Roma 6:22 - Sura Malelaha

²² Agaiana ide-ide, tekabahamokau hangko i kuasa dosa hai mewalimokau taunana Pue Ala. Itimi au moanti rasi irikamu, alana malelaha tuwomi, hai kahopoana molambikau katuwo maroa hawe i hae-haena.

Roma 6:22 Referans Kwoze

1 Peturu 2:16

Katouana, ikita to Sarani, barapoke napohawi dosa. Lempona, barapoke mampeulai peundeana lalunta au kadake, lawi Nakabahamoke Pue Ala hangko i kuasa dosa. Agaiana, katekabahanta iti inee niporara mobabehi dake. Agina moulamokau peundeana Pue Ala, lawi hawiNa mpuumokau.

Roma 6:18

Mewali, tekabahamokau hangko i kanapohawimi dosa, hai mewalimokau hawina Pue Ala au moula peundeaNa.

Roma 8:2

Lawi anti pohintuwuta hai Kerisitu Yesu, Inao Malelaha moweike katuwo au wou hai mokabahake hangko i kuasa dosa au mopaara kapate.

Yohane 8:32

hai ane topeulaNgku mpuumokau, ina niisa mpuu paturo au tou, alana tekabahakau hangko i karapohawimi.”

Galatia 5:13

Halalu, Nakakiomoke Pue Ala bona tekabahake hangko i Aturana Musa. Agaiana inee tapehangu katekabahanta hangko i atura iti peisamoke tuwo moula peundeana lalunta. Aginari mombepokaahike hai mombetulungike hadua hai hadua.

1 Korintu 7:22

Hawi tuwonta ba bara, himbela peake i peitana Pue Ala. Lawi hadua hawi au nakakio Pue Ala mewali to Sarani, tekabahami hangko i huku dosana anti pohintuwuna hai Pue. Nodo wori, hadua tauna au bara hawi tuwona au nakakio Pue Ala mepoinalai i Pue Yesu, ina mewali hawina Kerisitu.

1 Peturu 1:9

Matanamokau, lawi nihumbami wuana pepoinalaimi, iami tanoanami Nahorema hangko i huku dosami.

Galatia 1:10

Mewali halalu! Ba nipehangu mampopetoiana i manusia anti pololitangku inona? Bara, agaiana mampeinao peana molambi petoia hangko i Pue Ala. Ba niuli node: “Paulu mampeinao pea mopamatana laluna manusia?” Bara kuunde mopamatana laluna manusia, lawi ide iko, hawinana Kerisitu.

Roma 6:14

Ikita, barapoke nakuasai dosa, bara anti pampeulainta Aturana Musa, agaiana anti pampeulainta kabulana laluna Pue Ala.

Galatia 5:22

Agaiana ane naninike Inao Malelaha, ina tongawa wuana i lalu katuwonta, i lalu poantita: mombepokaahike, matana-tanake, tinda lalunta, sabarake, maalusu pololitanta, maroa babehianta; mopabukeike dandita,

Roma 7:4

Nodo wori ikita, halalu: Hangkoia tetaka manike i Aturana Musa. Agaiana ane matemoke hihimbela hai Kerisitu, tebolehimi pohintuwuta hai atura iti. Hai ide-ide, mohintuwumoke hai tohaduana, iami Kerisitu au tuwo hule hangko i kapate. Anti pohintuwuta hai Kerisitu, mobundumoke i Pue Ala.

Roma 6:21

Rasi apami au nihumba hangko i katuwomi au hangkoia iti? Bara mpuu ara! Babehiami au hangkoia nipokaeami. Babehia iti moantikau i kapate au mogaakikau hangko i Pue Ala.

Matiu 25:46

Napahopo Yesu lolitaNa, Nauli, “Ope-ope tauna au kadake iti ina ratendehe i lalu naraka hai rahuku hawe i hae-haena, hai tauna au manoto ina molambihe katuwo maroa au bara mokahopoa.”

