Yoonas 3:8 - NABUWWA KEE MALIKWA

⁸ Sahda kee saq inkih qabuudut gactaama. Kulli num baguuk Yalla fan dooqa abaama. Kulli num uma caalat kee uma taama cabaama.

Yoonas 3:8 Referans Kwoze

Yoonas 1:6

Doonik beya num kaal yemeeteeh, annah kaak iyye, «Away mannal xintaah? Ugutay isi yalla kallac. Ku yalli neh xuwaaweh rooci nek catam takkehik» iyye.

Yoonas 1:14

Too waqdi YALLAL weeqen. Iyyeenimih, «YALLAW, a numuk rooci nayyaaqeemih nee maqidin. YALLAW, atu elle faxxe'nnal abteemih sabbatah, nanu a numuy tu nel baahe weehiyya qidneemih nel mabeetin» iyyen.

Daaniyel 4:27

Hay, tonnal malikow, ku maganak anu koh acee fayu oobbey. Dambi lem maabinaay gitah tanim ab. Umaane cabaay, xukkot yan marah xuwaw. Tonnal gaddaliino koo cabe waytam takkeh» kaak iyye.

Yacedkel 33:11

‹Waara YALLAY Mulki lehiyya kinniyooh, inni migaaqal xiibita'mmay, uma taama le num isi uma taamah rabam kaak mafaxa. Woo uma taama cabba heeh mano kaak faxa. Israayil-xayloy, uma taama cabaay, manok raba madooritina› keenik inxic» iyye.

Ermiyaas 18:11

Tonna'mmay taway, Yuuda kee Yarusalaam magaalal yan marak, anu siinik abu waamih malat aniih, sin digaaleyyo siinik iyye keenik inxic. Edde yanin dambiy kulli way abaanahiyyak uduura keenik inxic.

Yasaqya 58:6

«Anu faxa soom siinih warisu waa. Qadaalat-sinni-silsilatay sahda edde tabbixeeni kee sahdak fillal tabbixen koyta sahdâ-fillak kalay edde xukkutan mari currih yanay inxica.

Ermiyaas 25:5

Too nabuwway sin adda amaatuk sugtehiyya siinik inteemih: ‹Uma taama kee qamalliinoy edde taniinihiyyak raaqa. Tahak raqteenik, YALLI sin kee sin kaxxa abbobtih kulli waqdi ikoytah yecee rasul muquk xiinetton› siinik iyyen.

Ermiyaas 26:3

A yab yaabben waqdi, edde sugen uma-taama cabaanam takkeh. Ta yab oobba haan waqdi, edde yanin umaanek raaqen ken tekkek, umaane keenil mabaahaay keenik abeyyo excem keenik maaba.

Ermiyaas 36:3

Yuudâ-mari, anu keenil oobisam faxa bala yaabboonu waan waqdi, away edde yanin dambik yaduureenim takkeh. Oson too dambik yuduureenik, anu kaadu duma aben umaanek qafu keenih abeyyo» kaak iyye.

Ayyuqel 1:14

«Takkeenimiik inki aracal qibaadah gaabowwa 'xicay sooma» 'yaanam inxica. Yuudah abbobti akak macabinay, Yuudâ marah inkih seecaay; Qibaadâ-Qaril sin Dageltal weeqa.