1 Abhakorinto 10:33 - Eriiraghano Eriihë

³³ Mubhe kinya bhuno eni neenyi. Neghwiköngʼi ghuchömëri abhaato bhoose kwo mangʼana ghoose ghano neghuköra. Taanyi kubha neghuköra hangʼu, kubha nibhönë obhwëra eni mwene, amare neghuköra hangʼu kubha abhaato bhaaru bhabhönë obhwëra gho kubhöna obhotoori.

1 Abhakorinto 10:33 Referans Kwoze

Abhagharatiya 1:10

Ibheere, mokwihëëbha kubha neghutabhara ghwisherereru na abhaato? Tiyaanyi, eni neghutabhara ghwisherereru ne Eryobha eryene chiri. Ghasi mokwihëëbha kubha neghutabhara ghuchömëri abhaato? Aribha nengatabhiire kobhachömëri abhaato, ntengabheere omutamishi o Kirisito.

1 Abhakorinto 10:24

Omooto atatereera ghano ghakomusakeri iwe omwene hangʼu, amare atereere na ghano ghaghusakeri abhaghëndi bhaache.

2 Abhakorinto 12:19

Ghasi moghwituuri kubha eriibhagha rino ryose, ntoghwitachura ambërë yaanyu. Amare itu ntoghosiikëra ghano ambërë e Ryobha, gho kubha n‑abhatamishi bha Kirisito toonyi. Abhasiighani bhiito, ghano ghoose ntoghuköra gho ghiri e kobhatoori muköngʼëri mo‑bhokumi.

Abharuumi 11:14

gho nchëra yoyoose yiire, nebhakörë Abhiisiraeri abhaghëndi bhaane bhabhe na amiigha gha kubhöna obhotoori kinya bhuno inyu mobhwine, kubha abhamu ghate yaabho bhatooribhu.

Abharuumi 12:5

Hangʼu nibhu na niitu toonyi. Itu ntoonyi bhaaru, amare ntubheere omobhere umu gho ghughöötana kwito na Kirisito. Mo‑mobhere waache, omooto woose n‑ekyemo ke mughëndi waache.

1 Abhakorinto 13:5

Obhosiighi mbokomuköra omooto abhe arabhasooka abhande, na atabha ariihëëbhëra amangʼana ghaache agheene, hamu ghukarara bhwango, hamu ghotoora amangʼana amabhe ghano omooto aghuköriire mo‑motema waacho.

2 Abhakorinto 12:14

Ibheere neghwisëëmi kuucha bhowaanyu mara e ghatato, amare nteekubha omorigho ghokoonyu. Ntesiighiri ebheghiro bheenyu, amare n‑inyu nekwënda. Neghosiikëra ghayo gho kubha abhaana abhasuuhu bhataakwëndëru ghotindëka ebheghiro kubha bhibhe bhe bhiibhori, amare abhiibhori mbakwëndëru ghotindëka ebheghiro kubha bhibhe bhe bhaana.

Abhabhiribhi 2:21

Abhande bhoose mbaghotereera amangʼana ghaabho agheene, bhataaghotereera ghuköra ghano Kirisito Yesu akwënda.

1 Abhatesaronike 2:16

gho kubha mbaghoturëki kobharaghaneri abhaato bha matöngö Angʼana Anchömu. Mbakwënda kubha abhaato bhatatooribhu. Hangʼu hangʼu mbakwëndërëra ghuköra amasari eriibhagha ryose. Amare ibheere obhororo bho Ryobha ˆbhokabhahikera!