko 13:9

“Amare inyu, mubhe miisho chwee. Abhaato mbakobhahira mo‑mabharacha na kobhatëma kobhe mo‑masinaghooghi ghaabho. Mbakobhahira mo‑bhakangati bha se na mo‑bhatëmi, gho kubha monsongʼaaniri eni. Riyo ndeekubha eriibhagha re ghughambera Angʼana Anchömu ghokoobho.

Yakobho 5:20

mumënyë kubha, uno akomugharoki omooto uno ataasiri koru mo‑masari ghaache, naakubha amuhöniri akörö yaache koru mo‑roko, na amasari ghaache maaru ngakwabhëru.

Tiito 2:15

Mbe, ubhe oreeghi amangʼana ghayo ghoose. Wishereriiru kobhaköngʼi na kobhatöngëra abhaato kwo bhotoro bhoose. Gho ghayo, omooto wowoose ataghutaraaha.

Abhakorosaayi 4:17

Momobhoorere Arikibho kubha, ahiki bhoheene emeremo ghino Omutëmi amoheere.

1 Abhakorinto 9:22

Kwo bhano bhataamara bhaköngʼëri mo‑bhokumi, neere kinya uno ataamara aköngʼëri mo‑bhokumi kubha nebhatoori bhamokumi Kirisito. ꞉Niiköriri ghoose kwo bhaato bhoose, kubha gho nchëra yoyoose yiire, nebhatoori nangabha abhamu ghate yaabho.

Abharuumi 11:14

gho nchëra yoyoose yiire, nebhakörë Abhiisiraeri abhaghëndi bhaane bhabhe na amiigha gha kubhöna obhotoori kinya bhuno inyu mobhwine, kubha abhamu ghate yaabho bhatooribhu.

Abharuumi 2:7

Ndekobhaha obhuhöru bho miishe ghyose abhaato bhano bhaghwiköngʼi ghuköra amachömu, gho kubha mbaghutabhara aghongo, na asooko no obhuhöru bhuno bhotaanyi na antenero.

Amaköri gha Bhatomu 26:22

Koru hangʼu, Eryobha ndentooriri mbagha kohikera orosiko runo ro reero. Nikyo ˆgheghaghëri ˆnekiimeerera hano ambërë e bhakoro, na ambërë e bhaato bha haase, neghosiikëra amangʼana ghano ꞉neerooche. Ghataanyi‑ho wiiki amangʼana aghande ghano neghosiikëra ghokera ghaare ꞉ghaasiikiiru na abharööti, na ghano ꞉ghaasiikiiru na Musa, kubha ngakorwera.

Bhiremooni 1:19

Eni Bhawuro, nyandëkiri gho kubhökö koone eni mwene, neghokoreha. Haghirohamu na ghayo nteekwënda ghokohiiti kubha, noonyi na asiire yaane, gho kubha eni nekuraghaniiri Angʼana Anchömu, iye oghatooribhu.

1 Abhatesaronike 2:16

gho kubha mbaghoturëki kobharaghaneri abhaato bha matöngö Angʼana Anchömu. Mbakwënda kubha abhaato bhatatooribhu. Hangʼu hangʼu mbakwëndërëra ghuköra amasari eriibhagha ryose. Amare ibheere obhororo bho Ryobha ˆbhokabhahikera!

1 Abhakorinto 1:21

Neghosiikëra hangʼu, gho kubha, Eryobha kwo mangʼiini ghaache, ꞉ndiihatëkiri kubha abhaato bhataaghotora korimënya gho nchëra e mangʼiini ghaabho abheene. Amare Eryobha ndesiighiri kobhatoori bhano bhakorekumi gho nchëra e ngʼana ino tokuraghani. Angʼana iyo, abhaato bhano bhataryeche Eryobha, mbakoyerighi kubha n‑e ghighëëghë.

1 Timotewo 4:15

Ughöötërërë ghuköra ghayo kwo mukörö waacho woose, kubha abhaato bhoose bharighi bhuyo okwëndërëra mo‑ghayo.