Roma 15:3 - Sura Malelaha

³ Lawi Kerisitu bara wori mohaoki kamatanaNa haduduaNa. Anti peulaNa i Pue Ala, Ia molambi ngkaia kapari. I lalu Sura Malelaha hangkoia ara lolita au mampololita kana i watana Pue Yesu au manguli, “Ope-ope lolita au mopapakoi Pue Ala, mokanai worina.”

Roma 15:3 Referans Kwoze

Pilipi 2:8

I tempona tuwo mewali manusia i wongko dunia ide, ia mengkaiwoi hai moula hawana Pue Ala, duuna mate rapaku i kau mombehape hihimbela hai tauna au kadake.

Yohane 4:34

Ido hai nauliangaahe Yesu, “PaandeKu, iami mampeulaiNa peundeana Pue Ala au motuduNa, hai moparooNa bago au NaweiNa.

Yohane 6:38

Lawi kamaiNgku hangko i suruga, baraNa mobabehi peundeaKu haduduaNgku. Agaiana maiNa mobabehi peundeana Pue Ala au motuduNa.

Yohane 5:30

Yesu mopaliliu lolitaNa, Nauli, “Iko, baraNa peisa mobabehi apa-apa moula peundeaKu haduduaNgku. Kubotusi hinangkana moula apa au nahawaaNa UmaNgku. PobotusiNgku manoto, lawi baraNa moula peundeaKu haduduaNgku, agaiana moula peaNa peundeana Pue Ala au motuduNa.

2 Korintu 8:9

Barakau kuparentai halalu, lawi niisa mpuu kamahilena ahina Amputa Yesu Kerisitu irikita. Ia pebuku, agaiana anti kamahilena ahiNa irikita, Ia mewali nodo hadua tauna au meahi-ahi tuwona bona anti katuwoNa au meahi-ahi, ikita peisa mewali pebuku. Ia mopaiwoi tuwoNa mewali manusia bona ikita peisa molambi katuwo maroa.

Yohane 8:29

Hai Ia au motuduNa, mamporangai liliuNa. BaraNa Napogiangaa haduduaNgku, lawi Kubabehi liliu apa au mopamatana laluNa.”

Matiu 26:42

Hangko inditi, lao mbulimi mekakae haduduana, Nauli, “UmaNgku, ane kapari ide bara peisa rapakarao hangko Iriko, batena peundeaMuri au mewali.”

Matiu 10:25

Apa au mewali i hadua guru, iti wori au ina mewali i topeguruna. Apa au mewali i hadua tuana, iti wori au ina mewali i hawina. Maroa-roakau, lawi Iko, Ampumi, hai ikamu, topeguruNgku. Mewali, ane rapana Iko rahanga Beelsebul, datunda ope-ope seta, pelumbunami ikamu au meula Iriko. Ina rakakabosai worikau.”

Yohane 15:24

I olonda tauna bosa, Kubabehi tanda kuasa au bara mani rababehi tauna ntanina. Ane kebara Kubabehi nodo, kebarahe masala. Agaiana i karaitana apa au Kubabehi, ihira mokahihi liliuNa, hai UmaNgku rakahihi wori.

Yohane 15:10

Iko mampeulaiNa hawana UmaNgku hai tuwo liliuna i lalu ahiNa. Nodo wori, ane nipeulai hawaNgku, ina tuwo liliukau i lalu ahiNgku.

Matiu 26:39

Roo indo, lao karao haodi, molingkudumi motumpa mekakae, Nauli, “UmaNgku, ane peisa, Nupakaraoa wongkoia kapari au ina morumpaNa ide. Agaiana bara peundeaKu au Kuula; peundeaMuri, Uma.”

Matiu 27:44

Nodo wori topanangka au rapaku i kau hihimbela hai Ia, monganga-ngangahe mopapakoi Yesu.

Pilipi 2:5

Poantita hangangaa nodo poantina Kerisitu Yesu.