Titu 1:1

Sura ide hangko iriko, Paulu, hawina Pue Ala hai surona Yesu Kerisitu. Naangkana Pue Ala mewali suroNa, hai Natuduna mopakaroho pepoinalainda tauna au Napilei. Natudu worina mopaguruahe paturo au tou, lawi ane tapeulai paturo au tou iti, ina mengkoruke i Pue Ala.

Kolose 1:10

bona babehiami ina hintoto hai tauna au moula peundeana Pue, hai bona ope-ope babehiami ina mopamatana laluNa. Ane nodo katuwomi, ina mobabehikau hinangka bago au maroa, hai ina katetetambaia poisami Pue Ala i lalu katuwomi.

Pilipi 4:17

Kuuli nodo, bara anti kamampeinaongku mbuli molambi kabula lalumi. Agaiana peundeaku bona hangko i kamaroana lalumi, katetetambaia pewatina Pue Ala irikamu.

Pilipi 1:11

Mekakaena bona nibabehi liliu apa au manoto anti pobagona Yesu Kerisitu i lalu katuwomi, alana bosa tauna motoia hai mampomahile Pue Ala.

Epesu 5:9

Lawi hangko i kamabaana lalumi, mesupa ope-ope babehia au maroa, au tou hai au manoto.

2 Korintu 3:17

Lawi Pue iami Inao Malelaha. Hai ane Inaona Pue maida i lalunta, ina tekabahake hangko i hinangka kuasa au mogaakike hangko i Pue.

Yohane 15:16

Bara ikamu au mopileiNa. Ikori au mopileikau. Kutudukau mowua; hai wua pobagomi iti bara ina matanta, ina mobundu hawe i hae-haena. Mewali, apa au niperapi i UmaNgku i lalu hangaNgku, batena Naweikau.

Yohane 15:2

Ope-ope daa au tuwo Iriko au bara mowua, Nakadiri. Hai ope-ope daa au tuwo Iriko au mowua, Napakabaa hai Nakadipura bona tetambai powuana.

Yohane 4:36

Tauna au mopahawehe Ngkorana Pue Ala peisa rapandiri nodo tauna au mantuda hai au mepare. Ide-ide masilolongami saronda topepare iti, hai mepongkamohe mogulu wuana. Anti pobagonda, bosa tauna molambi katuwo maroa au bara mokahopoa. Hai kahopoana ina matana-tanahe hihimbela hai tauna au mantuda.

Matiu 19:29

Hema au mopalehi halaluna, inana ba umana, anana ba souna ba bondena lawi meula Iriko, batena molambi hurungina hangatu belana hangko i apa au napalehi, hai molambi wori katuwo maroa au bara mokahopoa.

Matiu 13:43

Agaiana tauna au manoto babehianda, ina mewangkahe nodo alo, i lalu poparentana Pue Ala Umanda. Hema au motalinga, pehadingi maroa!”

Matiu 13:40

Nodo dana ragulu hai rahuwe, nodo wori tauna au kadake ina rahuku i alo pebotusi.

Pampetudungia 7:13

Roo indo, hadua hangko i totosae iti mekune iriko, nauli, “Arahe nuisa tauna au mebadu bula ngkalanga iti? Ba nuisa kahangko iumbanda?”

Yakobu 1:1

Tabea hangko iriko, Yakobu, hawinana Pue Ala hai Pue Yesu Kerisitu. Sura ide kupakatuakau to Isaraeli au hampulo hai rontina au mahawukau i humalele dunia.

Kolose 4:12

Tabea wori hangko i Epafras, hawina Kerisitu Yesu au hambomboeami. Napekakaea liliukau bona maroho peangkami hai manoto pepoinalaimi moula ope-ope peundeana Pue Ala bona datikau masala.

Ibarani 12:14

Hangangaa nipari-pari mohintuwu hai ope-ope tauna. Nipari-pari wori bona malelaha tuwomi, lawi tauna au bara malelaha tuwona bara ina moita Pue.